فسحه امل

١٤

فسحه امل
مساء الخير

بقلمي بنت الرافدين
عشتار

خالتي تسال الدكتورا وهي دكولها كل خير
كملت مني عدلت ملابسي
واجيت كعدت يم خالتي
والدكتورا تكتب بلتقرير
كال بيج ولد وحلو مثل امه بعد.عشر ايام
تكملين  الشهر الرابع وضعه وحجمه طبيعي
واريد تسوين تحاليل دم حتى اتاكد من النسبه
ظلت خاله تسأله صحته زينه مابين شي وياج
لا ابد كتلج كلشي طبيعي وحركته هم طبيعيه
باوعتلي لعد.ليش من اسالج دكولين مايتحرك
ماعرف خاله
بعدها همست باذنها بس اني قريبه سمعتها
اكلج دكتورا خو ما متاثر من مرض من ابوه
لا حبيتي ماله علاقه قابل هو مرضه وراثي
حتى تخافين هو حادث
ظلت تشكر منها وكتبتلي مقويات وكالت حنوكف المثبتات لان متحاجيها بعد
طلعنه وخاله وجهها يضحك بس ماحجت شي
حتى من سألتها الموظفه مانطتها جواب واني كومي منا اكعدي هنا
  كملنه وطلعنه صعدنا بلسياره
وخابرت سامر تحجي وياه اول فرحانه
بعدها ظلت تبجي ودكوله لادكول هيج
امي حبيبي ربك قادر على كولشي
يعني اني جايه افرحك انتي هيج تاذيني
وتكتل فرحتي اوووف منك سامر
واني اسمعها
سدته منه ومسحت دموعها وشغلت السياره
وصلنا للبيت ولكينه سامر منتظرنه كاعد على القنفه ويهز برجله مال واحد متوتر
استغربت شبي هذا ليش هيج يسوي
كعدت يمه وامه على القنفه الثانيه اتقرب مني وباس راسي وكال مبروك يأام محمد
محمد!!!
اي اسمه ابني على اسم ابويه
خالتي مبتسمه يجوز تعرف لان ماعلقت
كتله راح ابدل عفتهم ورحت لغرفتي
بدلت ملابسي لبست دشداشه عريضه وقصيره
ودا الف بشعري ودخلت وداد تباركلي
لج صدك بيج ولد
اي هيج كالت الدكتورا
يالله شكد.مشتاقتله شوكت اشوفه هيج
ويطلع حلو مثلج اله ماانطيجياه كله عندي
ليش بالله غير اني امه ويبقى عندي
لا اني اخذه حتى تسوينه واحد ثاني
ههههه والله يا وداد هسه خلي يجي محمد.
على كوله سامر وبعدها فكري بلجديد
تتعشين
اي والله ميته جوع شنو مسويه على العشاء
اوووه اسكتي
شكو؟؟؟
غير ام سامر دزت ناصر  وجابت كباب وتكه
ومعلاك وبيتزا وعزمت نهال وزوجها
كوله اليوم جاهز
ها يعني مرتاحه انتي
اي ههههه
ماشوفيني ادعي يوميه تجيبنه طفل حتى نفرح
ومااتعب اني
ها يعني علمود ماتعبين دكوليلي احملي وجبيلنا طفل
سمعت خالتي تصيح عليها
اووف منج هنوده تلهيني بلحجي حدما صاحوا
عليه
اروح احسن دخيل الله شكد.تلغين
طلعت واني هم طلعتلي فستان طويل اخاف
تجي حماتي
لبست وعدلت وجهي وطلعت كعدت وسامر جان ماله خلك
سألته شبيك.
تعبان هنوده العلاج دايذيي مايعالجني
الله كريم
دانحجي ودخلت حماتي وجايبه وياها
هديه الي فتحتها بدله حمل كابوي وردنها وصدرها قماش
وملابس طفل زغار يخبلون
وباركتلي وزوجها كعدنا وظلت امها تسألها عن
اوضاعهم بس باسلوب حلوو.لان كدام زوجها
وشويه ودخل لؤي سلم على خالته وباركلها
وباس راسها
واجه بارك لسامر بوسه ويكوله مبروك ابو سمره
لك لادكول هيج صرت ابو محمد.
رجع باركله وهو يكوله مبرووك ابو محمد.
باوعلي وهم كال مبروك خيتي ام محمد.
الله يبارك يوم الك انشاء الله
ههههه ماصدك.يمعوده ويني وين الاطفال اله يوميه زعلانه هي
يقصد على زوجته
سكتت اني وين اعرفهم حتى ماشايفتها  احجي مره غريبه عني البيوت اسرار
ظلت خالتي تحجي وياه ودكولها خل تولي
اني مرتاحلتها من اول بس ماعرف شنو عجبك
بيها انت وامك
لو باقي على اختياري جان هسه انت فوك النخل فوك
واني اكول بكلبي شدعوه هل الثقه الزايده
بقوا يحجون  واني رجعت للمطبخ مااحب كلامهم كله فخفخه رحت ساعدت وداد.
سويت وياه سلطه جايجيك وعصير برتقال
وجزر طبيعي
وهي بس تفتح السلفون وتخلي بلصحون
وتشيل وتودي على الميز  كملت واني اخذت العصير وخليته وكعدت وهما اني وسامر سوه
ونهال كبالنه
اباوع للاكل يشهي يالله ماعرف اكل وهما متجمعين وتعاي اكلي بشوك والسجين
بس حبيتي وداد ماتخليني دزلي صينيه للغرفه
تالي اليل وادوس براحيتي واني كاعده بالارض
ومتربعه
سمينا وبدينا ناكل واني هم مثلهم اكل ابقى بلكمه نص ساعه
حد.ماكملوا كمت غسلت ورحت للوداد.
لج ميته جوع
اسم الله وين ديره الجوع ومو هذا الاكل كومه
اي اعرف بس عزليلي حصتي
عفتها ورحت كعدت نشرب جاي شويه
وسامر اعتذر يريد يصعد.تعبان
واني هم رحت لغرفتي استوني .داخله واجه سامر حظني واني كمزت
يممممه خرعتني شبيك هيج تسوي
لج مشتاقلج حبيتي ام محمد ويتلمنس بطني
اكولج هنوده شنو كالت الدكتورا ابني حلو لولا
يشبهمن
ههههه ادري هي وين شافته هو سونار
ان شاء الله يجي للدنيا وتشوفه يشبهمن
او حلو لا
اووووف شوكت يجي هذا اليوم وعيونه دمعن
شبيك سامر هيج متشائم
فرك وجهه وكال الله كريم
بقى يمي وتمدد على الفراش وسحبني اله
شنو حتبات هنا
ياريت والله بس وين امي شنو ينقنعها وتقبل
دايحجي واندك الباب كال ها ها استلمي
واني متت ضحك اضحك بصوت عالي
هو يصيح بيه اسكتي لج شبيج هيج.تضحكين
واني ازيد بلضحك ضربني بلكوشه
وصاح تفضل وبلفعل خالتي
وكفت تتخصر هااا شكو هنا موكلت تعبان
شعندك هنا
اني درت وجهي واعض بشفتي حتى لا اسكت
شويه
طلع سامر هي دكلهه علاجك امي حبيبي
بقيت شويه ورحت للمطبخ جبت عشائي تعشيت واخذت دواء ونمت
بالايام الي بعدها ايامي هادئه  وضعي تمام
وبطني تكبر وحركه الطفل بدت توضح اكثر
وبس سامر صحته مدهوره حتى العلاج مادينفع
وياه
وخالتي دكوله بعد.مابيها حل اله تزرع كلى
اشوفلك مستشفى باي دوله ونسافر
بلفعل بقت تراجع وتراسل حتى تشوف وين دتزرعله الكلى
اما اهلي لاسالوا عليه وشافوني حتى ابويه
مافديوم سال عني ماعرف يعرفون بيه حامل
ومنتظره طفل مادري لا
فوني من يوم الي اخذه مني بعد ماعندي
اتصل بيت خالي
اليوم وراه الغداء واني بلغرفه اجاني سامر
وكتله اريد اروح بيت خالي
ماكل شي بس كتله ابات ماقبل
باجر روحي الصبح وتعالي بليل
بس امك اخاف ماتقبل
لا اني احجي وياها
تمام
خضرت نفسي ثاني يوم ورحت لبيت خالي حوالي ساعه بلعشره
صادف يوم جمعه الكل بلبيت دكيت الباب
وطلع خالي اني شفته وذبيت نفسي بحظنه
هو هم حظني عيوني دمعوا على الرغم هما مايسالون عني او يفقتدوني بس اني احبهم
يبقون بيوم من الايام ربوني وعشت بيتهم
وماعندي احد غيرهم
يعني البنيه تريد اهل وتريد احد يسال عليها
صعب احساس الوحده بس شنو بيدي هاي حياتي امي الي ماتسال عني يعني هي عدها
اطفال معقوله ماتحبهم ليش وماتهتم بيهم
بس اني هيج هامتلني
٠٠٠٠٠٠٠٠
حظني خالي وهو يسالني شونج ومشتاقلج
ودخلني جوه
سلمت على مرت خالي وطارق والبنات هم
بوسوني واخذوني للغرفتهم
وظلينه نسولف ويسالوني عن وضعي
ماعرف شنو احجيلهم يعني ظاهر حياتي
يبين اني سعيده من السايق من الملابس الي البسهم الذهب
بس ماعندي راح بال
هما بعدهم بلمدرسه الي بكدي بسادس بس مانحجت عادت السنه وطارق هم السنه بلخامس علمي 
والزغيره بلمتوسطه وخالي نفس شغلته
وطارق نفس اهتمامه بيه وبعده يكولي هنوده
واني اكوله طروقي بس مايزعل مني مثل قبل
لايفرح ويكولي من زمان ماسامعها
سالوني ليش ماراسلتينه
كتلهم فوني عطل وماجبت غيره جنهم ماصدكوا يكلولي شنو من قيمته حتى ماتشترين غيره سكتت
صار  وقت الغداء وفرشوا سفره بالارض والكل
كعد.ومسوين سمج مسكوف وتمن احمر وخبز
يالله سويت هجوم من زمان ماكاعده على هيج
سفره وماكله براحه وارتاحيت من الشوك والسجين
للعصر خابروا على خالوا وليد وفتحوا كام
كلوله راح نشوفك شخص تعرفه وجهوا الكامرا
عليه باوعلي وصفن بوجهي
واني ماملكت نفسي كمت ابجي هوايه احبه
من شافني ابجي عرفني لج انت هنوده
اي
شونج هيج كبرانه وينج ذاك اليوم من جنت
احجي وياج
اي خالوا فوني عطل
شوفني بنته سحر يالله تخبل وعمرها تلاثه سنوات ونص بلحضانه وتحجي الماني قليل
تحجي عربي مكسر
كالي شوفيها تشبهمن
صفنت عليها ماعرف خالوا انت شدكول
كال تشبه امي الله يرحمه
من كال هيج شبعت بجي وظلوا يهدون
بقيت لليل حد مااجه السايق عليه
العصر مرت خالي وخالي طلعوا للسوك
وبقينا وحدنا
اجوا قبل لااروح جايبين مسواك وعلاليك كومه
من دك الباب السايق رحت بدلت وسلمت عليهم
بس مرت خالي جانت بغرفتها
كلت لسما صيحها اسلم عليها حتى اروح
طلعت وبيدها علاكه جبيره وعلاكه زغيره مرسوم عليها فون
كالت هذا الج فون من خالج حتى تتواصلين
ويانه هاي كم قطعه الج
وان شاء الله من دخلين بشهرج جهاز الطفل
علينا
شكرا خاله ليش كلفتوا على نفسكم والله ممحتاجه
اعرف حبيتي بس مايصير طلعين من عدنا فارغه
طلعت واني فرحانه اول مره واحد.يذكرني
وصلت للبيت لكيت سامر يتنظرني بلحديقه
اول ماشاف السياره وكفت اجه وكف سلم عليه
السايق واني نزلت هم سلمت ودخلت 
اجه ورايه للغرفه ليش تاخرتي وهاي شنو
الي شتايلته بايدج شنو طالعه سوك
لا ماطالعه هما بيت خالي جابولي هديه
شنو المناسبه اخاف انتي كايتللهم اني محتاجه
ومااطلع للسوك.
لا والله اني محجيت شي وهما من كيفهم
وهذا فون اشترولي
ليشششش يشترولج فون ها
اكيد انتي كلتيهمو زوجي اخذ  فوني مو ؟؟؟
شبيك انت بس وصلت نهديت بيه كل ساع طالع بشغله شكل
اله اني اريد فون وماريدك تعرف جان ضميته عنك بس انت واحد شكاك ماتصيرلك جاره
انجبيييي لج طايحه الحظ شنو هل الصوت وهل لسان رحتي كم ساعه هيج.اجيتي مشحونه بعد يحجي ودخلت خالتي جرته
وطلعته بره الغرفه وهي دكولي الي يوم الي
اكص لسانج واخلص منه
لج اني مليت من مشاكلج شويه اسكتي طلعوا
واني ذبيت على الفراش بملابسي
حتى فرحتي بطلعه خربها ماعرف شنو من رجال يوميه شكل يوم ماكو احن منه ويوم
ماينجرع بس هو عليمن يطلع اكيد على امه
دااحجي وردت عليه وداد.ولج انتي وتالي ويه
لسانج
يممممه خرعتيني هاي من شوكت انتي هنا
كعدت واعدل بشعري
واجت كعدت يمه حبيتي اسمعيني اني احبج
الله شاهد عليه واعتبرج مثل بنتي مثل
ماانصحها انصحج
يامي لاتدرين على زوجج يصير عصبي
يتجاوز عليج اكولج صح
تنقهرين وتتاذين مايهم اتحملي وكظمي غيظج
دقايق بس يطلع احجي الي بخطارج ويه نفسج
هيج انتي ترتاحتين وطلعين الي بكلبج
هو يعرف انتي مظلومه هو تجاوز عليج واكيد
حينقهر عليج ويجي يعتذر منج وانتي تربحبين
صفنت عليها واني مخليه ايدي على خدي
اكول وداد تراه كلامج هم صحيح بس اني ماجنت اعرف هل الشي واسوي
هههههه لج شوفي هذا الشيب الي براسي
تحجي وهي لازمه خصله بيضه من شعرها
مااجن من  فراغ علمتني الدنيا هواي واخذت دورس كومه وهاي كولها ماقريتها بكتاب واجيت اتفلسف  براسج
لا هاي الدورس تتعلمتها من حياتي يوميه اتعلم
درس واني اكولج انتي هم تعلمي من يومج
وعوفي الخبال
رحت عليها وحظنتها يالله شكد احبج والله
هههه بنيتي اني هم احبج
تتعشين
لا تعشيت صدك خل اشوفج بيت خالي شنو
اشترولي طفرت من الجربايه اريد اروح للميز
لج على كيفج والله لو شافت ام سامر والله
اله تذبحج
طلعت الملابس واكدر اني وداد والفون شغلته
وخليت بي ارقام خوالي وبيدت اراسلهم
٠٠٠٠٠٠٠
فديوم نايمه بليل واحس الم بطني فضيع
كعدت من النوم مرعوبه لويات قويات
على الرغم اني ماتحرك ولااشتغل شربت
حبوب تقلصات وهم مافاد
بقيت ساعه اكعد.وساعه اكوم بلغرفه ميته الوجع اكثر من ساعتين واني على الحال
بعد ماتحمل رحت على وداد.عفيه لحكيني
خطيه احتارت شنو تسوي تخاف دكول لخالتي
هسه تكلب الدنيا على راسي
ولج راح اموت شوفيلي حل طلعت مني
وصعدت فوك واني بقيت الوب دقايق ونزلت
خالتي مرعوبه نزلت ولج شنو سويتي يامصخمه لازم ترعبيني ماتعدين كم يوم على
خير يالله بدلي خل اخذج للمستشفى
لبستني وداد.عبايه ولفت شعري
وطلعتني من الغرفه وسامر نزل
ظل يسال شكو وشبيج وداد دكوله بطنها
صاحت خالتي عليه  وطلعنه وطريق كوله تحجي عليه
حدما وصلنا للمستشفى ودخلوني على الدكتورا
كشفت بطني كالت عندج تقلصات ونتطني ورقه  على سونار رحت لغرفه سونار سويته
وخالتي  راسا  كلت للدكتورا الطفل مابي شي
عايش يتحرك
اي خاله كولشي مالي بس هي عدها تقلصات قويه لان اول طفل يصير هيج
رحت للدكتورا كتبلتي علاج وكالت هاي ابره للمغذي تاخذيها هسه رحت كعدت بغرفه وراحت خالتي جابت العلاج وخلولي اياه
والله صدك الالم هداء بديت انام
يمكن نص ساعه وكالت خالتي نطلع خلص المغذي طلعت امشي بس شنو اغفي ميته من النعاس خليت راسي على الكشن ونمت
حدما وصلت كعدتني وداد.حتى انزل واشوف سامر واكف بلباب مال البيت الداخلي
قريب على الحديقه والجو بي بروده
تلكه امه ها بشروا
ماكو شي عدها تقلصات دخلت للغرفه واجه ورايه رحت للغرفه بدلت واجت تمدد لكيته كاعد على الفراش
شونج هسه مامتاذيه لا زينه بس نعسانه يالله تعاي نامي تمدد وياي وهو يمسح على شنو
ماتصعد فوك بس اطمن عليج واصعد
بقى يشم بشعري ويكلي هنوده اني احبج
حد ماغفيت ماكعدت اله الصبح واشوف سامر
نايم بصفي غافي والمكان ضيك مخليني قريبه عليه كعد وصبح عليه رديت عليه وسالته شنو انت ماصعدت
لا وبعد.كوله انام هنا
ليش
ليش بعد.غير مشتاقلج تقربت عليه وحظني وظل يشم بيه ويبوس وحاول يتقربلي كتله
اخاف اتاذى  وخالتي تحجي عليه عفيه سامر
ابتعد رفض اله يقتربلي وبداء يتغزل
ويكولي احبج هنوده لج امووت عليج
حبيتي ام محمد.حد.ارتاح وابتعد عني ظل يتنفس سريع تمدد واني اساله سامر بيك
شي
لاتعاي يمي اقتربت منه هو نفسه سريع وهو قريب من وجهي حد.بدء نفسه يستقر ونام واني هم رجعت نمت ماكعدنه اله فوك العشره
هو صعد.فوك واني رحت سبحت وطلعت للمطبخ  اتريك سلمت على وداد ردت عليه وهي دكلي لج شنو اليوم متاخره وجهج مورد.
اي خذتني نومه واحلى نومه
من شوكت مو البارحه تتوجعين وخبصتينا
اي غير سامر البارحه بات يمي
عليج الله
اي والله واستوه صعد.واني طلعت
يارب يهدي دوم الج  مو كتلج سامر طيب وماكو منه بس انتي هم داري واهتمي بي بعد حملج ان شاء الله استقر اجه دور تستقر حياتج
انتي وسامر خطيه يعني هو من زواجه لهسه
شنو شاف بس طلايب  هسه هو ابو ابنج.
ان شاء الله منا وهيج كلش اهتم حتى راح ارجع اني اطبخلها بس انتي كثري من هاي نصائحج الحلوه ويالله هسه كافي اريد اتريك متت جوع
ههههههه تريكي اني طالعه عندي كومه شغل
طلعتي اجبان وحليب حميته بلمايكروا وكعدت
اتريك
بلايام الي بعدها جانت حلوه وسامر ينزل بليل
يمي ونسهر سوه ومرات ناكل تالي اليل
شكد جنت فرحانه بتغيره واحسن حتصير حياتي حلوه وخصوصا بدت الاشهر تتقدم
حد.ماوصلت بشهر السابع وبطني كبرت وسامر
فرحان وكل ساع يتلمسها ومرات يشوف حركه
الطفل كولش يفرح
حد.ما يوم كالتله خالتي واحنه على العشاء
حجزت بلمستشفى الاميريكي بيروت حتى تزرع
كلى ولازم خلال عشره ايام نسافر
رفض سامر وظلت تتجادل وياه خالتي
وهي دكوله شنو عاجبتك هيج حياتك لو كل كل ساع متخربط ومحتاره بيك.
ماتريد تعيش حياتك طبيعي مثل باقي الشباب
وبقت يوميه نفس الموضوع حد.ماوافق
سامر وقرروا يسافرون هو خالتي وابن عمه خلدون
اني جنت فرحانه لان حسب كلام خالتي حيتعلاج ويرجع طبيعي
بس من يوم السفر كلبي كام يعصرني خفت عليه هواي وظليت ابجي
صعدتله فوكه وذبينه نفسي بحظنه وكتله
عفيه سامر لاتسافر والله اخاف عليك.
ظل يهديني ويكولي لاتخافين ماكو شي
اتتي ماترديني اتعالج
اي بس مو بهذا الوقت خل اجيب وسافر
يعني اني منو الي بعدك ماتخاف عليه ابقى وحدي واله تاذيت او اجتني والولاده منو الي
حبيتي ماعليكم شي وداد وياج سايق هم ولؤي هم وصيته عليج عفته ونزلت شبعت بجي
كلهم يكولون ماكو خطر بس اني
كلش متخوفه ومامتفائله بهاي السفره

&&&&&&&
يتبع
قراءه ممتعه