#الحسن
#جمان_فريد
الجزء 15💓
الساعه 2ليلا
تشبح لتليفونها اللي يرن ..هادي تالت مره يتصل خلال5دقايق...قررت ترد ..ردت..
الحسن: معلومه لازم تعرفيها عني...اني نحب الإصرار هلبه ومانعرفش اليأس بكل..
عليا ابتسمت تهكما: به وبعدين...
الحسن : السلام عليكم...
عليا: وعليكم السلام..ياريت تخش في الموضوع طول لإني ناعسه ونبي نرقد
الحسن: وهذا اللي بنديره حتى اني ماعنديش وقت اكثر من اللي حددتهولك بش نضيعه معاك..
عليا تنرفزت منه بس فضلت السكوت .
الحسن: المرة اللي فاتت سمعتك وماعقبتش لأني كنت نبيك تكملي اللي عندك واني نقول اللي عندي..بس حضرتك كنتي مستعجله...ع العموم...
أني اللي يعرفني من محيطي القريب يعرف ان الزواج فكرة مش واردة عندي ابدا...لأنه بالنسبه ليا تقييد..حيقيدني عن الشي الوحيد اللي نعشقه فحياتي هو خدمتي..
عليا بتهكم: وشن اللي خلاك تخون عشقك!!
الحسن: معلومه تانيه لازم تعرفيها عني..مانحبش من يقاطعني
عليا بتهكم: اختصر...
الحسن غمض عيونه وفتحهم محاوله منه للسيطرة ع أعصابه: المهم...اللي خلاني ناخد هالقرار توا ..احساسي بالمسؤوليه اتجاهك واتجاه عيلتك..حسيت انه واجب عليا بما إني كنت شاهد ع اللي صار..اني ندير اي شي بش نساعدكم...وهذا أنسب شي...يعني اني وياك متصافين..لااني طامعه منك بشي ولاإنتي...
عليا : هكي أفضل..ريحتني...
الحسن: بتولي لقرايتك...حتقري وانتي عندي...حتعيشي في حوش عيله...لازم من توا تتأقلمي ع طبيعة الحياة في حوش راجل ...الناس تمشي عليه وتجي..وطبعا نقصد جدي الحاج علي..
عليا : فهمتك...تنهدت...مرحله ولازم نعيشها زي ماهي ماعنديش مشكله..
الحسن : الطلاق انسيه حوليه من قاموسك بالمرة...لمحتي بيه المرة اللي فاتت لما قلتي ان سبب موافقتك هو اني حنساعدك تاخدي بتارك من خوك..يعني لما يطيح في ايدي حتطلبي الطلاق...
عليا فعلا كان هذا قصدها ومابتش تعلق...
الحسن : انسي...
عليا : به شن مازال تاني...
الحسن : تحترميني ..تلقي مني معامله تفوق الإحترام بوين..
عليا بملل : به وشن تاني..بنرقد..
الحسن سكت شويه وبعدين قال: منقدرش نتحكم في مشاعرك .. انتي نفسك ماتقدريش تتحكمي فيها..بس نبي منك شي واحد ..صونيني في حضوري وغيابي..
عليا قعدت تفكر في كلامه هلبه وحست بشعور غريب بعدين قالت: اني رباني الشيخ جعفر الحافظ..وزينب مسعود ..اطمن حنصونك لأني متربيه كويس..
الحسن: تصبحي ع خير..
عليا : وأنت من أهله...صكرت...
شدت تليفونها وقعدت تشبحله ومش فاهمه هي شن كانت تحس فوقتها بس شعور غريب مسيطر عليها وخلاص...
فهاللحظه جتها رساله فتحتها طول
(مش حتقدري تحبي غيري ياعليا ...حتعيشي معاه تعيسه ..قلبك عندي...ترضي تكوني خاينه!!عليا زيدي فكري )
عليا نزلوا دموعها ...سكرت تليفونها ورقدت وهي تبكي..فعلا قلبها مع منصف قاعده تحبه..بس هو خذلها وهي معاش عندها فيه ثقه بش تسيب الحسن وتوليله...
***
فاتت الأيام والحال كماهو عليه...غير ان ابتسام ونرجس كانوا يجوا لعليا يجيبولها في الشيتات والمحاضرات بش تقرا اللي فاتها..وهي مقررة ترجع بعد تتزوج ع طول...
ابتسام: معاش شفته من يومها..
نرجس: غريب هلبه الولد هذا
عليا: بس شكله راجل ياإبتسام..
ابتسام ابتسمت بخجل ..
نرجس بضحكه: ريتيها هههههههههه
عليا : ياوخيتي محلاهم الشيخات لما يحبوا..
ابتسام : باه اسكتوا مبردكم😳
نرجس وعليا:😂😂
ابتسام تنهدت: مش عارفه شنو أخرتها..هو غريب اطوار يختفي ويطلع في وقت غير متوقع بعدين يرجع يختفي..ايه..ولاحظت ع بابا انه متغير الفترة هادي..كل مانروح من الجامعه يحقق معاي..وتوا قبل لنجيك..هو اللي جابني بروحه تصدقوا..
نرجس طقت ايديها ببعض: شكله كلم بوك واضحه..
ابتسام بصدمه ممزوجه بالخوف: زعمممه؟!!وبابا لزه أكيد..
عليا : لازم يكون الإحتمال هذا وراد عندك بوك رد هلبه ناس ليهم اسمهم ومركزهم..يابال بلال اللي اكيد حيشوفله بنظرة دونيه..
ابتسام نزلوا دموعها..
عليا جت جنبها: خيرك بسبس..
نرجس شدت ايدها: حني قاعدين نتوقعوا بس..
ابتسام ببكي: نحبه 💔
عليا : كان ليك فيه نصيب والله لما تاخديه لو يوقف فيها العالم كله..
نرجس : صح...صلي استخارة وماتبطليش منها..مش حني اللي نقولولك بسبس..
ابتسام مسحت دموعها وهزت راسها بإيجاب..
***
هههههههههههههههههههههههههه الحسن حياخد اختي اني...
وناض يرقص..العب يللا..العب ياللا ...
:تو انت فرحان ولاشنو بالزبط..
منذر: فرحان ومتحمس..
: وعلاش..
منذر: اول شي ان اختي افتكت من المعفن ولد عمتها..تانيا..اني والحسن ولينا نسابات يعني حيكون في سوبنس اكبر....
: كامليون الحكايه مش متحمله تنكيت..الكوماندا قاعد طايرتله من اللي صار في الصفقة الأخيرة..
منذر: عارف...اني خلال فتره بسيطه حنولي ..
: لازم تتعوض الخساره...
منذر: في سؤال قدااااااش ليه فخاطري..
: شنو
منذر: علاش ماتقطعوش راس الحيه...الحسن طربقوه ونرتاحوا..
: ولو ان مش من حقك تسأل بس الحسن في وراه من سانده..
منذر بإستغراب : منو..
: لهني وياسر..
منذر : به به...المهم توا بنمشي ل****وحنشوف الوضع غادي
:كويس ...
***
جي يوم حفل الترقيه اللي انعرض ع قنوات تلفزيونيه..
كل اللي يحبوا الحسن كانوا يتفرجوا...
عابد ووسيله...اللي لما سموا اسمه ولبسه وزير الداخليه الرتبه "النجمه" شافوه كيف طالع ببدلة الشرطه اللي زادته ع الهيبه هيبه..وسيله قعدت تبكي .وعابد عيونه تعبوا دموع...
الحاج علي كان فرحان بيه..وبرنيه اللي لما سمعت اسمه وشافتهم كيف يلبسوا فيه النجمه قعدت تزغرط ودموعها تنزل...
وسرمد يتفرج وطول الوقت مبتسم...
جعفر كان فرحان ان راجل زي هذا نسيبه وفخور بيه هلبه تقول ولده..وزينب وأميره زيه وأكثر...
بينما عليا كانت تقرا في الجنان ولا ع بالها..
***
الحاج علي: روح طول...
الحسن : عندي مشوار ياجدي نقضيه ونجي..
الحاج علي: ماتعطلش الناس بدت توصل..
الحسن: حاضر..ماتبي شي..
الحاج علي بضحكه: سلامتك يالأخ العقيد
الحسن ابتسم نص ابتسامه وصكر...وكمل طريقه لمشواره..
....
ايه يعني المصطلحات أهم.....ايه.....
تسمع في صاحبتها اللي تكلم فيها في التليفون شن تقول تأشر...
طق الباب
عليا : بسبس بنصكر توا وتونعاودلك......تمام.....وصكرت..
طق من جديد...ناضت للباب وفتحت وقعدت جامده في أرضها..تشبح بنظره كلها ذهول..للشخص اللي واقف ولابس بدلة الشرطة الزرقاء كحلي والرتبه بنجومها ع كتافه والطاقيه المميزة ع راسه..وملامحه الحاده..زادت الطين بله 💓
الحسن : عمي قاعد..
عليا استاقضت: احمم...تفضل ..وخرت من ع الباب وهو خش كان طويل وعريض جي حنبها هي سرقت نظره ليه وهو كان يشبح للطاوله اللي في جنان وشيتات ومذكرات ووراق عليها..قدم القدام ..وجي حدا الطاوله..لف وقعد يشبح للحياش اللي مقابلتهم...
الحسن حول الطاقيه حطها ع الكرسي...بعدين ضم حاجاتها حطهم ع الكرسي..وخدي مق القهوة حطه ع درجه بحداه...قام الطاوله ومشي بيها لجهه تانيه مستخطيه..حطها..ودار نظره القدام تأكد ان اللي حيقعمز هني مش حيبان ع حد ...
ولا جهة الكرسي رفع حاجتها حطها ع الطاوله وولا رفع الكرسي وحطه في مكانه ..وخدي طاقيته وشدها في ايده وولا للمق قامه وقعد يشرب...
الحسن : خشي ناديلي عمي..
عليا مصدومه وخلاص ولا حركه ولارمشة عين تفرجت ع اللي داره وماقدرتش ادير ردت فعل...لما كلمها استاقضت..وقدمتله..
عليا بحده: شن اللي درته توا..
الحسن يشرب في القهوة: قهوتك حلوة ..واني قهوتي ناقصه..
عليا بعصبيه : من قالك خود المق..ومن قالك حول الطاوله...
الحسن : وين عمي..ويشرب في القهوة..
عليا تنرفزت ع الآخر..جت بتاخد المق قامه فوق..عليا وكأنها واقفه قدام ناطحه سحاب..
الحسن : كان وصلتي فيه نعطيك الف جني..بعدين تفحص طولها..اممم ..ولانقولك 5....
عليا وجهها ولا أحمر من الغضب: انت واحد لايطاق...
ع طلعت جعفر: الحسن ...
عليا وخرت والحسن نزل ايده وتلفت لجعفر: كيف حالك ياشيخ
جعفر: الحمد لله ياولدي..توا كنا نتفرجوا ع حفلة الترقيه..
مبارك ياولدي ومنها للأعلى ..
الحسن: يبارك في عمرك..عمي معليشي وتي روحك..الحاج علي مداير عزومة غدي لحفل الترقيه...ومش حنمشي إلا وأنت معاي..
جعفر ابتسم: لحظه ياولدي ...عليا ضيفي خطيبك حاجه يابنتي..وخش داخل..
الحسن شبحلها وقام حاجبه..
عليا : ضيفت روحك بروحك..وشقلبت عيونها وخشت..
الحسن ابتسم بتهكم وكمل شرب القهوة متاعها من المق الخاص بيها💓...
....
خش الحسن وجنبه جعفر وقعد يعرف في الموجودين عليه..ويقول"هذا نسيبي الشيخ جعفر الحافظ"..جعفر حس بفرحه من تصرفات الحسن..وكيف الحاج علي حتى هو رحب بيه بحفاوة مقصودة..حس روحه بيي فوسطهم ..وكانت العزومه كبيره هلبه وفخمه...
روح جعفر يومها يحكي لمرته ع العزومه..وع ترحيب الحاج علي وع الحسن اللي كان يمشي ويجي عليه طول الوقت ويشوف شن يبي..
زينب كانت فرحانه هلبه وهي تشوف في راجلها كيف ربي جبره وردله اعتباره بزايد بين الناس ...سبحانه يعز من يشاء..ويجبر المكسور جبرا لامثيل له..💖
***
ماجاش حتى للجلسه هادي...
نجاة : لو غاب في الثالته حيحكمولك بالطلاق..
خوله : نبي شهر تاني ...
نجاه بضحكه: في اللي قعدوا سنين وسنين ..
خوله بخوف: ربي مايقولها...
نجاة: إن شاء الله تخلصي بأسرع وقت..
خوله : ياااارب..
خوله خلال جلستين من المحكمه سليم ماجاش بكل وليه فتره مختفي لاعاد كلمها ولابعتلها رسايل تهديد...فكرت خولة انه يكون استسلم ورضخ للأمر الواقع لو حتى ماطلقهاش بإرادته...حيخلي المحكمه اطلقها...بس ماكانتش مسكينه عارفه بالمكيده اللي يكيدلها فيها..
***
في يوم
ابتسام كانت مقعمز تقرا بروحها...
"ترا زيدي شويه"
ابتسام قامت راسها ابتسمت تلقائيا وادنت ...
بلال قعمز وبضحكه: امتحانات..
ابتسام تشبح القدام: لانراجع في محاضرة خديتها بكري..
بلال: مشيت لبوك المده اللي فاتت
ابتسام شبحتله: ايه؟
بلال: مانحكليكش كيف استقبلني ..شربني عصير كوكتيل..
هدرز عليا شويه..فتحت معاه الموضوع..قالي ياولدي ارتحتلك من أول ومانلقاش خير منك..وخودها من توا..
ابتسام بضحكه: وانت شن قتله..
بلال بضحكه: قتله خل نوتي روحي ونجيب الحاجه..
ابتسام بضحكه: وهو شن قالك..
بلال بضحكه: ماعندكش مشكله امتى تبي تعالى...
ابتسام : هههههههههههههه..شكلك غلطتت في العنوان
بلال: هههههههههههه...آااااه....شن بنقولك يابسومتي...
ابتسام وجهها ولا أحمر وطتت عيونها لوطا..
بلال ابتسم لخجلها: اني نبيك بصدق..حنمشيله بدال المرة عشرة ولو لزني كل مرة وبعت من يضربني حتى الضرب حنولي من جديد...بس نبي نقولك حاجه قبل لنطلب منك طلب ..
ابتسام شبحتله: شنو؟؟
بلال تنهد وشبح القدام: اني كنت محبوس تلاته سنين..
ابتسام انصدمت...
بلال: ضحك عليا واحد في في مشروع تشاركت معاه فيه..تعاملت معاه بحسن النيه ..لاني حسبته صديق...بس مع الأسف طلعت ساذج..ابتسم بتهكم..مشيت بنتفاهم معاه قالي ماعندي ليك شي لما ناقشته اكثر وسبيته ضربني عطيته طريحه قريب مات بين ايديا ...شكي فيا واتهمني بمحاوله قتله والتهجم عليه...انحكم عليا ب5سنين..لما شهدوا ناس ان اللي صار عكس هكي واني حاولت نتفاهم معاه لكن هو البدي بالضرب..فعلا هو اللي بدي بالضرب ..المحامي اللي واكلاته المحكمه دار جهده بش الحكم يولي 5سنين بس..
ابتسام وهي متأثرة وتشبح لعيونه المليانات دموع:باه كيف طلعت بعد 3سنين..
بلال شبحلها هلبه بعدين قال: تنازل ع القضيه...ممكن هداه ربي..
ابتسام شبحت لشيتها وقعدت ساكته..
بلال: شن قولك بعد اللي سمعتيه..
ابتسام شبحتله وابتسمت: ماتغير شي..بس زدت وثقت فيك اكثر..
بلال ضميره أنبه وسكت..
ابتسام : باه وشن هو الطلب
بلال شبحلها: نبيك تحاربي معاي..
ابتسام فهماته يقصد انها تقنع بوها ابتسمت: باهي..
بلال دارلها حركه بخشمه ضحكت وهو ضحك..💖
***
عرس الحسن وحسان بدي..
عابد دار عرس حسان في حوشه..
والحسن عرسه في حوش جده..انقسموا العيله مع الأسف في اكثر مناسبه مفروض يجتمعوا فيها..
عليا ماكانتش فرحانه بكل حتى البودري لبساته بالسيف..هي ماكانتش تبي تتزوج هكي..كانت تحلم بعرسها مع منصف وتخايلت كل شي ع هالأساس..مفروض تتزوجه هو..مفروض..لما تطلع من حوش أهلها عروسه تمشي لحوشها اللي اختارت هي تفصيلته اللي بنت فيه احلامها بحياتها فيه قبل لا تنبنا حيوطه..بس مع الأسف ..قعدت مجرد أحلام..
هاله مش خير منها حال ..اصلا هي دارت عرس بسيطه جوها الأقارب..وكانوا زي البرانيه..ببساطه كان أقرب للعزي من كونه عرس وهي حتاخد واحد لايبيها ولاتبيه..
يوم الحفله...
....يتبع...
