#قطعه_مني
#الحلقه_الثانية
#بقلمŃř_Ŕòhã
فتحت الجهاز لقيت تسليم الرساله وجاني مسج ونصدمت (نور دنيتي ربي ايسر امورك وافقي علي العريس)..نقرا ودموعي ينزلن بسرعه رهيبه لالالالا عاودت نتصل بيه بس مع الأسف مقفل دزيت مسج (اسو حبيبي نبضي حي عليا ماديرش فيا هكي اسو انا نبيك انت اسو نبي نكون حلالك انت اسو وين وعودك ليا اسوو ماتسيبني في نص الطريق وراسي انا بلاك ولاشي افتح جهازك ارجوووك😭)
سرتلي هستيرة وجسمي سقع مرة وحده حياتي وقفت في ثانيه انا مش متخيله اني نكون مع شخص غيرة 7سنوات وفيه معاه معاه في المرا قبل الحلوه بعد السنوات هذين يقولي شوفي نصيبك ليش حبيبي ليش يادنيتي حي عليا انا نار في قلبي والعه محرها بعد علاقه سنوات يرخي بيك
نذكر في يومها عالقه علقتها وصداع رهيب جسمي معش سخن بارده منصدمه شعور غريب عمري ماحسيت بيه سهرت في يومها ع امل يجيني تقرير استلام بس مقفل معش فتح ولابررلي ولا اي شي بعد المسج اللي دزا ساعه 4:12كنت راقده ع سريري من كثر مابكيت في يومها رقدت بدون مانحس كانا في حد يوعي فيا وعيت اعيوني ذبلات بس مافيش حد خذيت جهازي رنيت عليه الرقم المطلوب مقفل😭
معش جاني نوم مشيت توضيت وصليت ركعتين وخذيت القران بديت نقرا في سورة(ياسين)كانت اقرب سورة لقلبي قريتها وصكرت القران ورفعت ايديا
ياربي انت تحب العبد الاحوح ياربي انا جيتك ماليش غيرك ياربي لوكلهم قعدو ضدي انت معايا ياربي انا نحب ياسين ياربي اربط قلبي بقلبه😭ياربي مش متخيله حياتي مع غيرة ياربي الدنيا كلها اصكرت قدامي ياربي كون معايا ياربي اجمع بيني وبين ياسين ياربي نبيه هوا حلالي😭ياربي مايرخيش بيا في نص الطريق ياربي كون معايا ماليش غيرك 😭😭😭وانا ندعي سمعت صوت اذان الفجر كانا في داري صوت هادي جميل مريح شعور مش عارفه كيف نوصفه حسيت دفيت ودموعي جفن قعدت نسمع في صوت وسرحانه وعيوني متنفخات من كثر البكا كأنا ربي يقولي انا معاك لوكل الناس رخت بيك انا معاك وجنبك مانسيبك الله ع الشعور اللي حسيته في وقته😭
صليت الفجر وعاودت رنيت عليه مقفل رقدت
لايَضُرُّكَ شيءٌ مِنَ الفُقدَانِ، مَا لم تفْقِد مقامَكَ عنِدَ الله.___________
صباح يوم جديد وتحديداااا ساعه10 وعيت علي صوت عمي
عمي..مبروكه وتي روحك
مبروكه...هيا هيا نشوف نور بس
مبروكه...طقطق نور
انا...نعم خشي
مبروكه...صبحك الله بالخير
اناا..صباح النور
مبروكه...مشيا انا عمك نجيبو في نواقص لبكرا
انا...تمام
مبروكه...عشان مرات تزحم
انا..تمام
مبروكه..وبعدين توا تمشي مع هاجر تجيبي لبسه
انا...لامش ضروري عندي
مبروكه..كيف مش ضروري خوالك جيين شن يقولو
عمي..هيا يامبروكه
انا...كان جو عادي عندي دبش
مبروكه..عمك ركب عليا مع السلامه
اناا..في امان الله
طلعت عمتي وعمي ومشيت غسلت وغيرت ادبشي وبرمت علي الحوش غير انا بس اللي فيه الشباب في صالات عمي وهاجر في جامعه
لهيت لاذكرت جهازي برغم اني اول مانفتح اعيوني اسو اول مانصبح عليه اسو ....
في السيارة
عمي...شن رائيها
عمتي...والله شن نقولك ياناجي حسيتها مش طاربه
عمي...والله اخترت راجل وعارف انا يصونها
عمتي..انت تقول هك اقنعها
عمي...بعد بجن الصبايا بعدها يجي نظرة شرعيه بعدها ساهله
عمتي..انشالله خير
ومشا الوقت وسمعت صوت الباب
انا...من اللي جاينا توا
الجرس...ماوقفش
انا...انشاءلله خير هيا هيا جيت من
سارة...انا نونا
انا..نجك ليا جيتك فتحت الباب احلا واجمل صديقه صندوقي الاسود اكسجين في يومها بحضنها
وين ياحقيرة معش تسألي علي
سارة...😭
انا...عارفتك مرايفه علي 😭😭😭عندي عرم كلام نبي نقوله لك
خشينا في داري
سارة....مافيش حد
انا...خوذي راحتك انا بس
سارة...حتي انا مش مطوله
انا...روحي والله مانك طلعتها مرايفه عليك شوفي قد شنو ماشفتك وحضنتها
وبديت نحكيلها علي كل اللي صار فيا من اول شي للأخر
سارة..حضنتني مافيش حد يستاهل بما انا هوا فك فيك شوفي هذا هذي اشارة من ربي اكيد رايدلك الخبر
انا...وعارفه ربي مايخيب ضني اكيد اسو ليا
سارة..امس هل ياسين حولو من الشارع
انا...🥺😳كيف يعني توا نبي نسألك عليه ماشفته
سارة..جت امه سلمت ع امي هما من فترة يبيعو
انا...مستحيل اسو ماحكليش علي قصه بيعه بكل
سارة...والله امس في ليل شالو وتوا فيه وحدين شكلهم اللي شروه يسيقن وهك قالت لامي خذوه وحدين جيين من الغرب
انا...تحكي جد
سارة...والله باعو
انا...باهي وين قعدو توا
سارة...والله مش عارفه ماقلتش
انا.. اووووف هوا مقفل
سارة..كان يبررلك قبل
انا...حي علي ياسويره كان مش نصيبي نموت😭😭😭حياتي سمحه بيه
ساره..🫂خلاص نونا كان ربي يبيكم للبعضكم والله ح يجمعكم
ومشا حديث بيني وبين سارة مرة نبكي مرة نحكي لعند مافات الوقت واذن الظهر
سارة...وين ظهر نرن علي بابا
انا...خليك ماشبعت منك🥺
سارة...والله مانقدر الو بابا تعال
انا..حقيرة خليك معايا توا نطلع عليه
سارة...قالي قريب منك توا نجيك مرة اخرا
انا...مش جيه
سارة..حاضر
انا..ماتخليني نرياف عليك
سارة..بحضن طوويل نونا عينك من روحك وافقي علي العريس اللي جايك اكيد فيه خيرة لك
انا...لالا مش حنوافق الا لما نسمع اسو ليش قال هكي
سارة..براحتك جهازها يرن اكيد بابا وصل
انا...نرايف عليك
سارة..توا نجيك قريب
ومشت سارة وجت هاجر جوها خارب خشت لدارها ماحبيت نسألها انا بروحي في همي وقعدت حايسه بروحي وافكار يمشن ويجن ليش ياسين دار هك ماحسيت بروحي الا عمتي مبروكه تناديني
انا...نعم جيت
مبروكه..شوفي شن ناقص
انا...ماشاءالله متعبين ارواحكم ماناقص شي
مبروكه..عيب هذوم اضيوف
انا..ساااكته
خذيت الحاجات ونضمتها وكاني نلهي في روحي
مبروكه..نور الغداء اللي جيبينا خليه علي ماجو هادي وفرج
انا..حاضر
كملت كل اللي في ايدي ومشيت لداري لقيت تقرير استلام😍رنيت طول طلع بالمشغول وعاود عليا
انا...اسووو حبيبي وينك
ياسين..نعم نور
انا..اسوو وينك من امس
ياسين..قاعد
انا...شن قصه الرساله اللي دازها وليش مقفل من امتي تقفل في تلفونك عارفني ننشغل عليك المسج عارفته مش من قلبك وان..
قاطعني
ياسين...لاكتبته بكل قواي العقليه شوفي نصيبك معش تسكنيلي
انا..اسوو مستحيل اتكون انت اللي تحكي معايا
ياسين..ههه شن تبي يانور
انا...نبيك
ياسين..وانا معش نبيك
انا..اسوو
ياسين..ها نور شن تبي مش فاضي
انا...كيف معش تبيني فهمها ليا
ياسين..واضحه معش نبيك
انا...كيف هذي اسو انا نور دنيتك 😭حرام عليك كلامك يوجع فيا
ياسين..قتلك شوفي نصيبك
انا...نبيك انت نصيبي حبيبي مش قادرة حرام عليك انحبك انا
ياسين..ساكت
انا...اسو عارفه ضغط عليك وحياتك متلخبطه بس سعادتي وراحتي معاك حبيبي😭محرها اسو مش حاسس بيا ارحمني الدنيا اصكرت في وجي
ياسين..اكيد حتكوني متريحه معاه
انا...راحتي معاك
ياسين..شن تبي يانوور عششتيلي
انا..مستحيل تكون اسو قاعده انترجا فيك انت اسو اللي ماتحملني بكل ولاتحمل ادموعي كاني نحكي مع حد ثاني نقولك نبيك تقولي شوفي نصيبك انت نصيبي من الدنيا
ياسين..انا مش لك ولا انتي لي
انا...وال7سنوات اللي عدو كذب كله
ياسين...تمشايت وقت
انا...كيف كيف
ياسين...نزوه
انا...اسو انت شارب شي
ياسين...ورحمه باتي بكل قواي العقليه
انا...بس انا حبيتك فيهن السنوات هذين ل توا 😭😭😭😭😭
ياسين...نووور امي خطبتلي بنت خالي والفرح تحدد
انا...في وقتهاا كانا حد طعني بموس حاجه وجعتني في قلبي اسو😭كيف
ياسين..كيف ماسمعتي
انا...وانا باهي
ياسين..اهو بنطلع راجل معاك ونقولك شوفي نصيبك ماترجانيش
انا...عشت في وهم انت مستحيل تحب وحده غيري كان خذيتها تكون جسمك بس روحك معاي اسوو
ياسين...ساكت
انا...رد عليا عشت في وهم خليتني ندمنك
ياسين..جاك من يناسيك ياسين
اناا..مستحيل نقدر ننساك روحي انت روحي
ياسين...شوفي نصيبك يانور
انا...ربي مايهنيك معاها ربي يكسرك كيف ماكسرتني فيك😭😭😭😭😭😭😭😭😭😭حتي وانا ندعي مش من قلبي اسووو
ياسين..عينك من روحك نور
انا..روحي كنت مأمننك عليها كسرتها
ياسين...صكر الخط في وجي
عارفين شن حسيت في وقتها عارفين شن الشعور اللي حسيته
كيف ماتوقف الساعه البطارية علمت معش تخدم هك الشعور والاحساس اللي حسيت بيه عشرة عمر حياتي تفاصيلي الكبيرة قبل الصغيرة عارفهن كل حبي مشاعري عطيتهن له حاجات عرم واجد حسيت الدنيا صغرت قدامي مازلت مصدومه من كلامه ليا واسلوبه اللي تغير واااااااو لو اعيوني يشوفن هك نطلعنهن من مكانهن ونقول يكذبن
لم يكُن حبًا كان درسًا قاسيًا من الحياه ليجعلنى أُدرك أن لا مكان في هذا العالم لقلبٍ ليِنّ. وأن المُبالغة في الأشياء تُنهيها💔
فات الوقت وكنت في داري ماطلعتش بكل مش قادره نحكي ولانعبر ولاشي صاح هاجر اكبر مني بس مش متعمقه فيها لدرجه نحكيلها ع علاقتي ب ياسين كانت مخصصه حياتها للدراسه فقط...
من نحكي من نشكي كلمت سارة مقفل اسودت الدنيا قدامي
عدا اليوم بدون اي احداث عمتي مبروكه حايسه ع الضيافه كانا عريس جاي للبنتها وتبي ادير الزينه قدامهم_____
صباح يوم جديد
هاجر...نور نور
انا...امممم هاجرررر
هاجر..نوضي ياحنه
انا...ساعه كم
هاجر...11:29
انا...تبصري صاح
هاجر..لاوالله شوفي
انا...وين هذا كله
هاجر..اعيونك عااار
انا.كنهن
هاجر...شكلها ليله صايره فيك
انا...اذكرت بابا وماما كان معايا
هاجر...الله يرحمهم
انا...اللهم امين
هاجر...صبي نظمي امورك علي ماشيت درتلك كمدات علي اعيونك
انا...مش داعي
هاجر..تحشمينا قدام الناس
انا...هاجر
هاجر...نبصر انتي بكل حالاتك سمحه
طلعت هاجر وانا مشيت خذيت دش دافي ونظمت جوي وطلعت
مبروكه...كنهن اعيونك
انا...شي
هاجر...اذكرت عمي وعمتي
مبروكه..🫂فقدينهم كلنا
انا...😭😭😭نبيهم
هاجر..لالا اعيونك عار من غادي يابال تبكي
مبروكه...الله غالب نصيبهم ونحنا هلك من بعدهم
انا...مش قادره😭😭😭وكاني كنت نبي حد يحضني ونطلع اللي في قلبي كله
بعد حسيت روحي تريحت
هاجر..افطري
انا...ماعنديش نيه
هاجر..معناها تعالي ع طوله الاكل
انا...عليش
هاجر...نديرلك كمدات
انا...عادي خليهن
هاجر...عينك
انا..جيت هيا
بدت هاجر ادير في كمدات وبدت في الاقنعه ومشت معايا في داري طلعتلي فستان كم طويل ابيض اموج بالوردي واسع بسيط وهادي
هاجر...نونا هذا اللي البسيه
انا...باه
هاجر..تعالي نديرلك استشوار
وبدت اديرلي لعند م كملت
هاجر...مش متعب ناعم بس واجد
انا...تعبتي روحك
هاجر...ماشاءلله يانونا طول اخرا بعد الاستشوار😭
انا...حتي انتي شعرك سمح
هاجر...خربته بالقص
انا...معناها معش تقصيه
هاجر...كان يبي يقعد كيفك معش نقصه
انا...😅وبدت اديرلي في مكياج خفيف وهادي وطلعت اكسسورات هاديات
وجو خوالي ومراه خالي
انا... نسلم وين الباقي
حنان..والله امتحانات وعيالهم مايقدرو يسيبوهم
انا...كنت انتمنا انكم تجو كلكم
حنان...والله يبنها ان شاءالله في الفرح
انا...ان شاءالله
مشيت سلمت علي خوالي.. علي وموسي مراااايفه عليهم ريحت ماما فيهم😭
وبعد العصر ساعه5:15 دق الباب
هاجر...خشي
انا...هيا
جن 4صبايا مافيش حاجه مش جيباتها بوكسات الحلويات والعصاير انواع مكسرات فواكه
هاجر...ماشالله ماشالله العقبالي ياربي
انا...تقول اول مرة يطلب
هاجر...😂😂اكيد في سبب اللي سيبها توا تعرفيها بعدها تقوليلي ايواا
انا...مايهمني
هاجر...بدينا في جو حتي راجلي
انا..من ومن جا
هاجر...4امه وعمته وخالته واخته
انا...اهاا باه
وبدت هاجر وحنان في تضييف وحايسات لعند ماقلتلي خشي دزن عليك قلبي وقف
انا...لالا
هاجر..😆😆شن اللي لا
انا..مش ماشيه
هاجر...عيب
انا...نبيش
هاجر..خليك قويه وخشي خشي بثقه بعد نبحت فيك اطلعي مش تسكني معاهن
انا...باهي خلاص خشيت وهنا 😳😳😳ماشاءلله ماشاءلله ماشاءلله
مبروكه..هذي هيا نور
امنه امه...ماشاءالله اسم علي مسما
سلمت..والعيون كلهن عليا لعند ماشفت ضل هاجر حركت راسها حركه سريعه بمعنا خشي
خشيت قعدت معاهن في المطبخ
وكملت الضيافه كلها وتنسيق كان خيال بمعنا الكلمه
بس انا مش معاهن بكل كل تفكيري عند ياسين ياربت لو كل شي لياسين كان فرحتي غير كاني شمعه وطفت
عمي...مبروكه
مبروكه...نعم ياناجي
عمي..قولي ل نور تجي
مبروكه..وين تجي
عمي...للمربوعه
مبروكه..كيف المربوعه الرجاله قاعدين
عمي...لالاعدو قاعد جلال يبي يشوفها نظرة شرعيه
مبروكه..مش مفروض بكرا اقل شي
عمي...سقديني يامبروكه عليش نعطلو فبهم هوا يبي يشوفها توا
مبروكه...خلاص توا نمشي نشوفها
انا...فاتحه جهازي ونصفح لقيت اسوا كانت مخطوب تعليقات 465تعليق مباركات كانا واخذاها عن حب من طريقه الرد عليهم😭 يدي يرعشو جسمي سقع نبي نطير نبي نختفي نار ولعه فيا
مبروكه...نور وينها
هاجر..برا قاعده
مبروكه..نور عمك يبيك
انا..ادموعي جفات لكن علامه الصدمه واضحه ع وجي تضربني مايطلع دم مني
مبروكه..هيا
انا...نحرك في راسي بمعنا شن يبي
مبروكه.نظرة شرعيه
انا..باه
مشيت هاجر ابتسامه خفيفه ولبستلي وشاح شفاف وشعري كيف ماهوا مشيت معاها وخطواتي ثقيييييله دقت الباب مبروكه
عمي..هيا هيا خشي نور
انا...ع م ي
عمي...والله مانبي نكثر عليك لكن انا انحرجت بعد قالي نبي نظرة
انا..هزيت راسي باه
عمي..انا هنا يلا الباب برا
انا..ليش كاني نحكي وسكرانه
عمي..عشان..تاخذي راحتك
انا.ولاكلمه
عمي طلع
وانا خشيت للمربوعه العطر اللي قالب الدنيا مخدر مش عطر خشيت وسارحه وقفت فجاءة صبالي طول في عرض عضلات حواجب اعراض اللحيه🔥اللي زايدته سماحه لبسته اللي كلها اسود ف اسود شخصيه تخوف اللي شفتها قدامي انا جايه في بطنه😂طويل بكل
جلال...مرحبا مد يده الصوت الرجولي وثقيل مش متاع بصارة 💔لاضحكه ولاتبسيمه
انا..نشوف فيه وساكته
جلال...قلت مرحبا
انا...لساني ثقل اننن هوب طحت
جلال..استغفر الله ياعمي ياعمي
عمي...نعم
عمي...ييه نور نور
نور...في عالم اخر
جلال..شوي ياعمي يخبط كفوف ع وجي
عمي...منصدم شن ادير انت
جلال..نوعي فيها
عمي..مااشوف في وجها ماكانا فيها دم
انا..بديت نفتح بشوي لعند ماركزت فمي ناشف
عمي نور...بحتي فيا
انا...نبحت
عمي..تشوفي فيا
انا..هزيت براسي مانبيش😭
عمي..انحرج نور هيا نخشو جوا
جلال..بما انها تحكي خلينا نحكو شوي ياعمي
انا..لالا
جلال..رفع حاجب فعلا شخصيه مرعبه
عمي..نور
انا..طبست
عمي..هاكي اميه
انا..خذيت نشرب فيها وقاعده ع الفرشه
عمي طلع
جلال...شوفي يابنت الناس انا مايمشنش عليا الحركات هذين
انا...نبحت فيه وساكته
جلال...جو ادوخي وهك عليا انا مايمشنش تم
انا..انا ولاكلمه لكن جسمي اميه وداهشه ومش قادره حتي نرد عليه
جلال..سمعتي شن نحكي انا
انا...انا عندي السكر
جلال..كيف
انا...انا مريضه سكر طبيعي نطيح بعد يهبط
جلال..رفع حواجبه
انا...طبست
جلال..عمي ماقالهاش لنا
انا...مايبيش يحرج باتك
جلالك..اهاا عمي عمي
انا...لالا شن تبي ادير
عمي..ها خلاص
انا...مغمضه اعيوني😞
جلال..تمام ياعمي لكن نبي نقول علي شي
انا...فتحت اعيوني🥺
جلال ..الفاتحه مع السياق والفرح نهايه الشهر اتفقت مع نور علي كل شي
انا....😳😳😳😳كيف
جلال...تمام ياعمي وقوللهم هيا
عمي..هيا وانشاءالله كل شي علي البركه
انا..نبحت فيه ومنصدمه صبيت نبي نطلع ورا عمي
جلال...اسمعي اشعرك لفيه
انا...انبحت وساكته
جلال..والسكر توا انعالجه بطريقتي ماتخافيش
انا.....انت واحد................#يتبع
اسفه لو في لخبطه في الاسماء
انشالله تنال #اعجابكم
#انتظروووني_في_الحلقه_الثالثه
#ديرن متابعه❤
ياريت اللي تقرا تثبت وجودها بتعليق ولايك👍❤
