SANTI SIXTO

SANTI SIXTO Part 13

SI SANTI Sixto ay parang mabuburyong na sa kunsumi. Bakit ba nagkaganito ang buhay niyang dati ay pribadung-pribado?

Ang tahimik niyang pagkatao ay ginagawa na ngayong pulutan ng media. Pati ang kanyang pagiging unnamed coverboy noon sa banyagang magazine na Global Weekly ay buong Pilipinas na yata ang nakakaalam.

Natural, nakapag-produce ang media ng cover ng Global Weekly na siya noon ang modelo na wala naman niyang permiso.

Muling inilathala sa mga diyaryo at magazines ang cover na iyon. Kumbaga ay naging komersiyal ang balita dahil talagang nilapa ng publiko.

Ang kulay ng romansa kasi ang dahilan.

Imagine, ang nag-iisang anak ng isang multi-milyonaryong pilantropo sa Amerika ay nakabase na sa Pilipinas at dito na tumutulong sa mga mahihirap, dahil naakit ito noon pa sa binatang Pilipino na kahawig ng nobyong namatay?

ARAW-ARAW ay may taga-media na nag-aabang sa Santiara. Sina Arabella at Santi ang magiliw at magalang na tumatanggi sa mga ito tungkol sa kagustuhang ma-interview ang kanilang binata.

“Sorry, ladies and gentlemen. Wala talagang pinagbibigyan na reporter ang aming anak. Wala siyang balak na pa-interview kahit kanino.” Ni minsan ay hindi nagsusuplada si Arabella sa media, kahit nakakapagod din ang araw-araw na paulit-ulit na pagtanggi.

“Ma’am, kailan kaya maintindihan ng inyong anak na ang publiko ay kailangan din namang isipin niya. Ang babaing nagkakagusto sa kanya ay public figure na rin dahil sa estado nito, the least he could do is answer some basic questions. Gaya ng hindi ba siya naaawa kay Ms. Johnson na may ibang taga-media na ipinalalabas na siya ang naghahabol sa inyong anak?”

Natigilan si Arabella.

Bilang babae ay apektado siya sa negatibong image na napapala ni Marissa Carrera Johnson sa sitwasyon na ito.

“Si Marissa ay naging kaibigan ko muna bago sila nagkaharap ng anak ko. Honestly, I like her very much. I respect her being a very charitable young lady. Huwag naman sanang bigyan ng masamang kulay ng ibang taga-media ang ginagawa ni Marissa. Hindi niya kasalan kung siya ay magkaroon ng interes sa isang lalaki na kahawig na kahawig ng kanyan pinakamamahal na nobyo. Sino mang babaing lalagay sa kanyang katayuan ay gagawin din ito.”

“Ma’am, kung magsasalita nga ho sana si Santi Sixto, kung siya mismo ang magtatanggol kay Ms. Johnson, it will help a lot to wipe out the negative image of Ms. Johnson now.” Ang reporter na ito ay umaasa na siya ang makakaunang mag-interview kay Santi Sixto.

Nalungkot si Arabella.

Gusto man niyang tulungan si Marissa ay hindi naman niya magawang utusan si Santi Sixto sa isang bagay na alam niyang tatanggihan nito.

“My son is a very private person. He is old enough and he doesn’t need a mother to decide for him. Sa ngayon, ayaw niyang magpa-interview, iyon lang. Ang masasabi ko lang, apektado din naman ang anak ko. Mula nang pumutok ang balita, halos hindi na siya maaring lumabas.”

At magalang nang isinara nina Arabella at Santi ang gate ng Santiara.

Malungkot at maligalig silang naglakad patungo sa malaking bahay.

“Araw-araw na lang ba, Santi, ganito tayo? Si Sixto pa na ayaw ng high-profile na buhay ang nagkakaganito. Hindi ko talaga akalain na magiging kakaiba pala ang istorya ng buhay ni Sixto. Para siyang hinahamon, kung ano ang ayaw niyang mangyari, siya namang nagaganap. Kulang na lamang ay magpatayan ang media sa pag-aagawan ng maisulat sa kanya, kahit pa hindi siya nagpapa-interview.”

Buong pagmamahal na inakbayan ni Santi ang asawa. “Ang mga anak natin, gaya rin nitong ating tahanan, ay tila ayaw talagang bigyan ng Diyos ng ordinaryo lamang na buhay. Aywan ko ba, Ara.”

“Nakakatuwa pero… mahirap din naman kung ganito tayo. Mula nang mangyari ito, si Santi Sixto ay parang galit na rin sa atin.”

“Nadadamay lang tayo. Wala na naman talaga siyang itinuturing na kakampi ngayon, e. Pero siya naman ay isang lalaki. He is a strong person. Kaya niya ito. Malalaman din niya isa sa mga araw na ito kung ano ang kahulugan ng pagdating ni Marissa Carrera Johnson sa kanyang buhay.”

SI SANTI SIXTO ay buo na ang loob.

Aalis muna siya sa San Simon. The heat is on sa lugar na ito. This is no longer for him.

Sumisikat na ang San Simon sa buong Pilipinas dahil sa kanyang kuwento at kay Marissa Carrera Johnson.

Ayaw na nga niyang magbasa ng mga diyaryo at magazines. Bantad na siya sa mga comments na siya raw ay suplado, walang damdamin.

Alam na alam na rin niya na may mga nagpapalagay naman na ang American-Mexican na dayuhan na dalaga ay cheap dahil naghahabol sa kanya.

He is lost as to what he should really feel.

Uunahin ba niya ang awa sa sarili dahil wala na siyang privacy at marami nang nakikialam sa kanyang buhay?

O maaawa muna siya kay Marissa dahil nasa bad light ito o pumapangit ang reputasyon?