-انت لي مخك دا دايما مقبل ورا دا اسامه اخو ايه سمعها بتتكلم معاي فحب يسلم علي🙂
سناء:ويحب يسلم عليك لي ياببا ما كان يقول ليها وصلي سلامي ويختصر لي سلم بي نفسو😏
-والله السؤال دا وجهي ليو انا ايش دخلني
+قلت لي بكرة يبان المستخبي😏
-اريتو يبان عشان ارتاح من النقه حقتك دي🙂
طبعا يوم الجمعه دا عندنا ليو مراسم عديل فرضتها علينا هند خانم نصحى من سته ننضف البيت فوق وتحت ونبخرو عشان احتمال يجو ناس قرايبنا ويطلبوني وما صااح يلقونا مبشتنين😂خلصت موال النضافه دا ورجعت انوم ما صحيت الا حداشر اخدت شاور ولميت شعري تاني بقيت بفتش فستان البسو للحفله سناء ادتني حقها لكن طويل يااخ دا برميني قلت ليها اخير حقي دا لو وقعني قدام الناس ديك بموت من الخجله🙂قالت لي اتخيلي منظرك وانت واقعه ما ح تحسي بي حاجه لانك جمب الواطه😂طبعا بتتنمر علي عشان هي اطول مني بي عشرة سم🙂تبا لزمن اصبحت فيه البت الصغيرة اطول من الكبيرة🙂استغفر الله بس😂كويتو وقسمت شعري كعكتين وقعدنا نفطر منها صليت ومشيت لي مروة عشان نشرب جبنتنا لقيت خالتو سلافه بتحضر قالت لي مروة في الحمام امشي سوي الجبنه وتعالي اونسك بدل ونستا المسيخه دي😂قلت ليها هسي بتصلك ونتونس احلى ونسه😍طبعا مطبخم دا عامل لي كورة شراب في قلبي رفوفو بعيد الا اركب فوق البمبر حتى اصلو🙂نزلت الكبابي وعلب البهارات وقليت البن طلعت بالقلايه برا عشان خالتو سلافه تشم الريحه وتتكيف ورجعت جوا قلعت التوب الجو كان مسخن والسماء ملانه غيوم زي العايزة تصب مطرة قلعت التوب وختيت المويه تغلى مسافه ادقو وحلات بتنتنو كمان😌👋قال ليكم انا هينه ولا مقطوعه لينه دقيت كدا لما انبسطه جهزت الجبنه وكبيتها في السرمس اتجهمت بي صوت ود عم مروة قال عايز كبايه استغفر الله بس كل مرة الود دا بشوفني وانا مخلقنه والله ح يقول انا قاصده احوم كدا قدامو🙂هو طلع سريع مسكت التوب وخنقت بيو نصي عشان ما يقع ولا يزلق مروة جات وكبيت الجبنه المطرة بدت تنقط ياااه عشقي🤤قعدت في الحوش والمطر بدت تشد خالتو سلافه قالت لي خشي جوا قلت ليها ح تفوتني متعه قلت لي ميمي تعالي ارقصي معاي اي جريتها غصب ورقصت معاها اسلو تحت المطر قلت ليها اتخيلي نفسك عرستي وانا راجلك والهبله صدقت وبقت تتبسم😂خالتو سلافه تتكلم معانا ونحن سارحين في احلامنا الوريديه🙈بعد اتبلينا تمام دخلنا جوا لبست من بجانبها وقعدت عشان اشرب الجبنه لقيتها بردت قمت سخنتها اتذكرت ود عمها قال عايز جبنه جبت ليو صينيه وكبايه كبيت ليو واديتها لي مروة ونحن كملنا ونستنا قريب العصر رجعت بيتنا اسوي الغدا لانو الجمعه دي علي فتحت الشباك والنسيم هباني وشجعني اطبخ بي مزاج🤤💛خلصت المغرب صليت وقعدت قاطعه موضوع🤦♀️جات سناء وبتحكي لي عن المعيد حقهم قلت ليها بس لحقتي ايه وعوارتا😂ودي كمان منبرشه بي كلوو لمن زهجت منها بديت اجهز عشان مروة ما تنحرني😂لميت شعري وعملت الميكب ولبست الفستان اتعطرت ولبست الهيلز عشان اطول شويه🥺طلعت لي امي قلت ليها اها كيف وكيف بجيب العريس😂قالت لي هو بجي لكن لو بتقبلي مالو😒ضحكت ومشيت كانت مروة بتلبس شبطا قالت لي مالك الليله خير قلت ليها حاسه ح الاقي هناي🙈قالت لي ان شاء عشان نرتاح في روحنا دي😂خالتو سلافه قالت لينا الليله عاد شلعتو عديل قلت ليها اصلنا لو قمنا صعبين ولا ما كدا يامروة😌👋قالت لي كدا ونص👋وقفنا في الشارع مسافه ود عمها طلع العربيه ركبنا واتحركنا على بيت اهلهم دا الضيوف ما كانو كتار وكلهم برجوازين العربات ما تديك الدرب والعجب الراكبنها قل هو الله احد🤤ما تعرف تعاين للبنات ولا الاولاد حتى شفعم نضاف ما زي حقننا ممردغين في التراب😂والبنات دي اخر لبسه وشياك فستاني وفستانك مكياجي ومكياجك انا انبرشت فيهم خلي الاولاد😂العرس كان في حديقه البيت وبيت زاتو ما شفت زيو الا في المسلسلات التركية موزعين الطرابيز وعليها بطاقات زي نظام كل ناس في محله شفتو راقين كيف😂نحن قعدنا ورا عشان نطق وماف زول يجيب خبرنا😂👋وداك من العشاء الفاخر انا وميمي اكلنا لما روجنا اتمسح😂بعد شبعت تب ومليت المسكينه جددتو تاني وقمنا اديناها رقصتين حارات كدا البرجوازين ديل ميتانين الفنان دا ليو ساعه بغني زول هببو ليو ماف ولمن قمنا نحن اتلمو الناس حولينا بنات واولاد اهلا جنهم محاكى حتى في الرقيص وياريت ليو بعرفو اغلبهم شتر😂رجعنا قعدنا في الطربيزة شفت ود عمها واقف ليو مع نجفه كدا صاروخ بس ما شاء الله تبارك الله الوقفه كيف وختت اليد ولا الضحكه حاجات كدا ما بعرف ليها😂وانا شغلتي كلها اتلفت ما هو المجتمع غريب علي😂مروة لفتتني واشرت لي على واحد ببقى ليها وجيه كدا ما شاء الله عليو قالت لي دا ود خالا باللفه وعاجبا شديد قلت ليها عاجبك ولا بتحبي قالت لي احتمال كبير اكون بحبو🙈من كترت ما عاينت ليو لمن انتبه ليها جاء هو ومعاو واحد كدا قعدو جمبنا سلمو علينا وهو قعد جمب مروة وانا اتسمبكت مع التاني ديلك يتونسو وانا ما عرفت اتجاوب مع الود بس بهز راسي لكن مروة اخر ونسه وضحك عااد ما لقت مناها تاني بتشتغل بي🌚شفت ود عمها اشر لي بي يدو نظام نطلع خلاص قلت ليها ارح بنادونا قالت لي ما تشتغلي بيو لكن ما قدرت لمن كرر لي الحركه كذا مرة قمت وهي لحقتني قام شاكلا بتتونس معاهم لي وهي طبعا ولا بتسكت بترد ليو كلمه بي عشرة وانا خشمي وعندي نهائي ما اتكلمت لكن اتغظت منو هو ما كان واقف مع بت وبتونس معاها غير وقفتهم قريبين من بعض والضحك العالي السألو منو اصلا الاولاد دي شغلتهم يعملو الحاجه ولمن بت تعملا يتجننو وهم بتناقشو وانا نفسي ارد لكن ما قادرة رجلي دخلت في الطين واتزلقت قربت اقع لكن عمرو ثبتني من يدي ورجفت القلب رجعت لي تاني💔
-ميمي قلبي تاني واجعني
مروة:بسم الله يابت انت مالك اليومين دي
-ما عارفه شكلي ح اموت😂
+وبتضحكي يا ام قلبا ميت😒
-اعمل شنو كلنا على هذا الطريق
جابو لي مويه شربتها وغسلت وشي اخدت نفس شويه ومنها رجعت البيت كانو نايمين وما حبيت ازعج زول غيرت ونمت
