Flame Armor [ 火焰戎装 ]

Chapter 48.1

Tue, Aug 10, 2021

{ Unicode }

ရန်ရိ ကုံးရင့်ရှန်နောက်က လိုက်ဝင်သွားသည်။ အခန်းကြီးထဲ၌ စာအုပ်စင်တစ်တန်းနှင့် စားပွဲခုံကြီးတွေရှိသည်။ စားပွဲခုံတွေပေါ်မှာတော့ ခင်းကျင်းပြထားသော ပစ္စည်းများရှိပြီး နံရံက ဓာတ်ပုံများ၊ သတင်းစာဖြတ်ပိုင်းစများ၊ ဆောင်းပါးစများဖြင့် ပြည့်နှက်နေသည်။

အဖြူရောင်စားပွဲခင်း, ခင်းထားသော လှပသေသပ်စွာပြုလုပ်ထားသည့် စားပွဲငယ်များအနက် တစ်ခုပေါ်တွင်တော့ ဓာတ်ပုံမှန်ဘောင်လေးတစ်ခုသာ ရှိနေသည်။

ကုံးရင့်ရှန် စားပွဲဆီလျှောက်သွားပြီး၊ လက်အိတ်များချွတ်ကာ၊ ဓာတ်ပုံမှန်ဘောင်လေးကို ယူလိုက်ပြီး ဓာတ်ပုံထဲကလူကို သူ့လက်ချောင်းသွယ်များဖြင့် ညင်သာစွာ ထိတွေ့သည်။

ရန်ရိ သူ့ဆီလျှောက်သွားတော့ ရန်ရိကို ဓာတ်ပုံမှန်ဘောင် ‌ကမ်းပေးလာသည်။

ရန်ရိ တည်တည်တံ့တံ့ယူလိုက်၏။ သူယူလိုက်ရတာက ဓာတ်ပုံဘောင်လေးတစ်ခုမဟုတ်၊ လူတစ်ယောက် ဆယ့်ရှစ်နှစ်တာလုံး သူစိမ်းတစ်ယောက်ကို မပေးခဲ့ဖူးသည့် ယုံကြည်မှုများပင်။

ထိုဓာတ်ပုံက မိသားစုလေးယောက်စုရိုက်ထားသောပုံဖြစ်ပြီး ရန်ရိ တွေ့ဖူးသမျှထဲမှာ အခန့်ညားဆုံး မိသားစုဆိုလည်းဟုတ်သည်။ ဖခင်က ခန့်ညားရည်မွန်၍ မိခင်က နှစ်သက်ဖွယ်ကောင်းပြီး ကလေးနှစ်ယောက်ကတော့ နတ်သူငယ်များအလား ချောမောလှပသည်။

ရန်ရိ ဓာတ်ပုံထဲက ကလေးဆန်ပြီး ချစ်စရာကောင်းတဲ့ ကောင်လေးကို ကြည့်လိုက်သည်။ သူ့မျက်လုံးတွေက စမ်းရေကြည်လို ကြည်လင်ပြီး သူ့အပြုံးက ပန်းတစ်ပွင့်လို ထူးခြားပြောင်မြောက်သည်။ သူ့အမေက လက်မောင်းတွေကိုကိုင်‌ထားရင်း ပျော်ပျော်ရွှင်ရွှင်နဲ့ လက်ဖြန့်ကားထားသည်မှာ ကမ္ဘာကြီးကို ထွေးပွေ့ရန် ကမ်းလင့်နေသည့်အလား။ သူ့မျက်နှာ၌ အကြောက်တရားမရှိ၊ ခက်ထန်ခြင်းမရှိ၊ ပူဆွေးမှုများလည်း ရှိမနေချေ။

သို့သော်လည်း များမကြာခင် ထိုကလေးသည် အရာအားလုံးထံမှ အဝေးပို့ခံလိုက်ရပြီး တိမ်စိုင်တွေကြားကနေ မလွတ်မြောက်နိုင်သော အသူရာချောက်နက်ထဲသို့ ကျဆင်းသွားရပါ၏။