သူငယ်ချင်းသို့ ( To Friend )

အပိုင်း ၃

Unicode✍

တံတောင်ဆစ်ဖုံးရင်ဖုံးအင်္ကျီအဖြူလေးကို ချိတ်တပ်ကျောင်းစိမ်းထဘီလေးနဲ့တွဲဝတ်လိုက်သည်။ မိနွယ်က ရိုးရိုးထမိန်ကိုကောင်းကောင်းဝတ်တတ်သော်လည်း ကိုကြီးသာကချိတ်တပ်လုံချည်တွေ လေးငါးခြောက်ထည် အပ်လာခဲ့ပေးတာကြောင့် အလကားမဖြစ်စေရန်ဝတ်ရမည်။

အနည်းငယ်ရှည်လာသော ဆံပင်ကိုနှစ်ဖက်ခွဲကာ ကျစ်ဆံမြီးကျစ်လိုက်ပြီး ကိုကြီးသာသွေးထားပေးသော သနပ်ခါးကို ရေပြန်ရောကာ အဝိုင်းလေးတွေကွက်လိုက်သည်။

'ငယ်လေးရေ..ငယ်လေး.....မိနွယ်'

'ရှန် ...'

'မရှန်နဲ့ လာဒီမှာရွာထဲက ကောက်ညင်းပေါင်းနဲ့ အကြော်ပူပူလေးဝယ်လာတယ် လာစား အဘကိုပါတခါထဲခေါ်ခဲ့'

'ဟုတ်'

မိနွယ် အဘကိုသွားခေါ်ကာ ကောက်ညင်းပေါင်းနံ့လေးမွှေးနေသော စားပွဲဝိုင်းဆီသို့ ခပ်သွက်သွက်ထွက်လာလိုက်သည်။

'အငယ်လေး နင့်ဟာကအခုမှ၆နာရီတောင်မခွဲသေးဘူး အစောကြီးရှိသေးတာကို အဝတ်စားတွေလဲထားကုန်ပြီလား'

'‌လဲပီးပေါ့ ကိုကြီးသာရ ဒါစားပြီးရင်သွားတော့မှာ စောစောသွားမှခုံဦးရမှာပေါ့ကိုကြီးသာကလဲ'

'ခုံများဟာ အဲ့လောက်အစောကြီးသွားဦးစရာလိုလို့လား'

မိနွယ်မျက်စောင်းထိုးကာကြည့်လိုက်တော့ အဘကကြားထဲမနေနိုင်စွာ

'နေပါစေသားကြီးရယ် သမီးငယ်က ကျောင်းဖွင့်ရက်ကိုစောင့်နေတာ ခါတိုင်းနှစ်လဲ ဒီလိုရက်ဆိုအစောကြီးသွားတာပဲ ဘယ်တုန်းကပြောလို့ရဖူးလို့လဲ ငါ့သားရာ'

အဘကရယ်ရင်းဆိုတော့မှ ကိုကြီးသာက ဘူးသီးကြော်ကိုပါးစပ်ထဲထိုးထည့်ရင်းလိုက်ရီသည်။
သူတို့သားအဖ ဘယ်လောက်ပြောပြော နောက်ဆုံး
မိနွယ်က ဒါဆိုဒါပဲ လိုက်ရောပေးရသည်ပင်။

_____

နဝမတန်းပထမဆုံးကျောင်းတက်ရမည့်နေ့။
ခက်ကရှေ့ဆုံးတန်းမှာသာထိုင်လေ့ရှိသူမို့ မိနွယ်ပါရောရောင် ရှေ့ဆုံးတန်းကထိုင်ခဲ့သည်မှာ လေးတန်းကထဲကပင်။