كنت مبسوطه من نفسي شديد وبضحك للضرس الاخير ما عارفه لي حاسه بالفخر وكأني حققت انجاز عظيم😂💃👏
سناء:خير يا طير في شنو بتضحكي قدر دا عقدو ليك مع ايه ولا شنو؟
-ياريت كان امي زغردت من الفرح😂اها العرس كان كيف؟
+يابت خمج زي الخمج اي شي بالبزار اقعدي النحكي ليك ولا خلتني امصل جزمتي😂
+وووبعلي لو شفتي العاميل حقتهم تطمم بطنك من العرس نبدأ خطوه خطوه العرس عملو في صاله مقفوله ولو شفتيها رهييبه كيف تلخم عديل ودا من غير ما تعايني للناس عشان ما تتصدمي البنات ديل واقعات من مجله سيدتي والأولاد مجلات الكورة والمشاهير اما النسوان والتياب والدهب اسكتي سااي المهم قعدنا في الطربيزة وبنتفرج عليهم شويه وجابو لينا عشاء واسكتي خلي سااي الجداده مقسمنها على اربعه والسمك فرايد وتلاته فطاير والبيتزا مع جنبه وطعمية وزيتون ومخلل وفي سلطه مايونيز في النص اما البارد دا ولا بحسبو انتو قاعدين كم عشان يختو ليكم بكبو السبت كلو وبمشو ودا كلو هين التقيل ورا خلصنا العشاء جابو لينا التحليه وحاجه كدا ولا بكذب ولا حصل ضقتها ولي هسي ما عارفه نفسي اكلت شنو🌚جابو لينا صحن مدور فيو تلاته اصناف سلطه فواكه دي عرفتها وتاني بتاعت لا تعرفيها كيكه ولا بسبوسه وشكلاته مع فانيليا وبسكويت مكسر وحاجه كدا اسكتي بس🤦♀️انتهينا من حتت العشاء نجي لي زفت العرسان اول شي جو بي عربيه ليموظين(هي ليموزين لكن سناء دي هبله😂)طويله من بيتنا لي لي بدايه شارع الركشات اول حاجه نزل العريس بشر لي اصحابو مسافه يصلا ربع ساعه😂فتح الباب وجات نازله وووبعلي منها اتاريها عجوز وهو اصغر منها لكن الصراحه نجفه تسوي كدي👋القروش عااد خلت حاجه لكن مكياجها ما حلو لانو ما عرفو يظبطو ليها الحواجبين والبدرة اغمد من لون فسختها بقت وشها مبرقع دا لاحظت ليو لمن جوا ماشين بجمبنا وبتمخطرو والسمعتو انو الفستان تصميم خاص ليها هي وبس بدت خياطو قبل العرس بي سته شهور وما خلص الا قبل اسبوع بس لكن لو شفتي الفستان في فواريز ونقش وتطريز مالنو لمن خربو منظرو وعينك ما تشوف النور لمن رقصو سوا فضل يدخل جوا خشمها انا خجلت ليهم وجايبين فنانين واحد فيهم بعرف يغني زي الناس ماف يهنقو ساااي والعجب في الجرتق القونه هابطه ما هججت بينا وغنت اغاني زول عارفه عشان يشيل معاها ماف وصحي توب الجرتق برضو تصميم خاص والفال شده ما كتير في ناس شالو اتنين وتلاته انا جبت ليك واحد ختيتو في دولابك وقالو مسافرين تلاته دول باريس وسويسرا وكندا احيي تخيلي🥺
-يعني انا هسي بعدين اعمل عرس عشان يجو الزيك ينبذو ويشنفو اي حاجه فيو وفوق دا ياكلو ويملو بطونهم على حساب راجلي ويمشو🙂
+الزول يكذب عينو يعني دا الشفتو وانتو مجبورين تعملو عرس
-والله ولا مجبورين ولا شتين مالي ومال الناس وكلامهم نعمل انا وراجلي عقد بيسط نلم فيو احبابنا نتجرتق وكل واحد يفرتق اهلو👋
+برري والله انا زاتي عايزة البس فستان تصميم خاص واتجدع في عرسي العرس هو كم مرة في العمر😒؟
-كلها متعه زايله فستانك الفرحانه بيو بعد تلاته ساعات ح يتركن في الدولاب وما ح تلبسي تاني وتبقى خسارة قروش، في صاله ولا ميدان كورة ما فرقت المهم اتزفيتي مع البتحبي، اتمكيجتي عند خبيرة تجميل ولا براك نفس الشي الادوات العندك عندها، سافرتي جزر القمر ولا الكناري ما مهم المهم انت معاو هو ان شاء الله في اي حته، خلي تفكيرك يكون على المدى البعيد وما تركزي مع متعه لحظه وزايله تفتكري بعد العرس دا ح يكون مديون بي كم مليار وتقضو باقي حياتكم تسدو في الديون بدل تعمرو بيتكم من غير ما تنقصكم حاجه اخدت صنه كدا بتفكر في كلامي وشكلها اقتنعت قمت ادوشت ورقدت نمت اصلي تعبانه من شغل امبارح والسهر
