#الحسن
الجزء 12💓💓💓
قاوم وكلي نصيبه ..مازال حي الغلط اللي صار مع فتحي مانبيشي يتكرر ياآدم
آدم : حاضر يافندي...ادى التحيه ومشي...
خش الحسن داخل عيونه عليها كانت مقعمزة مع ضابط من العنصر النسائي ...كان في ايدها طاسة عصير عنب تشرب فيها وكيكة تاكل فيها بالسيف..
يشوفلها ويتأمل في القوة متاعها برغم كل اللي صار مازالت متماسكه..اول مافاقت غطت راسها بشرشاف طاوله بمجرد ماشافته..صغيرة قاعده ماخشتش العشرين..بس تصرفاتها...شخصيتها أكبر من عمرها بوين..برغم من ملامحها الناعمه هلبه...وبشرتها الصافيه اللي زي بشرة الأطفال...
الضابط "مراة": سيدي البنت حالتها أحسن ...
قامت عيونها فيه..الحسن يشبح للضابط: جيبيها...
"وين رافعيني"
الحسن بدون مايتلفت: جيبها بسرعه..ومشي...
جت الضابط لعليا ورفعتها...
الحسن كيف بيركب سيارته قعد يشبحلها وهي طالعه مع الضابط...شبحتله رفعت حاجبها اليمين بنظرة حادة بعدين شبحت القدام وركبوها السياره..
الحسن مش عارف شنو هو اللي يصير فيه مجرد مايشوف هالبنت ينسى نفسه ..يتوه...يحس بقلبه مش ملكه...استاقض مجرد مالسيارة مشت ركب ومشي وراهم...
في المركز....
المحققه: حسب مانعرف ان في علاقة تربطك..بمنذر الحافظ الملقب "بوكشاش"..
عليا : مع الأسف خوي...
المحققه: خوك!!!
عليا ابتسمت بتهكم وقعدت ساكته..
المحققه: شن سبب وجودك غادي..
عليا : كنت مخطوفه ...
المحققه : اممم بتقوليلي خوك اللي خطفك صح..
عليا: هذا اللي صار..
طق الباب وخش الحسن..وقفت المحققة وحولت من الكرسي...وقعمز الحسن في مكانها...
عليا عيونها في الطاوله وهو عيونه فيها...
الحسن: علاش كنتي غادي..
عليا : اسألها قبل شوي سألتني وجاوبتها..
الحسن : اني اللي نسأل وانتي تجاوبي...
عليا شبحتله: كنت مخطوفه..
الحسن: خطفك خوك..
عليا هزت راسها بإيجاب دون ماتشبحله..شبح الحسن للمحققه..اللي فهمت نظرته تلقائيا أدت التحيه وطلعت..
عليا: ماعندي شي نقوله أكثر من اللي قلته..
الحسن: قداش ليك مخطوفه..
عليا: 15 يوم..كنت نعد فيهم..
الحسن: منذر الحافظ خطف أخته لغرض شنو؟
عليا شبحتله: مش مصدق متصدقش تبي تحبسني احبس..لكن لازم تعرف ان مش كل الخوت خوت بالحق..في اللي يربطهم الاسم اللي بعد أسمهم الأول وبس...
الحسن تنهد : كنتي صغيره وقتها ..مانذكرش كم كان عمرك لما طلعتي وراي اني والضابط اللي كان مسؤول عن القبض ع خوك يومها..وصيتنا عليه وعيونك كان فيها حزن كبير وقتها..نظرة عينك توا ماتشبهش هديكا النظرة نهائي..
عليا تشبحله ومصدومه ذاكرتها اسعفتها بشويه من ملامحه..اللي تختلف هلبه عن ملامحه الحاليه..سكتت وماردتش...
الحسن: ماعندكش فكرة وينه..
عليا بغضب: ماعنديش ولانبي يكون عندي..نتمنى لو يختفي من الدنيا كلها...
الحسن شبحلها هلبه وهي حست بنظرة عيونه مش عاديه..حست بخجل ونزلت عيونها وخدودها أحمروا...
الحسن قلبه قعد يضرب بقوة ..عمره ماحس بوجود قلبه إلا لما يكون معاها بالذات في هالمرة...ناض ..
الحسن: يابنتي...خشت الضابط.. خلوها توقع ع أقوالها ووصلوها لحوش اهلها
عليا: رد بالك ترقد هاني قبل لتجيبه وتجيب أمثاله..
الحسن وقف شويه بعدين طلع بدون مايشوفلها..
اللحظه اللي طلعت فيها عليا من المركز كانت الصحافه تراجي في الباب بدوا يصوروا وهي درقت وجهها بالوشاح ودخلوها طول للسيارة..وتحركت السيارة متوجهه لحوش أهل عليا...
***
الحسن الصادق..
: ومعاه محمد رزق الله...
منذر: معناها ماكانوش يلعبوا بينا وقتها كانوا يخططوا من جد...اسمع اليوم بنطلع لتونس بر..دبرلي كل شي..
: تم ياراس...
***
نزلت عليا من السيارة ..أول ماشافت الحوش دموعها عبو عيونها..قدمت وطقت ع الباب..انفتح طول وكان مصعب اللي جبدها لحضنه طول...وسكر الباب..
اميرة كانت بتمشي للمدرسه لما شافتها خشت تجري...
اميرة: ماااااماااا باااباااا علياااا عليااا روحت..
زينب طلعت من الكوجينه تجري وصلت فالباب شافتها جرتلها طول حضنتها وقعدت تبوس فيها وتشم فيها ودموعها ينزلوا..وعليا تبكي ..بعدتها امها وقعدت تتفحص فيها
زينب ببكي: شن دار فيك هالفاجر ياريلا شن دار في بنتي..
طلع بوها بخطوات ثقيله يرعش كله مع بعضه مشتله عليا
نزلت باست رجليه ...وناضت باست ايديه وجه وقفا وباست راسه..
عليا وهي شادة ايدين بوها: سامحيني ..والله ع خاطرك بش مايضركش مشيتله برجليا..بوها حط ايده ع راسها وخداها في حضنه وقعد يبكي..وهي تبكي..
ومصعب وزينب وأميرة دموعهم سيل..
...
خبر العمليه اللي قام بها جهاز مكافحة المخدرات بالتعاون مع جهاز مكافحة الارهاب تناولاته كل وسائل الإعلام..تلفزيون ونت..السيء في الموضوع ان صور عليا طلعت والأخبار قالت انها كانت محتجزة في احد المزارع الخاصة بتاجر المخدرات البوكشاش..وهالمزرعه تقام فيها حفلات دعارة..
الناس بدت تغزل في القصص..اللي قالوا انها ذراعه اليمين..واللى قالوا ان هي اللى تجيبله في البنات..ووووو..وغيره هلبه...هذا مجتمعنا مع الاسف..
من الفضيحه اللي صارت جعفر من حوشه معاش طلع..
ومصعب سيب الخدمه بسبب عركه صارت مع واحد من اللي يخدموا معاه لمالقح ع أخته..
وأميرة بدت تكره تمشي للمدرسه من الهمز واللمز اللي يصير قدامها سوا كان من بنات معاها او ابلاتها..
مديحه تعاركت هي وأهل راجلها اللي خاضوا مع الخائضين ولأن مراد يحبها وعارف كل شي من البدايه وقف مع مرته ومادور حد
أما بثينه...منصف....؟!!💔
بتينه : بنت خوي صح لكن اللي صار مش ساهل..واني نبي لولدي مراة تشرفه وتشرف صغاره..
جواد : اتقي الله يامراة هادي بنت خوك وانتي الأدرى بربايتها..
بتينه : حتى لو الفضيحه اللي صارت كبيره هلبه مافي شي يرقعها..
جواد :وولدك هذا رايه؟
"اكيد هذا رايي"
بوه شبحله بصدمه..
منصف وعيونه حمر: هادي فضيحه كبيرة ..مانقدرش نرتبط بوحده خشت اوكار مخدرات ودعارة...حتى لو مادارت شي فهي خشتهم ولحقها عفن خوها ..اللي ياما حذرتها منه..
جواد: زي ماتبي..انت حر..بس اللي بديروه ابدا مش راضي عليه...وناض وخلاهم...
بتينه : تو نبعتلهم هدايهم اللى ردوها في البيان..
منصف : خشي خودي من داري كيسه وابعتيها معاهم..
***
يتفرج ع الأخبار في الفيس..
الحسن بعصبيه : شعب رجعي حاشا القله..
سرمد: لو تبي نتكلم في الموضوع ..
الحسن: رد بالك مش ناقصه الحكايه..نبوها تخمد مش تزيد تكبر...
سرمد: والله عيله كويسه وناس طيبه مايستاهلوش ..
الحسن يتفرج ع أخبار وساكت..
***
حابسه روحها وماتبيش تشوف حد حالتها في النازل يوم عن يوم..
ابتسام ببكي: الله ينتقم من اللي كان السبب..
نرجس: مهما قالوا حني عليا عارفينها كويس وكلام الناس يموت في ارضه لو عليا طلعت واجهتهم مش دس روحها وتثبت في الإشاعات اللي قاعده تطلع..
ابتسام : مش ساهل يانرجس اللي صار..
نرجس : عارفته مش ساهل بس لازم تقاوم..
زينب : اللي زايدها خطيبها اللي لادورها ولاسأل فيها حتى عمتها قطعت مرة وحده..
طق باب الحوش..فتحه مصعب كانوا في بنغلاديش قدام الباب جايبن معاهم كياس ..دخلهم مصعب وسكر الباب..دخل الأكياس داخل..امه ناضت ..
زينب: شنو هذا ..
مصعب: شوفي بروحك..
زينب مجرد فتحت أول كيسه اللي كان فيها قفطان مغربي..هو اللي ردوه في السوابيت وهي بروحها خداته لبتينه فهمت كل شي..
زينب وخرت ودموعها نزلوا وتلفتت لصاحبات بنتها..
زينب بألم : حتى منصف سيبها
حطوا ايدهم ع فمهم بعد شهقوا بصدمه اما اميرة اللي دموعها نزلوا ابتسمت بتهكم لأنها متوقعه هالشي من واحد زي منصف...
***
والله ياماما اللي صار معاها يحرق القلب..
وسيله : في خو يدير في اخته هكي..
جنان : العيله طيبه ياماما كيف هذا طلع ولدهم مش عارفه..
وسيله : البطن تجيب صباغ ودباغ..هيا معاش جت للجامعه..
جنان : نهائي..برغم ان درجاتها اعلى درجات في الإمتحانات النصفيه في الدفعه كامله..
وسيله :لاحول ولاقوة الا بالله..مستقبلها ادمر...
جنان نزلوا دموعها وقعدت تمسح فيهم..
***
ايام صعبه ع عليا وعيلتها..ولو معزولين عن الناس والدوة كترت عليهم..في الأول منذر وتوا عليا والكلام اللي طلع عليها..
جعفر حابس روحه في المربوعه مايبيش يطلع منه وقته كله صلاة وقراءة قرآن بس....
زينب كل ماله تزيد تتعب اكثر واكثر..واميرة معاش مشت المدرسه
مصعب الوحيد اللي كان مقوي روحه ويواجه في الناس حصل خدمه تانيه ومتمسك بقرايته ومش مدور حد..
***
فسخ !!
ابتسام : ايه يابابا..شبح وجهه معاش طايقاته للحوش معاش نبيه يخش..
عبدالقدوس: حاضر يابابا حنشوفه في الشركه بس..
ابتسام: وكان تلزه مرة واحد زيه مافيشي أمان
عبدالقدوس : ومن قالك حاط فيه أمان اني..يخدم في خدمته وعيوني وراه لو فكر مجرد التفكير انه يغدر بيا حنكرهه في الساعه اللي جي فيها للدنيا..
ابتسام ماعلقتش وطلعت من مكتب بوها طول...
***
وووك ياكبدي هديكا الزينه..
انعام : ايه يما تذكريها..
برنيه : هو اني نسيتها من لما طاحت عيني عليها واني نتخايل فيها مرت ولد خوك...
انعام: منو فيهم..
برنيه : الحسن..
انعام : ماقلتيش حسان طول للحسن بينه وبينها 18سنه..
برنيه : مش مهم..اهو توا مسكينه الله أعلم شن صاير فيها..
انعام : وجعتني هلبه لين بكيت ع خاطرها..حتى اني خشت خاطري وقبل لنعرف انها مخطوبه تمنيتها لسرمد..
برنيه : ربي يشبح فيها وفي ماليها...
***
فاتت هذيكا الليله وعليا شبه مغيبه عن العالم اللي حواليها
تبكي وترقد وبس ..وتنوض تصلي فقط وماتاكل الا لما امها تحلف عليها..وماحد جابلها سيره بفسخ الخطوبه...
فتحت ليلتها الفايبر لقت منصف متصل بالإنترنت كلماته ماباش يرد عليها..حطت في بالها انه ممكن يكون راقد..فرحت شويه لإنه روح لليبيا..وحاطه في بالها بتمشي لحوش عمتها اليوم اللي بعده وتحكي لمنصف اللي اكيد حيوقف معاها وحيدافع عنها لإنه يحبها هلبه..او هي هكي كانت تفكر...
فعلا جي اليوم اللي بعده مع الساعه 11 عليا ناضت لبست عبايه ووشاح وخدت معاها فلوس وطلعت،وماركزتش ع الكيسه اللي كانت محطوطه جنب الكامدينو اللي فيها هداياها لمنذر...
طلعت من الحوش خلسه عن امها اللي كانت تنشر في الحوايج واختها اللي كانت تتفرج ع التلفزيون..
خدت تاكسي وتوجهت بيها لحوش عمتها...
وصلت ورنت ع الأنترفون..ردت نوال..
عليا: اني عليا يانوال
نوال سكتت بعدين ردت : خشي..
انفتح الباب وخشت عليا ...
في الحوش من داخل
بتينه: علاش قلتيلها تخش
رشا : ماهو غبيه..
نوال: بالك عندها شي تبي تقوله..
طق الباب..مشت نوال فتحت
خشت عليا : كيف حالك عمتي..
بتينه من فوق نفسها: الحمد لله..
عليا لاحظت ع عمتها انها مواطيه عليها العين بس تجاهلت ..
عليا : منصف قاعد..
نوال : ماشي شويه وجاي..
بتينه ورشا قريب يطربقوا من نوال وتصرفاتها..
عليا : حنستناه في داره..وفاتت من حداهم ومشت لدار منصف..
رشا : موقحها..
بتينه: تخش ولاماتخشش مش حيتغير شي
عليا كانت مقعمزة ع سرير منصف وتستنى فيه ..لين فتح الباب وخش.ناضت عليا تشبحله بعيون حزينه ومسكورة تستنى منه يواسيها ويجبرها..
منصف وقف ع مكتبه اللي كان في داره : علاش جايه..
السؤال صدم عليا بقوة نبرة الصوت اللي قالها بيها خلت قلبها ينعصر عصر..
عليا: كيف علاش جايه..منصف..اني عليا..
منصف يشبح لملفاته ومباش يرد..
عليا قدمت: منصف اني عليا حبيبتك انت اكثر حد يعرفني..اني يامنصف مكسورة من اللي صار..مفروض انت توقف معاي وتقويني زي ماتعودت منك..
منصف بعصبيه: انتي اللي جبتيه لروحك انتي اللي وصلتينا لهني انتي اللي مشيتي برجليك لخوك اللي يااااما حذرتك منه ياااما ياعليا..
عليا ببكي: هددني ببوي هددني يحبسه ويخليه يخسر سمعته بين الناس..
منصف ضحك بسخريه: يعني هو توا ماخسرهاش..
علياانصدمت اكثر وحست بخنقه شديده..قدمت وشدت ايده نفضها عنه وكأنه ينفض في حاجه قذرة..
عليا قريب ماتت مش مصدقه ولا مستوعبه ان هذا منصف اللي تحبه وتشوف فيه ارجل من عرفت بعد بوها..
منصف: تعرفي قبل عرسنا مايفصلناش عنه الا تلاته شهور..قام كاتولجات فيده..شفتي الكاتلوجات هادوا..للمطبخ لدار النوم للصالون..كنت نبيك تختاري بروحك نبي كل شي ع ذوقك نبي لمستك في كل زاويه من الحوش..وبعصبيه شديدة ...لكن انتي خربتي كل شي كل شي ..وقعد يحدف عليها في الكاتولجات وهي تعيط وتبكي لين خشت عمتها وطلعتها وسكرت الباب..هوانهد ع الطاوله وقعد يبكي بحرقه..
اما هي بعد طلعتها عمتها..
بتينه: خلاص يابنتي مالكمش نصيب في بعض اقتنعي..
عليا شبحت لعمتها هلبه بعدين شبحت لنوال ورشا..وحده متشمته ووحده واجعها الحال..لفت وطلعت طول...
طول ماهي ماشيه كانت تبكي..وتدعي ع منذر..نست ان المسافه بعيده بين حوشها وحوش عمتها المها وكسرتها خلوها معاش تحس بشي..تمشي وخلاص وتبكي..لين في لحظه معاش تندري ع روحها بعد طاحت مغمى عليها...
...يتبع...
