عن ظلمهم سيسألني الله ولن أغفر

حظن الام

البارت ال ١١
❤️اللهم صل على محمد وال محمد كما صليت على ابراهيم وال ابراهيم انك حميد مجيد❤️

جذبه عمرك وانته ممتعلك بطيبه
كلشي خيبة...
يومك الي عده والباجر يجيبه
البحر نفسه
وصوتك المبحوح حسه
هو نفسه
عادي حزنك مو غريبة
الليل بعده يلم نجومه
الكمر بعده
والجكاره
والغنه الكاتم نحيبه
غراب فوك الراس
وبصدرك نوارس
هايمة صوب المواني
وما توصلها الثواني
ينكطع نفس الحجي ويه المصيبة
كلشي خيبه
وروج عالي
بعلو همك
والجرف ياهو اليجيبه.. منقول

باوعت لسناء وحنان مكابلات عمار ويصرخن ويونن
وعمار دموعه على خده
عمي واكف شوي عنه هم يبجي

اباوعلهم واحس بخوف
تقربت عليه سناء وصرخت
ولج هدوء راح ابونه ..
حظنتها وارد بقهر
-انا لله وأنا اليه راجعون.. الله يرحمه الله يرحمه
اهدي سناء ادعيله بالرحمه
الدمعه جمدت بعيني ماطاحت..
قلبي نعصر
بيني وبين نفسي
يابه رحت وانت ماراضي عني وظالمني..

عمار مسح دموعه وباوع لعمي
نتحظر كلنه نطلع للبصرة الفجر ..
لان الطريق باليل يخوف ..

كمت دخلت للغرفه
حظرت جنطه صغيرة وساعدت وداد ..
وقت العشا كعدنه هم نحظر
رغم محد ياكل بس الاطفال
عمار دخل غرفته وسناء وحنان وكرار ومسلم
صوت ونين خفيف كل ماساد الهدوء
يكسرة..
واحس عبرات تتكسر بصدري..

لبسنه الاسود وتحظرنه
طلعنه برا البيت اباوع الكوستر بالباب وتقرب علينه رعد

جر عمار حظنه وطبطب على ظهرة
-البقيه بحياتك الله يرحمه
رفع راسه باوعلي باسف
البقية بحياتج بت عمي
جاوبته بجمود
-وحياتك الباقية وصعدت الكوستر..

وكعدت بصف الجامه سندت راسي عليها
سمعت صوته يسولف ويه السايق
يعني يروح ويانه للبصرة
عمتي صعدت هم بس مالها حس ولا عزتني ولا تقربت مني
الاطفال نايمين
واباوع للطريق وذكرياتي تتخاطف ..

طاحت دموعي وانا اذكر قسوته خوفي منه وكلماته
مااعرف اسامحه وهوه شلون ؟!..
عمار يكول صارله فتره يشكي من نغزات بقلبه ومن غافي بعد الغدا شوي
جايه امي تكعده لكته ميت..
مسحت دموعي
غفيت شوي حسيت السيارة وكفت باوعت
التفتت لحنان بصفي
-ها وين وصلنه
-خيه ماعرف بس بعدنه ..بس شوي يجيبون مي ويغسلون..

هزيت راسي بتعب
رجعو صعدو وحركت السيارة غمضت عيني ودلي اطير واوصل هسه لامي حيل مشتاقة الها ولحظنها وبالي يمها هيه متفارك ابوي هواي
تحملته وتفهمه من نظره اعيونه..وعاونته بحياته ..
ياسر وايمان شحالهم هسه ..

سمعت صوت عمار
-يالله وصلنه الحمد لله على السلامه..
اباوع دخلنه لفرع اهلي
تحرك الحنين بداخلي لكل حياتي قبل
وكفت الكوستر بعد شوي عن البيت لان كبال البيت منصوب جادر الفاتحه
صوت القرآن يصدح ..