حيدر بقة يشرح لجدو والبيبي انو شغلتها حيل صعبة وهي عازمتهم بدون فهم وتحشد بالجن وترجع ليورى
وهي مو شغلتي ولا شغلتنه احنا اهل الحوزة والساده وشيوخ
شغلتها عدهم نفسهم الي يخلصوها
.... يا همة
.... المشعوذين والسحره هم بس يكدرون يسحبوها منها وفرح مبينه متمسكه بالدنيا كسرت باب كلبي خايفه من الموت
من جهة ما اريد احد يعطف عليه وينقهر وينكسر كلبه
ومن جهة دموعي وعبرتي خنكتني من كلامه
شخصيتي حيل متناقضه كرهت نفسي من وراها
ما جاي احس بروحي عندي كيان من بدايات حياتي لحد هسة الانفصام راح يجننني
تجاهلتهم ونمت ما ادري بشي لحد ما كعدتني بيبي وغسلتلي وجهي وكلتلي يلا بيبي خل نروح
.... ها حنرجع للبيت
.... لا بنيتي راح نروح حتى نشوفلج حل حيدر كال نعرضها على كم سيد اذا ما فاد نروح للسحار حماده هذا اضبط واحد موجود بالنجف بلكي تخلصين منهم وترتاحين
لبست حجابي وعدلت نفسي وانطلقنا جانت سيارة جدو وخالو سيارات حديثة ومن افخم انواع السيارات
وسيارة حيدر سايبة تعبانه انقهرت عليه وكلت بس اصير زينه اجيبله احدث سياره مدري ليش نزلت عليه الحنيه فجأة ولا اني اكره علاقات الاخوة
رحنا لكم سيد يعرفهم بس يباوعلي يرفضون
اخر شي ايسنا وغربت شمس
وكال ما بقه غير حماده بلكي يكدر
وانطلقنا للمقبره القديمه
صفينا سيارات على صفحه وجدو لازم ايدي من جهة وبيبي من جهة عبالك زعطوطه
ونمشي بين القبور بالكوة حتى مرات منكدر نفوت اله ندوس على القبور
شكد بقينا نمشي فوك الساعه
احد ما وصلنه غرفة مدحوسه دحس بين المقابر بلكوة مبينه
فوك الباب ضوة تعبان حيل مبين قديم لونه احمر وتأثيره يخوف
بقينا ندك بالباب محد طلع
....عنده ناس لازم ننتضر يطلعون يله يفتح الباب
.... اكلك جدو حيدر انته منين تعرف هذولي الشكولات انته وين همة وين
....اني ما اعرفهم معرفة شخصيه بس من جنت اريد مدرس حوزة جنت من ادور صدفه واعرف هذا بيت الساحر الفلاني وهيجي
....وانته ادور مدرسين حوزه بالمقابر
ضحك حيدر وكال لا جدو سالفه طويله ربما انو احنا مطولين خلينا اسولفها الكم نكضي وكت
