شرفي عندك

البارت الرابع والعشرون

ما أجمل الذي يتألم ولا يتكلم
والذي ينخدع ولا يخون
فليس كل من أبتسم سعيد
قد يكون وراء الإبتسامات
( حزن شديد)

بقلم الكاتبة الزهيريه الزهيريه
آيسن /الصدفة الها دور بحياتنه وهاي الصدفه مرات تخلينه بمواقف بس الله يعلم بيها واكو صدف حلوه ما ننساها واكو صدف تعيسة وأكو صدفه تخلينه معرايين گدام أقرب الناس النه اني چنت گاعده بالجامعه وتحديدًا بالكفتريا ودى أراسل بصائب وساعه گشره من چنت أراسله ما حسيت الموبايل نجر من أيدي

اني التفت لو ما ملتفته أحسن لان لو ملك الموت يصير گبالي ولا من سحبت فردوس الموبايل مني
چانت بالنسبة إلي كارثة من كوارث الطبيعة وما چنت محسبة لهذا الشي أبد وظلت تگلب بي وتگلي / ولچ تحسين يا گح .... يا ساقطة ليش هيچي شسويتلچ بس گليلي مزوجه وعندچ أطفال وتصاحبين وتحبين وهسه ما لگيتي غير خطيبي وتسوين علاقه ويا

أريد يحضرني رد مناسب ماكو أريد أبين انه اني ما غلطانه وهي اخذت ممتلكاتي لان هو چان مزوجني قبلها ماكو اي رد غير
گتلها/ أنتي اجيتي اخذتي من عندي واني چنت زوجته قبلچ وهسه اجيتي تگليلي خطيبچ وتحچين جيبي لچ موبايلي

بس هي تهسترت خلت موبايلي بجنطتها وهجمت عليه واني قصيره وهي أطول مني واني ضعيفه وهي جسمها متروس وحتى تبين اكبر من صديقتي كوثر في حين كوثر تبين اكبر منها بسنتين من خلت موبايلي بجنطتها شمرت جنطتها بالگاع ومن هجمت عليه اول شي جرت حجابي وگعتلي دگ اريد اخلص نفسي منها ما اگدر والبنات والولد كلها جمعت علينه وشي طبيعي طالما مكافش مال بنات الولد ما يدخلون لان يخافون لا صير عشاير شلون ولد بحچة عركه يلمس بنيه

أماالبنات ادخلن ويريدون يجروها من عندي بعد ما سوت وجهي خريطة الوطن العربي بس هي عضتني عضه من أيدي والله حتى سنونها نبتتها بيدي والبنات يجرن بيها الا ما حسيت راح تشلع الجلد بحلگها حتى الدم من العضه صارت بحلگها

اجوي امن الجامعه التموا وأجني أستاذات الي بالجامعه واني اعيط وهي تعيط

وأستاذه جنان تگول / هسه ما نعرف منو الجاني ومنو مجني عليه هاي تعيط وهاي تعيط شلون بله نعرف شكو وشصار

وچان تگول استاذه ناهده / يله كلها على مكتب العميد شنو احنه هنا شنو مكافش وانتن بالحرم الجامعي يله امشن گدامي

اني بالي يم موبايلي الي يمها بس هي ركضت على جنطتها وأخذتها من الگاع واني بلا حجاب وحالتي حاله واخذونه على مكتب العميد واني مشكلتي حتى شالي ماكو وعجيبه كوثر اختها هاي الي لمت الجامعه كلها اصواتنه هي ماكو وانوب أدور على حجابي ماكو فص ملح وذاب ما أدري صار من نصيب منو

دخلونه مكتب العميد وهو ظل يباوع علينه والعميد يطلع عمره نهاية الخمسينات واگرع ولابس مناظر طبية وچان ما أدري شنو گدامه ويگلب بي وحتى من رفع راسه وشافنه عدل مناظره
وگال / هاي شنو شصاير