رجعت وبعد شويتين صاحب عمرو جاء قعد معانا وعايز يتونس معاي ويشيل ويتظارف وموقفي بقى بيش شديد لانو عارفه نور ما بحب الحركات دي وممكن يدقو وظاهر انو اضايق عشان عروق وشو ظهرت تفاديا للممكن يحصل قلت ليهم ارح البيت انا تعبت
مروة:لسه الوقت بدري خلينا قاعدين
-طيب انت اقعدي نور ارح وصلني
وعد:انا ونورالدين عندنا مشوار ما تخربي خططنا
-معليش
مرتضى(صاحب عمرو):انا بوصلك
-ماف داعي تتعب نفسك بمشي بالمواصلات
نورالدين:بوصلك وبرجع
مرتضى:ما فيها تعب
اسامه:انت تبع منو؟
نورالدين:يا ولدنا انت منو عشان توصلا اطلع منها
مرتضى:بتكلم معاها لو ما حابه بتعرف ترفض
نورالدين:انت ما بتفهم بالذوق صااح😠
وقام عليو وقفت حاجز بينم واسامه جراو من يدو قلت ليو نور الله يرضى عليك ماف داعي تعمل جوطه وتلم فينا الناس انا بمشي براي وبريحكم من ام الحوار دا شلت شنطتي ومشيت خليتم واقفين ايه جات لاحقني قالت لي انت عويرة كيف يعني تمشي براك في الوكت دا قلت ليها اعمل شنو ما شايفام بتعاملو كيف عايزين يدقو بعض قالت لي الود رشيق ويستاهل السألو منو😒قلت ليها غلطانه انا السمعت كلام مروة ومشيت ليو ما كان اتجراء وجاء قعد معانا قالت لي بخصوص مروة في موضوع لازم احكيو ليك قلت ليها شنو قالت لي مروة شالت رقم اسامه من وين ما عارفه وضربت لي وحاولت تدردقو بالكلام وهو قال ليها انو معجب بيك فقالت ليو انك بتحبي نورالدين وخطبوك ليو وعرسكم قرب ولمن اسامه شافكم في العرس مع بعض سحب اوراقو وقالت ليو انها بتحبو من زمان وكل مرة انا بحكي ليها عنو ولمن شافتو ما صدقت وكلام كتير كدا دا كلو من غير ما تصرح بي اسما وعشان اسامه تلفونو فيو برنامج بسجل المكالمات سمعني بدايه الاتصال وسألني دا صوت منو لانو قالت انها من صحباتي قلت ليو صوت مروة لي في شنو ما قال لي حاجه وانا الشمار ما خلاني في حالي استنيتو دخل الحمام شلت التلفون سمعت باقي المكالمه واتذهلت من السمعتو😳لمن واجهت اسامه قال لي فعلا هو اعجبك بيك وبدا يفكر فيك لي قدام لكن لمن اتكلم مع مروة اتراجع كم خطوة وضحت ليو انو كلاما كلو كذب قال لي البت اعترفت لي بحبها وانا اول كنت عايز صحبتها في الحاله دي ما بقدر اقرب ولا على وحده فيهم ما عايز اكون السبب الح يفرق بينهم قدر ما حاولت افهمو انو انت ما عندك ذنب اذا مروة بتحبو ول لا فدي مشكلتها هي وانتو ما خصكم راسو وستين الف سيف ماف حاجه ح تحصل وحالتي انا بخطط من زمن عشان نجي نخطبك حتى قصيت الفستان واخترت الدبل وجهزت اي حاجه ممكن تحتاجي ليها وحلمت لمن تبقي مرت اخوي ونعيش سوا في بيت واحد والهبل الح نعملو وكيف ح نعيش مبسوطين لكن بسبب مروة اتهدمت احلامي كلها واتبخرت💔
الصدمه دي أقل حاجه ممكن اقول اني حسيت بيها لكن ما صدقت ولا حرف
-مروة مستحيل تعمل كدا
ايه:قصدك انا بتبلى عليها يعني🙂
-لا اكيد ما قصدي لكن يمكن يكون في سوء تفاهم وانت فهمتي غلط
+عرفتك ح تعاندي وما تصدقي عشان كدا حولت التسجيل في تلفوني
فتحتو وسمعت المكالمه كلها لكن برضو ما مصدقه
-اول شيء الصوت ما واضح شديد وانت عارفه انو في برامج كتير بتغير الصوت احتمال في زول عمل كدا عشان يخرب بينا
+وح يستفيد شنو مثلا
-ما عارفه لكن مروة ما بتعمل كدا
+طيب لو عايزة ما تصدقي المهم انا عملت العلي وحذرتك
كانت ظاهرة ملامح الضيق في وشها لكن برضو ما بقدر اتهم مروة بي قصه زي دي نحن لينا سنين مع بعض اكلنا وشربنا ونمنا في نفس السرير لو سألتها سااي ح تتحسس وتزعل مني وما بعيد تقاطعني
مروة جات سألتنا في شنو قلت ليها ماف حاجه خلينا نمشي البيت رجعنا ودعناهم وايه واسامه مشو وهي لسه مضايقه مني وعد قالت لي نور يوديها البيت ونبرة صوتها كانت حاده قال ليها ح يوصلني اول قامت زعلت ومشت خلتنا واقفين قلت ليو الحقها انا بمشي مع مروة ما تقلق لحقها لمن جينا نركب العربيه صاحب عمرو جاء وقال ليو يوصلو معاو قال ليو انت مش جيت بي عربتك ردا ليو ما فيها بنزين يوصلني البيت مروة قالت ليو ح تفتح ليو تحقيق ما تودينا وخلاص ركبت معاي ورا وهو قدام
كانت بتونس مع مروة ولمن يوجه لي الكلام كلمتين ما بزيدهم وما عارفه اعمل شنو عشان ما يفهمني غلط والمشكله انو نهائي ما راضي يفهم اني مضايقه وما عايزة اتكلم معاو لمن وصل حتتو جاني بالشباك ومدا لي تلفونو عشان اكتب ليو رقمي طبعا بقيت قدر السمسميه وما عرفت اتصرف كيف ومروة تغمز لي عشان اديو وعمرو بعاين لي بالمرايه قلت ليو لو في قسمه بنتلاقى تاني ولوقتها في امان الله قال لي قدام الا ما نتلاقى يوم وعلى كدا مشى مروة ضربتني في يدي وقالت طيرة انت ما الود جاري وراك مالك بتتساغلي قلت ليها مروة انت شايفه عمرو قدام ولا ما شايفه قالت لي شغاله بيو كتير مالك ومالو ما يطق راسو بالحيط قلت ليها ما ظريفه خالص اذا اتصرفت كدا وهو معانا قالت لي اقعدي لي دا اصلا هو حالك وح تفضلي سنقل قلت ليها احسن اسكت عشان ما اتكفت😂
مشيت بيتنا لقيت امي وسناء قاعدين برا وبتونسو في موضوع خطير ومن تركيزم عليو ما انتبهو لي الا طقطقت بي يدي
-هووي مالكم مندمجين كدا
سناء:زغردي نور ووعد فسخو الخطوبه
-بسم الله هسي كانو معاي سمنه على عسل الحصل شنو؟
+خالتو قالت لينا اتشاكلو ورمت ليو الدبله وقالت ما عايزة اشوف وشك تاني
-واااي لي يااخ ما كانو حلوين ومتفاهمين💔
+حلوين السسمك انت ما شفتي وعد بتتعامل مع اخواتو كيف ولا معبراهم حتى ونورالدين مورياو النجوم عز الضهر بعد دا لو سمحه مالو وشها زي صاج العواسه😒
-يخسي عليك يا حقارة ضربتها في يدها وكملت من متين بتنبذي الناس كدا وبعدين ما كانت عاجباك
+كانت يعني في الماضي
-وهسي الاتغير شنو
+مع انو ما كنت حابه اقول ليك لكن لازم تعرفي انت ما سمعتيها في العرس لمن كنت بترقصي مع نور قطعت فيك وما خلت نبذة ما قالتها
-وانت العرفك شنو؟
+في قواله بتتدسى كمان
-يلا القولت ليك دي عايزة علاقتكم تخرب والا ما وصل ليك الكلام
+التخرب كان خربانه مالي لاقيه من وراها شنو جنه ولا نعيم😒
هند:والله خالتك زاتها من البدايه وعد ما عاجبها ومشت مجبورة عشان بت عمو وهسي ما فضل ليها الا تزغرد😂
-ربنا يصلح بينهم
سناء:انت مالك ومالم
-وعد بتحبو والله ونور زاتو بحبها ربنا يسهل امورهم ويرجعو لي بعض
+بتك دي غبيه ما بتفهم🙂
هند:بتي ما اتعرفت عليها جديد🙂
دخلت رقدت في سريري وطلعت تلفوني ضربت لي نور اول مكالمه ما رد وفي التانيه برضو في التالته قال لي سما انا عارفك عايزة تتكلمي معاي في شنو لكن في الوقت الحالي ما عايز اتكلم في الموضوع فلو سمحتي اقفلي قلت ليو طيب زي ما تحب وقفلت الخط.
