عن ظلمهم سيسألني الله ولن أغفر

ام لاتعوض

البارت ١٤

اللهم صل على محمد وال محمد كما صليت على ابراهيم وال ابراهيم انك حميدٌ مجيد❤️

يامراجيح التحط من الهوه
وياطيوف الي يجي بيها الضوه
منتظر جيت الصبح
لو بس دفو
لو بس نده
ويروه كَلبي الماروه
انا حسبتك سمه ومعناك طيب
لا تشح وكَربك لروحي دوه... منقول

رفعت اعيوني بطىء اباوعله
اخذ مخده وغطا
اعيوني تتبعة..
وصل قريب يم الباب
سمعته ظل يجر انفاسه بصعوبه
اباوعله التفت عليه
يباوع لعيوني وبأسف حجه

يحتاجلي وقت حتى اتعود وانتي
تقرب وتلمس اطراف خصلات شعري
باوعلهن وباوعلي
-انتي جوهرة تستاهلين الشخص يكون بكل كيانه ومشاعره وياج ..
انا مجروح وتعبان اتمنى..
سكت متاسف وكمل
-بس وقت احتاج بين مايطيب جرحي واتعود

غرغرت اعيوني بالدموع
متأسفه على حالي وحظي

دنكت  تقرب وباس راسي بطىء
و ابتعد فتح الباب
-اخذي راحتج بعد انتي ام البيت تصبحين على خير

كعدت منهاره على طرف السرير بين دموعي وبين غصه
هوه كلي ولمحلي بس كنت متأمله تقبل من نوع حتى لو بسيط
مسحت دموعي
وانا اعزم ويه نفسي احاول اخليه ينسى ويتقبلني بحياته
لخاطر اطفاله الي احبهم ..

نمت بقلق كعدت الصبح
باوعت للساعه الي معلكه فوك ميز المرايه
ب ٨ الصبح
طلعت من الغرفه ماكو اي صوت
رحت للصحيات
طلعت صار بوجههي هوه ابتسمت
-صباح الخير
وهوه ابتسم الي
-صباح النور
من وكت كعدتي عطله لو باقيه نايمه همه يكعدون بعد العشره

-ميخالف احب اكعد من وكت
مشه كدامي للمطبخ وانا امشي وراه
دخلت للمطبخ اتفرج بتركيز البارحه خواته وزوجات اخوانه واطفال واستحي فما باوعت
المطبخ حلو مرتب سيراميك مربعات صغار ابيض قديم
وكاونتر خشب مترتين ونص بمتره ونص سنك وباب هم يطلع للحديقه

اباوع وقطع افكاري صوته
-انتي بكيفج شنو تحبين تغيرين تعدلين
هزيت راسي بفرح
هوه طلع قوري الجاي
وعلبه بلون ابيض مكتوب عليها جاي .. تقربت منه
خليني اسوي
ابتسم لا انتي عروسه بضيافتي انتي

دنكت بحسره عروس ليش انا مرتين ازوج ومااحس احساس ولا فرح عروس
رحت كعدت على ميز طعام خشبي بسيط باربع كراسي
اباوع لاصابيعي وافكر بحالتي

هوه سكت يمكن شاف رده فعلي

-ليش كعدتي اهنا تقرب ومد ايده الي
امشي بالحديقه يم المرجوحه كعدي ونتريك
مديت كفي لمسه ايده دافيه
كمت وهوه يسحبني وفتح باب المطبخ
اباوع الحديقه كبيره ومرتبه
كعدت على المرجوحه كبالها طبله مستطيله خشب
-شكد مساحه الحديقه صلاوات كلش كبيره
-امممم البيت تقريباً مساحته ٣٠٠
والحديقه بال ١٥٠
-خل اصب الجاي هسه خدر