شرفي عندك

البارت الخامس

كلامي لازم تفهمه
شوف اسلوبي وتعلمه
آنه محد كسر خشمه
آنه الأول آنه الفرگاك
ما همه لازم بيه تتباهه
آآآآنه البصمه

آيسن/ اني أكثر الأحيان ألوم نفسي لآن اگول اني ما تعبت نفسي ومنعت موج بس الانسان اذا براسه شي ما يگدر ألف يمنعوا من الي يريد يسوي اني چنت أنشر ملابس من حسيت أيد على حلگي وأيد قيدت أيدي تمشي بيه گدامه
من قوة ايده أريد احرر ايدي من ايده ما اگدر ظليت أتحرك أريد اشوفلي منفذ ماكو

وصلني للترك وره بيتنه وخله وجهي للحايط وهو ورايه وحسيت شفايف برگبتي تخبلت حرر ايدي
بس جرني عليه قوي واني وجهي للحايط وظهري بصدره ومن وخر أيده من حلگي التفت چان يعرب

ظليت مصدومه منه گمت أعلي صوتي بالعياط هو بسرعه أبتعد عني وطلعت موج وشافتنه بترك
وهو من شافها
يگلي/ شبيچ آيسن ترى فهمتي غلط اني من گتلچ معجب ترى قصدي بموج مو بيچ انتي مثل أختي الصغيرة واني لو اموت ما أبدل موج بنسوان الدنيا كلها

ظليت اباوع عليه وگتله/شگد حقير ولك مو چنت تريد تعتدي عليه
وهو يگلي / آيسن حرام عليچ خلي گلبچ أبيض من ناحية اختچ شنو هذا الحسد الي بداخلچ ليش تغارين منها وهي تحبچ

والله صفني على شلون يحچي وجهين وعافنه وراح وهو ينطي بوسه بالهوا لموج
ظلت تباوع عليه وچان
تگلي/ ولچ شنو من نفسيه عندچ عينچ على واحد يحب اختچ
گتلها/ انتي مصوره اني مثلچ موج همي منو يحبني لو لا هو چان يريد يعتدي عليه

چان تگلي/ خاف عبالچ مثل قبل اصدگ من گتلي سجاد اعتده عليه وأنتي الله يعلم ويامن سويتي هيچي انتي الي ينطيچ ألف دينار شيريد منچ سوين

گتلها/ انچبي آني أشرف من الشرف لما اخوچ آبن امچ لوثني

چان تگلي/ لا عيني أنتي مخبله حتى ما ندري منو سوه هيچي بيچ وذبيتيها براس سجاد

بعد ما تحملت حچيها أكثر هجمت عليها واني يتخيلي موج من ذني الي چانوا ويايه بالمستشفى الأمراض العقلية لزمتها موتتها كتل وهي تعيط
دخلت جوارينه الي مقابيلنه أم اسماعيل وخلصت موج من أيدي

بس شنو من وجع راسي أشوف الواحد عشره
وموج تعيط وتگلها لأم إسماعيل/ هاي مخبله چانت بمستشفى مال مخابيل وهي ما أدري منو صخم وجهه وذبت التهمه على اخوها سجاد

هنا تعريت گدام أم اسماعيل لان اني هذا الموضوع چنت ضامته وماكو واحد يعرفه الا أشخاص محدودين وهاي حچت گدام أم اسماعيل
وهي أم اسماعيل نفسها عدها نظام اي حچايه ما ضم أبد تگول الحچايه وتگلچ لا تحچين هاي أسرار ناس ودع الخلق للخالق بس عفيه مو تحچين لآن حلفتني وبعدين تطلع المنطقه كلها تدري

لهذا تخبلت أريد آكلها لموج لكون عرتني گدام آم إسماعيل بس هي دخلت للبيت وبقيت آم اسماعيل بس شنو من عرفت اني چنت بمستشفى مال مخابيل تحچي ويايه من بعيد
وتگلي / عليچ العباس ابو فاضل لا تعضيني وحق الزهرة أبد ما اگول الي سمعته من موج وإني اتقدم عليها أريد اعبر من يمها وهي عبالها جايه عليها گعدت بالگاع وكورت نفسها وحطت أيدها على راسها
وتگول / يبوووو تعزيتي رسمية هاي مخبله راح تغتصبچ وماكو واحد يدري بيچ