شرفي عندك

البارت التاسع

أطمئن فأنني احدثك من عمق الوجع
من حالة أشد ألماً من سابقتها
احدثك هنا من وسط خيبتي وها انا
أتجرع ألم الثقه لكل مره عدة بها
بها خائباً

آيسن/ الأنسان مخير مو مسير بس أكو اشياء يكون بيها مسير مو مخير يعني اني ما اختاريت تكون دموع أمي ولا سجاد أخويه ولا اختاريت حادثة الاغتصاب الي قلبت موازين حياتي وصارت نقمة حياتي الي دفعت ثمنها حياتي وابد ما ارتاحيت من هاي الحادثه

من اتوفى أبو يزن وهو انسان والله چان طيب الگلب عكس عمتي ألي هي آخت أبويه وماكو واحد راح للفاتحه بس أبويه يروح ويرجعه ياسين بالليل وثالث يوم الفاتحه أبويه راح من الصبح حتى ريوگ ما اتريگ لا
گال ابويه/ اليوم الختمه ويجبون سيد يقرا

ويمشي ويوصي بيه على انتبهي على نفسچ وانتبهي من شغلين الطباخ لو يوصي بيه انتبه من الكهرباء وراح حدود الساعه 11 الصبح ندگ الباب ولكون أني موجوده ماكو واحد يطلع للباب لا دموع ولا موج فتحت الباب صار بوجهي واحد

گال / اني مبلغ وانتوا مرفوعه عليكم قضية

گتله/ أخويه من منو مرفوعه علينه القضيه

گال/ من سجاد على ابو قضية حجر

اني في وقتها ما فهمت شنو حجر
گتله /يعني شنو حجر يعني يسجنوا

گال / شگد عمرچ

گتله / 17

گال / ميصير تستلمين التبليغ لان عمرچ أقل من السن القانوني لازم شخص بالغ يستلمه حتى يوقع ويبصم روحي بلغي واحد چبير من اهلچ خلي يستلم التبليغ

وظليت الح ويا شنو معنى الحجر بس گلي اسالي اهلچ او محامي هو يجاوبچ اني ما أعرف يعني شلون واحد يصرف واحد وما يطول ويا بالحچي

دخلت گعدت دموع وبلغتها بوجود المبلغ وعادي ما أستغربت الموضوع وشلون كأنه الها علم بي طلعت وساعه تحقق ويا المبلغ على التبليغ وشلون وين يحضر وين توقع ما استلمت التبليغ الا وهي مطلعه روحه راح وهو يكفر من عدها

هي دخلت واني امشي وراها واسألها شنو يعني حجر بس هي ما جاوب ظليت حايره عليمن اتصل اذا اتصلت بيزن ما يگدر يجاوبني وهو عنده الثالث مال أبو بقيت ألوب المن احچي ومنين أستفسر بس لازم اگعد واسكت لما يجي أبويه

وبقيت ذاك النهار كله واني منتبه على دموع وموج وهنه مخبوصات وأشوف مخابراتهن هوايه بس ما فهمت ويا منو الى الليل رجع أبويه ويا ياسين بس ما دخل راح ودموع وموج من شافن أبويه إجى دخلن للغرفه وحتى صوت ما تسمعلهن وابويه گعد تحسه تعبان بس هذا ما يمنع أنه اگله على التبليغ

رحت على دموع واخذت منها التبليغ وهي تغم بيه من انطته ألي أخذته وانطيته لابويه وهو ظل يباوع عليه بمعنى شنو هذا