شرفي عندك

الجزء الاربعون

لست اسف بتاتًا حينما تظن اني اخيب ظنك
فأنا لم أطلب منك أن تظن بي شيئًا

بقلم الكاتبة الزهيريه الزهيريه

رواد/ مرات من حبنه لشريك حياتنه يهون عدنه كل عزيز وغالي وما نفكر بالعواقب الي ممكن صير ولا بالضرر ألي ممكن يصيب غيرنه بسبب انه نحقق غايتنه منه واني غلطت غلطة عمري والي الله ما عبرها الي ورجعت عليه أضعاف مضاعفة وفيما بعد ورب العالمين عادل بحكمه علينه

واصعب شي بحياتك من ضحي بالغالي والرخيص على شخص ما يسوه تفكر بي ثانيه مو انوب ضحي علموده وهذا چان حالي ويه نيفين چنت من حبي إلها مثل الأعمى بحيث ما أشوف عيوبها لهذا چنت أريد أسعدها بكل وشتى الطرق من عرفت ياسين بمرور الوقت عرفته عنده أستعداد يضحي بكل شي في سبيل يحصل على فلوس ويريد يقفص عليه بكل الطرق لهذا چنت اطمعه بكل الطرق بس بذكاء

يعني مره انطي واحسسه شوكت ما يريد فلوس عندي انطي ومره لا احسسه أنه الفلوس الها مقابل مو بلاش لهذا من ما انطي أخلي يعرض عليه كل شي عنده وصلت ويا إنه يريد يعرض عليه مخدرات بس اني أرفض او مرات اوعده إنه انطي واعوفه على الشحن واخلي يتصل ويراسلني ألف مره يله أرد عليه لو اگله أعذرني والله صار عندي ظرف وفاة وما اگدر ارد عليك وطبعًا من عرفته موتت كل العشيره مره اگله عمي مات ومره ابن عمي يعني بالمختصر العشيره على ايدي صفت ما بقه بيها آحد بس هو يعرف اني دى أكذب عليه بس ما يگدر يگول أنت كذاب

ومره من چنت واگف ويا بابهم وشفت جود آبن آيسن وهو شافني اباوع عليه اني في وقتها والله انقهرت عليه لان خطيه شنو ذنبه لا ملابس ولانعال حاله حال كل طفل بعمره ومبهذل وحتى ياسين من يصيحله حتى يجيبله سم جگاير يضربه ويگله روح جيب جگاير

ومن جود يجاوبه ويگله/ انطيني فلوس حتى أجيب
يجاوبه / ابن الگح.... من عندك لو من أمك
ومن خطيه يجاوبه ما عدنه

يگله/ روح گله لأبو المحل على حساب عمي ياسين وعود روحله انت بالليل وهو يفهم

أتعجبت عليه شنو يجيب هسه من أبو المحل وشنو الطفل يروحله بالليل اني وصلت الفكره لعقلي بس حبيت أتأكد واني چنت متأكد ياسين يريد يوصلي الفكره ويطمعني بنفس الوقت حتى ياخذ مني فلوس

گتله/ شنو السالفه ياسين انت تاخذ من أبو المحل آبن أخوك ليش دزه بالليل لأبو المحل

گال/ اني متفق ويه أبو المحل

گتله/ ادري شنو يروح لأبو المحل يعاونه يعني ينزل ويا بضاعة لو ينظفله المحل لو شنو الفلم ياسين

گلي / شوف رواد التعرفه أحسن من الما تعرفه واني ما اضم عليك عيشه صعبه واني شاب ألي حياتي أريد اتونس بيها شلون أعيش يعني

صدگ هنا كلامه ضحكني گتله / عفيه العيشه صعبه شنو قابل عندك عميان ألي تصرف عليهم شو بطرگ روحك يله طلع الزبده فهمني شنو الفلم