لا يطريك تزعل مني ادري انا الغلطان
سواتي معك قليل غيري .. يسويها
ولكن تجاوز من قصوري لا شفته بان
الين الله يرد المياه .. لمجاريها
،
خرجت من الحمام وهي تلفُ المنشفة حول جسدها النحيل بينما
المنشفةُ الأُخرى تغطي شعرها الطويل وقفت امام المرأة وبدأت بالغناء
حبيبي ولا على باله شوقي اليه ولا شاغله بالي انادي عليه
لتردف وهي تُقبل المراية / تبارك الرحمن قمر والله قمر أجمل وحده في قصر
محمد الله يحفظني من عيونهم واضح حسودين اكيد ليه ما يحسدوني
جمال ورقة ودلع
سعيدة وهي تضع صينية العشاء / يا الله يا الغثي تعالي اخلصي على
ارتدت جلابيتها وعلى عجله ظهرت لها وبصوتً بري /
خير معصبه وش سويت؟
سعيدة بسخرية / لا حشى ما سويت شيء لأبدن بس بغيتي تنكبينا
وبغيتي تفضحينا وتهلين علومنا ابدا ما صار شيء
وقبل أن تمد يدها للطعام سحبت يد والدتها وقبلتها بعمق
وبصوت مُحب / اسفه يا عمري انتي والله ما عرف وش يخليني اتصرف كذا؟
سعيدة بطرف عين/ أي اخذي عقلي بكلمتين
نجلاء بتمثيل/ صدقيني يمه انا بدون شعور اتصرف توقعين أحد مسوي لي شيء؟
سعيدة ترد باستهزاء / على ويش على الجمال الى يقوطر والا العقل الى الكل يشهد به
نجلاء بغرور / الجمال خذته من امي شيخة النسوان وبنت راجح شيخ العرب
والعقل من جدي متعب لأمل الشمل
سعيدة بملل / أقول ابلعي وانتي ساكته لو عمي متعب نفسك كان اللحين يأكل الخيوط
نجلاء بكذب / امهم العودة صافيه ماتت على قالت لو عندي ولد كان
خطبتك تقول ما عمرها شافت أحد بجمالي
سعيدة بمجاره / تصدقين حتى انا سمعتها بأذني
طُرق الباب سعيدة بتأفف / يا رب توني أقول بنام وبرتاح
لتردف نجلاء وهي تلتقط الخمار/ خلك يمه انا بقوم اشوف من؟
فتحت نجلاء الباب وبهدوء / هلا بو احمد
المؤجر بو احمد / شلونك يبه وين أمك؟
نجلاء بملل / بتنام؟
بو احمد / نامت والا بتنام؟
نجلاء بغباء / نامت الا شوي
بو احمد / نادي أمك ابغيها شوي
نجلاء باندفاع / اسمعني إذا تبغي تخطب أمي تراها متزوجة
بو احمد / حمد الله والشكر ما أني رايق لهبالك ناديها
سعيدة باستغراب/ اشفيك لزقتي بالباب من هنا؟
بو احمد / اختي شلونكم طيبين؟
سعيدة تبتسم تحت الغطاء / الحمد الله طيبين أمرني واسمح لي ما أقدر اقلطك الوقت
متأخر وما عندي رجال
بو احمد يهز راسه بتفهم / المهم اليوم صار امرين بقولهم لك
سعيدة تبلع ريقها / تفضل
بو احمد / جاءني شاب وسألني إذا فيه حرمه معها بنت استأجروا في المنطقة طبعا
يقصدكم ومشيته ما عطيته العلم
سعيدة بخوف / والشيء الثاني
بو احمد / بو سلطان الشيخ محمد طالب اثباتاتكم وانا توهقت قلت له انكم من
البادية وراح تروحون لعزبتكم بعد اسبوع تجيبون اثباتاتكم
نجلاء تلوي شفتها السفلية / وإذا ما جبناها؟
بو احمد / ما راح يسكت الشيخ وراح يطلع علمكم
سعيدة بتوتر / ما عرفت اسم الى سال عنا؟
بو احمد / لا والله ما قال
نجلاء بشك/ أوصفه لي إذا ممكن؟
بو احمد / شاب طويل جسمه زين لا متين ولا ضعيف وما شاء الله وسيم
نجلاء تبتسم / وسيم وسيم والا وسيم جدا
بو احمد باسترسال / بصراحة عليه زين تبارك الله الواحد يخطب من اهله وهو مغمض
سعيدة بهدوء / مشكور أخوي ما أنسى خدمتك
غادر بو احمد لتغلق الباب نجلاء وسعيدة أمامها تمشي بخطي هادئة للصالة وقبل ان تجلس
تمايلت عليها نجلاء
وبصوتها الضاحك / لاهوب يدور لي لاهوبي حوووبي ومستقبلي
سعيدة دفعتها / انتي وين وانا وين لاهوب امره بسيط المصيبة في الشيخ الى وهقتيني معه
نجلاء بعبط / يحبني يمه مثل حبي له
سعيدة تهز راسها بأسف / والله لو بيدي أقول له ما يتزوجك لأنك خبل
اللحين الشيخ محمد موضوع بروحه
نجلاء بثقة / تبغين أكلمه؟
سعيدة برعب / لا والله اسمعيني قسم با الله إذا ما اعتدلتِ لأكون مأخذه منك موقف
نجلاء وهي ترمي الخمار / حتى انا أبغي اخذ موقف معك وين تأخذينه؟
سعيدة بقهر / اخ يا قلبي ما عرف انتي ليه كذا؟
نجلاء باستغراب / وش سويت؟
سعيدة فقدت اعصابها / انتي عقلك فيه شيء والا تبغين تجلطين
نجلاء وهي تغلغل اصابعها بشعرها وترفع شفتها للأعلى /
والله ما فيني شيء، اشفيك على معصبه؟
سويت شيء يضايقك؟
سعيدة بتعب/ بروح انسدح أبرك لي إذا قعدت معك أكثر بنشل
أنت تقرأ
تائهون إلى أن يشاء الله
Hành độngمتاهة الثأر المهابة لا تصالحْ! ولو منحوك الذهبْ أترى حين أفقأ عينيكَ ثم أثبت جوهرتين مكانهما.. هل ترى..؟ اذا لا تصالح ....
