#الحسن
#جمان_فريد
الجزء 26
راسي بتفجر شنو هذا..
: بالله نعوم جيبيلي معاك نسكافيه..
انعام : منو يبي حاجه تانيه ..كلهم اشرولها بالنفي ..
طبعا انعام تخدم موظفه في أحد المصارف...انعام تزوجت في عمر 20سنه كانت مازال طالبه تزوجت استاذ يقري فيها كان يبان انسان راقي ومتعلم وانعام شافت فيه فارس احلامها..تزوجاته..اول شهرين كانوا عسل..بس بعدين طلع ع حقيقته ..عنده علاقات بالهبل..وكلها بالحرام ولما عرفت بدي عيني عينك يكلم فيهم قدامها..لين جي نهار كلمت خوتها جوها روحوا بيها...ولين مشوله قاللهم اختكم هي اللي ماتنفعش وشادها تكلم في الولاد وعندها علاقات..طبعا ماصدقوشي...ولأنها بنت الحاج علي طلقها غصب عنه..اطلقت في عمر 22سنه..تعقدت من الزواج لكن كملت قرايتها وتخرجت وخدمت ورغم انها حلوة وهلبه تقدمولها بس كانت ترفض وماتبي حد يناقشها فهالموضوع...
...
يشوف لروحه في مرايه السياره: وحق الله سمح ..حتكبد فيك ياهليل..نزل من السياره ..متوجه للمصرف..تفاجأ بيها طالعه..
هلال"اه يالكرما"...ساوا روحه ومشالها..
هلال : مرحبا..
انعام وقفت مصدومه..
هلال: عرفتيني!!!
انعام تشبحله بس ..
هلال : اها معاك حق تعرفني بالشكل بس..اسمي هلال مراجع كبير خوتي والكبير الله..عمري 34سنه...ونخدم ضابط ..ونبي نكمل نص ديني..ورايدك بالحلال..
انعام مصدومه وتشبحله ..
هلال : عندك وقت فكري ان شاء الله اسبوع..اكثر من هكي يصير فيها كلام تاني..المهم انا يوميا مزروع هنا..اي كان قرارك..موافقه...ولاموافقه..ماعندكش غير هك طبعا ..تلقيني هنا ...هي في امان الله...ولف ومشي..
هيا من صدمتها تلقائيا قعدت تضحك لفت ورجعت للمبني المصرف ونست علاش كانت طالعه اصلا..
***
الساعه 2ظهرا..
خش للحوش جايب معاه حاجات..خش للدار النوم لقاها راقده قرب منها نزل باس ع راسها وغطاها وطلع..
قعمز ع الصالون يفكر في شي يديرهولها يبيها تطلع من الحزن اللي هيا فيه ...خطرت ع باله فكره نزل بش يطبقها..
ساره: السوق..
حسان : ايه اطلعوا كلكم مع بعض..يقولوا انتوا النساوين السوق احسن علاج لنفسياتكم..
ساره بضحكه: صدقوا...المهم خلاص تو نكلمهم ونقعنوها تطلع معانا..
حسان : احلى سرو قرصها من خدها وركب..
وسارة قعدت تضحك..
بعد العصر..
سوق...!!
سارة: ايه كلنا طالعين..
هاله : اني اعفوني..
سارة : شن قصتك مع كلمة اعفوني..بتمشي غصب عنك..
هاله: ء....
سارة ناضت : الحزن ليه وقت والفرح ليه وقت ...خلي كل حاله تاخد وقتها وبس..ابتسمت وجت طالعه..نراجو فيك..
هاله تنهدت وهي تفكر في كلام سارة ..بعدين ناضت وغيرت حوايجها...
...
منين طلعتلي بهالموال..
حسان : غير بالله عليك قولي وينه المفتاح..
الحسن : في دار سرمد في قجر مكتبه..
حسان : تمام...صح..طوط طوط طوط..لاحول ولاقوة إلا بالله..
مشي حسان لدار سرمد لقاه فيها طلب منه يعطيه المفتاح ..عطهوله وطلع..
رفعهم للسوق بسيارة الحسن الكبيره الأشبه بالباص..
انعام وساره..وهاله وعليا وريحانه لصقت روحها معاهم..
وصلوا في مول كبير...وقعدوا يدهورا وحسان قعمز في مكان في المول يستنى..
في وحده من محلات المول..
عليا : يطلع عليك هلول..
ساره: ايه حلو هلبه ..
هاله بإبتسامه : حتى اني عجبني...
في جهة تانيه من المحل...
دهواري العيله وجو مليح ..درت فيك خير ياعليا واني مانندريش..
قعد يدهور في المحل..وفجأه طااف..
ريحانه بعصبيه: اعمي خوي...
منذر يشبحلها وخلاص..
ريحانه : مبردكم الهم..قامت البلوزة ...تصير فيها حاجه انت تدفع حقها ..وقعدت تتفحص فيها..لحسن حظك مافيهاشي..ومشت وخلاته...
منذر"واي واي واي واي...هادي منو ..طرف مغبر"💓
تبعها بعيونه لقاها مشتلهم...ضحك وقعد يراقب في الوضع بإستمتاع..
كلهم شروا بس اكثر وحده خدت حوايج كانت هاله...
سارة: عليا هاله تعالوا...
جوها الزوز...
ساره : هادي هديه مني ليكم..استعملوها أمتى تحسوا وقتها جي..وغمزتلهم..ومشت ...
هما الزوز ماعرفوش شنو لإنها كانت باكوات مغلفه..
روح بيهم حسان مع المغرب حطهم ورد السياره في مكانها والمفاتيح وطلع بسيارته لمشوار معين ...
***
انسانه راقيه وهاديه ولطيفه..
: ههههههههه
رياض : علاش تضحكي ياأمي...
امه : انت عصبي ماعندكش الريح وين ادور حرام عليك وليدي تبليها بيك..
رياض : ربي يسامحك وخلاص..
امه: هههههههههه...باه قنينه..
رياض ابتسم..
امه : شوقتني نشوفها..
رياض : حيجي يوم وتشوفيها أكيد...يقين رقدت...
امه : ايه عشيتها ورقدت....
***
طلعت من الحمام بعد دوشت لبست حاجه جديده من اللي شرتهم ..جففت شعرها ودارتله كريم زيت ومشطاته..قامته ديل حصان وطلعت من الدار شبحت للشيتات اللي ع الطاوله ابتسمت..خطرت عليها هديه حماتها ولت للدار بتشوفها..طلعت الباكو وحولت غلافها....
وجهها ولا طماطم من اللي شافته طول خدت الباكو ودساته تحت حوايجها في الدولاب وطلعت طول وهي حاسه بخجل شديد وإحراج..مشت قعمزت كالكنبه وخدت الشيتات ع الطاوله وقعدت تشوف فيهم ..انفتح الباب..راجلهاجي💓
حسان وهو يسكر في الباب: السلام عليكم
هاله : وعليكم السلام..
حسان قام راسه وركز فيها كيف طالعه عليها اللبسه حلوة وكيف باينه ناعمه وجذابه رغم انها مادارت شي ع وجهها ..لاحظت نظراته حطت عيونها في الشيت..
حسان بأبتسامه قدم: ايوه هكي..هلو الشطورة..
هاله ضحكت: كيف جبتهم ؟
حسان قعمز: عندي معارف غادي
هاله : اكيد بنات..
حسان بمزح: ايه وطروف من الأخير..
هاله ابتسمت بتهكم وشبحت للشيت..وهو ضحك..
حسان : مجرد كلمتهم ..طول بعد ساعه اتصلوا بيا وقالولي تعاالى خود اللي وصيتنا عليه..
هاله متهكمه: فرقت روحك عليهم..
حسان بضحكه: كل وحده ربع ساعه..
هاله : كويس...
حسان : المهم اللي جابوه هو الصح..
هاله بحده: ايه باقي المناهج متاع موادي..
حسان ضحك: كويس...رن تليفونه..رد
حسان فتح المايك: ها حبي...
هاله فنصت عيونها..
: ايوا ياقدر..المناهج نفسها ولا..
حسان: ايه هما...منووور بالهلبه..
:تبي حاجه تانيه مايحشمك شي..
حسان : يبارك فيك ويرحم والديك...
: والدينا والديك ...هي اوينا...
حسان: سلام وصكر...شبح لهاله..كانت تشبح للشيت ومبتسمه وجهها أحمر..
حسان ناض وهو يضحك: تعشيتي..
هاله : لالا..
حسان : تو ننزل نشوف شن دايرين...
هاله : ماتعبش روحك..
حسان : ترا اسكتي اسكتي.."ماتعبش روحك" قلد صوتها..
وتوجه للباب وهو طالع تلفتلها هي كانت تشبحله وتضحك وهو غمزلها وطلع...وجهها ولا أحمر مجرد اذكرت هديه سارة حطت وجهها في الشيت
شويه وركب ...جاب معاه صونيه مغلفه بالسلفر..خش للحوش..لقاها تقرا..
حسان: اهو جبتلك العشي..حط الصونيه ع الطاوله..ومشي للكوجينه جاب صفرة وكشيك وعصير وطلع حطهم وقعمز حول السلفر..كان في الصونيه رز أبيض ومعاه امبطن وبوريك جبده..
حسان : نجي جنبك عادي..
هاله بعد ماحولت الشيتات هزت راسها بإيجاب وهي مبتسمه..
جي جنبها والصفرة في ايده حط الكاشيك في صونيه وعباه رز ومدهولها..
هاله ابتسمت وفتحت فمها وكلت..
بعدين قسم شويه من طرف امبطنه وحطه في الكاشيك ومدهولها..
هاله : اممم..وانت..
حسان : كولي انتي واشبعي وتوناكل بعدين...ماتاكليش زين ياهاله والله ماحناكل
هاله قعدت تشبحله هلبه: انت من امتى هكي..
حسان ابتسم : من لما عرفتك..
هاله ابتسمت وفتحت فمها وكلت المبطن وهي مبتسمه بخجل..وهو يتأمل فيها💖..
***
شهقت بفرحه..
جنان: واخيييييرا لقيته..قعدت تتفحص في حساب الفهد ع الفيس ..كان كله بوستات تخص عمله..وفي نفس الوقت ع الأم لاحظت انه أغلبهم عن الأم...ابتسمت وبدون تردد بعتت طلب..وشكله ماكانش فاتح..
جنان : ياااارب يقبله ويعرفني طول...سكرت..وخشت سريرها ورقدت...
***
تاني يوم
الصبح..
عليا : صباحو هلول..
هاله بإبتسامه : صباح الورد لولو..
برنيه جتهم : صباحك مبروك وعوك مهلوك بنيتي ..
هاله بإبتسامه: صباح الخيرات ياحناي
برنيه : هيا تعالوا افطروا...
خشوا فطروا ..وبعدين طلعوا..
عليا : حناي اليوم بنخطم ع حوش أهلي ..
حناي : بنيتي الشور مش شوري..
عليا هزت راسها بإيجاب..وبعدت شويه طلعت تليفونها وحطت ع رقمه تنهدت واتصلت..
: تفضل يافندي..
الحسن : يبارك فيك ياهشام..
طلع العنصر والحسن كيف بادي بيفطر رن تليفونه..شاف الرقم قلبه 💓💓💓💓💓💓💓..رد..
الحسن : نعم..
عليا : صباح الخير..
الحسن :خير..
عليا بضيق: احمم..نبي نمشي نزور اهلي بعد الجامعه..
الحسن : امشي..
عليا: استنى ماتسكرش..
الحسن : مش فاضي اختصري...
عليا قلبها وجعها من معاملته القاسيه: ان شاء الله حترتاح مني عن قريب وقتها حنمشي ومش حنولي وسكرت عليه..
هو أول مرة حد يديرهاله ويسكر عليه..لكن هو مافكرش في الحركه ...فكر في كلمتها لما قالت نمشي معاش نولي..لاوييين ماتفكرش حتى مجرد التفكير فيها..مادام خشت قلبه حتى في الحلم مش حتطلع من حياته إلا بالموت..
***
صباح الخير..
زاهيه ورياض: صباح النور..
خوله قعمزت بإبتسامه وزعت نظرها عليهم: شن جو..
الزوز بأصوات متقطعه: تمام..مليح..
كانت خوله جايبه معاها حافظه..فتحتها..وناضت جت لرياض تفضل..شااف لقاه كب كيك..خداه
رياض بإبتسامه : شكرا..
خوله ابتسمت : عفوا..ومشت لزاهيه عطتها..
زاهيه خدت كلاته : يهبل عطيك الصحه..
خوله ولت للمكتب بإبتسامه: سلمك..
زاهيه : اممم...حي حي حي لويندري الكابو الكبير ان ناكلوا في المكتب ...
خوله بخلعه: حقه ممنوع..
زاهيه: هو استاد وليد عادي..بس استاذ الراوي لما يقلب الدنيا..
خوله : الراوي!؟؟
زاهيه : صاحب الشركه...
خوله: قصدك مش استاذ وليد صاحب الشركه..
زاهيه : لا ..واحد تاني صاحبها..عمري ماريته نسمع بإسمه..الراوي يقولوله..مايجيش إلا نادرا..
رياض يسمع بتركيز..
زاهيه: واحد ياكبدي نار جهنم من يقربها...
خوله : وكيف حكمتي عليه هكي دامك ماشفتيشي قبل..
زاهيه : هكي كلهم يحكوا ..
خوله بضحكه: وأكيد اللي يحكوا سمعوا من ناس تانيه سمعوا من يلي يحكوا...
زاهيه : هههههههههه
رياض شبحلها ابتسم..
خوله : عمرك ماتحكمي ع حد من كلام الناس عليه عاشريه وبعدين احكمي...
زاهيه : صدقتي...هي خل نلهوا بخدمتنا خايفه يكون مداير سماعات ويسمع فينا..
خوله : ههههههههههههههههههه
زاهيه : هههههههههههه..وبدوا يخدموا ورياض عيونه ع خوله..قامت عيونها لقاته يشبحلها وجهها حمر وغيرت نظرها بسرعه...
***
جاها السواق بكري للجامعه بش بيرفعها لحوش أهلها..وهي طالعه..جاها واحد..
: انتي عليا الحافظ..
عليا: ايه..
: خودي ..مدلها فلاش ..خودي بسرعه..
عليا من الربكه خداته ..وهو مشي بسرعه..طلعت وهي مش فاهمه شي من اللي صار وصلت في السيارة ركبت وتحرك بيها...
***
زينب : اني طالعه لجارتنا مبروكه...
أميره :بري ماما..
زينب : حالك احسن متأكده نطلع..
اميره : اطلعي ماما مادوريش..
زينب: باهي ساعه ونروح..مشت..
اميره ولت تقرا...
...
شويه وحطها السواق ومشي..لقت باب الحوش البراني مردود ابتسمت فتحاته وخشت..يااااااه قداش استاحشت هالحوش وايامها فيها..خشت داخل..طلعت المفتاح وفتحت باب الحوش الدخلاني..وخشت حست الحوش فاضي..كملت طريقها لدارها لقتها مفتوحه واميره لاهيه بالقرايه..
عليا : طالبه علم..
اميره: هييييييييييييي..وناضت تجري لأختها وحضنتها..وقعدت تبوس فيها وعليا تضحك..قعمزوا يهدرزوا واميرة تقصقص فيها..
عليا : لاباس عليك حبيبتي..
أميره : توا أحسن بهلبه ..شبحت لعليا هلبه...
عليا : شن تبي تقولي..
اميره: بنقولك لكن ماتقولي لحد..
عليا بخوف : قولي..
اميرة: ماما المدة اللي فاتت هبط ضغطها..
عليا ضربت بأيدها ع خدها..
اميره : اهدي توا حالها باهي الحمد لله..بس مش هذا اللي بنقوله..
عليا : تكلمي قطعتيني..
اميره : وبابا ومصعب مهناش..منذر جي للحوش..
عليا بصدمه: شنوووووووووووو
اميره : ايه ..وامي مابتش تكلمه ولا تعدل عليه..هو خش للدار شبحلي شبحه خوفتني ..قعد يدور في دولابك طلع لعبتك هذيكا وطلع من الحوش..
عليا حطت ايدها ع راسها من هول اللي تسمع فيه..
اميره : مانحكليكش قريب متت من الخوف ..
عليا : يااااربي خيره هذا..خيره
اميره: اني خبرتك بش تاخدي احتياطك..
ابتسمت عليا بتهكم وحكتلها ع اللي صار من يومين...
اميره: وااااك ياربي شن مازال يبي منك..
عليا : يتحدى في الحسن..
اميره: صح ...ايه شن جوك انتي وياه..
عليا تنهدت: عادي...ايه حقه اللاب متاعك وينه..
اميره : غادي..
عليا وجهت نظرها وين ماأشرت أختها ناضت خداته وجت حداها وفتحاته..
عليا : بكري وقف عليا واحد قالي انتي عليا الحافظ قتله ايه عطاني هالفلاش ومشي..
اميره: زعمه شنو فيه..
عليا : تو نشوفوا ..حطت الفلاش ..وكيف بادي يفتح كان مكتوب..كلام..
(كل اللي حتشوفيه في الفلاش موثق بالتاريخ واليوم )
فجأه طلع فيديو ..اميره قلبت وجهها..لكن عليا قعدت فاتحه عيونها بصدمه شديده..
كانت فيديوات مصورة لمنصف مع بنات ليل في البارات..وفي اللي فديار النوم..وكان أغلبها في فترة خطوبتها هي وياه..لين وصلت في فيديو كان اوفر بزياده سكرت اللاب ومشت طول للحمام وقعدت ترجع ..واميرة دموعها نزلوا وقعدت تسب وتلعن..لحقت اختها..
اميره : عليا ..عليا..
عليا طلعت من الحمام وهي مصدومه: شنو اللي شفته توا ياأميره..
أميره : حقيقة منصف ياعليا اللي ياما لمحتلك عنها..
عليا : قصدك انتي كنتي تعرفي..
اميره: إيه..وحكتلها ع موقف التليفون..
عليا : علاش ياأميرة علاش ماقلتيش
اميره : شن بنقول ياعليا انتي كنت معميه فيه ع الآخر حتى تلميحاتي عنه ماقبلتيها..يابال لو قتلك ع اللي شفته مش حتصدقيني..
رن تليفون عليا وكان السواق وهي في عز صدمتها ردت..
سالم : بنتي هيا اطلعي الأفندي قالي ساعه وروح بيها..
عليا : قوله معاش بنروح بكل...وسكرت..
اميرة بصدمه : شن قلتي..!!!
عليا قعدت ساكته ومصدومه...وبس..
....
كيييف!!؟
سالم: هي هكي قالت..
الحسن : باه باه ..وصكر..ناض وهو معصب ع الأخر طلع من مكتبه ومن المركز كله..
...
بعد صمت ..عليا طلعت..
اميرة : وين ماشيه..
عليا: بنروح..
اميره : عليا انتي كويسه..
عليا : ايه كويسه ..يستنى فيا برا السواق هي باي...
اميره استغربت ومافهمت شي..
طلعت عليا من الحوش..قعدت تمشي ع رجليها وهي مصدومه بدت المطر تبشبش بس هي مش حاسه بشي قعدت ماشيه وخلاص..لما حست رجليها معاش حملوها قعمزت ع رخامه مابين الحياش..وقعدت تبكي وتبكي..
تعرفوا علاش تبكي مش ع خاطر خيانة منصف..ع خاطر الحسن اللي قرر انه يسيبها مجرد مايلقى خوها بسبب منصف..بسبب واحد مايسواش ظفره ..عليا قعدت تبكي وخلاص..حاسه بالضياع..في هالوقت درست حداها السيارة انفتح بابها ونزل منها هو..
"خيييرك"
عليا ايديها ع وجهها وتبكي لما سمعت صوتها قعدت تبكي أكثر..هو معاش تحمل نزل ع روس صوابعه..
الحسن : عليا..
تاني مرة تسمع فيها اسمها من فمه بنفس النبرة نبرة الخوف..وقلبها يتكهرب من جديد..
الحسن : علاش تبكي..
عليا قامت راسها وجهها كله دموع: منك أنت..
الحسن غمض عيونه بشده وفتحهم : تي غير شن درتلك بس..
عليا بنبره باكيه : انت معاش تبيني..
الحسن يشوف قدامه ف بنت ناضجه جسديا بس طفله في أغلب حالاتها..ابتسم بإبتسامه مختلفه عليا قعدت سرحانه فيها..
الحسن: طفله والله العظيم..وحصلت فيها..
عليا ولت تبكي من جديد..والمطر بدت تقوى..
الحسن : هيا نوضى المطر قوت..
عليا: لااا..
الحسن : اللهم طولك ياروح..شدها من ايدها ونهضها .
عليا : مش ماشيه معاك ...
الحسن شبحلها هلبه قدم حاوطها من خصرها وقامها ع كتفه..عليا انصدمت وقعدت ساكته وفي ناس يتفرجوا عليهم..فتح الباب وحطها داخل..وسكره..
جاه واحد: خلي بنت الناس في حالها ولانبلغ فيك..
الحسن تلفت وهو قايم حواجبه : زيدي غادي زيد..وركب السياره..وتحرك طول..
الحسن :عجبك هكي..
عليا ضحكت بصمت..
الحسن هز راسه ايمين ويسار: ماليك حالهم باهي..
عليا : إيه..علاش جيت..
الحسن ماباش يرد..
عليا : انت معاش طايق حتى تشوفني..
الحسن : ماتعرفيش تسكتي..
عليا : لاااا..
الحسن : ربي يصبرني ع مابلاني..
عليا : ربي يرفع عنك هالبلوه عن قريب..
الحسن شبحلها وابتسم : اللهم زيد ابليني بيها اكثر واكثر...
عليا شبحتله بصدمه..
الحسن شبح القدام : بش نؤجر بصبري عليك..وتخف ذنوبي..ونخش الجنه طول..
عليا : اني اللي بنخش الجنه طول من صبري عليك..
الحسن ضحك ع جنب وسكت..
عليا : جعااانه..
الحسن : ياسرك ياسر..وانتي ديما ترحي..كتفي نزل تقول حطيت عليه شوال سكر..
عليا : هييييييييييييي ..
الحسن : هههههههههههه
عليا سرحت في ضحكته حلوه هلبه ورجوليه تشبهله..
شبحلها لقاها تشبحله : خيرك..
عليا وجهها احمر وشبحت القدام : معاش نبي ناكل خلاص..
ابتسم وماباش يرد..
وقف بيها ع مقهى خدالها اسكالوب في الأول دارت روحها ماتبيش تاكل وبعدين طاحت فيه..الحسن قعد يناشب فيها مابتش تعدل عليه لين كملت..
الحسن : نزيدك واحد تاني..
عليا : شن تشبح فيا قدامك جازورا..
الحسن ضحك مرة تانيه ..وهي سرحت فيه من جديد..
الحسن شبحلها وهي قعدت تشبحله ..سرحوا في بعض..بعدين هو ركز نظره ع فمها..عليا لاحظت سخنت وتحشمت..
الحسن : امسحي شاربك الفوقاني ..
عليا نزلت الواقي اللي قدامها كانت فيه مرايه لقت كتشب ع شاربها الفوقاني..طلعت لسانها ومسحاته..
الحسن الحركه لخبطاته هلبه بلع ريقه وقعد يشبح القدام ..قامت الواقي..
عليا : هيا نروحوا..
الحسن هز راسه بإيجاب وتحرك....وبطريقهم للحوش..
...يتبع...
