شرفي عندك

الجزء الثاني عشر

يالله حيل ما ظل بيه
جرح يلچم جرح ونگول مگظيه
أبد ما ظل وجع ما جاس عافيتي
آيسن/ كل نفس بما كسبت رهينه بكتاب الله بس بقانون البشر يحملوك حتى أخطاء غيرك الي يرتكبها غيرك بحقك وساعتها الحق يضيع ما تعرف من الحق ومنو الباطل

والدنيا والناس البيها ما ترحم احد بس الها الظاهر وتحكم على الهامش ودائماً أشوف اكو ناس من تنجح وتحقق ذاتك ماكو واحد يفرحلك بس من تخطئ او حتى اذا كان الخطأ انت مو سببه يجون ينصبون نفسهم قضاة ويحكمون عليك

وأبسط مثال وائل أبن عمو كريم يعني من أمه رادت تطلعنه من يمها ما اعترض من سكنه بيت بالحواسم وإيجار وحتى أبويه مريض وما عدنه بس يزن ساعدنه وابد ما عافنه ما چان يعرفنه وحتى من أنجح بتفوق ما يعرفنه بس من طلعت مو بنيه والذنب مو ذنبي ذنب واحد نهش بكارتي تحت مسمى الأخ

أجى وائل وصرت عار عليهم وصخمت وجوهم
ويريدون يذبحوني لا ويگلك نحلفها بالعباس أنهُ الصار غصبن عني والعباس بريء منهم من اتفقوا آنه أروح أحلف بالعباس وهما طلعوا هادرين دمي تحت مسمى العشيره وبحكم قانون وأعراف العشاير انه اذا مو باكر ينهدر دمها وألي يذبحها لو أخوها لو أبن عمها

لهذا الشيخ من زوجته جابت تقرير من الدكتوره أنه اني مو بنيه بأمر من الشيخ نهدر دمي واني ما أدري وچان همهم يضمون السالفه على يزن خاف يساعدني وأبويه هم ميعرف وآني الغبيه اخذت الموضوع بحسن نيه وصدگت اني رايحه على حلفان وأكبر غلط من الآنسان يفكر بحسن نيه لان دنياتنه ما بيها حسن نيه

وحتى يزن من گالوا گدامه تحلف بالعباس حچى بشك
گال يزن / هو الحلفان وين ما چان يحلف الا يروح يم الي يحلف بي يله يحلف شنو هذا الفلم لأن ما دى اصدگه

بس اكو من يقنع لإن عمو كريم
گال / هو الي يريد يحلف يرحون يحلفون بالعباس والسياره علينه أنت شعليك

وسكت يزن وحتى موعد الحلفان من نروح مجهول ما نعرفه بحيث گالوا الأربعاء نروح وماكو وأحد اجى وبالليل گالوا باچر خميس ونروح لآن موعد الزيارات كله الخميس لهذا گعدت من الصبح وسبحت لان لازم أكون طاهره حتى علمود الحلفان وهم من ادخل للحضره حتى اصلي هناك وأدعي لأبويه الله يشفي وينطي صحه ويرجع يمشي وبقوته

وأبويه أجى أبو الخضره ذبله شليف الخضره وراح واني من صرت بالاعدادية گمت ما أروح أودي الشليف للسوگ مثل قبل گام يجي ولد صغير أبو عربانه هو يودي الشليف مال الخضره للسوگ وأبويه يروح ويا لهذا طلع لسوگ وسجاد وموج ودموع نايمين بالغرفه لإن من دخلت اخذ دنبوس من موج

سجاد رفع راسه وگلي / طفي الضوه واطلعي ولا تظلين كل شويه داخله هنا لا تحوسين يمنه اريد انام

واني أصلاً سجاد أكرهه وأكره احچي ويا لهذا ما جاوبته وأخاف منه لهذا آخذت علبة دنابيس مال موج وطلعت أركض حتى دست على رجل دموع وهي رفعت الغطا وشافتني وظلت تفشر وتغلط حتى العشيره وأبوي ما خلصوا منها