Mon, Aug 23, 2021
{ UNICODE }
ရန်ရိ အိမ်ကနေအမြန်ထွက်ပြီး စခန်းသို့အပြေးသွားသည်။ လမ်းတစ်လမ်းပဲခြားပေမယ့် ပထမဆုံးအကြိမ်အဖြစ် အကွာအဝေးကအနည်းငယ်ဝေးသလို ခံစားရသည်။ ကုံးရင့်ရှန်ကို အမြန်မတွေ့ရအောင် ကာဆီးထားသလိုပင်။
လမ်းကူးပြီးတော့ စခန်းရှေ့မှာ ကုံးရင့်ရှန်ကားရပ်ထားတာမြင်ပြီး မြန်မြန်ပြေးသွားလိုက်သည်။
ကားမှန်တံခါး တဖြည်းဖြည်းနိမ့်ကျသွားလျက် နက်မှောင်သောညချမ်း၊ နက်မှောင်သောခန္ဓာကိုယ်နှင့် နက်မှောင်သော ကားအတွင်းပိုင်းက အသက်ရှူကြပ်စရာ ထောင်ချောက်တစ်ခုပုံဖော်ထားပုံရသည်။ ကုံးရင့်ရှန်ရဲ့ ကြွေထည်ကဲ့သို့ဖြူစင်သော ကျောက်စိမ်းအလှတရားသည်သာ ရောင်ခြည်ဖြာနေ၍ အမှောင်ထုအားရက်ကန်းခတ်သည့်နှယ် ထိုးဖောက်ကာ နေရာတစ်ခုလုံးကို အလင်းဆောင်စေသည်။
ရန်ရိရင်ထဲ လှုံ့ဆော်အားတစ်ခုဖြစ်တည်လာလျက်--ထိုလှုံ့ဆော်မှုသည်ကား ကုံးရင့်ရှန်ကို တင်းတင်းကြပ်ကြပ် ပွေ့ဖက်ထားချင်သည့်ဆန္ဒပင်။ သူလည်း ကုံးရင့်ရှန်ရဲ့အလင်းရောင်ဖြစ်ပြီး သူ့ခေါင်းထဲမှာ ဆယ့်ရှစ်နှစ်တာလုံးလုံး မှုန်ဝါးနေတဲ့မြူဆိုင်တွေကို ပယ်ဖျောက်ပေးနိုင်ပါစေလို့ ဘယ်လောက်တောင် ဆုတောင်းခဲ့ရလဲ။
ကုံးရင့်ရှန် ကားတံခါးဖွင့်၍ အထဲမှထွက်ကာ အပြစ်ပြောလာသည်။
" ခင်များကုတ်အင်္ကျီ ဘယ်မှာလဲ? ဘာလို့ ဒီလိုဝတ်စားပြီးထွက်လာတာလဲ? "
ရန်ရိ စိတ်ပြန်လည်လာပြီး ကုတ်အင်္ကျီမယူခဲ့ဘူးဆိုတာသာ သတိရသွားသည်။ သူထွက်လာတုန်းက သူ့အဖေလှမ်းအော်နေတာလည်း မဆန်းပေ။ သို့သော် သူအေးတယ်လို့မခံစားရ။ သူ့ရင်ထဲ မီးတောက်တစ်ခုရှိနေပြီး ကုံးရင့်ရှန်ကိုတွေ့တဲ့အခါ လောင်ကျွမ်းလျက် ပိုပူပြင်းလာသည်။
ကုံးရင့်ရှန် ကားနောက်ဖုံးဖွင့်ပြီး အထဲကစောင်ပါးတစ်ထည် ထုတ်လိုက်သည်။ သူစောင်ခါလိုက်ပြီး ရန်ရိကိုယ်ပေါ်ခြုံပေးရင်း တမင်တကာတောင် တင်းကြပ်လိုက်သေး၏။
YOU ARE READING
Flame Armor [ 火焰戎装 ]
ActionTitle -[ Flame Armor ] Original Author - Chapters - 196 chapters + 4 extras " 3 , 10 , 2020 " -- ရက်စက်သောမီးလျှံအား သံချပ်ကာဖြင့်တန်ဆာဆင်အပ်သော အဆင်တန်ဆာအဖြစ် ပြောင်းလဲ၍ အကျွန်ုပ်အား ခွန်အားသတ္တိနှင့် အကြောက်အရွံ့ကင်းမဲ့သော စွမ်းအားကို ပေးပါလော့...