عن ظلمهم سيسألني الله ولن أغفر

كسر أنوثة

البارت السادس
صباح الخيرات

❤️اللهم صل على محمد وال محمد كما صليت على ابراهيم وال ابراهيم انك حميد مجيد❤️

كل الحب والتقدير لكل تعليق وتصويت وكلمه اعجاب بالقصة..
كل الحب لادمونات كروب مريم السعدي بالفيس
الي يدعمون ويشجعوني❤️
كل الشكر ZahraZahra517
للرفيو الحلو للقصه والغلاف الجميل..

الى متى يبقى بداخلي ذاك الضجيج
بين الرضوخ والثورة
ضد كل ما يقيدني
وينقص من مكانتي
أنا لا أطالب الا بشيء مشروع لي
أن تهتم بي..
او أن تطلقني خارج قفصك الوهمي..
فأنا أستحق أن اعيش
لنفسي
لذاتي
سأجري بعيداً عنك وعن من قيدني ..
ولا أخاف..
كان حلمي..

اعيوني انملت بالدموع ..
وانا اشوفها دخلت للصالة..
بوجها الابيض الي بينت بيه تجاعيد الزمن..واعيونها السود الواسعات ..
رحت الها وحظنتها وظليت أبجي بحركة
مشتاق..
أشم بريحتها وابجي
وكلشي بيه يصيح محتاجه حظنج يمة
بعدتني عنها وتمسح بوجهي..
وبصوتها الباكي
-شبيج بنيتي سمي بالرحمن
رجعت حظنتها
-مشتاقتلج يمه عنيتو (اشتاقيتلكم) عليه
بعدتني بعد ما سمعنا صوت ابوي

-شنو صغيرة وهيج تبجين
امسح دموعي بايدي واحاول اهدي نفسي..
مو بيدي مقهوره منه كسرني ابوي..

رحت عليه بست ايده وراسه
-الحمد لله على سلامتكم يابه
باوعت وراه ياسر مبتسم بس وجه يبين مقدار الفقد الي عدة
لحيته وجهه التعبان
ابتسمت بحزن
تقربت عليه مديت ايدي
جرني وباسني براسي
مكدرت احجي وياه ولا هوه اثنينه بداخلنه غصة..
احس بيه يدري الحزن الي بداخلي لا اكدر اواسيه ولا يواسيني..

صعدت أيمان وياي للغرفة
ظلت تتجول بيها ..
وتسولف فرحتها لان اول مره تسافر تشوف بغداد..
طلعتلها الفستان وقاستة ..
فرحت هواي بيه
امي هواي جايبتلنه شغلات وياها ..
التهيت وياهم ..

بعد الغدا هالمره الاكل عمي جاب هواي..
نباوع انا وحنان ونضحك
شاورتني حنان
-ولج يمكن من يرحون اهلي اسبوع بس خبز ناكل
اشرتلها باصبعي يم حلكي
-اسسسس لا تسمعنه

امي سحبتني من ايدي بعد الغدا ..
للغرفة الي جوا الدرج ..

كعدت يمها اباوعلها بلهفة
وهيه نظراتها حيره ..

-شلونج هدو ويه رجلج
دنكت افرك بايدي باوعت للباب ورجعت باوعتلها تمنيت احجي كلشي الها بس اكتفيت ب
-زينه
رفعت حاجبها
-بس عمتج ماكالت هيج ..تكول ابني مامرتاح وياها واصلا كايللها يمكن ازوج ثانيه..

فتحت اعيوني بوسعهن
مو انقهرت لان يريد يزوج عليه لا بس ليش يذب التقصير بيه

جريت نفس احس حتى قلبي كوه يدك
زفرت انفاسي ..
هيه كملت
-ها ماتحجين سولفيلي شبيكم
باوعتلها بحيره شأحجي شأكول خاف احجي ..
فتحت الباب سناء
-هايمه شو بس هدو يمج وانا
-اريد اشوف حظها شبيه ٣شهور مزوجه ورجلها يريد يزوج عليها..
ضربت صدرها سناء
-عزا ليش شبيه وياها منو كال يزوج عليها...
-عمتج
تقربت ونصت صوتها
-عمتي تحجي شيش بيش على كوله بيبي الله يرحمها هوه بكيفها عمي وكرار مايخلوه..
التفتت الي
-انتي شبيج وياه الرجال مايشكي اذا ماانتي مقصرة
هزيت ايدي ماعاجبني وبقهر حجيت
-هوه منو مقصر ويه منو شبيج سنا لو ماانتي تدرين بطبعه ..وين شايفته انا ينزل ينام لليل يطلع يرجع وجه الفجر سكران
امي ضربت صدرها
-سكران
-اي يمه بس عمتي ماتحجي حظها وبختها
وين اشوفه وهوه ماشايفني مره
ملتهي عني
طاحت دموعي خليت وكفت
بكيفه يريد يزوج  خل يزوج ويعتقني