#قطعه_مني
#الحلقه_التاسعه_عشر
#بقلم_ Ñř Ŕóhã
واحمل وجعآ جديدآ ، جآء على مقاس وجعي القديم تمآمآ ..
انا..صبيت لقيته رقم غريب مارديت حطيته علي الصالون ونبي نرد لدار سمعت صوت رساله رديت
فتحتها(انا رنده طليقه جلال ردي ضروري).
انا..واقفه في مكاني نقرا عاودت الاتصال خشيت في الدار
انا..الوو
رنده..الوو انتي نور
انا..اها انا نور تفضلي
رنده..انا رنده طليقت جلال نبي نقولك جلال والله مايفكر فيك ولاح يحبك في يوم خذاك عشان رغبت باته وبس ح يرقدك علي ضرب وينوضك علي ضرب كيف ماكان يديرلي انا اها نسيت نقولك يحكي معايا يومي ونادم علي كل شي داره معايا يعني كان خذاك بس عشان يرضي باته نصيحه طلعيه من راسك حتي وانتي علي ذمته ح يكلمني ويكون متواصل معايا اطيري تنزلي بينا شاهين وح يردني ح يردني طلعي جلال من راسك يانور ماتبنيش احلامك علي الفاضي جلال ليا انا لاخر العمر
انا..عليش كلمتيني انا
رنده..انقولك جلال مصيره راجعلي انا ام اوليده وانتي ح تكوني مجرد نزوه عابره بالنسيه له ودليل علي كلامي معطيك رقمي القديم لانك ولا شي وهذا قدرك
انا..كيييف رقمك القديم
رنده..رقمي اللي عندك يالحلوه كلامي وقلته شدي كرامتك اشوي وقولي معش نبيه خيرلك خليها اتجي منك
انا..بس انا جلال بعد طلبني انتي مش في حياته ولاخربت بيتك
رنده..صاح انا اطلقت منا بس راجعلي راجعلي
انا..جسمي بدا يصقع ويعرق دموعي ينزلن بدون صوت بس مش قادره نبي نستوعب هذي شن تحكي انا ماخربت حياتها ولابيتها جلال تقدملي وهيا مطلقه صكرت الخط في وجي وتم الحفظ التسجيل....
قعمزت علي الوطا وحاطه يديا علي راسي ونبكي شن اللي يسير معايا انا مانستاهل كل هذا حياتي خربت معش عندي ثقه في حد ياسين ساره كل اللي نحبهم خيبو ضني فيهن 😭
هبه..نووور يانوور
انا..مازالت علي الوطا ونبكي محروقه ومقهوره علي اللي يصير
هبه..افتحت الباب شافت منظري ودموعي علي خدي ومش قادره حتي نبكي بصوت كامته بكيتي
هبه..جت تجري نور نور كنك
انا..بحتت فيها ودموعي ماوقفو هبه انا نستاهل كل اللي يسير معايا
هبه..تمسح في ادموعي انتي تستاهل كل خير شن فيه ياسين كلمك
انا..حضنها لاااااا هل المره جلال هبه
هبه..شن دارلك
انا..طليقته كانت علي التلفون
هبه..كيف من عطاها رقمك
انا..افتحي التلفون وشوفي التسجلات
___
جلال..في مكتبه في يده قهوا ودخان في فمه
الشرطي..افندي
جلال..تفضل
الشرطي..جاك الضرف هذا مدا له
جلال..ليا انا
الشرطي..جا ابأسمك ومكتوب علي الضرب اسمك
جلال..من جابه.
الشرطي...مش عارف علي نسلمه لك وبس
جلال..تمام الباب في يدك
الشرطي..تمام وطلع
جلال..يفتح في الضرب طق الباب
جلال..تفضل
كمال..جيت صباح الخير
جلال..صباح النور
كمال..شن هذا
جلال..مش عارف نفتح فيه
كمال..من محكمه
جلال..بدا يقرا في الورقه رافع حاجبه ويضحك
كمال..شن فيه
جلال..تهنئه بفرحي بتهديد
كمال..تحكي جد
جلال..مدله الورقه
كمال..هوا نفسه
جلال..نفسهه
كمال..في عندهم يد في المركز اللي يعرفو كل خطواتك
جلال..هههه
كمال..كنك تضحك تهديد هذا
جلال..عارف خليهم يهددو عادي
كمال.مش خايف علي روحك
جلال..الخالق الراس قاطعه مافي حد يموت ناقص عمر
كمال..انت عارف من يدزلك صاح
جلال..شبه عرفت
كمال..من
جلال..يطفي في الدخان يجي يوم وتعرف
كمال..قولي رفيقك انا
جلال..عمري مادخلت في شغله لك لو نحكيلك نخشك في الموضوع وانت عندك عايله وعيال اصغار القضيه هذي شوري وانا اللي كنت ماسكها وانا اللي ننهيها
كمال..تم يانصي غير خايف عليك بس
جلال..العمر واحد ياراجل يحسابو بشوي كلام نجي نرعش هه
