#الحسن
#جمان_فريد
الجزء السادس 💕
"الحمد لله
والصلاة والسلام على على رسول"
بدايه خطبة الجمعه للشيخ عابد الصادق في حضور ولاده وبوه وخوته وولاد عمه وباقي المصلين الجامع كان مليان..
كانت الخطبه عن الصلح ولم الشمل تكلم بإستفاضه وبكلام في الصميم والناس كانت منصته واكثر المنصتين سرمد اللي حيتكلم عن الموضوع هذا في حلقته الجايه..
تمت الخطبه وبدت الصلاة...
في جامع تاني في حي تاني كيف انتهت خطبة الجمعه وبيبدا إمامهم بالصلاة "جعفر الحافظ"...وكان برا يسمع في الخطبه اللي كانت تتكلم عن برالأباء بأبنائهم..موضوع نادر وفي الغالب الوعاظ والدعاة يتكلموا ع العكس..
منذر"ههع بريت بيا لما سلمتني للضياع برجليك لما خليتني من مدمن جروه رفقة السوء للغلط لراس كبير في تجارة السم يجر في هلبه ناس للغلط..للموت ..مش حنسامحك ذنبي وذنب كل من ضيعتهم في رقبتك ..فرقبتك أنت بس"
***
هيا بسرعه كركبوا البازين ع جية من الجامع...
وسيله : عمتي بعد الغدي بيتسقدوا لحوش الحافظ
برنيه: لا بعد العصر..
مجيدة: ربي يعديها ع خير...
برنيه : هيا كملوا شغلكم حسهم جو...
***
مديحه: فرخه عليا كيف تجي معاك التركيكبه مساويه هكي
عليا مبتسمه بغرور: سر المهنه
زينب: اختك فالحه تتعلم بسرعه وتتفنن في حاجتها...
اميرة جتهم: بوي ومصعب روحوا..
زينب : هيا هيا وتوا الصفر...
***
كسيكسو بالبصله..
ابتسام وهي تحط في الصونيه ع الطاولة: كسيكسو بنتك حتى هو..
عبدالقدوس بضحكه: واحلى كسيكسو...
***
مقعمز قبالتها ويوكل فيها ويبصر معاها والبسمة مافارقت وجهه...
نبيهه: كول انت ماكليت شي..
محمد : تاكلي انتي كإني اني اللي كليت ياغاليه..
نبيهه بعدت الكاشيك: مالا اني والله معاد خاشلي فم لين تاكل انت الأول...
محمد بضحكه عبا كشيكه وكلي : همممم ..
نبيهه: هههههههههههه
***
يلموا في الماعين ع بعض وحايسات..خش سرمد..
سرمد: اما بازين بعد هكي فساد هذا بازين وسيله
وسيله بضحكه: صدقت..
سرمد : الحسن قالها بازين امي...
سارة : ديما يعطي فينا ع راسنا كيف مانعرفوش نديروه..
انعام : تو نشوفوا اللالا اللي بيجيبها ..
وسيله : هو غير يجيبها إن شاء الله بايرة مستعده نعلمها..
كلهم: ههههههههههههههه
ترا شويه..
سرمد تلفت تخزرط وبعد....كلهم شدوا ضحكتهم
هدى: كيف حالك سرمد
سرمد بمجامله: الحمدلله ..وحك راسه من الخلف..ماتنسوش ..الشاهي..وطلع زي الصاروخ..
هدى: حشومي لين مفسد..
سارة وانعام:😁😁
...
الحسن: ردان مش حيردكم واثق من هالشي...
علي: حتى اني قلت هكي..
واحد من ولاد عم علي: لو يبي ديه ندفعوا
عابد: لو يبي ديه كان خداها من الزمان..الموضوع ساهل وحيعدي ع خير..
محمد علي: البوكشاش ولده ولا...
علي عابد: وحني مالنا بيه دام بوه متبري منه ..حني علينا في جعفر نفسه وبس..
سرمد جاهم: هاه منو بيمشي...
الحاج علي: أكل منا...
الحسن: انت بتمشي..
سرمد بضحكه: انتوا تكفوا وتوفوا اني عندي خدمه...
الحاج علي: على كيفك...
***
بعد العصر
توجه الحاج علي برجال العيله لحوش جعفر الحافظ اللي ماكانش يندري علي شي..كيف كمل صلاته وبيفتح باب حوشه تفاجئ بالسيارات ورا بعض ادرس..والبيبان انفتحوا واللي فيها نزلوا..تفاجأ ع الآخر لما شاف الحاج علي وعابد ولده..قدمله الحاج علي..
الحاج علي: جاينك وقصدينك في خير ادخلنا ولانولوا من وين ماجينا...
جعفر فهم سبب جيتهم ابتسم وقدم للباب وفتحه: تفضلوا...
ابتسموا بأرتياح وخشوا بالواحد..
أميرة جتهم تجري: امي واني في الكوجينه شفت بوي خاش ومعاه رجاله..
زينب ناضت: إن شاء الله خير...هيا نوضوا معاي للكوجينه..
ناضوا مديحه وعليا ورا امهم ..
...
اهلا وسهلا بيكم تفضلوا تفضلوا..
الحاج علي: يزيد فضلك..
عابد: كيف حالك ياجعفر..
جعفر: الحمد لله في خير ونعمه ..
عابد : ربي يدومها..
جعفر : كيف حالك ياحاج علي وكيف حالكم كلكم
كلهم بأصوات متقطعه : الحمد لله...
الحاج علي: ضريرتي وضنا عمي تعرفهم..
جعفر: ايه ..شبح للحسن وضيق عيونه..الشاب هذا مش غريب عليا..
الحسن قعد يشبحله ويذكر في يوم القبض ع ولده منذر منساشي ابدا..بس جعفر العمر ليه دور في عدم تذكره للحسن..غير هكي شكل الحسن تغير هلبه من هذاكا الوقت لهالوقت..
الحاج علي: هذا ولد عابد الوسطي..الحسن ..
جعفر: مش هو نفسه الأفندي اللي يحكوا عليه..
الحاج علي بضحكه : هو بشحمه ولحمه..
ناض جعفر من مكانه ومشاله بيسلم عليه مرة تانيه الحسن تحشم وناض طول صاحفه بإيديه الزوز..
جعفر: امثالك ياولدي الواحد يفرح بيهم ويرفع بيهم راسه ربي يكثر من امثالك..
الحسن بإحراج: عطيتيني فوق حجمي ..
جعفر: ماعطيتك شي من حجمك ياولدي..عرضت روحك للموت اكثر من مرة بش تحمي ولاد بلادك من هالسم اللي كل يوم يدخلوا فيه شياطين الإنس..
الحسن: هذا واجبي ومفروض عليا لابطوله مني ولابجميلي
جعفر شبح لعابد: ارفع راسك بيه اللي خلف زيه من حقه وين مايمشي يقول هذا ولدي..
الحسن باس ع راس جعفر ..كلهم عجبتهم حركته هلبه..وجعفر حسها كبيره ..وحس قداش الحسن راجل واللي قالوه عليه كله حق...
....
زينب: مديحه كلمتي مصعب..
مديحه وهي تستف في الحلويات: ايه كلمته...
عليا تصب في القهوة : خاطري نعرف من هما وعلاش جايين..
زينب: اميرة قالت واحد منهم لابس جرد...
مديحه : حني حتى ناس في الدواخر ماعندنا...
عخشة مصعب من باب الكوجينه: شن في من جاي...
زينب: علمنا علمك..برا سلم ولدي خش سلم وتعالى ارفع الحاجات..
مصعب : حاضر..
***
الناس منين تسمع بحاجه زي هادي يتشجعوا و ياخدوهم قدوة..
وسيله: صدقتي يامجيده..
فاطمه مرت محمد: ربي يصلح الحال..خلاص نبوا نتصافوا ونبوها تعمر..
برنيه: ايه والله يافطومه...
***
حط فنجال القهوة ع تركينه: حني القهوة مش حنشربوها حتى لو بردت قبل لاتقول اللي طاببينك فيه تم..
جعفر: تم ..
عابد: اسمعنا قبل..
جعفر : من اول ماشفتكم واني عارف سبب جيتكم وقلت مش حنردهم"ادفع بالتي هي أحسن فإذا الذي بينك وبينه عداوة كأنه ولي حميم"...واني نبي لهالعداوة تتبدل لود ..ياسرنا حقد وقطيعه..الدم انرد بالدم وكل شي مشي ع حاله..اشربوا قهوتكم...ووالله ماطالعين ماعندي قبل لتتعشوا.
الحاج علي: ربي يهديك غير علاش تحلف بس...
جعفر: هذا اول مافي الصلح تاكلوا مني ويبدا بناتنا خبزة وميه...
الحاج علي وزع نظره ع اللي جايين: خلاص انت حلفت ماعندنا مانديروا..
جعفر بضحكه: اشربوا القهوة تفضلوا..
***
جنان : تو الرجاله اللي فالحوش طلعوا ومافي حد غير عمي سرمد ومسكر ع روحه مكتبه..
ميسون: حتى اني فكرت فيها
ريحانه: كان يروحوا ويطب علينا الحسن..
سارة: اللي فهمته ان الموضوع مطول يعني حيعطلوا
هدى: هيا هيا ...مجرد سمعوا كلمه هدى ناضوا مع بعض...طلعوا للجنان وفرشوا حصيرة وقعمزوا...
جنان: تعرفوا فشن خاطري..
ساره: دربوكه..
جنان طقت ايدها: اختي انتي..
ريحانه: هههههههههه ..حناي عندها وحده..
جنان : تو نوض نجيبها..ناضت خشت وصلت في غرفة المعيشه..حناااي..
برنيه: خيرك..
جنان : الدربوكه وين..
وسيله: دربوكة شنو اللطف..
جنان: كساد نبوا نغيروا جو وبعدين عرس مرعي وسارة مازال عليه شهر خل نستعدوا من توا...
وسيله: هني روحك وقعمزي ترا..
برنيه: وشن فيها خل البنيات يفرهدوا..الحاج كلمني بكري شوي وقالي بيتعشوا في حوش الراجل...
مجيده: يعني تمت ع خير...
برنيه :ايه الحمدوله..
كلهم بأصوات متقطعه: الحمد لله..
برنيه: تلقيها في دولابي من فوق..
عفاف:الله عليك يابرنيه هههههه
انعام: هيا نوضي خوله ..
خوله ابتسمت وهزت راسها بإيجاب ولحقتهم..
***
والله عندي حاجه ضروريه بنديرها ع العشي بإذن الله نكون هني..
جعفر: مش حنتعشوا لين تجي..
الحسن هز راسه بأيجاب: بإذن الله جاي..هي السلام عليكم..
كلهم بأصوات متقطعه: وعليكم السلام..
طلع الحسن وعليا لمحاته من الروشن وهو طالع وعاطي بالظهر قعدت واقفه تشبحله ..وهو كيف جاي بيطلع تلفت بسرعه ادرقت ..وهو عقد حواجبه وطلع...
عليا"عار اديري فيه ياعليا شن وقفني هني أصلا"...
****
اشكرارا را واشكرارا ري
والليله نقيموها وصلوا ع النبي..
سرمد في مكتبه: مهبولات 😂
سارة: واللي سوريته خط بخط
يردوا وراها:هيييه هييه
سارة: قال ع قلبي شلفط
هيييه هيييه..
...
الحسن وهو يسوق:خل نخطم ع الحوش ناخد الوراق من سرمد قبل..
....
هدى محزمه وترقص في النص..
انعام : حتى كان سمينه شويه
زي الحوته في الصونيه..
...
برنيه ماشيه للكوجينه تسمع فيهم وتضحك..سمعت الباب انفتح انصدمت..
...
جنان: محبوبي روح السمارة
واخد عقلي محبوبي روحي السمارة
...
الحسن يسمع ضيق عيونه وماشي بخطوات بطيئه لين وصل فيهم وشاف سارة وهدي يرقصوا وجنان ادربك والباقي يصفقوا في الجنان..
الحسن بصوت عالي: ماشااااااء الله ماشاااااء الله ..
عيطوا كلهم ..وفاتوا يجروا لداخل ..خبطوا في بعضهم وفي اللي طاحوا ..وهدى مسكينه ماخشت لين خليني ونخليك...
ولف وخش من القدام..
الحسن لقاهم بيهربوا لغرفة المعيشه: ياحيوااانه انتي وياها وقفوا ..
برنيه : ياخامرات يامعفنات خنبتوا الدربوكه خنبه صار
كلهم:😨😨😨😨😨
برنيه: والله لما ندمكم عليها يازوفريات..
الحسن : حولي ياحناي..
برنيه تشبح فيه جابد عصاة المكنسه: 🤤..لالا..وليدي مادهشش روحك معاهم اني تو نوريهم..التفتت...يا كلبه منك ليها تحركوا لدار الخزين ضموها كلها نبيها انظف من وجوهكم مانكم ضايقين فيها عشي ولانوم قبل اضموها..
هما يشبحوا للعصاة فيد الحسن هزوا راسهم بأيجاب..وطاروا لدار الخزين..
الحسن: قسما بالله تصير حاجه زي هادي مرة تانيه علي الصادق مايحزهم مني..وتوجه لمكتب سرمد اللي كان يسمع وميت بالضحك🤣...
في دار الخزين..
هدى: مافيش عقارب هني...
جنان: عقارب شنو انتي تانيه ...
سارة : عليك رعشه ..
ريحانه : قلبي كان حاسس..
انعام: غير فكوا الوشاحات اللي قاعدات محزمات بيهم...
جنان ضحكت ومشت خدت وحده من الطناجر وقعدت ادربك..
سلم ضمامات الحايس..
نشوفوهم يارب عرايس..
ضحكوا ويردوا وراها ويصفقوا...
الحسن ينادي من برا: سرررررررمد
جنان لوحت الطنجره وراها واللي هذا شدت حاجه لهت بيها..😁
***
سبحان الله بعد هالسنين..
مديحه: احسن ارتحنامن العداوات والمشاكل..
عليا وهي تقرض في البصله: خلصنا من العداوات حصلنا في العشاوات..
مديحه وزينب: ههههههههه
***
يمشي بخطوات بطيئة لين وصل في المطبخ شبح لبنته ترحي ع ماكينة الحديد اليدويه..
يونس: شن اديري يابنتي وانتي ليك يومين ع هالحاله..
هاله بربكه: شي غير..قلت نرحي طعميه انت تحبها..
يونس: الكميه كبيرة يابنتي..
هاله بربكه أكثر: بنعطي لجارتنا وبناتها...
يونس هز راسه بإيجاب...
هاله: بوي تبي حاجه..
يونس : لا يابنتي غير قبل نبيك تجي تتفرجي معاي عمك الهادي بدي ..
هالة ابتسمت ومشت للاوندينو غسلت ايدها..وغطت الطعميه والماكينه: هيا تعال نتفرجوا من بكري نستنى فيه...
يونس ابتسم ومشي مع بنته يتفرجوا ع التلفزيون..
***
يسوق في للسيارة ويتكلم في التليفون
حسان: تي مش ليله هيا لووووز$%&£.......ايه لالا فوت الفترة هادي...تمام...تشاويتوا...وصل في حوش جده درس ونزل ع طلعة الحسن..
حسان جمد في مكانه...
الحسن: غير عندي ماندير توا...لكن تو نلهى بيك ..وركب سيارته وتحرك..
وحسان بلع ريقه و خش للحوش...
***
في احد القنوات الأخباريه
الإشتباه بضلوع داعش في أغتيال العقيد سالم المسعودي..
:ترا نقص شوي..كيف صار
:كلمت الحبايب وتصرفوا..وفبركنا الموضوع كويس
:يعني ياشرودة الحكايه بعيده عليك
شرودة : وهلبه...ربي يدوم حبايبنا في مناصبهم..
...يتبع...
