#الحسن
#جمان_فريد
الجزء 20💖
تاني يوم الصبح
الكل ناض...فطروا....وقعمزوا البنات مع بعض في الصاله...
ميسون: اني نبي نخش طب ..
عليا : رغبتك..
ميسون : ايه وزادت جنجون حببتني فيه..
عليا: اهم شي انك تحبيه..لما تحبي الحاجه حتنجحي فيها هلبه..
هاله ابتسمت : صح...ايه بكري درت كيكه تفاح شن رايكم انديروا نسكافيه معاه..مازال وقت ع الغدي..
عليا: تمام...
هاله : خل نوض مالا ونقول للي مقعمزين برا..
عليا ابتسمت : كويس...
مشت هاله وكيف جايه بتطلع سمعت كلام وقفها غصب عنها...
سارة: هاله لازم تهتم بنفسها شويه ...
مجيده: عندك حق هامله روحها هلبه..
خوله : تبي من يوريها اللي نعرفه انها عايشه بروحها مع بوها وحتي صاحبات ماعندهاش..
ريحانه: حتى حسان نافر منها..بصراحه ماتنسباش بكل من ولاناحيه..
جنان بحده : هاله بنت ماشاء الله عليها ...خوي اللي ماينسبهاش مش هي...
وخرت هاله لما سمعت كلامهم طلعت من القدام من الحوش كله حاسه روحها مخنوقه هلبه..يعني حتى هما هكي رايهم فيها...به شن بدير هي ماعاشتش حياة زيها زي باقي البنات مر عليها هلبه فحياتها وياما شافت وتحملت مسؤوليه فايته عمرها..بس هما الناس هكي ديما يقيموا ويحكموا من الظاهر وبس بدون مايحطوا أعذار..
وصلت في مكان مستخطي..قعمزت تحت شجره وقعدت تبكي تبكي بقهرة وبحسرة وبألم...شويه وهدت وبدت تقرا..في آية(ولقد نعلم انه يضيق صدرك بما يقولون فسبح بحمد ربك وكن من الساجدين)
قرتها بصوت حلو بس نبرته باكيه..عاودتها أكثر من مرة...لين هدت ...غمضت عيونها واتكت ع الشجره وقعدت تسبح...
وهذا كله كان تحت عيون حسان..اللي كان بعيد عنها بمسافه كان يكلم في وحده ع الماسنجر..لين سمع صوت بكاها..قعد يشبحلها لين ناضت..ومشت...
فات باقي النهار عادي ...
بعد العصر
كانوا يتجهزوا للمرواح...
جنان : عليا تعالي اركبي معانا اني وانتي وساره ومرعي وحسان وهاله وسرمد ...
عليا : باه...
مشت عليا مع جنان وركبت..كان نظام السياره زي الباص كبيره وسودا هادي اللي كان يسوق فيها الحسن..
القدام كان مقعمز سرمد في الكرسي اللي جنب السواق..
وراه مرعي من جهة الروشن جنبه ساره
وراهم عليا وجنان..
في الأخير حسان بروحه..لاهي بالتليفون...
ركب الحسن: كلكم ركبتوا...
سارة تتفقد فيهم:لا مازال هاله...
عليا : شويه وجايه...
شويه وجت هاله وكيف ركبت: سامحوني عطلتكم..
كلهم بأصوات متقطعه: عادي..ولايهمك..مافيش مشكله..
شبحت لقت مكانها جنب حسان اتكنطت قعمزت ولصقت في الباب..
حسان شبحلها بإزدراء مع رفعة حاجب وقرب بهمس: ميت ع خليقتك اللي تجيب الهم...
هاله لصقت وجهها في الروشن وتجهلاته وهو ولا لتليفونه وكان مبتسم بتهكم..
تحرك الحسن...طلع سي دي
سرمد: كبيييييره الحسن بيفتح أغاني ياهوو
مرعي : مرات تطلع نشرة أخبار مسجله..
كلهم:😂😂😂😂
الحسن: ارقوا ارواحكم مرات تصيبكم عين ع خفة دمكم..
كلهم: هههههههههههه
جنان: هيا خلاص عاد خلوه يفتح اللي يبيه..ان شاء الله حتى النشيد الوطني متاع فنزويلا..
كلهم :😂😂😂😂😂😂😂
الحسن : باه سمعونا سكوتكم...وحط سي دي...
وبدت الأغنيه...
🎶ع هدير البوسطا اللي كانت ناقلتنا
من ضيعة حملايا ع ضيعة تنورين
تزكرتك ياعليا وتزكرت عيونك
يخرب بيت عيونك ياعليا شوحلوين ..
عليا انصدمت وراسها لوطا...سارة التفتلها وضحكت وجنان ضربتها بروس صوابعها ع فخدها...
هاله ابتسمت...
سرمد يشبح للحسن ويضحك ...ومرعي مبتسم ويشبح للروشن...
هاله شبحت لحسان لقاته لاهي بتليفونه ومنسجم معاه ومرة مرة يضحك..تنهدت بقهره وشبحت للروشن..وهو قام راسه شبحلها وابتسم ...وللا يشوف لتليفونه..
نحنا كنا طالعين بهالشوب وفطسانين..
واحد عم ياكل خس واحد عم ياكل تين..
واحد هو ومرتو ولو شوبشعه مرتو
حسان قال بهمس : زي حالاتي...
سمعااته هاله شبحتله بحده وهو شبحلها ورافع حاجبه بإستفزاز هي طول ردت وجهها للروشن...
كملوا طريقهم مع الأغنيه لين وصلوا في اخر مقطع كانوا سارة وجنان يغنوا مع الأغنيه..وبصوت عالي مع بعض
يخرب بيت عيوونك ياعليا شو حلوين...
سارة التفت وغمزتلها وجنان قرصتها قرصه خفيفه من يدها...وهي خلاص من الخجل قريب اذوب في حوايجها..
هو ابتسم ع جنب من حركات خواته..وسرمد قعد يضحك هو ومرعي...
عليا في نفسها"كان نعرف شن قصده من اللي يدير فيه..معقوله يبي يكسبني بش يوصل في منذر عن طريقي..باه علاش يدير هكي لو اني قتله حنساعدك..حركاته في من وراها قصد ..ايه صح كيف مافكرتش فيها أكيد مش مقتنع اني مانعرف شي عن منذر ومش مقتنع انه كان خاطفني..صح اكيد دار روحه صدق وهو يخطط من وقتها ..عبيطه ياعليا عبيطه"
ايه والله ياعليا عبيطه..وهلبه...الحسن الراجل الصلب الجاف الجاد الحاد صاحب قلب الحديدي زي مامسمينه لإنه جلف هلبه في التعامل ومايهاب شي...توا هو ولايقاوم في خوفه من انه يطيح في حبك..هو طاح قاوم ولاماقاوم وكل اللي يدير فيه معاك تلقائي من قلبه طول ...قلبه اللي تمرد عليه وسيطر شبه سيطره تامه ع أفعاله....
وصل في حوش اهله نزل جنان وقعد يشبح لحوش اهله بضيق..بعدين تحرك للحوش...وفات باقي يوم اليوم عندهم بروتينهم المعتاد...
***
ابتسام: غدوة نوضيني بكري ياكميله..
الخدامه: حاضر..
خش عبدالقدوس...طول ابتسام لفت بتركب...
عبدالقدوس بصوت عالي : ابتساااام...
وقفت ولفت نزلت ووقفت قدامه وماتبيش تشبحله..
عبدالقدوس: هذا غير ملتزمه وحامله كتاب الله..
ابتسام شبحتله: ولأني ملتزمه وحامله كتاب الله واجب عليا وين نشوف شي غلط مانسكتش عنه..
عبدالقدوس ضيق عيونه: شن هو الغلط اللي ريتيه؟!
ابتسام ابتسمت بنفاد صبر: بابا انت فاهم قصدي مانبيش نعيد ونزيد في الموضوع ..
عبدالقدوس بنفاد صبر: استغفر الله..
ابتسام لما سمعت كلمته ابتسمت بتهكم: تصبح ع خير ولفت بتركب
"كان شفتيه مرة تانيه قوليله يجيني نتفاهم اني وياه"
ابتسام انصدمت بعدين الفتت: ع شنو
عبد القدوس: مش هو يبي يتزوجك لازم يسمع شروطي..ونتفاهموا..
ابتسام : والله !!بعد لزيت امه وبعد الكلام اللي قالاته مازال يولوا؟!خلاص يابابا الموضوع تسكر قبل لينفتح اساسا ..ارتاح يابابا..ولفت وركبت بسرعه ودموعها ينزلوا..
وعبد القدوس تنهد بألم ومشي لداره...
***
🌄أشرقت شمس يوم جديد
بس كان يوم مصقع الشتي خش ..فهاليوم هاله كانت في قمة الحماس..لبست عبايه ووشاح ولبست عليهم بالطو اسود وتت شنطتها وشيتاتها ..فطرت كيكه وقهوة..وطلعت..لقت عليا طالعه..ابتسموا تصبحوا ع بعض نزلوا يجروا من الدروج شبحوا لبعض وضحكوا بعدين فتحت هاله الفاصل وخشوا اللحوش..لقوا برنيه وعلي نايضين صبحوا عليهم وهدرزوا شويه..ومشوا للسياره ..ركبوا وتوجه بيهم السواق للجامعه..
نزل عليا في كلية الطب ورفع هاله للغات..
عليا تمشي لقت نرجس وابتسام مقعمزات مع بعض جت وراهم طبست وقالت: صباحو..
تلفتوا وعيطوا وناضوا حضنوها واللي حواليهم يتفرجوا ..
من فرحتهم نزلت دمعتهم وعليا كذلك..بعدين قعدوا يضحكوا ويمسحوا في دموعهم ..وجبدوها قعمزوها في نصهم..وبدوا في القصقصه عاد
...
كم ليها طالعه....كويس....تمام ياحناي...ماتبي شي....ربي يحفظك..وصكر..
خش لمكتب جاد الله ادى التحيه وقعمز...
جاد الله : شن عندك قول...
الحسن: البوكشاش روح..
جاد الله : عندي علم ..حسن نبيك تهدي الفترة هادي شويه..
الحسن بإستغراب: شن في؟؟؟
جادالله: الجماعه حطوك تحت المجهر..وومش ناويين ع خير..
الحسن : وضح أكثر..
جاد الله حطله ورقه قدامه..شافها الحسن قامها وقراها ابتسم بتهكم...
الحسن : ماتخافش هادي حركات صغار عارف اللي وراها...
جاد الله : ماتتعاملش مع الوضع بأستخفاف..
الحسن: مش استخفاف...بس فاهم اللي دار الحركه هادي علاش دارها...
جاد الله هز راسه بإيجاب: اخر الأسبوع الجلسه..
الحسن : تمام....
***
عليا بشهقه: معقوله ...
ابتسام بحزن : ايه..ومن يومها معاش شفته ولاليا عين نقابله بيها...ولاهو مازال يشبح لوجهي..
نرجس تنهدت : الله يسامحه بوك وخلاص..
عليا: فيها خيرة حبيبتي...
ابتسام تنهدت بألم من وسط قلبها: الحمد لله ع كل حال...
***
طلعت من المحاضرة وكانت لاهيه ادس في المذكرة في الشنطه وقفت لما سمعت جمله...
"مبارك ياعروسه"...
التفتت لمصدر الصوت وانصدمت..
خالد قدملها: علاش درتي فيا هكي..انتي عطيتني المواقفه ومشيتي تزوجتي غيري..
هاله بصدمه : اني!!اني ولاأنت قبل اكثر من شهر جيت ودورتك بنقولك تجيب اهلك لقيت مسرة وقالتلي انك خطبت بنت خالك وبتتزوج وحتي انك كنت مسافر وقتها بش تجيب اتات حوشك من برا..
خالد بصدمه: شن تقولي انتي!!
هاله ودموعها نزلوا: والله العظيم هذا اللي صار..
خالد بدهشه: اني لاخطبت لاتزوجت اني ياهاله كنت مسافر بأمي لتونس علاج تعبت فجأة ورفعناها طول...
هاله قعدت مصدومه ولاكلمه...
خالد : معقوله ياهاله تصدقي طول اللي ينقالك وانتي عارفه كويس اني نبيك بصدق وياما درت ع خاطرك..قاعد نخدم ليل مع نهار بش نكون واتي ومانخلي شي ينقصك معاي لما ناخدك...دمرتيني ياهاله...
هاله بألم : تحسابني فرحانه باللي صار..انت اكثر شخص يعرف ظروفي واللي عشته..اني بنت ضعيفه ماعندي حد في الدنيا بعدالله غير بوي وهو راجل مريض مانقدرش نعارضه..ماكان في ايدي شي خالد ولاالله مافيدي حاجه..وتبكي..
خالد: يعني انتي مجبورة عليه..
هاله تماسكت وشبحتله: مجبورة ولا مش مجبوره معاش تفرق..نصيبك مش فيا ونصيبي مش فيك ..ربي يبعتلك اللي خير مني..ورجاءا لاعاد توقف عليا ولاعاد تكلمني اني في ذمة راجل توا...ومشت وخلاته...
خالد كان متألم لين خلاص كان يبي هاله من وسط قلبه بس ربي مش كاتب...
....
تي من زيك ياراجل ...
حسان : من جدك تحكي انت ..موال الزواج ماكانش فبالي بكل ولاكنت في بابه..
رامي: تي والله نتمنى لو طحت في عيله زي عيلتك زوجوني غصب عني لبنت حلال يعرفوها كويس..
حسان بتهكم: ولو ميت ع الزواج علاش ماتتزوجش..
صاحبهم: ايه يارامي شن مانعك وانت عندك كل شي..
رامي ابتسم : في سر اول مرة نفصح عليه..
حسان: هههههه افصح ياعم فصيح..
رامي بضحكه: فكرت في الموضوع ..او بالأحرى في وحده خلتني نفكر فيه ..بس ماليش في طيب نصيب..
حسان بضحكه : اوووو...نغيب اسبوع يصير هذا كله..
رامي : الحكايه قبل بهلبه..
صاحبهم: غير خليه يكمل ومعاش تقاطعه..
رامي بضحكه: بصراحه ياولاد من الجو اللي نديروا فيه...معاش عندي ثقه في جنس حوا في بالي أغلبهم هكي..بس في وحده غيرت نظرتي...لكن مع الأسف ..مرة جيت نشوفها لقيتها تكلم فواحد للحظه قلت زيها زي غيرها بس حبيت نتأكد طلع واحد يقري فيها ويبيها ويبي يخطبها ومافيش بيناتهم علاقه..هو حافظ قرآن ومعيد في كليتها وهي طلعت ملتزمه وتحفظ في القرآن ...
صاحبهم: لو منك فتت الموضوع بككككل ..
رامي : حاولت بس حسيت روحي نفكر فيها بجديه..سيبت سريب الصياعه لاأراديا بسببها..
حسان بتعجب: لهالدرجه..
رامي : مش حتفهم اللي صار معاي ألا لو عشته..حاولت من جديد بس مع الأسف تزوجت..
صاحبهم: الأستاذ نفسه
رامي: مش عارف...بس تزوجت وربي حاسد اللي خداها ...
حسان :تشوقت نشوفها...
رامي: ههههههههههه تعرفها ياصاح
حسان استغرب:نعرفها!!!؟
رامي : ايه البنت متاع الطعميه...
حسان انصدم صدمه تلاتيه الأبعاد ...زي من صب عليه سطل ميه سخونه ...
صاحبهم : طعميه ...
رامي : ايه ..وحكي رامي القصه للولد اللي معاهم اللي قعد يشكر في تصرف هاله..
حسان ماتحملش ناض: هي ياشباب اني ماشي ..
رامي :وين توا بس قعمزنا..
حسان وهو يكتم في غضبه : عندي ماندير..اوينا ومشي وخلاهم مستغربين...
***
روحوا عليا وهاله من الكليه خشوا داخل هدرزوا شويه وبعدين ركبوا لحياشهم..
خشت عليا..دوشت وصلت...ورقدت...
أما هاله..
خشت للحوش لقت حسان مقعمز في الصاله حاط رجل ع رجل وكإنه معصب ..تجاهلت وسكرت الباب وجت بتمشي لدار النوم...
ناض: ههههههه..دايره روحك بريئه ومش زي غيرك ...طلعتي تبي واحد قبل ياشيخه ...
هاله انصدمت والتفتت وضيقت عيونها: شنو تقول انت!!
قدم حسان : المعيد متاع كليتكم...
هاله سكتت وشبحت لجهه تانيه ..
حسان زاد قدم : معاناها صح..
هاله حطت عيونها في عيونه وقدمت اكثر: ايه كان يبيني معيد في كليتنا وحافظ كتاب الله وراجل خادم ع راسه وعمره ماتجرأ يكلمني الا مرة وحدة وقالي فيها انه يبي يخطبني..واني كنت شايفاته مناسب ليا وواقفت..بس للأسف..النصيب جابني ليك أنت..
قدم حسان أكثر: جابك لواحد صايع فاشل وفاجر ...
هاله : لله حكمه واني مسلمه امري ليه يفرجها من عنده..
حسان : كيف ترا؟؟يعني طامعه يجي يوم ونطلقك وتاخديه؟؟
هاله سكتت ومابتش ترد..
حسان بعصبيه : رددددي تكككلمي ..تبيني نطلقك بش تاخديه..ولا..لأنك تشبحي فيا نجس وهو طاهر ولا..
هاله ولا كلمه..كان قريب عليها هلبه انفاسه تضرب في وجهها..لاحظت عيونه كانت مركزة ع مكان معين في وجهها خافت..
حسان بهدوء: لكن اني مش حنطلق ..حتقعدي في..ذمتي..لأخر يوم فعمرك..وباسها قعدت تقاوم هو شدها وكان عنيف ...هو كان يحس بشعور حلو بالمرة أول مرة يحسه في حياته رغم ان ياما جرب اشكال وألوان..بس هالمرة غير..لكن هي كانت تتخايل في مع قداش وحده دار هكي انقرفت وتقززت وبكل قوتها دفاته...ورجعت في مكانها..
هو قعد يتنفس بقوة وهو مصدوم فيها..وهي ترجع قريب تموت...
حسان مش مستوعب لهالدرجه هيا منقرفه منه وعايفاته ...وخر خطوات ولف وطلع من الحوش طول ..
اما هي فوقفت ترجيع وقعمزت ع ركابها وقعدت تبكي بالعبره...
***
وصله الإستدعاء؟
منصف: ايه وصله..
عثمان : ربيه يامنصف وحطه في حجمه الطبيعي..هو راسه كبر هلبه...
منصف : حنكسروله وراسك حنكسره..والايام بيني وبينه..
عثمان : بس نبي نعرف من وين عرف بقصة دبي..
منصف: المفروض الروس هما اللي يعرفوا...
عثمان : صح...
...
رفع عليه قضيه..
:المحامي منصف هو اللي اقنعه يرفعها..
منذر: كلب الزينه هذا...
: شن في بالك ياكامليون..
منذر: تو نمخمخلهم كويس...
: الليله الكوبرا بيشوفك ف ****
منذر هز راسه بإيجاب: تماااام..تمااااام...
***
🍃....تمضي الأيام...
الحسن كان لاهي يدور ورا عثمان والبي ..تلاقى مع بلال بش يشوف شن الوضع وبلغه بلال باللي يخططله..بلال حقد ع عبدالقدوس من الإهانه اللي اهانها لأمه وزاد اصرار انه ينفد اللي طلبه منه الحسن..هو وعليا معاش تقابلوا إلا خطف..
الحسن كان يقاوم في نفسه لإنه بدي يحس بضعف بسبب شعوره اتجاهها.. وهذا أكثر شي مايبيشي ورافضه لهذا كان يتهرب من شوفتها ع قد مايقدر...
اما حسان فكان يطلع من الصبح مايروحش إلا عقاب الليل وكان يتحاشى في هاله..
بس مرة مرة في الليل يقعمز حدا دراها ويسمع فيها كيف تقرا في القرآن لين تكمل ويمشي يرقد..
عليا كانت منشغله بقرايتها وبس ومرة مرة تنزل تهدرز ع العيله وعايشه حياتها عادي وماأهتمتش هلبه لغياب الحسن..
***
يوم المحكمه...
كان يوم ماطر...ركب الحسن لشقته بيجيب منها كبوط حاطه في دولاب دار النوم..عليا طبعا كانت في الكليه..
طلعه من الدولاب ولبسه وقعد يساوي في روحه قدام مراية الزيانه..جت عينه ع حديده شكلها مميز محطوطه ع الزيانه ..اثارت فضوله قدم وخداها..لقي من برا منقوش عليها اسم عليا..ابتسم لاإراديا..تفحصها كويس فيسع ماتلاشت ابتسامته وتغيرت ملامحه لصدمه ممزوجه بالغضب..لما شاف اسم منصف منقوش عليها من داخل..كان حيكسرها بين ايديه بس لوحها ع الزيانه وطلع وهو في قمة الغضب من الشقه...
***
في المحكمه..
مقعمز يستنى بفارغ الصبر بش يمارس هواياته الجديده حرق دم الحسن..اللي خدي منه حب عمره....
عثمان : تتوقع يجي..
منصف: 100% جاااي...
عثمان سكت وقعد يستنى شويه وخش الحسن..تجاهل منصف وعثمان اما هما فكانوا يشبحوله..ابتسم منصف بمكر"حنحرقك حرق اليوم"...
شويه ونادوا عليهم وخشوا..
بدي منصف يتكلم قدام القاضي وكان يعرف كيف يتلاعب بالكلام..وعثمان كان يقوله في اللي حفظهوله..
الحسن دافع ودفاعه كان مقنع ..لذلك رفض القاضي الدعوه..طلعوا..والحسن كان ماشي فات من جنبه عثمان شبحله بتهديد وطلع ..
منصف: هادي مش اخر مرة حنتلاقوا فيها هني..
الحسن وقف والتفتله : وفي كل مرة حنخليك تطلع وايديك ع راسك..
قدم منصف ضحك بتهكم: ممكن حنخسر قدامك في كل القضايا الا قضيه وحده...
الحسن شبحله باستغراب ورفعة حاجب..
منصف فتح تلفونه حط ع رسايل ومده للحسن : شوف بعينك..
الحسن جبد التليفون وقعد يشوف كانت رسائل من منصف لعليا والحسن كان حافظ رقمها وكلها تم استلامها..
منصف: هي صح ماردتش عليا..بس سؤال علاش ماغيرتش رقمها لتوا..؟؟
الحسن قلبه قعد يضرب بطريقه موجعه وكإنه متألم..مد لمنصف تليفونه ولف وطلع..اما منصف فأبتسم بنصر وطلع وراه..
***
الساعه 1ظهرا..
روحت عليا يومها الساعه12مع هاله ولإنه خميس قعدوا لوطا لقوا ريحانه وجنان قدامهم وكانوا مقعمزين مع انعام يهدرزوا بدت تصب المطر بقوة وعليا كانت تعشق المطر..
عليا :تعالوا نطلعوا ..
هاله : الدعاء مستجاب توا..
انعام : حمستوني نطلع..
جنان : مالا هيا خل نطلعوا قبل تروح حناي..
ناضوا بيطلعوا..
انعام : هيا ريحانه تعالي ..
ريحانه: عارفتيني مراضه ..
انعام : ايه مالا اقعدي ..وطلعوا ..
مشت هاله في تركينه مستخطيه وقعدت تدعي تحتها..
اما انعام فوقفت تحت المظله وتتفرج وتضحك ع جنان وعليا وهما يغنوا تحتها ويديروا في حركات مجنونه ويضحكوا...
...فهالحظه خش الحسن وتوجه طول لحوش العيله خش لقي ريحانه واقفه الروشن هيا شافت صورته عاكسه ع المرش..
ريحانه بخبث: مرتك طفله ياولد عمي...طالعه برا ترقص وتغني تحت المطر..
الحسن وصلت عنده للشيطان الرجيم..ولا وطلع لف للجهة التانيه في الجنان وشاف المنظر..
الحسن بعصبيه وصوت عالي: شن اديري هني ياحيوانه انتي وياها...
كلهم انصدموا وخافوا ماعدا عليا اللي طارتلها من اهانته..
عليا : علاش تتكلم هكي شن درنا..
الحسن كان موجوع منها هلبه من الحديده اللي شافها الصبح مرورا بالرسائل اللي وراهوله منصف..للمنظر اللي توا شافه..
الحسن بغضب: انتي بالذات تسكري فمك وتنتلفي تركبي لحوشك..بصوت عالي ..هيااااااااا...
انتفضوا من الخوف وعليا خنقتها العبره وركبت خشت وتووجهت طول لشقتها وهي ماشيه جت عينها في عين ريحانه اللي شبحتلها بشماته زادت عليا اضايقت وطلعت طول ..ركبت ودموعها ينزلوا وهي في قمة الغضب..
الحسن : قسما بربي نلمحكم مرة تانيه برا حتشوفوا مني شي عمركم ماشفتوه..خشوا كلهم بسرعه ...
ماعدا هاله اللي ماشبحهاش لانه جايه في تركينه بروحها وكانت خايفه..
عليا مقعمزة ع السرير تقرض في ظوافرها وتهز مع بعضها من الغضب ودموعها تنزل..سمعت صوت الباب...انفتح وتسكر..خشلها وهي ناضت وجت قدامه: اللي درته توا مستحيل نسامحك عليه اهانتك ليا قدامهم لوطامستحيل ننساهالك..
الحسن شدها من دراعها وبصوت عالي: صوتك معاش تعليه في وجهي معاش تردي عليا الكلام ..سايرتك قبل لكن الباين
ماتنفعش معاك المعامله بإحترام انتي..
عليا بعيون غاضبه مدمعه: مش حتحترمني مش حنحترمك..
الحسن بعصبيه شديده : ع اساس انتي احترمتيني قبل ..جبدها حدا زيانه وقام الحديده وحطها في وجهها..احترمتيني لما حاجه زي هادي تقعد عندك..
عليا مصدومه وساكته..لفها وليه وجبدها بقوة لين خبطتت في صدره..اللي داخله قلبه ينزف ...احترمتيني لما قاعدة تستقبلي في رسايله وتقري فيها...هكي انتي احترمتيني صنتيني...قوووولي ...تكللللمي...
عليا مصدومه ومش قادره تتكلم وطت عيونها لوطا..
تمنى لو دافعت عن نفسها لوقالت كذب كان مستعد يصدقها لو كذبت عليه..
طلقها ووخر ومسح ع وجهه بإيده وقال بصوت هادي: وعد نقطعه ع نفسي قدامك يطيح خوك فأيدي حنطلقك طول ..وبريله وقتها ..بس طلب اخير..ياريت ياريت يابنت جعفر الحافظ من هني لهداكا الوقت تصونيني تصوني الراجل اللي انتي ع ذمته ..وطلع من حداها انتفضت لما سمعت صوت الباب كيف تقربع..حطت ايديها ع وجهها وقعدت تبكي بحرقه شديده...
...يتبع....
