أين المناص

رجعوا جاسر..؟

#بارت الرجوع
#للكاتبه عائشه العكيدي..

_ كلبي وياك ع البعد لاتعلمه عشكتك ليل نجمة تغازل بنجمة❤️

(قبل سبع سنوات)..!

_كاعده على حافه الباب وايدي على راسي.
والتعب والقهر ماخذ مكانه بكل ركن بلبيت..
حتى بصعوبه احس التنفس صار علينا..

دموعي تنزل بهدوء مسحتهن وجانت بحضني نايمه
باوعت عليها وبلمسات بطيئة ايدي مشت ع وجهه
الناعم والبارد..

_قسمتج من الدنيا مااتعيشين ويا مره عظيمه مثل امج اتمنى تصيرين مثلها!

فتحت عيونها ببطء وجانت عيونها كبااار
كلش ولونهن ما مبين لأن بعدها صغيره.
بس حلوه حيل وشعرها ثخين وجلدها أبيض.
تشبه امها حيل!

خليتها ع صدري وحضنتها والدموع
صارت تنزل بغزاره وكاتمه الصرخه والوجع بداخلي

كامت تبجي مسحت دموعي بسرعه.
وكمت بيها جوا..

دخلت للبيت الجنت مااريد ادخله ابد
جان باااااارد بشكل فضيع جن قطعه ثلج
وخالي من نفس اي بشر.
رغم حرارة الجو وصيف بس البيت
جان بارد ووحشه وخنكه.
ومحد بلبيت بس اني وغرور الصغيره..

هذا اسمها ع امها!
دخلت لغرفتي بسرعه طلعت الحليب
ورجعت برا بكل سرعتي
اخاف أضل بلمكان حيل يخوف
وخصوصاً مكان موتها..
الجانت نايمه بي.

كعدت بلحديقه خليتها بحضني.
وسويت الحليب الها وجانت رافضه
تشربه بأي طريقه '

رجعت شلتها ودخلت جوا غصب عليه
اتحمل الخوف الي اني بي
كعدت بغرفتي ورضعتها طبيعي وأخذت الحليب
ماارفضته بلعكس!
وهيا بحضني ايدي ع شعرها ودموعي بهدوء تنزل عشره عشره..

_مر ع وفاة امها اسبوع ومن بعد الفاتحه
جابوها النا من المستشفى لأن جانت بحاله كلش خطره ومهدده بلموت باي لحظه.
قدر الله وما شاء فعل وصارت زينه وجابوها..

حالة البيت تخوف الجهال ببيت جدهم مااردناهم يبقون يمنا وحتى شمس بنتي خليتها تروح وياهم.

وماهر يطلع وماايرجع لليل ويلف راسه وينام
ولا اكل ولا شرب واكله وشربه الجكاير.

ومصطفى ويا جاسر ماا فاركه وماعرف وين راحوا
بس الي سمعته ان جاسر كاعد يم كبرها ومايقبل يرجع لو يسوي شي!

والبيت خالي من أي نفس.
وغرفتها الماتت بيها قفلتها ومحد بعد فتحها..

جانت إيام اشبهه بلجحيم ايام مااريد لا عدو ولا صديق يمر بيها يكفي ان الشخص الجان
مصدر قوه وسعاده للكل مات؟ وراح لدار حقه..

أخذت نفس بصعوبه وشلتها لأن شبعت ونامت.
خليتها ع فراشي وخليتها براحتها وكمت وفتحت الباب حتى إذا تبجي اسمع..