ملكت عرش قلبي "الجزء الثاني من طفله أوقعتني في عشقها"

الفصل الثامن والعشرين و الأخير

اللهم لك الحمد والشكر كما ينبغي لجلال وجهك وعظيم سلطانك 💙💙

نبص على اخر البارت ضروري ياجماعه ♥️

بعد مرور ثلاثة أيام..

رن هاتف جوري برقم غير مسجل لديها وهي تتناول الإفطار مع والديها.. أعطت الهاتف لأخيها مروان؛ فهي لاتجيب على أرقام غريبة..
أجاب مروان على الهاتف.. ليجد أن الخط قد أُغلق بوجهه..
قطب مروان جبينه قائلا باستغراب:
_ هو مجنون ده ولا إيه؟!
ردت جوري قائلة بلامبالاة:
_ مش مهم يا مروان سيبك منه.. تلاقيه حد بيستظرف..
رد إسلام هذه المرة قائلا بغضب:
_ وهو اللي بيستظرف ده ملقاش غير رقمك إنتِ يستظرف ويتصل بيه مش كده؟!
هدأته مريم قائلة:
_ في إيه بس يا إسلام؟! وبعدين هي جوري حبيبة قلبي مالها بس.. وبعدين ممكن يكون حد اتصل غلط.. بطل تفترض بس حاجات غريبه..
رد إسلام قائلا:
_ مش هفترض حاجة يامريم خلاص وبعدين هي جوري حبيبتي مبتخبيش عليا حاجه صح يا جوري؟!
أومأت جوري قائله:
_ والله العظيم أنا ما عارفه الموضوع كبر على مكالمة تليفون ليه؟! وحد قفل السكة في وش مروان.. والله العظيم ما أعرفه..
تنهد مروان قائلا بنفاذ صبر:
_ ما خلاص يا جماعه بقى في إيه؟! إنتوا كبرتوا الموضوع على إن حد رن علي التليفون.. وبعدين خلاص مااتصلش تاني يبقى مفيش حاجة..
أيدته جوري قائلة:
_ أيوه قل لبابي إن مفيش حاجة..
نهض مروان قائلا وهو يقبل رأسها:
_ قوللهم إنتِ بقى..
نظرت إليه جوري بغيظ.. ليقبل هو رأس والدته أيضاً.. أوقفه إسلام قائلا:
_ استنى يا مروان هطلع معاك..
قبل إسلام رأس زوجته وابنته.. ثم تبع مروان إلى الخارج..
جلس إسلام جوار مروان في سيارته بالأمام..
قطب مروان جبينه قائلا بتساؤل:
_ هو حضرتك مش رايح الشركة؟!
ابتسم إليه إسلام قائلا:
_ لا هاجي معاك شركتك النهارده أشوف الشغل عندك ماشي إزاي لو مش هيضايقك يعني..
ضحك مروان قائلا:
_ لا طبعاً حضرتك تنور في أي وقت..
ربت إسلام على كتفه.. لينطلق إسلام بسيارته متجهًا إلى شركته..
وصل مروان وإسلام إلى شركة مروان..
ترجل كلاهما من السيارة.. ذهبا مباشرةً إلى مكتب مروان..
أشار إسلام إلى مروان بأن يترأس مكتبه..ولكن مروان نظر إليه قائلا بحرج:
_ لا طبعاً العفو.. اتفضل حضرتك..
ضحك إسلام قائلا:
_ يابني ده مكتبك إنت.. إنت اللي تقعد عليه.. أنا بقى ضيف المفروض كده تطلبلي فنجان قهوة..
ثم جلس على الكرسي الموجود أمام المكتب.. جلس مروان على الكرسي الذي أمامه.. ثم قال وهو ينظر إليه بامتنان:
_ حضرتك الوحيد اللي آمنت بيا وادتني الفرصة إني أبني نفسي بنفسي..
ربت إسلام على يده قائلا:
_ إنت كنت تستحق الفرصة دي وأنا خليتك تلاقي الطريقة إنك تحصل عليها.. وإنت أخدتها واستغلتها..
ليكمل قائلا بمرح:
_ ها فين فنجان القهوه بتاعي بقى؟!

ذهبت جوري إلى جامعتها برفقة سيلين..
جلستا في الكافتيريا الخاصة بالجامعه.. وضعت سيلين يديها أسفل خدها قائلة بتعب:
_ أنا تعبت أوي ياجوري والله.. ومش من الجامعة بس لا ده سيلا لازم تنزلنا كل يوم نشتري حاجات العروسه ومامي تروح جيبالي معاها كمان اللي هو عشان متنزلش تاني ساعة لما آجي أنا أتجوز.. ومش المشكلة في كده المشكلة إنها عمالة تجيب هدوم لسيلا لو قعدت ٨٠ سنة مش هتلحق تخلصهم كلهم.. أنا مش عارفه دولاب إيه ده بس اللي هيشيلهم..
ضحكت جوري حتى أدمعت عيناها.. لتقول وهي تحاول إلتقاط أنفاسها:
_ يا نهار أبيض ده تجهيز البنات طلع صعب أوي.. طب لما أنا آجي أتجوز هيعملوا فيا كده برضه؟!
ردت سيلين قائلة بيأس:
_ يابنتي وأنا أقعد أوقل لمامي ياحبيبتي بقى فيه أونلاين تشتري اللي أنتِ عايزاه يجيلك لحد عندك مفيش داعي لللف ده والله.. تقولي أبداً مترتاحش غير لما تشتري الحاجه بنفسها وعلى العموم هتتفرجي النهارده..
قطبت جوري جبينها.. لتكمل سيلين قائلة:
_ مامتك النهارده الصبح بدري اتصلت بمامي عشان تسألها على تجهيزات الفرح وكده ولو إحنا محتاجين مساعده.. إحنا النهارده رايحين نشوف الفستان أصلاً بتاع الفرح.. فمامي قالت لطنط مريم تيجي النهارده معانا وأهي تاخد خبرة لجوازك..
تنهدت جوري قائلة:
_ وده طبعاً إجباري مش إختياري لازم آجي..
أَومأت إليها سيلين.. ضربت جوري كفيها ببعضهما.. ثم قالت:
_ يعني سيلا لسه جاية تفتكر إنها هتتجوز ما كان عندهم ٧ سنين خطوبه محضروش نفسهم ليه فيهم؟!
أجابتها سيلين قائلة بحرج:
_ ما هو بصراحة إحنا مكناش متأكدين هما هيتجوزوا ولا لا؟! أنتِ مش شايفة أخوكِ مروان كان بيعاملها إزاي؟!
عصرت جوري بقبضتها ذيل طرحتها.. ثم قالت:
_ بصراحة عندك حق إذا كنا إحنا نفسنا مكناش متأكدين..
قاطعهما رنين هاتف جوري.. زفرت جوري قائلة بملل:
_ هو إنت مبتزهقش ياحج إنت إذا كنت أنا نفسي زهقت..
سألتها سيلين قائلة:
_ مين ده يابنتي؟!
ردت جوري قائلة:
_ ده بني آدم أو بني آدمه الله أعلم عمال يتصل من الصبح ومش عارفه هو مين..
ردت سيلين قائلة:
_ ماتشوفي ده مين على التروكولار؟!
أجابتها جوري قائلة بسخرية:
_ على أساس أنا معنديش الأبليكشن ده.. ما هو مش مسجل عليه..
قاطعتها سيلين قائلة:
_ خلاص ردي..
ترددت جوري.. ثم أجابت على الهاتف.. بمجرد أن أجابت حتى أُغلِق الخط بوجهها مثل أخيها..
نفخت جوري وجنتيها.. ثم نظرت إلى سيلين بخيبة أمل.. طلبت سيلين من جوري أن تمليها الرقم..
اتصلت عليه سيلين.. ليجيبها صوت تعرفه قليلاً..
فتحت سيلين مكبر الصوت وهي تشير لجوري أن تقترب منها.. ردت سيلين قائلة:
_ حضرتك مين؟!
أجابها الطرف الآخر قائلا:
_ حضرِتك اللي متصلة.. حضرِتك مين؟!
تنهدت سيلين قائلة:
_ ما تقول بقى..
رد ريان قائلا بملل:
_ أنا ريان الألفي..
هذه المرة أغلقت سيلين هي بوجهه..
شهقت جوري قائلة وهي تنظر لسيلين:
_ يانهار أبيض هو ريان طلع مجنون ولا إيه؟! طب بيتصل ليه ويقفل في وشي السكة..
ضحكت سيلين.. ثم قالت:
_ بصراحة يابنتي هو معجب بيكِ بس مش عارفه هو ليه بيتصل ويقفل السكة في وشك..
هاتفته سيلين مرة أخرى.. ليجيب ريان قائلا بنفاذ صبر:
_ هو إنتِ فاضيه وبتتسلي عليا ولا إيه؟!
ردت سيلين قائله ببرود:
_ والله أنت اللي بتتسلى عمال تتصل على جوري ليه يا ريان؟!
قطب ريان جبينه قائلا بتساؤل:
_ إنتِ تعرفيني؟!
_ أجابته سيلين قائلة:
_ أنا سيلين زين يا ريان.. وبعدين صحيح إيه شغل المراهقين اللي إنت بتعمله ده؟!
رد ريان قائلا وهو ينهض عن مكتبه:
_ طب إنتوا فين وأنا هجيلكم؟!
هزت جوري رأسها بالنفي؛ كي لا تخبره.. لتقول سيلين:
_ أنا طبعاً مش هقولك إحنا فين عشان اللي إنت كنت بتعمله ده مكانش ينفع على فكره.. وعلى فكرة كمان أنا اللي هقفل في وشك المره دي..
***********~~~~***********
نظرت عشق إلى سيف الجالس أمامها يتصفح هاتفه..
لتتنهد قائلة بنفاذ صبر:
_ يا سيف ارحمني وسيب التليفون شويه..
ترك سيف الهاتف.. ثم قال بانتصار:
_ شوفتي أنتِ متحملتيش قعدتي على التليفون نص ساعة بس.. وإنتِ إمبارح نمتي ٤ ساعات وقافلة الأوضة عليكِ وسايباني أنا بره دخلت زي الحرامية من الشباك..
كتمت عشق ضحكتها.. ثم قالت ببراءة مصطنعة:
_ هو مش إنت ياحبيبي قولتلي تلت ساعة وراجع.. أنا استنيتك ساعة كاملة وإنت مجيتش أعمل إيه أنا بقى؟!
أجابها سيف قائلا بغضب مكبوت:
_ تنامي طبعاً يا عشق.. تنامي ياحبيبتي.. إيه اللي مصحيكِ صحيح ما تكملي العشرين ساعة نوم بتوعك..
نظرت إليه عشق قائلة:
_ إنت عايزنا نتخانق أول خناقة بعد ما اتجوزنا بـ٤ أيام والله حرام عليك.. طب استنى شويه وأنا اللي أكون عاملاها على الأقل.. قول بقى إن الشغل وحشك وإنت عايزنا نتخانق عشان ننزل مصر صح؟!
هز سيف رأسه بالنفي.. ثم جلس جوارها ليمسك يدها وهو يقول بحب:
_ لا طبعاً يا عشقي ده أنا أقعد معاكِ سنين من غير ما أشوف ناس ومش هزهق والله بس إحنا مخرجناش من أول ماجينا غير مرتين تلاتة.. ده أنا حتى مبلحقش أقعد معاكِ.. إنتِ على طول نايمة..
ردت عليه عشق قائلة بابتسامة:
_ خلاص ياسيف مش هنام كتير تاني والله حاضر متضايقش نفسك..
قبَّل سيف يدها.. ثم قال:
_ يا عشقي نامي براحتك مبقولش حاجة بس استني لما نرجع القاهرة ونامي براحتك مش هضايقك في مواعيد نومك وصحيانك..
قاطعته عشق قائلة:
_ قول بقى من الأول إنك مش عايزني أنزل معاك المستشفى بعد مانرجع..
رد سيف قائلا:
_ عشق إنتِ كنتِ بتتكلمي بجد يعني على موضوع نزولك المستشفى.. ولما أعوز حضرتك في الطوارئ ساعات ويبقى مقداميش غيرك وفي نفس الوقت مش عايز مراتي تفضل قاعدة طول الليل في المستشفى أعمل إيه ساعتها؟!
ردت عليه عشق قائلة:
_ سيف مش عايزني أشتغل معاك في نفس المستشفى مش مشكلة قولي وأنا أشتغل في مستشفى تانيه.. ومش لازم يعني تحطني في الطوارئ.. ما مليكة مش في الطوارئ مش لازم تعجزني يعني..
هاودها سيف قائلا:
_ ماشي يا عشق إن شاء الله لما نرجع نبقى نشوف هنعمل إيه..
ردت عشق قائلة بتبرم:
_ إن شاء الله وبإذن الله وماشاء الله.. ماشي يا سيف براحتك..
ثم اختطفت حجابها؛ لتضعه على رأسها.. ثم اتجهت إلى الشرفة؛ كي تجلس قليلاً بمفردها.. أخرجت هاتفها من جيبها.. هاتفت والدتها.. ردت عليها آيه قائلة:
_ أيوه ياحبيبتي.. عامله إيه؟!
ردت عشق قائلة بصوت حاولت جعله طبيعياً:
_ كويسة الحمد لله يا مامي.. أنا بس عايزه أكلمك..
تنهدت آيه.. ثم قالت:
_ إنتِ وسيف شديتوا مع بعض صح؟! على العموم أنا مش عايزه أتدخل في حياتكم ومتخليش أي حد يتدخل حتى أنا وباباكِ ياعشق.. مبقولكيش تفضلي كاتمة في قلبك اتكلمي معاه هو وحاولوا تتوصلوا لحل وسط..
وجدت عشق سيف يقف بجوارها.. ودعت والدتها قائلة:
_ طيب يا مامي.. يلا مع السلامة..
قبَّل سيف رأسها.. ثم قال بحنان:
_ أنا آسف ياحبيبتي.. حقك عليا يا عشقي.. هعملك اللي إنتِ عايزاه.. أهم حاجة عندي إنك تبقي مبسوطه ولو شغلك هو اللي هيبسطك خلاص ياحبيبتي اشتغلي واعملي اللي أنتِ عايزاه..
نظرت إليه عشق بسعادة.. ليجلس هو جوارها.. ثم لف ذراعه حول كتفها يضمها إيه..
بمجرد أن أنهت آيه حوارها مع عشق حتى وجدت مازن أخيها يحادثها.. أجابته قائلة بعتاب:
_ كده يا مازن بقالك ده كله مبتتصلش تسأل عليا من بعد فرح عشق بقى ده ينفع..
رد مازن قائلا باعتذار:
_ معلش يا آيه حقك أنا آسف والله عارف إني مقصر معاكِ ومعاكم كلكم..
ردت آيه قائلة:
_ إنت مش مقصر معايا أنا بس.. إنت مقصر مع نفسك ومع إخواتك كلهم.. يعني تيا إمبارح كلمتني تقولي إنك مروحتش عندها وهي كانت عازماك على الغداء.. وعاصم وعدي قالولي إنك مبتروحش الشغل ده غير سيرين اللي بتجوز سيلا وإنت متصلتش حتى تقولها مبروك.. ومروان صاحبك برضه تلاقيك أكيد مبتكلموش.. أنا عارفه يا مازن إنك انطوائي ومبتحبش تختلط بحد بس ده مينفعش ياحبيبي.. إنت مش صغير دلوقتي عشان أقولك..
أيدها مازن قائلا:
_ ياحبيبتي أنا عمري مبزهق من نصايحك إنتِ ولا أي حد من إخواتنا.. أنا بس كنت منعزل شوية عن الناس الفترة اللي فاتت لدرجة إنهم كانوا بيطلعولي الأكل فوق في أوضتي مش قادر أشوف حد.. كنت بفصل مع نفسي شوية بحاول أرتب أفكاري..
ردت آيه قائلة بحنان:
_ ماشي يا مازن بس متبقاش تقعد ده كله من غير ماتطمني عليك تاني عشان بقلق عليك.. إن شاء الله جوازه مروان وسيلا تتم على خير وأنا ومحمد والأولاد وكمان سيرين وزين وأولادهم نيجي نقعد بقى عندكم ياسيدي فترة طويلة ونشوف بقى إمتى هنفرح بيك ياسيدي.. أهو ربنا كرم مروان واتجوز عقبالك..
رد مازن قائلا بإصرار:
_ يا آيه أنا مش هتجوز وإنتِ عارفه ليه؟!
أحابت آيه قائلة بهدوء:
_ لو مكتوب في قدرك إنك تتجوز هتتجوز مهما إنت رفضت.. ولو مش مكتوبلك تتجوز لو إحنا عملنا إيه برضه مش هتتجوز.. كل حاجة مكتوبة عند ربنا من قبل ما نتخلق ياحبيبي..
رد مازن قائلا:
_ ونعم بالله ياآيه.. على العموم أنا هقوم أغسل وشي وألبس عشان مروان كلمني نشوف موضوع البدلة وكده ونشوف تجهيزات الشقه بتاعته هو وسيلا عاملة إيه..
ابتسمت آيه قائلة:
_ ماشي يا مازن قوم شوف اللي وراك وأنا كمان أقوم أشوف اللي ورايا على ما محمد يرجع من الشغل وآسر وكارما يرجعوا من الكلية.. يلا مع السلامة..
***********~~~~***********
كانت رحمه جالسه مع روفان في الملجأ بعد أن أنهت عملها تخبرها عن أمر سليم.. ابتسمت إليها روفان قائلة بحنان:
_ طب يا رحمه هو شكله بيحبك أوي ياحبيبتي بس مينفعش إنكم تخرجوا مع بعض من غير حاجة رسمي إنتِ عارفه..
أومأت رحمه قائلة:
_ أيوه طبعاً يا ماما روفان بس هو لسه معترفليش بحبه صراحةً كده.. هو أنا قلت لحضرتك على تلميحاته ده غير إنه النهارده الصبح أول لما صحيت لاقيت بوكيه ورد قدام باب الشقة عندي.. كان تحفة أوي.. بس إن هو يقولي بحبك لا لسه مقالش..
ردت روفان قائلة:
_ هو بيحبك ولسه مقالش ومادام لسه مقالش إنتِ مش هتضربيه على إيده يعني وتقوليله قلي بقى.. فإنتِ بقى مش هتخرجي معاه تاني هو عايز يقابلك هتجيبيه هنا الملجأ بعد ما تخلصي شغلك ييجي يشوفك هنا مفيش أي مشكلة..
ردت رحمه قائلة:
_ حاضر والله خلاص مش هخرج معاه تاني غير لما يبقى فيه حاجة رسمي..
لتكمل قائلة وهي تنظر إلى روفان:
_ بس أنا يعني لما ييجي يعرفني على أهله في يوم من الأيام ويبقوا عايزني يطلبوني ليه هتبقي حضرتك معايا؟!
ربتت روفان على يديها قائلة بابتسامة:
_ طبعاً ياعبيطة إنتِ هبقى معاكِ.. أنا ومراد وريان وعز وسليم لو كان رجع ساعتها.. وصدقيني والله أهل سليم دول كويسين وطيبين جداً والله وإنتِ هتحبيهم جداً..
تنهدت رحمه قائلة:
_ ربنا يستر يا ماما روفان..
***********~~~~***********
كانت أسيل جالسة في المنزل.. لتجد خالد يدلف إلى المنزل بعد أن أنهى عمله..
استقبلته قائلة بابتسامة:
_ أهلاً ياحبيبي.. البنات ساعة وهيرجعوا من الجامعة..
جلس خالد جوارها.. ثم تنهد قائلا بحزن:
_ طيب ألحق أقواك على اللي أنا عايز أقوله قبل ماييجوا..
ردت أسيل قائلة بلهفة:
_ مالك ياخالد في إيه؟!
رد خالد قائلا بابتسامة راضيه:
_ الحمد لله يا أسيل على كل حاجة.. بصي يا حبيبتي أنا عندي مشكلة في القلب يا أسيل..
شهقت أسيل وقد بدأت الدموع ترقرق في عينيها.. طمأنها خالد قائلا:
_ متقلقيش ياحبيبتي للدرجه دي.. في دكتور من ألمانيا أنا اتواصلت معاه وقالي إني أسافرله ألمانيا بعد شهر ونص يعملي العمليه هناك.. بالله عليكِ ياشيخه ما تزعلي إني خبيت عليكِ.. أنا أول ما عرفت محدش هنا كان متفائل إني هعيش غير كام شهر لحد ما كلمت الدكتور ده وطمني.. وعشان خاطري متقوليش للبنات مش عايز أقلقهم عليا..
بكت أسيل قائلة بعتاب:
_ كده يا خالد كده تعمل فيا كده وتخبي عليا ده كله معرفش وإنت عمال تروح لدكاترة ومتقوليش.. بقى أنا للدرجة دي مش فارق معاك إني كنت عايزة أقفجنبك وأساعدك.. ولو مكنتش لاقيت الدكتور ده كنت هتبقى راضي عن نفسك وأنا بشوفك كل يوم وبضحك في وشك وتضحك في وشي أنا وبناتك وعمرك ينتهي قدامنا وإحنا مش حاسين.. أكتر من نص عمري كان معاك إنت وأيسل وتالا ياخالد.. كده يرضي ربنا بذمتك..
احتضنها خالد قائلا وهو يقبل رأسها:
_ أنا آسف ياحبيبتي والله بس مكنتش عايز أتعبك معايا ولا أقلقك عليا.. وبعدين ماأنتِ أول حد قلتله.. أنا ليا حد غيرك إنتِ وبناتنا ده إنتوا أغلى حاجة في الدنيا كلها عندي.. ربنا يمد في عمري لحد ما أطمن على البنات مع رجالة تستحقهم.. اوعي تزعلي مني..
مسحت أسيل دموعها؛ حتى لا تتسبب في تعب رفيق دربها أكثر من ذلك.. لتحاول رسم ابتسامة على وجهها وهي تقول:
_ أنا مقدرش أزعل منك يا خالد.. وحاضر مش هقول للبنات حاجة.. لتكمل قائلة بمرح:
_ شوفت بقى إنت خليتني أنسى الأكل اللي على النار إزاي ينفع كده.. هروح أشوف الأكل.. وإنت روح غير هدومك وارتاح شوية لحد ما البنات يرجعوا..
تطلع إليها خالد قائلا بشك:
_ يعني إنتِ متأكده إن مش زعلانه؟!
ابتسمت إليه أسيل.. ثم هزت رأسها بالإيجاب.. لتتجه إلى المطبخ.. فتحت صنبور المياه على آخره بعد أن تأكدت من دلوف زوجها إلى غرفتهما.. لتبدأ في البكاء وهي تحاول قدر الإمكان أن تكتم صوتها.. حاولت استجماع شتات نفسها؛ فزوجها في أمس الحاجة إليها وإلى دعمها الوحيد إليه.. ربتت على قلبها الحزين بتلك الكلمات.. مسحت دموعها.. ثم أنهت ما تبقى من إعداد للطعام؛ فهي لن تشعر ابنتيه بأي شيء كما يريد زوجها..
بعد ما يقرب من ساعة كانت أسيل تضع الطعام على السُفره.. لتجد ابنتيه تدلفان إلى الداخل.. نظرت إليهما بفخر؛ فإحداهما أصبحت معيده بكليتها والأخرى مازالت تدرس ولم يتبقَ لها سوى 3 سنوات على انتهاء دراستها.. قبلتا والدتهما التي أخبرتهما بأن تذهبا سريعاً؛ لغسل أيديهما حتى توقظ والدهما..
استيقظ خالد من غفوته.. ليذهب إلى المرحاض؛ حتى يغسل وجهه.. ثم ترأس مائدة الطعام.. ليبدأَا جميعاً في تناول الطعام وأسيل تخبر الجميع عن يومها وكذلك تالا..
***********~~~~***********
في المساء..

كان عمرو في مكتبه الموجود بمنزله عندما دلف إليه ابنه محمد..
ابتسم إليه عمرو قائلا:
_ خير يا محمد؟!
أعطاه محمد بعض الأوراق.. ثم قال:
_ ده ورق الصفقة. الجديده اللي هنعملها إن شاء الله الأسبوع الجاي..
التقط عمرو منه الأوراق.. ثم قال:
_ ماشي يا محمد.. أنا هشوفهم دلوقتي..
دلفت نور ابنة عمرو الأخرى قائله:
_ يلا يا بابي وإنت يامحمد مامي خلاص عملت الأكل..
أومأ إليها أخوها وكذلك والدها.. ثم ذهب ثلاثتهم إلى الخارج.. تنهدت زينه قائلة وهي تضع آخر طبق على المائده:
_ إنتوا مبتتعبوش من الشغل ده؟!
قبَّل محمد رأسها.. ثم قال بهدوء:
_ يا ماما ياحبيبتي إنتِ قلتِ منشتغلش في البيت وسمعنا كلامك بس إحنا اليومين دول عندنا شغل كتير أوي في الشركة ووقتنا في الشركة مبيكفيش..
رفعت نور حاجبها قائلة باستنكار:
_ لا والله يا محمد.. محمد أنا بتغدى دلوقتي.. مش واخد بالك إن الساعة بقيت ٨ بليل وإحنا لسه هنتغدى.. وأصلاً أنا النهارده صحيت الساعة ٧ ونص الصبح عشان ألحق أجهز قبل الكلية لقيتك إنت وبابي مش هنا.. سألت مامي قالتلي إنكم روحتوا الشغل من الساعة ٧.. يعني بجد كتير أوي ١٢ ساعة شغل..
داعب والدها شعرها وهو يقول بمرح:
_ لا مش كتير ياشقية.. وبعدين الـ١٢ ساعة اللي بتقولي عليهم كتير دول.. إحنا كنا بنسهر أضعافهم أنا ومامتك لما سيادتك كانت بطنك بتوجعك وتفضلي بالأيام سهرانين عشانك..
عبست نور قائلة:
_ يا بابي ده كان زمان.. وبعدين ده برضه ميخليش عندكم حق إنكم تقعدوا ١٢ ساعة في الشغل..
ضحك إليها عمرو قائلا:
_ حاضر ياستي.. شوفي إنتِ عايزة إيه يراضيكِ وأنا أعملهولك..
سعدت نور كثيراً.. ليرد محمد قائلا بنفي قاطع:
_ لا متفكريش يا نور في اللي في دماغك.. مفيش سواقة عربيات لوحدك..
تنهدت نور قائلة بيأس:
_ ليه كده يا شيخ بتحبطني؟! وبعدين ما إنت بدأت سواقة العربية لوحدك من وإنت عندك ١٨ سنة.. وبابي علمك من وإنت عندك ١٦.. ليه أنا بقى لا؟!
إجابتها زينه قائلة بهدوء:
_ يا نور عينيا أكيد مش مزاج عندنا يعني نقولك لا.. بس أنتِ لسه في تانيه كليه.. إن شاء الله لما تتخرجي من الكلية أنا هجيبلك عربية ليكِ لوحدك بنفسي ياستي.. وبعدين محمد كان ولد أكيد مش هنوديه العربية وحد سايقهاله.. كان هيبقى منظره إيه قدام صحابه؟! مينفعش لكن أنتِ بنت ولازم ندلعك..
أيدها محمد قائلا:
_ أيوه يا نور ماما عندها حق.. وبعدين ياستي مش عايزة حد يسوق العربية.. أنا بنفسي هوصلك كل يوم وهرجع أخدك من الكلية يارب تكوني مبسوطه بقى..
قبلته نور من وجنته قائلة:
_ ربنا يخليك ليا يا أحلى أخ في الدنيا.. ويارب تثبت على النغمة دي متغيرهاش وأصحى أكلمك الصبح تقولي أنا عندي شغل..
شعث محمد شعرها.. نظر إليه والده بتحذير.. ليقول محمد بنفاذ صبر:
_ إنت مش شايفها بتقول إيه؟!
***********~~~~************
انتهى ❤️❤️
#ملكت_عرش_قلبي 💙💙
#آيه_محمد_عبدالرحمن
رأيكم 💜💜

هنعتبر ده اخر بارت للجزء ده عشان حقيقي انا كنت كتبت اكتر من 1500 كلمه في البارت اللي كان المفروض الأخير بس معجبنيش لا الحوار ولا الحبكة بتاعته ميلقش يبقى اخر بارت بجد 💙
الاعلام كله مقلوب على اللي بيحصل في 3 السنه دي ربنا معاهم وييسرهم امرهم وده مأثر عليا جدا وتابعلي نفسيتي والله العظيم.. ربنا معاهم ويفرحهم بمجاميعهم ويحققوا اللي نفسهم فيه ♥️
وادعولي انا كمان السنه دي تعدي عليا واطلع من 3 وانا سعيدة ومحققه حلمي 🤲🏻
بحبكم جدا واتمنى متزعلوش مني 💙💙

دمتم بخير واشوفكم السنه الجايه على خير ❤️