#الحسن
الجزء36
#جمان_فريد
ماتتحشميش خليك عاديه والله ناس طيبه وحتنسجمي معاهم طول..
أميرة بإبتسامه خجوله وهي تذكر في سرمد: باه...
طلعت عليا هي وأختها من الحوش وتقابلوا مع هاله..
هاله ابتسمت: كيف حالك أميره ..
قدمت اميرة وسلمت عليها: الحمد لله...كيف حالك إنتي..
هاله : الحمد لله ..
عليا : شن دايرة..
هاله : مكرونه بالبيشاميل..وانتي...
عليا: طاجين جبن..
ونزلوا مع بعضهم اول مافتحوا الفاصل قابلهم سرمد ..اميرة ادرقت وراهم...
سرمد ابتسم: هاه شن دايرين..قدم ..شن في هني..
عليابضحكه: طاجين
سرمد: اممم كويس..شبح لهاله..قلبي يدق واني نشوف للي فيدك..علاش ياترى..
هاله : هههههههههه اللي فبالك صح...
سرمد: انتي أحسن وحده..بعدين شبح لعليا...واكيد حتى انتي احسن وحده..واللي وراك مدرقه مش عارف علاش حتى هي احسن وحده..
هاله وعليا:😂😂
أميرة:😳🙈
عليا : متحشمه شويه ..
سرمد برفعة حاجب ابتسم..
خشوا كلهم داخل لقوا انعام وسارة وبرنيه في الصاله قعمزوا وسرمد قعد واقف..
سارة: انستي اميرة..
اميرة: الله يأنسك..
انعام : خودي راحتك سموحه ماتتحشميش..
ابتسمت أميرة...
برنيه : مرحبتين بيك بنيتي..
اميرة: تسلمي ياحناي..
سارة بضحكه: ياحليلي اني حسيتها ولت كنتنا حتى هي
سرمد ابتسم..
عليا : خلاص ره بتبخر من الخجل ..
اميرة قرصتها..وهما ضحكوا..
سرمد وهو مبتسم: هيا حطولي اني ومرعي..
انعام : باه...حطوا لمرعي وسرمد وسرمد رفع صفرتهم وطلع..وأميرة بدت شويه شويه تنطلق وانسجمت معاهم..
عليا كانت تضحك بالسيف حتى في الماكله كانت تجامل ماهناك ماكلت..
لما تكون متالم من داخل صعب تستمتع بأي شي حلو يمر عليك لإن قلبك المجروح مش قادر يعيش حالة السعاده هادي..ببساطه القلب هني مفهوم السعاده عنده اختصر في شخص واحد...💔
***
ماشيين في ممر طويل..
: واحد من الناس اللي كانت متوغله داخل المنظمه وطاح في ايدينا وحافظنا ع حياته أكثر من حياتنا ..
الحسن : ماتكلمش معاكم بكل..
: لا قال نبي نشوف الافندي الحسن..
الحسن : تمام..وصلوا في مكتب التحقيق..فتح الحسن الباب وخش..كان يشبح للشخص اللي مقعمز قدامه هلبه..بعدين قعمز..
الحسن : قالوا طلبتني بالإسم..
راس الغول: ايه...واخيرا شفت الوجه اللي مداير فينا الرعب..
الحسن شبحله ببرود: شن عندك..
راس الغول : اللي بنقوله توا حيكلفني هلبه ..بس بصراحه ماعندي شي غير روحي وبالنسبه ليا مش غاليه هلبه خل ياخدوها..
الحسن : فعلا لو كانت غاليه عندك ماكنتش غرقتها فهالوحل...المهم توا خش طول في الموضوع وقول شن عندك.ماعنديش وقت نضيعه معاك..
راس الغول تنهد واتكي ع الكرسي: ليا معاهم 20سنه..تكفي ان نعرف عنهم بعض الحاجات..هي من اكبر عصابات تجارة المخدرات ونشطه من قريب 50عام..
الحسن: اللي قلته نعرفه ..نعرف انهم كانوا مدعومين من النظام السابق..وبعده..وللان..تسقط دول وهما قاعدين قايمين..
راس الغول: صح...كبيرهم..ينادوا فيه الكوماندا..لاعمرنا ريناه ولاشفناه ولاتعاملنا معاه نهائيا ..كانت تجي الأوامر منه عن طريق رجاله..ولما زدت سألت عرفت ان ماحد شافه حتى القدم...الفترة الأخيرة سيب وعطي المكان لغيره.
الحسن بإنتباه:بالزبط امتى..
راس الغول: تلاته الشهور الأخيره..لواحد لقبه الكوبرا...تبي الحق الكوبرا خلال سنين الأخيره هو اللي يمشي في المنظمه..
الحسن : وحتى هو ماتعرفوش شكله..
راس الغول: شفناه وماشفناشي..يعني كان يتلاقى مع افراد من المنظمه لكن كان متنكر والقناع اللي كان يلبس فيه غريب شوي..قابلته مرة وحده بس..واحد جلف ومافيشي رحمه بتاتا...
الحسن : مافي حد فيكم عنده رحمه من الأصل..عندك شي تاني غير هذا..
راس الغول: اني طلبتك بالأسم لسبب تاني..
الحسن : شن هو..
راس الغول: زي ماتعرف انت تشكل علينا في خطر كبير وياما خسرتنا رجال ومال..من المفروض انك تموت..بس كان الإحتمال هذا ديما بعيد عندهم..
الحسن ضيق عيونه : المعنى؟
راس الغول:بنسألك اني توا؟..ليك يد معاهم..
الحسن شبحله بتهكم: ماعنديش نيه نمارس العنف..
راس الغول ضحك بتهكم: المهم ..هما مايبوش يضروك ويبوا يضروك..اني ولإن امري شبه منتهي..بنحذرك..انت تحديدا لو ماقتلوكش..حيديرولك مصيبه اكبر..
الحسن شبحله هلبه بعدين ناض: كلامك لاقدم ولااخر..كانوا حينهوا امري في اخر عمليه غير ربي مايبيش..وجي بيطلع
راس الغول: اني حذرت..وأنت حر...
الحسن طلع وسكر الباب..
***
ماشي بيحقق مع راس الغول...
: ايه..
منذر: فهمته يقوله زي ماقتلك..
: ايه ياراس ...
منذر: تمام..تمام
***
تاني يوم...
الساعه 11
كان يمشي بالقيلا بانت عليه من بعيد عيونه ضحكوا قبل فمه..من لما وصلاته رسالتها امس وقلبه ماخلاشي يرقد...
وصل فيها..
بلال: السلام عليكم..
ابتسام بملامح بارده وهي تشبح للقدام: قعمز..
بلال ابتسامته تلاشت..قعمز بحداها بمسافه..
ابتسام : اسمعني كويس..اني نحب نعيش بضمير مرتاح ضمير يحس برضا ربي عليه..لهذا القرار اللي خديته مرتاحه هلبه اني خديته..اني نحب البلاد هادي ونتمنى نخدمها باللي نقدر عليه..وتوا جتني فرصه كبيرة لعندي ومش حنضيعها ..اني معاكم انت والشرطه فاللي بديروه...حتى لو كان ضد بوي..عيونها تعبوا دموع..مع الأسف هو اللي جابه لروحه..
بلال وهو متفاجأ: يعني..
ابتسام : حيتم كل شي في وقته..
بلال مش مستوعب اللي تقول فيه..
ابتسام شبحتله بغل: لكن لازم تعرف ان انت عندي معاش تسوى شي..ولاعاد تعنيلي حاجه...زواجنا مربوط بمده مهمتك وبس ..وصدقني حنساعدك ع قد مانقدر بش اتمها ونخلص منك في اسرع وقت..
بلال اللي كان يعرف يقرا لغة العيون كويس قري الكلام اللي فعيونها اللي كان عكس اللي طلع من فمها تماما ابتسم : حاضر..
هي طول ناضت ومشت وخلاته..
بلال: المهم نقعد قريب عليك..
***
الساعه 1الظهر..
خشت اميرة للحوش بعد حطها سالم وماشي يجيب عليا وهاله..بحكم قرب مدرسه اميره من الحوش..
ركبت الدروج وسرمد جي طالع وقريب انخبطوا في بعض..
سرمد: أووو ..
اميرة راسها لوطا وجهها احمر..
سرمد: روحتي..
اميرة هزت راسها بإيجاب..
سرمد بضحكه: مفروض رديتي عليا لاقاعده في الطريق..
اميرة: هههههههههه..
سرمد: ترا قيمي راسك..
اميرة بالشويه قامت راسها جت عيونها فعيونه الملونه سرحت فيهم ..
سرمد وهو ذايب: انتي علاش حلوة هكي..
اميره وطت راسها.
سرمد: وحلوه هلبه...
اميرة معاش قدرت تتحمل طول هربت وفتحت الفاصل وخشت وسكراته وراها..
سرمد تنهد: حلللللوةهلبه...
"من هي هادي"
التفت سرمد بخلعه: منو!!
برنيه : اني اللي نسأل فيك
سرمد بربكه: النخله اللي غادي..
برنيه شبحت للنخله وشبحتله بإستغراب..
سرمد بضحكه مرتبكه: هههه.هي..اني ماشي ..ماتستنونيش ع الغدي..ولف ونزل طول ..ركب سيارته وطلع ..
برنيه مطت شواربها بتساؤل وخشت..
***
فاتوا يومين..
جت فيهم أم بلال لحوش عبدالقدوس حددت يوم عرس ولدها ع بنته..اللي كانوا بعد اسبوعين ...
اميره قاعده تعيش في اجمل حاله تعيشها اي بنت في سنها..بالذات وان سرمد كان جريء هلبه بكلامه ونظراته وهي حابه جرأته هادي..
عليا قلت ماكلتها وحالها مش باهي بكل لاسأل عليها ولادورها وهي قريب تموت ع شوفته هالمرة حست انه بعيد اكثر من قبل هلبه هلبه..مش حاسه بطعم شي من غيره...
اما هو فقاعد في المدينه اللي هو فيها مشغول بالتحقيقات والتحريات ووصل لهلبه معلومات تفيده..ماخطرتش في باله عليا؟!...هو قادر يحولها من باله...غير يسهى شويه ولايغمض عيونه بيرقد تجي بين عيونه..مستاحشها بيموت عليها ..لكن مجروح هلبه هلبه..هو مش شاك في إنها تخون فيه لا..بس هو حاسس انها ماتحباش ..وقاعده تحب منصف..مالا علاش رافضاته؟!!
خوله قاعده منسجمه في الخدمه وأمورها تمام بالذات بعد غيرت شفرتها..
في يوم كانت راكبه لمكتب المدير بتسلمه ملف مطلوب منها..
وصلت وطقت الباب وخشت...
خوله: تفضل استاذ وليد هذا الملف اللي طلبته مني..
وليد قعد يتفحص فيه :ممتاز..
خوله : في شي تاني..
وليد ابتسم: لا تقدري تولي لمكتبك..
خوله ابتسمت ولفت وهي ماشيه وقفت والتفتت : احم استاذ وليد..
وليد : نعم..
خوله: احمم..نقدر نعرف..يعني..زميلي في المكتب رياض علاش استقال..
وليد ابتسم : قال ماانسجمتش في الخدمه معاكم..
خوله "غريبه هوقال انه بأمس الحاجه ليها يسيبها ع خاطر ماأنسجمش"..
وليد : في حاجه؟
خوله : احمم..مش عارفه شن بنقولك..اخر يوم ليه معانا صار بيني وبينه سوء تفاهم..وبصراحة اكتر اني اللي غلطتت فيه ونبي نعتذر منه ليا فترة نحاول نوصل فيه ومش قادرة..يعني ماعندكش ليه شي..رقم تليفون مثلا ..هكي يعني..
وليد ابتسم: هو مجرد موظف عندنا علاش بيكون عندي رقم تليفونه..
خوله ابتسمت بإحراج: صح..اسفه جدا خديت من وقتك عن اذنك استاذ...
وليد : اذنك معاك..
لفت وطلعت طول..ووليد ضحك وطول قام تليفونه ودار اتصال برقم معروف صاحبه...
***
بعد العصر ..
مقعمزين يشربوا في قهوتهم في الجنان الجو ربيعي..والطقس معتدل..
هاله مقعمزة حدا حسان وتهدرز عليه ..وانعام تهدرز مع ساره وأميره واقفه حدا النخله مع برنيه وتهدرز عليها وسرمد يشبحلهم..اما عليا فكانت في عالم تاني عالم اللي غايب عنها ومخليها تعاني مع شوقها ليه...ملامحمها بهتت ووجهها شاحب من قلة الماكله وعيونها الحلوات ذبلهم البكي اللي كل ليله تبكي..فيه..
🎶ياغايب ليه ماتسأل ع أحبابك اللي يحبونك
ومايناموا الليل لعيونك انا بفكر فيك
تبعد عني وتنساني محتاجك جنبي ترعاني.
تنسيني دموعي انا مشتاق لعينيك...
ياحبيبي لاتروح بعيد..
انت نصيبي وبقلبي الوحيد
انت اللي بقلبي والله تفداك الدنيا كلا...
برنيه : وهو هذا...
اميره : حينفعني كلامك في البحث هلبه صحيتي حنينه..
برنيه بضحكه: سلمها ياربي ..ان شاء الله بالنجاح..هيا تعالي نقعمزوا حداهم..
اميره بإبتسامه : هيا..مشوا هما الزوز وقعمزوا بحداهم..اميرة شبحت لسرمد لقاته يشبحلها ابتسمت ونزلت عيونها وهو ابتسم..
سارة: مش ع بعضها شوفيها بكري دموعها ينزلوا وتمسح فيهم بسرعه..
انعام : في حاجه ..اصلا علاقتهم ببعض غامضه ومش مفهومه..
سارة: ماسألتيش نفسك ليش بعد اربعه شهور زواج لتوا مافيش حمل..
انعام: حتى هاله...
سارة شبحت لهاله وحسان:ره حتى هما ماكانوش مزبوطين مع بعض ماتنسيش حسان مجبور عليها بس توا تحسنت علاقتهم ببعض ..
انعام تنهدت وسكتت...
برنيه : خيركم اللي هذا في جهة تعالوا هنايا..
سمعوها وجو قعمزوا حداها...
برنيه وزعت نظرها عليهم بعدين شبحت للجنان: هالجنين السياح النياح يبيله صغويرة يجروا فيه ويلعبوا...
هاله وعليا:😳😳
حسان قرب من هاله وهمس في وذنها: سمعتي حناي شن تبي..
هاله فنصت فيه وجهها نار من الخجل..
سارة بتغير الموضوع: الليله حلقتك سرمد
سرمد بأبتسامه : ايه..
انعام : ع شنو....
سرمد: ع....
اميرة بتلقائيه: ع الوضع في الجنوب وشن سبب الأهمال الدائم لكل انظمة الحكم المتعاقبه فالبلاد للجنوب وناسه ..و...سكتت لما لقتهم يشبحولها ومتفاجئين..
انعام: حافظه الدعايه شكلها...
عليا بضحكه: تحضر في دعايه البرنامج كل ماتتعاود وتحضر في البرنامج فوقته وف الإعاده..
اميرة بإحراج: عليااا🙈
كلهم : ههههههههههههههه..ماعدا سرمد اللي سرحان فيها ومبتسم...
***
بتخش لفراشها وترقد بعد شافت الساعه ولقتها1ليلا..
رن تليفونها برنة مسج..فتحاته
(أراكي غدا يالبرتقاله)
ريحانه قريب تتطربق ردت عليه برساله
(يراك عزرائيل الليله وماتلحق ع غدا)
وسكرت تليفونها ورقدت...
مجرد وصلاته الرساله وقراها
منذر: ههههههههههههههههههههه...تهبل الجروة هادي..
***
ناضت الصبح بكري هلبه.. صلت وبدلت ونزلت لوطا..
كان الجو حلو..قعدت تدهور في الجنان الكبير...دموعها ينزلوا غصب منها...محجر عينها انحرق من دموعها المالحه اللي ديما تنزل..وصلت في العنبه قعدت تشبحلها وتذكر مواقفهم واذكرت اخر مرة لما وقفوا هني شن قاللها...
<< حالاتك كلها حلوة..مرة طفله..مرة مراة ناضجه..واني نحبك بكل حالاتك ...حتى لما تولي غولة جنانات وتفصلي...>>
عليا"واني نحبك موت..حتى لو ماقلتهاش بلساني قلتها بافعالي قلتها بعيوني قلتها بأكثر من لغه..اه منك ظلمتني وظلمك مر"...
...
درس السيارة قدام الحوش بالزبط..نزل منها وقعد ينزل في قابيات فواكه بعتهم معاه جده من الحوازة لما خطم عليها...
نزل أول وحده وخش بيها ...بيحطها حدا الكوجينه من برا..
وهو ماشي سمع صوت يغني قرب اكثر..لقاها واقفه قدام العنبه وتغني...
لا ياحبيب العين لاتظلمني ظلمك عذاب مرير
ولو ريت مني عيب لاتجاملني حقك علي كبير
هكي غلا الزينين لاجرح لادمعاات..
دايم زها للعين لاظلم لاسيات..
غير الشوق غير الشوق والود الغزير
لاياحبيب العين لالا..
"احمم حمم"
جمدت في مكانها بس قلبها كالعاده يرجف💓...جسمها قعد يرجف تبي تتلفت انفاسها تسارعت..التفتت ..شافته يحط في القابيه بمسافه بعيده عنها شوي..وهو مولي تنحنح من جديد...ضحكت ودموعها نزلوا فهمت قصده ..معناها "خشي"...ع طول خشت ..
هو ولا ومعاه قابية تانيه شبح جيهة العنبه مالقهاش ابتسم ابتسامه ع جنب...ولا طلع يدخل في قابيه..تانيه...
قعدت مقعمزة في الكوجينه وهي تحاول تهدي قلبها شويه وتوقف دموعها اللي ينزلوا بدون اراده منها..ع خشة برنيه...
برنيه: صباح الخير بنيتي..
عطت بالظهر ومسحت دموعها : صباح الخير حناي وتصنعت الإبتسامه...
برنيه : نسمع في حس برا...
خش الحسن: صباح الخير..
برنيه بفرحه: وليدي جيت ..صباحك مبروك وليدي..
قدم باس ع ايدها وراسها...
برنيه : فطرت..
الحسن هز راسه بالنفي..
برنيه: بنيتي طلعي زميته ديرها لراجلك..
الحسن : نبيها من ايدك انتي حناي..
عليا خنقتها العبرة : احمم..خل نمشي نقول لأختي تنزل..وفاتت بسرعه من حداهم وطلعت..
برنيه شبحتله بضيق: خيرك معاها..
الحسن وهو يصب في ميه بيشرب: وين المشكله لوقلت نبيها من ايدك انتي..
برنيه : اسمع ره قاعده نشوف غير ندير فروحي مش شايفه..البنيه حالها مولي حال لاتاكل لاتشرب زي الناس..وعيونها ديما منفوخات من البكي..البنت امانه فرقبتك ياولد مش قد هالأمانه ردها لأصحابها..وطلعت من حداه..
هو بلع ريقه..وغمض عيونه بشده وفتحتهم وقعد يشرب في الميه بغل...
هي لما ركبت طول خشت للحمام وسكرت عليها وقعدت تبكي...
اميره اللي كانت تبدل في الدار التانيه حست بيها خشت مشتلها لدار النوم مالقتهاش قدمت وقفت حدا الحمام وطقت الباب..
اميرة: عليا انتي داخل..
عليا وهي تحاول تعدل نبرة صوتها: انزلي حبيبتي افطري..لحقاتك..
اميرة : باه...طلعت اميرة من الشقة ونزلت لوطا لقت سرمد قدامها..
سرمد: هو يإنك انتي تلاحقي فيا..يالقدر مصر يطلعك في طريقي..
اميرة تنرفزت: نلاحق فيك!!اسمع انت مذيع مشهور واني ماننكرش معجبه بيك كمذيع بس مافيش حاجه تانيه..
سرمد: كسرتي قلبي اللي كان متأمل في هلبه حاجات..
اميرة شبحتله بحده..
سرمد: ههههههههه..احمم..صفحتي الشخصيه ع الفيس اكيد تعرفيها حنفتح طلبات الصداقه اليوم بس ع خاطرك..
اميرة رفعت حاجبها وخشت..
وهو ضحك ومشي لسيارته...
...
طلعت عليا من الحمام وهي ماشيه حست بدوخه..بس شدت روحها..تماسكت وخدت شنطتها وطلعت من الحوش ونزلت لوطا...
خشت لقت هاله واميرة وانعام يفطروا..والحسن مقعمز برا ياكل شافته من باب المطبخ المفتوح ع الجنان..
برنيه: هي تعالي افطري ..
عليا ابتسمت مجامله : فطرت فوق..
اميرة شبحتلها بإستغراب...اما برنيه فهمت عليا ولفت بوجهها جهة الحسن اللي عاطي بظهره وياكل..
سمعوا كلاكس..
عليا : هيا..بالسلامه...وطلعت...
طلعوا وراها هاله وأميرة بسرعه..انعام شبحت لبرنيه..واشرت بعيونها لأمها بمعني شن صار..
برنيه شبحت للحسن وهزت راسها ايمين ويسار بأسف..
اما هو فكان ياكل واللقمه بالسيف تنزل ..قلبه واجعه عليها هلبه ..بس كرامته وكبريائه مسيطرين ع تصرفاته معاها...
***
زاهيه : اول مرة يجتمع بينا رئيس مجلس الأدارة..
مودة: قصدك بموظفين الشركه كلهم..وين بيحطنا..
خوله بضحكه: في قاعة زي المسرح هنايا هيا اللي حنجتمعوا فيها..
زاهيه : قالوا أول مرة يديرها..
خوله : اشبح شن في ان شاء الله خير..
وصلوا للقاعه وخشوا لقوا القاعه تعبت..شويه واكتمل عدد الموظفين..خش وليد ومعاه السكرتيرة ومدير مكتبه..كلهم ركبوا ع الستيج وقعمزوا ع كراسيهم وخلوا كرسي فاضي في نصهم..
زاهيه : متحمسه بش نشوفه...
خوله : هههههههه...
وليد قرب ليه لاقط الصوت: احمم..صباح الخير عليكم جميعا..اليوم الأستاذ الراوي حب يجتمع بيكم زي ماتعرفوا..
وهذا اول اجتماع ليه بالموظفين..السبب انه يبيكم تتعرفوا عليه اكثر..ويكون في تواصل بين الرئيس والمرؤوسين..
شبح للباب..اهو جي...
كلهم التفتوا للباب وشافوا الشخص اللي كان بكامل اناقته خش ووراه شخص قايم الشنطه..كلهم يشبحوله بفضوله ..ألا المجموعه اللي كانت تشبح فيه في القسم اللي كان يخدم فيه كلهم مصدومين..بس مش زي صدمة خولة بتاتا اللي ماقدرتش ترمش من تأثير الصدمه عليها ..
هو وصل في كرسيه وقعمز..وزع نظره عليهم ..قرب ليه لاقط الصوت..
رياض: صباح الخير...سعيد بلقائي معاكم اليوم...اول شي خل نعرفكم بإسمي كامل..وجه نظره لخوله اللي ماكانش اصلا يشوف في غيرها من بين الموجودين ...معاكم..رياض زايد الرواي...
خوله جاحظه نظرها فيه بصدمه شديده ومش مصدقه بكل..
***
الساعه 11
كلية الطب...
ماشيات التلاته طالعات من الكليه بيمشوا لكليه العلوم ع رجليهم..
نرجس: رياضه يابنتي..
ابتسام: بطيحي رجلينا انتي ..
عليا مش معاهم بكل...
نرجس : هيا هي قصوا بسرعه..فاتوا نرجس وابتسام ..وعليا ماكانتش ع بعضها قصت بعدهم ومش مركزة ع السيارة اللي جايه..
التفتوا نرجس وابتسام وشافوها عيطوا الزوز: عليااااااااااا
اما هي لما سمعتهم شبحت للسيارة الجايه ناحيتها حست بروحها مش قادرة تتحرك...وفجأة الدنيا ولت سودا
..وعليا طاحت في مكانها.....
...يتبع...
