الاشاوس و الشقراء

البارت الثـالث و الخمسون

( التناقض )
يوم اصلي وعشره اموتن ع الطرب
ساعه اغني وساعه بين عيوني رب
نوبه تلگه بروحي راحه
ونوبه موسم للكرب
مره احب الدنيا واعشگ
ومره احس يومي گرب

لارين :

كاعده افر بلخاتم اللي بايدي وادك برجلي بلكاع اختي ليغاد مني وصادق يلح عليه يريد يتقدم وخايفه من ردود الافعال وخايفه لا يأذوني شسوي هسه مادري

دخل ابن خالي وحماها لاختي بنفس الوقت اباوع عليها كبل طفرت ووجهها انكلب الوان وحجت

- هلا هلا ابو عون نورتنه من بعد غيبه الحمدلله على سلامتك

القيت بنظري عليه بشرته سمرا وملامحه حاده كلش طويل وخشن جسمه ممشوق ومعضل ومرتب لابس عسكري سلاحه بحزامه ساعته وخواتم بايده وثلاث نجمات مزينه جتفه بلرتبه العسكريه '' نقيب ''

ثاني مره اشوفه من اجيت لليوم واحس الكل عدهم رهبه ويخافون منه شنو السبب ما ادري حته ابو رغم هو ابو واخوانه كبار كلهم بس يحسبوله مليون حساب بكل موضوع

بصوت خشن جهوري رد عليها

- الله يسلمج

فركت ايد بايد وتلبكت كالتله

- ابو عون ممكن اسئلك سؤال بلا زحمه عليك

صد عليها باستغراب وهو عاكد حاجبه كلش نرفزني شهالشخصيه وكلها هيج ترجف رجيف منه شمسويلهم وهالمصخمه اختي هيج تخاف منه

- تفضلي ام حسين شصاير

- ما صاير شي بس مرتضى كالي اذا اجيت اسئلك على تعيين ما طلع مالت ابن خالو قاسم

- ايي صح دينتضره خطيه للتعيين

باوع عليه ورمقني بخزره سكتت هذا شبي يالله بس يخزر صد على نسرين وكال

- ماكو اخبار عليه بعده مطالع

- ان شاء الله يطلع

مدري وين راح رفعت راسي وكتلها

- شنو سالفته هذاا شبي بس يخوزر وميتحاجه

كبل صكعتني على جتفي وكالت

- لسانج الطويل ابلعي يمعوده لا تداهرين وتعيطين لا عبالج مثل مرتضى فكاهي ما يقبل بصوت العالي وهذن السوالف اله قوانين محد يتعداها بوجوده ابد ترا ما يقبل والله انه العلي كتلج

باوعت عليها كعدت ع التخم وكالت

- يمه ابوس ايدي وجه وكفا على رضاوي حبيبي زلمتي شحلاته

هزيت ايدي وكمت شدعوا هلكد خالس الكل من حوره ع اساس

طلعت للحديقه وصلت بلكراج جاي اتمشه وما حسيت الا هجم عليه كلب نرعبت وكبل عطت اريد اوخره ماكو مجلب بيه يشمشم لعبت نفسي وكعت وهو فوكي اعيط تاليها هو كبل طفر مني