فسحه امل
٥
مساء الخير
بقلمي بنت الرافدين
عشتار
سمعت مرت ابويه دكوله
اريد اخبز وابيع وهند تساعدني
عززااااا هذا الناقصني بعد الخبز
ياربي شنو من حظ عليه الي بعمري بين
المدارس والكتب واني مكابله الكراب
والتنظيف
رحت نمت واني اذكر بيبي شون جانت
تذكرني بصلاه ولازم
اصلي كل فرض بوقته
هسه هنا ماشفت واحد توجه للقبله منهم
ملتهين بمشاكلهم
بلفعل الصبح بعد الريوك والتنظيف
صاحت عليه خالتي
هندددد
هاخاله
تعالي
اي بس اكمل تنظيف الهول
اي بسرعه مو تجرين بنفسج جر
كملت ورحت عليها غسلي ولمي شعرج
وتعاي
شعدها هاي امشي واسولف ويه
نفسي
رحت لفيت شعري وغسلت
واجيتله لكيتها جاي تطبخ مرك
شعجب اليوم تطبخ هي
ها خاله
باوعتلي ورجعت جابت الانجانه
وفتحت جيس الطحين وخلت بي طاسه
زغيره وظلت تغرف
وتخلي بلمنحل الي بوسط.
الانجانه وتهز بلطحين
اباوع عليه ومخليه
ايدي على خدي
كالت باعي حتى
تتعلمين مو صافنه بوجهي
بعدها كالت يالله تعاي انتي
انخلي الطحين ظليت اهز بالطحين
ماعرف هاي اول مره اشوف هيج
شي
صاحت بي
داسوين انتي تنخلين الطحين لو تركصين
ركص شرقي
اخذته مني وهي تعلمني شنو الزم المنخل
هيج سوي مو
تهزين بجسمج كله
كملنه الطحين وخلت ملح وصودا وخميره
وهي دكولي احفظي المقادير
وخلته بالارض و كعدت تعجن وهم تعلمني
مو قصدها استفاد وانما حتى ترتاح
كملته وغطته ورجعت طبخت التمن
وراحت للغرفته ساعه وصاحت يالله
صبي الغداء
رحت صبيت وكعدنا ناكل اني واخواني الزغار
وهما وحدهم
حدما ماكملنه الغداء وغسل المواعين
صاحت عليه
لكيته تكور بلعجين ودكلي تعلمي
و رحنا نخبز واني ارفع القبق الها
وتخليلني خبزتين الاخيرات اني اخبزهم
خاله والله اخاف واني اباوع على النار
مالت التنور تلهب
كمت ارجف اصورت من اطك الخبز
راح اوكع وياها
ظلت تصيح تعلمي خايسه جايفه
لشوكت تبقين كلشي ماتعرفين
كوه جربت وطكيت الخبزه واني مغمضه
والثانيه هم حد.ماكملت واني ميته رعب
بعدها رحت غسلت وجهي الي صاير
نار من الحر وهي ظلت تجمع بلخبز
واخذته ولبست عبايتها وطلعت
بعدعا بساعه اجت جايبه مسواك وفرحانه
يجوز باعت الخبز
يالله احسن من ابويه الي من يوم
عطلت السياره مافكر يدور شغل
بقت مرت ابويه تعلم بيه بلعجن والخبز
وكم مره انجوي بلتنور وهي دكلي ثول
ثولج
واني روحي لاليبه وهي تلوم بيه
اروح اغسلها او اخليلها معجون على مكان
الحرك حد.ماتهدى شوي
وبعدها مصره اتعلم وبقت تقسم الخبز
جزء اني وجزء الها بس هي خبزها مدوره
واني معكره ومفتوحه من الوسط
الي اخبزه يبقى النا للبيت
