شرفي عندك

البارت السابع والعشرون

البارت السابع والعشرون
من لا يؤدبه الضمير حتمًا
ستؤدبه الحياة حين تدور

بقلم الكاتبة الزهيريه الزهيريه

آيسن/ يگولون الخايب خائب يطلع من الدنيا بلا نائب والله خيبتي لو تنباع چان بعتها بس مع الاسف كل خيبه تمر بحياتي ما أدري ألوم نفسي ما أدري الوم الدنيا على حظي الما گعد بيها جبتها من تكفخ دموع وسجاد الى تكفخ صائب ويزن
وآخرها وگعوا بيها أطفالي الي يزن عاداني وما يخليني أشوفهم

وبعد اعتقال سجاد الغير متوقع إتصل بيه رقم غريب من رديت عليه
اجاني صوت يبچي وهو يگلي / آيسن والله احبچ وما اگدر بدونچ

وچان الصوت حافظته وسبحان الله من خسرت اطفالي هذا الصوت شگد چنت اعشقه هسه صار هذا الصوت ولا يعنيلي شي
جاوبته / الله يخليك صائب أنساني وبعد لا تتصل بيه

گال / آيسن والله بعد أيمان ما حبيت غيرچ انطيني فرصه اثبتلچ بيها حبي

گتله/ صائب اني بعد الي صار ندمت عيشتك بوهم وعرفت مو كل شي بالحياة حب أكو أشياء أهم وربي يشهد عليه حبيتك حب بس الله يعلم بي بس ربك ما راد النه ننجمع هذا نصيبنه

گال / آيسن النصيب ما أله علاقه بينه احنه نختار قدرنه بنفسه وأنتي هسه عوفي يزن وخلي نزوج هذا الشي أنتي تختاري بس انتي تريدين تبقين ويا يزن لان زوجچ وأبو ابنچ

گتله/ صائب انت شتحچي يزن طلگني واخذ اطفالي مني

وهو حسيت بي تفاجأ بس فرح گال / أحسن شي سويتي واني والله راح أكون سند الچ

وظل يزن كل شويه يتصل واذا ما يتصل يرسل رسائل وبعدها عرفت دموع انه رجعت علاقتي
بصائب طلبت مني انه يتدخل حتى اذا يگدر يساعد سجاد
گتلها للقير والجهنم واني شنو بسجاد عسى ما طلع شنو دخلي
بعدين فكرت گلت بنفسي خلي استغل دموع تكمل السالفه الي حچاها سجاد لان ذاكَ متهمي ب4 ارهاب بعد وين الگى واذا الشغله متورط بيها يزن أحتمال آخذها ورقة تهديد ضد يزن مثل ما هو يهددني اني هم اهدده وأخذ اطفالي منه وچان اكبر غلط سويته بحياتي انه حاولت أعرف هذا السر وندمت على عدد شعر راسي من فكرت مجرد تفكير أنه أعرف سر يزن

گتلها /اذا ساعدچ صائب شتنطيني

گالت دموع / والله الي تأمرين بي اذا طلع سجاد عيوني الچ

گتلها / وشسوي بعيونچ ذني خليهن الچ أريد اعرف يزن من سوه الحادث مال هذا الولد والبنيه منين دفع فصل

بالبداية سكتت فتره مثل الي واحد دى يفكر بعدين گالت /تدللين والله بيوم طلعت سجاد اگلچ هااا بعد عليه عتب 

گتلها / هسه إتصل بصائب واحچي ويا گدامچ

وبالفعل جبت موبايلي وأتصلت بصائب وهو من أتصل بي بسرعة يرد عبالك ايده على Ok من رد گتله/ صائب اني جايه على الله وعليك اريد منك شغله إذا اسويها ألي أكون ممنونه منك