#الحسن
#جمان_فريد
الجزء28
فاقت الصبح..لقاته راقد..حطت ايدها ع جبهته لقت حرارته رجعت لطبيعتها..ابتسمت..ناضت للحمام توضت وصلت..وقامت شعرها كعكه..ومشت للكوجينه ..فتحت راديو صغيرون عندها ..وكالعاده فيروز ملكة الصباح..
توتي في الفطور وحاسه بسعادة غريبه...
طلعت من القجر شكارة فيها زميته عطتهالها برنيه..دارت فطور معتبر...
اما هو ففاق لما سمع صوت فيروز وشم ريحه القهوة قعد شويه في فراشه يستوعب شويه هو وين..ابتسم.وناض..خش للحمام دوش..وطلع لبس حوايجه ..صلى..وطلع لقاها تغني وتهز في كتافها"ترقص"
ابتسم وقدم ..
الحسن : صباح الخير..
عليا التفتت: صباح الورد وضحكت..
الحسن: 💓💓💓💓💓💓
عليا: هيا تعالى افطر..
الحسن قدم وخش للكوجينه: شنو هذا كله..
عليا :انت مريض ولازم تاكل وحطت في فمه قطعة صغيره من الكيكه..
كلاها وهو مش عارف كيف يدير معاها مصرة اطلعه من عقله يشبحلها وخلاص..
عليا: هيا قعمز..
الحسن قعمز...قدمتله الزميته..والشاهي..وهي تاكل في كيكه وتشرب في القهوة..
الحسن: هذا فطورك!!
عليا: هذا اللي نقدر ناخده ع الصبح.
الحسن : باه وهذا كله اللي مدايرتيه بناكله بروحي..
عليا : ايه...وبعدين أنت ضاعف هلبه..
الحسن حول من يدها القهوة ومن حداها الكيكه..وحط صونية الزميته: كولي..
عليا قعدت تشبحلها وتشبحله : مانحبهاش..
الحسن : الحاجه اللي فيها الفايده ديما ماتحبوهاش..هيا كولي ..
عليا : اممم به..تو نجرب..وبدت تاكل وهو ياكل..ماتقبلتش بس حست روحها تبي تاكل ع خاطره ..قعدوا ياكلوا ويهدرزلها الحسن ع الزميته وفوائدها وهي دايره روحها منتبهه معاه ..
....
عكس هاله اللي فاقت لقت حسان مهناش ناضت ادور فيه سمعت صوته يغني جاي من الكوجينه..مشت طول خشت..لقاته يدير في الفطور..
هاله بضحكه: شنو هذا..
حسان تلفت: ياصباح الفل والياسمين..
هاله بضحكه : صباح الخير..
حسان : بري توضي وصلي وتعالي بسرعه..
هاله : ههههههه..باه ..ولفت ومشت وهو ولا يكمل باقي شغله..
كان صبح مميز ومختلف ليهم الأربعه..قربوا أكثر من بعض..بس قرب حذر شويه..ومع هذا كانت احلى ساعات يعيشوها مع بعض..
...
فات اسبوع...
انعام ماردتش ع هلال..وهو قرر يتصرف تصرف تاني..هي ماعطتش للي صار أهميه لأن مش أول مرة يصير موقف زي هذا معاها..بغض النظر ع إنه صاحب ولد خوها..
اما خوله فأرتاحت في خدمتها الجديده وتتعامل عادي جدا مع رياض اللي انجذب هلبه لطيبتها ورقتها..واسلوبها الحلو في التعامل..ومازال قاعد ماشي في تمثيله لدور انه موظف عادي وبسيط في هالشركه الكبيره..
جنان قبل الفهد طلب الصداقه وعرفها بس ماباش يبين انه عرفها..بعتت رسايل..وماباش يرد..قصدا..وهي اضايقت وحست روحها فارضه نفسها عليه حدفاته مرة وحده..
هاله وحسان وضعهم عادي يتعاملوا زي الصحاب وهاله مازالت حذرة منه..
اما الحسن فغاب عن طرابلس لمهمه برا منها..وعليا حست روحها مستاحشاته بس ماقدرتش تتصل بيه لإنه هو مايحبش من يتصل بيه بتاتا لما يكون في مهمات..
في ليله..
واااو حلوة..
انعام : تطلع عليك..اهو بعد اسبوع الإمتحانات بيان بنت خالتي بديره في حوشنا طلي طله جديده..وانتي هاله..
هاله : لا أني بنخليه بلونه نحب لون شعري هكي..
عليا : يعني نغامر ونصبغه..
ساره : غاممممري وبقلب قوي..
عليا : ههههههههههه..
خش حسان..
حسان: مرت خوي هاك..
عليا خدت التليفون: منو..
حسان : سيف النار..
كلهم : ههههههههههههههه
عليا : باه وانتم ماصدقتوا...وطلعت..
سارة: مارضتش فيه..
انعام وهاله ابتسموا..هاله قامت عيونها فحسان لقاته يشبحلها تحشمت وغيرت عيونها..
عليا برا ردت..
عليا : آلو..
الحسن: شن كان يقول التافه هذاكا..
عليا : ههههههههههههه
الحسن : في الجنان..
عليا بربكه : ايه..
الحسن : وتضحكي هكي..
عليا عضت ع شاربها: اسفه..
الحسن ابتسم : خشي داخل..
عليا : باه وخشت داخل..فتحت الفاصل وركبت قعمزت في الدروج..
الحسن : ايه شن جو..
عليا : تمام..
الحسن : اكيد تمام؟!
عليا : ايه ...خيرك؟..
الحسن : انتي اللي خيرك نبي نطمن بس..تقري..
عليا : كنت نقرا وتوا مقعمزة لوطا مع العيله..
الحسن : باتي لوطا..
عليا: حسن شن في ..
الحسن : الحسن..
عليا : باه شن في..
الحسن : مافي شي..هك اني حريص بزياده..الحاجه اللي فأمانتي نخاف عليها هلبه...
عليا ابتسمت : باه..
الحسن : هي توا بنسكر..
عليا: أستنى امتى مروح..
الحسن : العلم عند الله...هيا فأمان الله ..وصكر..
عليا بضحكه: اخخخ منك..وناضت خشت وعطت لحسان تليفونه وكملوا باقي سهريتهم..
***
في احتمالين..إما في خاين بيناتنا أو جاسوس...
الشكوبا: جاسوس هادي مستحيل..صعب اختراقنا
التمساح : مستحيل..
الكاميليون "منذر": ماتستبعدوش اي احتمال مفروض ماتكونش ثقتنا بأنفسنا مفرطه..
الكوبرا: منور ياكامليون...لازم يكون في حرص أكثر حذر اكثر تحري أكثر..كل نفر خش في المنظمه خلال العشرة سنين الأخيرة تحروا عنه..
منذر: تم...
***
📅فاتوا يومين..
بصوت جماعي :وااااااااااااااااااااااااااااااااااااو
جنان : خيااال..
سارة: تههههههبلي..
هاله : اللهم بارك..
خولة : مش عاديه..
انعام : مالا شوفوا..وحولت وشاحها..
عيطوا كلهم...
جنان : قلبي...
سارة : مش معقول...اللهم بارك ع نساوين عيت الصادق..
خوله : والله يانعومه طالع عليك طلعه مش عاديه مغيرك هلبه..
انعام بضحكه: عليا خششتها في راسي وصبغت..
عليا :حسيته يطلع عليها..
هاله : وفعلا طلع عليها..
جنان : حني في البيان حنقلعوا الدنيا..جميلات بيت علي الصادق..
كلهم ضحكوا..
...
تاني يوم...
تاتك ياتاتك ياسمحه في خواتك
راني عليك نغني يابنيه بابتك ياتاتك
ريحانه: مرزن دمك..
شقرا شعرها شواظ شمس
شقرا شعرها شواظ شمس..
وقفت والتفت: ياتافه ياشوارعي..اخطاني خيرلك..
منذر وهو رافع حواجبه : وكان ماخطيتكش..
ريحانه:معناها تلعب بعداد عمرك..
منذر حط ايده ع قلبه : احلى نهايه نموت ع ايد هالجميله الفاتنه..
ريحانه عيطت : هااااااع...ههاااااع..
منذر ارتبك: يامهبوله..
ريحانه: هااااااااااااااااع هاااااااااااع هااااااااااااع ..بدوا الناس يلتموا..
منذر : انتي هكي..باهي...شدها من ذراعها وقعد يجر فيها وهي مصدومه...حولوا زيدوا غادي مراة وراجلها ماحد ليه علاقه..الناس بدت توخر..وهو يكر فيها..لين وصل في مكان فاضي ...
منذر حط في شنطتها حاجه : مايجينيش آلو منك خلال يومين حتلقيني في خلئتك عدل "بالمصري" ضحكلها بإستفزاز ومشي ...
وهي مصدومه"عليك حيوااان"...
***
قصدك الحسن الصادق خوك خوك من امك وبوك..
خوله بضحكه : ايه
زاهيه : حييي..بالله عليك كان عندك صورة ليه وريهولي..
خوله : للأسف خوي هذا يكره التصوير..لكن مرة طلع في التلفزيون لما دارولهم حفل ترقيه ..
رياض: مذكرها كويس وحتى شكل خوك اذكرته..
زاهيه : ممكن فاتني وقتها..اني الحق ماندورش هلبه في الأخبار..لكن خوك حاجه تانيه صيته في ليبيا كلها واصل..
خوله : ههههههههههه
طق باب مكتبهم وخش واحد...
: من فيكم خوله الصادق..
خوله: أني..
قدم وعطاها بطاقه دعوة..وطلع ..
خوله فتحت البطاقه وانصدمت وماصدقتش اللي شافته قعدت ترعش.. ناضت وطلعت من المكتب..
زاهيه : خيرها اللطف..
رياض ضيق عيونه بإستغراب ممزوج بالخوف..
...
محقرهم الطيور ع أشكالها تقع..
خوله ببكي : معقوله أني كنت ساذجه وغبيه لهالحد..
جنان :هما اللي كلاب وانجاس..ربي انقذك منهم...معاش تبكي حبيبتي خلاص..وحضنتها وخوله تبكي..
***
روحت من الكليه..ركبت لشقتها..خشت شمت ريحته..ابتسمت..مشت لدار النوم خشت فتحت الضي تفاجئت باللي شافاته...
قفطان سهره لونه أزرق ملكي..يلمع كله تفصيلته حلوة محطوط ع السرير..قدمت وقعدت تتفرج عليه بأنبهار...
"عجبك"..
التفتت شافاته استاحشاته..استاحشت نظرته الحاده وملامحه الجاده الجذابه..كان مبتسم ع جنب وهي تحب هالإبتسامه..كانت تبي تحضنه بس تحشمت..
عليا: حلووو بالمرة..
قدم قعد يشبحله وايده في نصه: عمري ماشريت حاجه نسائيه بتاتا..هادي أول مرة..
عليا بدهشه: تتكلم جد...
الحسن هز راسه بأيجاب..
عليا : القفطان خيالي..يهبببل..انت اخترته ولافي حد ساعدك فيه..
الحسن بضحكه: من بيساعدني جماعه العمل...
عليا بضحكه: قصدي انت لما قلت أول مرة ..ذوقك حلو ..وكانك متعود تشري حاجات زي هادي من قبل..
الحسن: هو اني لما اخترته ..فكرت فيك..
عليا : فكرت فيا..
الحسن شبحلها : بمعنى فكرت في حاجه تشبهك وهذا اللي طلع معاي..
عليا ابتسمت: شكلي حلوة في عيونك هلبه..
الحسن غير الموضوع : الإمتحانات الاحد..
عليا ابتسمت: ايه...
الحسن : شدي كويس نبي تقدير ممتاز..
عليا بضحكه: حنفوت اختك المرة هادي
الحسن : تو نشوفوا..
***
وفعلا بدت الأمتحانات متاع الجامعه..
هاله تقرا ومنهمكه فيها..وحسان موفرلها كل شي..ومش مخليها ادير حاجه..
هاله : شنو هذا..
حسان : زنجبيل وحليب كويس للذاكره..
هاله بضحكه: شكرا ياسيدي.
حسان ابتسم : العفو..المهم شدي كويس هلو...
هاله ابتسمت وغمضت عيونها وسكرتهم بمعني باه..
...
واقف وشاد شيت في ايده يتفرج عليه : والله نعيش عمري نجري ورا المجارم..ارحم من اللي نشوف فيه هذا..شبح للدار..علياااا..
عليا من الدار: جاااايه ..
هو رجع شبح في الشيت بأمتعاض..
عليا : اهو جيت..
قام عيونه : هي......
قطع كلامه شكلها الجديد اللي زاد خلاها فاتنه اكثر واكثر..صابغه شعرها بالأصفر مع بيوضيتها وجمال عيونها السود..وشفايفها اللي كانوا مكتسيات باللون الكرزي من ربي طبيعي بدون شي..كانت لابسه توته سودا وحاطه برنوس ع راسها..كيوته ..عسسل..تهبل...💖💖💖
عليا اخدودها احمروا: خيرك؟!!
الحسن : احمم..هيا..معاش في وقت ..احمم..
بدت تشرح وتقرا وع أساس هو طالب قدامها هو كان مقعمز حاط رجل ع رجل ومكتف ايديه في بعض..ومركز معاها..مش في اللي تقول فيه ..فيها هي تحديدا..وهي تشرح ومنسجمه..
عليا : معاي..
الحسن اشرلها بعيونه بأيجاب..
عليا : خل ناخد بريك..
مشت للكوجينه..
الحسن : بتبدا المكينه..
عليا: ووووواك خلاص معاش نبي..
ضحك وناض مشي للثلاجه..وطلع منها شكلاطات..ودارلها نسكافيه..وحطهم ع طاوله البار
الحسن : كولي..
عليا بزعل: معاش نبي..
الحسن: كولي بلادلع...
عليا لفت وجهها عنه..
الحسن خدي شكلاطه حول غلافها. ولف وجهها ليك: كولي ..
عليا خدتها منه وهي تشبحله وقعدت تاكل..
هو خدي تليفونه وقعد يشوف فيه..
عليا : علاش ماديرش فيس..
الحسن : دوة فاضيه..
عليا: بالعكس تقدر تستفيد منه.
الحسن : وجع راس بس..عندك انتي..
عليا وهي تاكل: اممم..اسمي لوليش كوين..
الحسن شبحلها ورفع حاجبه : ترا وريهولي..
عليا طلعت تليفونها وحطت ع صفحتها وعطتهوله..
قعد يدهور فيه ..وجهه تغير لما لقي منصف قاعد من الأصدقاء..عطاها التليفون بدون مايعلق...عليا حست بشي..شافت انصدمت نست مرة وحده الحكايه هادي..اصلا هي من لما تزوجت معاش فتحاته..هو جاي بيمشي..
عليا شدت ذراعه: والله نسيت بالمرة نحدفه اصلا من يوم زواجي معاش فتحته..
الحسن : ماسألتك ع شي..خلاص حني الموضوع تكلمنا فيه واتفقنا عليه..
عليا: بالله عليك الدوة الفاضيه هديكا معاش تعاودها بالله عليك..
الحسن شبحلها: اني مش حنعاود شي ولانقول شي..قلبك مش بأيدك..لوهو قاعد معاه لابيدك ولابيدي نديروا حاجه..بس نبيك تصبري بس ..لين.
عليا بصوت عالي : اسكككت اصصص..اني معاش نبيه معاش نبيه معاش ليه فقلبي حاجه معاش يسوى عند حاجه ولاأي حاجه ..ماضي ومتأسفه عليه متأسفه عليه هلبه..ودموعها نزلوا..
هو اتفاجأ هلبه بكلامها وحس بفرحه أول مرة يحس بيها..بس قلبه وجعه لماشاف دموعها ..مسحهم بطرف ابهامه..
الحسن : خلاص باهي..تو معلوماتك اللي من بكري وانتي تنفخي في راسي بيهم يطيروا..
عليا : صدقتني..
الحسن : ايه..
عليا شبحتله : حقه حسن..
الحسن : الحسن..
عليا بضحكه: حسن..
الحسن : الحسن..
عليا : حسن..
نزل راسه وقرب وجهه لوجهها : الحسن..
عليا : حسن..
قرب اكثر: ال..حسن..
عليا سخنت : حسسن..
قرب اكثر وقلبه في 1000 وعيونه مركزة في حبات الكرز: ال..حسن..
عليا بدوخ : حسن..
الحسن بصوت هادي جدا: الحسن..
عليا بصوت يذوب طالع : ال..حسن..
خلاص معاش في شي يفصل بيناتهم عليا غمضت عيونها ومستسلمه وهو انجن لما شاف حركتها هادي ..خلاص ..بيوصل..
طقطقطقطقطقطق..
عليا : يالطيف..
الحسن : شن في..وتوجه طول للباب طلع حسان..
حسان : افتح التلفزيون يتكلموا ع عمليتكم الأخيرة يتكلموا عليك بالإسم..
خشت عليا تجري فتحت التلفزيون..ع القنوات الليبيه لين وصلوا في القناه نفسها..كان لواء في الشرطه كبير..يتكلم عليها ويتكلم ع الحسن ومجهوداته وكيف انه تعرض لإصابه ومع هذا كمل لين تم اكبر عمليه شملت مدن في المنطقه الغربيه من ليبيا إلي جانب طرابلس..
عليا بخوف: اصابه ..
الحسن: حاجه عاديه..
حسان: لو حاجه عاديه يتكلم عليها هكي..
عليا: الحسن وين انصبت..
الحسن : فوتي الموضوع..
عليا : لا مش حنفوته..
حسان خاف الحسن يفصل عليها قدامه: خلاص فوتي اهو حاله باهي.
عليا : لا مش حنفوت..وين انصبت..
الحسن عصب : خلاااص عاد قلت فوتي معناها فوتي ..
عليا انصدمت : أسفه..ومشت طلعت من بحداهم..
حسان شبحله بأسف ومشي..
اما هو مسح بأيده ع وجهه..وحط ايديه في نصه..
عليا اكتر ماتكره حد يهزبها قدام حد..من زعلها خدت شيتاتها ونزلت لوطا وقعدت تقرا في دار انعام ومعاش بت تطلع..اما هو اضايق من نفسه هلبه اللي زعلها..وطلع من الحوش ومشي المركز..
استمر هالزعل يوم اتنين تلاته اربعه..عليا كل ماتسمع صوته جي تبي تشوفه ولو شويه بس لأنها حساسه زعلها بزايد ويزيد زعلك من الشخص لما تحبه..💖
الحسن قريب يهبل ع شوفتها يختلق في الحجج بش يلمحها لكن هي كانت تعرف كيف تتهرب منه..
***
جديده هادي..
بلال: شن الجديد فيها ياعمي خطيبتي وبنعزمها ع غدي بمناسبة انتهاء الإمتحانات..
عبد القدوس: مانقول غير الله يسامحها خطيبتك هادي ..
بلال بضحكه: غير شن قلت ياعمي..
عبدالقدوس: ساعتين بس..
بلال : تلاته..
عبدالقدوس: ولانص ساعه زياده..ياإما انسى..
بلال" غير اعبى": حاضر...
عبدالقدوس قعد يشبحله بشك..وبلال مبتسم بعبط..
***
في السيارة..
هاله: ههههههههه..ملاهي..
حسان : ايه ملاهي وين المشكله..
هاله : به ياسيدي ملاهي ملاهي..
***
احلى حاجه شعور اني ريشه نطير في الفضاء...
جنان: ههههههههه هذا كله ع خاطر تمينا قرايه..
علا: تم الهم والغم والنكد والسهر..
جنان: ههههههههه..جاهم قرسون وسألهم شن يطلبوا قالوله ومشي..في هاللحظه جنان جت عينها ع مشهد فاجئها هلبه..
الفهد مقعمز مع مراه كبيره..ع كرسي متحرك وهالمراه كانت بيضا زي الشمعه..مش باينه ملامحها بس واضح نازكه..
جنان: الفهد...
علا : وينه..
جنان :شوفي غادي
علا تلفتت شبحاته: ياااه عندك حق سماره ع عيونه الخضر يجذب هلبه..
جنان بغيره: باه التفتي قدام ونتي ماصدقتي..
علا: ههههههههه..
جنان قعدت معاهم وتراقب فيهم كيف يوكل فيها وشاد ايدها ويهدرز معاها ويضحكوا...
هو كان يضحك ويوزع في نظره ع المكان تلاشت ضحكته مجرد ماجت عينه عليها قعد مسهم وبس..
نبيهه: محمد خيرك امي..شن شفت..التفتت امه وشبحت وين مايشبح ..لقت بنيه حلوة مقعمزه بعيد شويه مبتسمه بخجل لما شبحولها..
نبيهه شبحت لولدها: هي هادي..
