للحظات نحن واقفين ما عارفين نتصرف كيف وكأنو الزمن وقف عندنا هو بعاين لي وانا بعاين ليو مروة جات قطعت لحظه الشرود قالت لي يابت سمعت صوتك بقيتي كيف حتى انتبه وطلع جات علي وقالت يابت بتكلم معاك قلت ليها دا منو بخلعه كدا قالت لي ود عمي جانا قبيل قلت ليها وااااي وشوفي انا جيت بي شنو احيي من الخجل استاهل عشان ما سمعت كلام امي🤦♀️قالت لي ما تختي في بالك ما بركز قلت ليها ان شاء الله قالت لي جاء عشان ابوي مسافر وح يقعد معانا كذا يوم منها يحرسنا ومنها يقضي مشاويرنا بدل ما تكون العربيه مركونه سااي ولا امي بتعرف تسوق ولا انا قلت ليها معناها من الليله احترم نفسي واجي بي توب😂قالت لي بكون احسن😂شلت الشطه ورجعت بيتنا دقيتها واتغدينا وامي بتحكي لي عن بنات اهلا العرسن والبي عيالن وكلو طعين بالكلام عشان اعرس🙂لكن نفسي ابيه ولا ترضخ للضغوطات(شايفين العربي الرهييب دا😌👋)ما رديت بي حاجه بشاغل ابوي وهو بضحك وهي تحمر لي😂خصلنا وشلت الصينيه وديتها المطبخ عشان الليله دوري في غسيل العده الزفت دي🙂لكن سناء جات قالت لي بغسلا ليك عشان يدك ما توجعك بستها في خدها وقلت ليها ما انحرم منك ياارب🙈❤قالت لي ولا منك❤مشيت غرفتنا بقيت بفتش لي في روايه اقراها تاني اتذكرت انو بكرة عندي تست ومفترض اقرا🤦♀️جبت شيتاتي وفرشتها قدامي وقلت في نفسي هسي لو كنت معرسه كان راجلي ساهر معاي وقراني ودلعني وخلاني اقرا والمكافآة تكون حضن ولا بوسه بدل اقرا واكفت نفسي لمن ما اعرف الاجابه لكن الحمدلله بس😔
صحيت بي سناء بتهز كتفي فركت عيوني وقمت قالت لي انت مليتي الخزان ضربت جبيني بي يدي وقلت ليها اخخخخ نسيت والله🤦♀️قالت لي اجري جيبي ليك مويه تستحمي عشان تمشي الجامعه قبل ما امي تعرف بعملتك المهببه دي وتطين عيشتك وفعلا لو امي عرفت عيشتي ح تتزفت مش تتطين بس😂اتسحبت وطلعت بيت ناس مروة تاني اتذكرت ود عمها دا بعد وصلت الباب رجعت لبست توب امي ومشيت لقيت مروة بتتسوك فتحت الماسورة وقلت ليها الليله ح يكون يوم اسود ومنيل علي بستين نيله قالت لي مالك نسيتي تعالي شنو😂قلت ليها نسيت ما مليت الخزان وهداك فاضي يشحد ربو قالت لي اجري قبل امك تصحى😂خلصت ودخلت جوا وانا لسه منتظرة الجردل يتملي لكن الماسورة ضعيفه🥲غسلت وشي واتشطفت وشلت الجردل فجأة حسيت بي قلبي بضرب شديد يدي لمن رجفت والتوب عتر لي قربت اقلع وقفت مسافه تاني قلعت التوب وجدعتو بالحيطه وقلت ليو غطس الله حجرك يا حقير عايز ترميني مثلا🥲وشلت جردلي ومشيت اخدت شاور سريع وجري على الباب لقيت مروة راكبه مع ود عمها دا شكلو ح يوصلها وانا طلعت على الشارع تاني اتقابلنا قالت لي اركبي قلت ليها لالا بجي بالمواصلات قالت لي يابت انت عويرة نحن ماشين نفس الحته ارح لمن اصرت ما حبيت احرجها وبعدين اخير امشي معاها المواصلات ما مضمونه ركبت ورا قلت السلام عليكم وطلعت تلفوني وركبت السماعه ما خلصت باقي المسلسل ودي فرصه لا جوطه ولا واحد يدخل عيونو في تلفونك🙂
مروة:لسه مسلسلك العوير دا ما خلص
-قرب😂
+اسمو شنو
-ميه مرة قلت ليك امير السطوح وما تساليني الحصل شنو عشان ما ح احكي ليك😘
+اسألك من شنو مسلسل ناسا كلهم بشبهو بعض احضرها ما اعرف البطل من الشرير
-والله ماف بينم اي شبه بس انت عشان ما بتحضري كوري
+عليك الله كوري ولا صيني كلهم نفس الزول بس منسوخ😂
-استغفر الله منك ما ح اتجادل معاك😂
رجعت لي مسلسلي لمن خلص تاني فتحت الشيت اراجع شويه وقلبي لسه بضرب بقوة
-ميمي!
+مالك؟
-قلبي دا من امبارح كل شويتين بضرب شديد خايفه اكون بودع🥺
+تودعي شنو عمر الشقي بقي😂
-انا جادة والله حاسه نفسي ما كويسه وبعدين مرض القلب ما غريب مننا حبوبه ماتت بيو ويمكن اكون وارثاو منها
+كفى الله الشر ما تفكري كدا خلينا يوم السبت نمشي نفحص ونتأكد
-لكن ما تكلمي زول من ناس بيتنا لغايه ما اعرف الحاصل شنو
+كويس
وصلنا الجامعه لقيت ايه منتظراني برا اخدتني في حضنها كانت مبسوطه والفرحه ظاهرة في عيونها قلت ليها المعيد دا اعترف ليك بي حبو وح تعرسو قريب ولا شنو قالت لي ياريت لو يحصل كدا🥺لكن حصلت حاجه اظبت قلت ليها اها بشريني قالت لي تخيلي امبارح رجعت البيت لقيت اسامه رجع من السفر😍قلت ليها الف حمدلله على سلامتو بركه الشفتو طيب قالت لي الله يسلمك دخلنا جوا وهي بتونسني عن فرحتها بي جيتو طبعا ايه ما عندها غير اسامه اخوها عشان كدا بتحبو اكتر من نفسها حتى الوقت كلو اسامه عمل وفعل لمن حسيت اني بعرفو لي سنين طويله
مواقفهم مع بعض ضحكم وهبالتم لمن ورتني الصور اول افتكرتو حبيبها😂بريدا شديد وبهتم بي ادق تفاصيل حياتها بجد علاقتهم مميزة شديد ربنا يحفظهم لي بعض💛🌻
كان عندنا محاضرة وحده اخدنها وطلعنا اصرت علي امشي معاها بيتم لكن رفضت ما بقدر وانا ما كلمت امي ولا ابوي لكن قلت ليها بجي يوم تاني ان شاء الله طلعنا قدام البوابه ولقيت مروة وايه قالت الليله ما جات بي عربيتها وح تمشي بالمواصلات كلمت ميمي عشان اركب ايه اول اصلا برجوازيه خوافه ما بتركب مواصلات في العادة😂جاها تلفون بعدها بشويه جات عربيه وقفت قصادنا قلت ليها طلبتي من ابوك يجيك مش يجبانه😂قالت لي دا اسامه الجاء نزل من العربيه شاب في نهايه العشرينات كدا مهندم ولبسو شيك شديد حلاقتو جديدة وعطرو حمانا النفس😂وقف جمبها وجراها من انفها وقال لي متين ح تفضلي كدا بتخافي تجي براك ردت ليو بخاف مش انت قاعد عشان تطمني؟قال ليها وانا شغلتي شنو في الدنيا غير اني اطمنك قالت ليو دي سما الحكيت ليك عنها اتخلعت طبعا بتحكي عني لاخوها لي تصبر لي العواليق🙂سلم علي بحرارة كدا وقال البت دي عذبتني بيك عذاب مستحيل اتكلم معاها في يوم وما تجيب سيرتك😂قلت ليو ان شاء الله سترتني معاك ايه قالت نشرت غسيل الوسخ كلوو😂قلت ليها اصبري لي بس بنتحاسب😒جات مروة قالت لي نحن اتأخرنا ارح وانتبهت لي اسامه سلمت عليو ايه قالت لي بنوصلا انتو امشو قلت ليها ماف داعي تتعبو نفسكم نحن بنمشي ونتلاقى اسامه قال ما فيها اي تعب ارح مروة قالت طالما مصرين ماف مشكله ركبنا معاهم وايه تشيل وتحكي لينا عن مغامرات اسامه وشقاوتو هو بضحك فيها ويغالط انو ماف حاجه من القالتا حصلت وكلو كذب😂وصلونا قدام الباب قلت ليهم اتفضلو تشربو معانا شاي المغرب حنستم كتير ما رضو قلت ليهم المرة دي بعذركم لكن ح تنورونا في يوم تاني ايه قالت لي اكيد ح يحصل ودعتها ودخلت
استلمتني امي من الباب شايله سوط وجاده جايه علي بيو قلت ليها ما ناويه تجلديني صااح🥺اخدت لي محطتين😂وجدعت السوط واشتغلت شكل😂نسيتي الصهريج وما عندنا مويه وجوطه كتيرة كدا انتهت لمن بستها في راسها وقلت ليها الله يخليك لي وما يحرمني سماع صوتك في البيت دا❤🤲قالت لي امييين يارب ولا يحرمني منكم❤🤲وبس كل مرة غشيني بي دعواتك دي😒ضحكت وقلت ليها خليك حناكه عشان امورك تسلك منها اخدت شاور وصليت الضهر واتجدعت في السرير ما عارفه تعبانه لي وخايفه بالجد موضوع القلب دا يطلع حقيقه ح اتصرف كيف؟ واكلم ناس امي كيف؟وهل ح يتقبلو الصدمه دي؟راقده وبفكر لما شالتني نومه
صحيت بعد العصر صليت ودخلت المطبخ اكلت وفتحت الT.v سناء جات قالت لي اقسم بالله الجامعه دي موت احمر اخير سنه تالت😭قلت ليها وانت الغشاك منو وقال لي في الجامعه بترتاحي😂قالت لي بكرة عندنا سنمار ولازم احضر ليو يلا ودخلت الغرفه وانا قعدت للفارغه حقتي😂مروة ضربت لي عشان اجيها جريت توب امي ومشيت ليها قعدنا في الصاله قلت ليها قريبكم مافيش قالت لي اي طلع لي صياعتو وقال عندو مشوار طوالي جدعت التوب اصلي ما بحب اقعد بيو بحسو بخنقني وانا ما بحب حاجه تخنقني😂
مروة:شفتي اخو ايه مز كيف🤤
-اي ما شاء الله وجيه وظاهر انو مأدب وواعي
+يابت ادب شنو انت شفتي العربيه الجاء بيها ولا ساعتو اللابسها والعجب عطرو واااي بس🤤
-انت عارف ناس ايه ما شاء الله مروقين
+وووبعلي من دي روقه اريتو حالنا😭
-بررري ما تتمني حال زول انت عارفه ربنا شال منهم شنو عشان يديهم القروش
+قامت للتفلسف🤦♀️
-ما فلسفه كلامي جد والله
+اها😒
-انا عطشانه يا كافي البلا لو جيتك وما قمت جبت لي مويه بتخليني اموت بالعطش🙂
+يابت اتلهي قومي مالك مكسرة ولا ناقشه الحنه
-قمت اصلا ما منتظراك
=يا مروة اديني الشاحن
قمت كدا شفت قريبها واقف وبتكلم وكان شغال في تلفونو رفع عينو علي كدا وانا شلت التوب وجري على بيتنا
أنا أحبك بذلك القدر الذي جعلني أتجاهل كل العابرين والباقيين والعائدون والذاهبون وابقى بانتظارك❤
💜ابقوا عافيه💜
