#الحسن
#جمان_فريد
الجزء18💓
تاني يوم الصبح بعد ليله من الدموع نزلوا هاله وعليا لوطا زي اليوم اللي فات لبسوا قناع السعاده المزيفه..وخشوا للعالم اللي ينسوا فيه مرارة حياتهم الخاصه..
حسان لبس وتأنق بعد الفطور وطلع وهاله هذا وين ارتاحت تبي تفتك من شوفة وجهه..بينما الحسن قعد مع ضيفه هلال وماسيباش بكل برغم انه عريس في نظرهم واستغربوا تصرفه...
عليا طول النهار ماشفتاش وهو كان متعمد انه مايخشش داخل بكل.."هكي أحسن" قالت هالجمله في نفسها ..وفعلا عليا وهاله بدوا ينسوا شويه اللي صار معاهم ليلة أمس مع جو العيله..برغم وجود ريحانه اللي كان ضاغط ع أعصاب عليا هلبه...
***
الساعه 5:30العصر..
رن جرس حوش عبدالقدوس البي ..
خشت الساكته اللي صح ابهرها كبر الفيلا وفخامة اتاثتها بس ماحستش بالنقص بتاتا ..تقابلت مع خالات ابتسام..سميرة وسناء..سلموا ع بعض وقعمزوها في صالون الإستقبال...
ضيفوها...
وشويه وخشت ابتسام اللي كانت لابسه قفطان سماوي قصير وفارده شعرها وطالعه ناعمه وحلوة..اعجبت بيها الساكته لين خلاص...
...
البرا بلال كان مقعمز بروحه في السيارة سرحان ومبتسم..ويتخايل في ابتسام كيف حتطلع لأمه ياترى شن لابسه...وشن شكل شعرها...ضحك ع روحه كيف يفكر..
من جهة تانيه عبدالقدوس كان جاي فجأة..نزل من السيارة وهو نازل لمح السيارة دقق النظر لقي بلال فيها سرحان ويضحك بروحه..
عبدالقدوس"مستحيل اللي نفكر فيه يكون صح" خش للحوش..قابلاته الخدامه..
عبدالقدوس بحده: من في داخل..
الخدامه : في ضيفه ..
عبدالقدوس بنفاد صبر: ايه من هي لمن جايه..
الخدامه: اللي فهمته جايه تخطب..
عبدالقدوس هني خلاص معاش يشبح فشي..هوالتصرف الطبيعي اللي لازم يديره انه يطلع يكسر بلال تكسير بسيارته..بس اللي فكر فيه العكس طريقة يتعامل بيها مع بلال حتوجعه أكثر..توجه لصالون الإستقبال وخش طول بلا احم ولا دستور ولحسن الحظ ام بلال بحجابها...كلهم انصدموا...
عبدالقدوس بصوت عالي : شن المهزله اللي قاعده تصير هنايا..
الساكته قعدت تشبحله حست انها شايفاته قبل...
ابتسام بإحراج وخوف: بابا..
عبدالقدوس: انتي حسابك معاي بعدين..وتوا انتي يااختي ياريت تطلعي ماعنديش بنات للزواج..
الساكته ناضت واذكراته: الله يسامحك ياولدي يابلال من بنات الدنيا كلها مالقي مايحط عينه غير ع بنتك..
عبدالقدوس بتهكم: ايه ياريتك ربيته ع انه مايشبحش فوق هلبه بش ماتنكسرش رقبه..
سميره: عبد القدوس مش هكي عاد
سناء: غلط اللي ادير فيه..
الساكته قدمتله : ايه اني ربيت ولدي ع هلبه حاجات ومن بينهم انه ماياكلش حرام ولايكسب حرام..بس نسيت ماعلمتاش انه لما بيجي يتزوج مايحطش عينه ع وحده بوها عايش بالحرام...ومشت من حداهم ..وخلتهم كلهم مصدومين وعبدالقدوس زي من عطاه كف لايقرا ولايكتب..
طلعت الساكته وتمالكت نفسها...وركبت السياره..
بلال بلهفه : شن صار..
الساكته تصنعت الإبتسامه: إن شاء الله خير..
عند ابتسام
ابتسام دموعها نزلوا: تفضل ..شفت بعينك ...توا مش عارفه يابابا اذا كان مازال شايف ان الردع كلام الناس عليك مش مهم!!
وطلعت من حداه ومشت تجري ركبت لدارها وهي تبكي....
***
هضا هو..
الحسن قعد يتفحص في صورة في تليفون هلال...
هلال : كل شي حتلقاه عنه في الصورة اللي بعدها..
الحسن حط ع الصورة اللي بعدها وقري الإسم والمعلومات..
وطبعا لدواعي أمنيه ماكانوش يتكلموا عنه بشكل صريح..
الحسن كان يشك في كل شي وكان حريص ويحتاط حتى مع نفسه...
الحسن مط شواربه داخل: تو غدوة إن شاء الله نشوف موضوعه...
***
ياوالله نهار مبارك..
مديحه : هههههههههه...
أميره بحماس: الله بنولي خاااله..
زينب بضحكه : واني بنولي جده..
مديحه وأميره: هههههههههههه
زينب: ايه قوليلي ماكلمتيش اختك ..
مديحه : لا ..بنكلمها بعدين..
زينب: اميره نوضي جيبي لأختك طاسة عصير
أميره بشبحه ع الجنب: قولي نوضي بنكلم أختك في موضوع كبار..😒
زينب: هاك فاهمه ياقردة نوضي..
اميرة ناضت: باهي...ومشت
مديحه: 😂
زينب : خليك منها ..لما تكلمي أختك قصقصيها شن صار..
مديحه بإستعباط : فشنو ..
زينب: فاهمه قصدي يامعفنه..
مديحه : ههههههههههه باه تو نقصقص..
زينب: بتمشي لمتاعينك تبشريهم..
مديحه وجهها تغير: مراد ماشيلهم بيبلغهم..
زينب: باهي ولأمتى يابنتي..
مديحه بضيق : أمي بالله عليك غيري الموضوع
زينب: ربي يهدي..
***
ليل الليل..
ركبوا عليا وهاله لشققاهم..بس كانوا مرتاحات بعض الشي..حسان ماكانش في الحوش..هاله دوشت ورقدت طول..
وعليا اللي ماشافتش الحسن اليوم كامل نفسيتها احسن ..لقت اختها متصله ..كلمتها وهدرزوا وبلغتها بموضوع الحمل فرحت هلبه..ولما جابتلها سيرة ليلة الدخله عليا كذبت ع أختها..برغم ان مديحه حست من نبرة صوت أختها إن في شي..
ابتسام طول الليل كانت تبكي..وبلال بعد روح بأمه بلغاته باللي صار..أضايق هلبه وطلع من الحوش وقعد في الورشه وفش غله في الخدمه...
الحسن ماقدرش يرقد وهو يفكر كيف حيوصل في الروس الكبار لعصابه كبيرة تخدم في الإتجار في المخدرات والسلاح ..ليهم سنين من فترة الفوضى
نشطوا أكثر وأكثر...يبي يوصل فيهم وفمن يدعم فيهم من الحكومه...وبدت تتجمع عنده خيوط بمعلومات جابهوله هلال خلال فترة وجوده جاسوس بيناتهم من 4سنين..لف بنظره جيهة الحوش شبح لروشن من رواشن شقته تنهد من وسط قلبه...وولف ومشي للمربوعه البرانيه بش يبات مع ضيفه..
حسان روح هديكا الليله متأخر هلبه...لقي هاله راقده ..توجه لداره وانطرح ع السرير طول ورقد...
***
يوم جديد
الحسن توجه للمركز بش يبدا يباشر عمله عتب عليه العميد جاد الله..ماباش يرد وطول خشوا في اجواء الخدمه..
جاد الله :عثمان بشير...مدير تنفيدي في شركات البي..
الحسن : ايه ..بعتت من يجيبه بش نهدرزوا عليه شويه...
جاد الله: العميل متاعنا عنده مايثبت بالوثائق تورط الراجل هذا ؟
الحسن : صوت وصورة..بس مش هذا وقتهم..
جاد الله : انت تبي تربك الوسط من جديد..
الحسن ابتسم بتهكم وسكت...
***
عليا وهاله في الكوجينه يهدرزوا ماكانش في غيرهم في الحوش..انعام في العمل ..وريحانه روحت من امس..سارة طالعه مع مرعي..والحاجه برنيه ماشيه مع الحاج علي يطيروا في السو ع قريب ليهم داير عمليه ويسكن برا طرابلس..والرجاله كلهم مهناش..
عليا : بتبدي من الأسبوع الجاي..
هاله: ايه ..
عليا : نراجي فيوم السبت بفارغ الصبر..
هاله : زيك حتى اني..بس اللي نفكر فيه الخلوة ..
عليا : ايه الجامع اللي تقري فيه بعيد؟
هاله : لا مش بعيد..بس صعب نمشي ع رجليا..
عليا : نكلموا جدي الحاج وهو يدبرلك..
هاله ابتسمت : إن شاء الله..
عليا : وين واصله..
هاله : سورة طه..
عليا : ماشااااء الله ...
هاله ابتسمت ..شويه رن تليفونها كان بوها..فرحت استأذنت من عليا وطلعت ...
هاله بفرحه : السلام عليكم بوي..
يونس : وعليكم السلام بنيتي كيف حالك ..
هاله دموعها نزلوا من كثر مامستاحشه بوها:الحمد لله في خيار الخير..
يونس: كيف حال راجلك والعيله اللي عندهم..
هاله : الحمد لله يابوي كويسين..
يونس: شن مدايره مع راجلك وناسك
هاله : الحمد لله يابوي ماتخممش كله كويس الحمد لله..
يونس: دوووم يابنتي دوووم...اهم شي بنتي ترفعيلي راسي وتكوني كيف مانعرفك وكيف ماربيتك..
هاله بألم مخفي : اطمن يابوي...تربيتك وتربية أمي الله يرحمها..
يونس : الله يرحمها..ربي يرضى عليك دنيا واخره..
هاله بدموع: ربي مايحرمني منك ويطول في عمرك ع طاعته
قولي تاخد في دواك ولا..
يونس يخفي في بكائه: ايه بنتي ايه ...
هاله : اكيد؟؟
يونس: اكيد بنتي ..اطمني...
هاله : كويس..
يونس: هي مالا مانعطلش عليك بنطلع للصلاة قربت..
هاله : باهي رد بالك ع روحك وبيي..
يونس ابتسم بألم: حتى انتي بنيتي..في أمان الله..
هاله: في أمان الله..صكرت لما بوها سكر..وقعدت تبكي بصمت...شويه وقامت راسها لقت حسان واقف ع سيارته ويشبحلها شبحتله بحده وخشت داخل...
هو ضحك بهزوة ركب سيارته ومشي...
***
كيف؟؟؟
:زي ماسمعت يابي خدوه من وسط الشركه بطريقه مهينه..
عبدالقدوس : سكر انت...توا اني نتصرف...
عاود اتصل عبدالقدوس بمحامي شركاته ومحاميه الخاص رد..
عبدالقدوس: وينك..
منصف وهو راقد وجنبه وحده من اياهم: شن في ..
عبدالقدوس: نوض دوش وصحصح وكلمني..عثمان شدوه ..
منصف: كيف ..منو شده..
عبدالقدوس: الأمن العام...واللي عرفته..ان ضابط من جماعة المكافحه بيحقق معاه..
منصف : مكافحه شنو..
عبدالقدوس : المخدرات...الحسن الصادق..هو اللي طلبه..
منصف صحصح: الليله حنكون في ليبيا
عبدالقدوس ابتسم بتهكم : نستنى فيك...
***
عثمان بشير وصل يافندي ..
العقيد مختار: جيبوه هني...العنصر أدي التحيه وطلع...
العقيد مختار: بنسلمك المكتب متاعي خود راحتك..ياليث..
الحسن: يبارك فيك يافندي مختار...
العقيد مختار طلع وشويه وخش عنصر ومعاه عثمان بشير
ادى العنصر التحيه وطلع..
الحسن قاعد يلعب بالتليفون فلعبه "هذاكا اللي يجري وراه الشرطي...قداش ادوخ 😂"
قعد الحسن يلعب ومتحمس وعثمان قاعد واقف ..
عثمان حس بالإهانه: ماتجيش العامله هادي ره..
الحسن وقف اللعبه وشبحله : خيرك واقف تفضل قعمز..
عثمان قعمز..والحسن رجع يلعب...
عثمان يشبحله وعصب ع الآخر: علاش جايبيني هني..
الحسن وقف لعب وحط تليفونه: اللعبه هادي في الظاهر ماليهاش نهايه هو يرتكب فعل غير قانوني ..يجري وراه شرطي بش يشده وهو يهرب يلم في الفلوس..ويهرب ويلم في الفلوس ويقعد يهرب ويلم في الفلوس وف الأخيييير يشده الشرطي يشده....
عثمان : وين الفايده في اللي قلته ...
الحسن وخر ع الكرسي وابتسم بتهكم: منذر الحافظ ليك علاقه بيه...
عثمان ضحك بسخريه: وعلاش يكون ليا علاقه بواحد زي هذا...
الحسن : دبي ...
عثمان انصدم وبلع ريقه..
الحسن: *****و******...
عثمان قعد ساكت...
الحسن قدمله: شن درتوا غادي غير الصياعه ...
عثمان شبحله: مش حنتكلم لين يجي المحامي..
الحسن : ...يااااابني...خش العنصر..ضيفنا بيبات هني الليله وتوله مكين قنين ونظيف يليق بمقامه..
عثمان : شن تقول أنت!!!..
الحسن ناض: محاميك برا البلاد لما يروح ويجيك هنايا وتتكلم حضرت جنابك في حضوره..تونشوفوا بعدها كان تقدر تروح ولاتأنسنا كم يوم زياده...وطلع ..
وهو طالع تقابل مع العقيد مختار : خلوه يقعد هني لين يجي محاميه..
العقيد مختار: تمام..
الحسن : يصير شي جديد بلغني طول..
العقيد مختار : تم...ايه حق ..سامحني عزمتني ع عرسك وماجيتش الظروف منعتني..
الحسن: غدوة بإذن الله مداير عزومه غدي لجماعه في العمل ماقدروش يجوا في العرس..ياريت تتفضل ومافيش اعذار
ابتسم مختار: إن شاء االله....
***
في الليل..
وصل للمطار خدي تاكسي...وطول توجه للمركز..نزل من التاكسي وقاله يستنى..خش للمركز طول..سأل ع العقيد مختار ...دلوه ومشاله طول...
مختار: انت محامي بشير عثمان..
منصف: ايه..
مختار : لحظه ...دار مختار تليفون...بعد صكر..نص ساعه يكون العقيد الحسن هني...
منصف ابتسم بمكر: كويس..
فاتت النص الساعه...
بعد طلع مختار بشويه خش الحسن..ماباش يشبح لمنصف لين قعمز..ومنصف يشبحله برفعة حاجب..
الحسن: انت محامي مجموعة البي..
منصف من فوق نفسه : ايه..
الحسن هز راسه بإيجاب..شويه وخشوا العنصر ومعاه عثمان..
اللي صار ان الحسن كان يسأل وعثمان يرد بإنكار ومنصف يدافع عنه..كل غرض حسن من اللي داره يكشف منصف لوين واصل مع البي...واكتشف ان منصف ع الأغلب ذراع ايمين للبي وواضح يعرف هلبه حاجات...
الحسن : تمام...سيد عثمان انستنا وشرفتنا ...تقدر تروح...
عثمان : واحد غيري كان رفع عليكم قضيه في الوقت اللي ضيعتهولي ع دوة فاضيه..
الحسن : مع السلامه...نشوفوك ع خير..وابتسم بسخريه..
طلع عثمان وهو راقيتله..بس منصف قعد...
الحسن : إن شاء الله خير...
منصف : شن حال بنت خالي ..
الحسن شبحله بحده...
منصف ابتسم بتهكم: ره هي حساسه وعنايديه وماتحبش من يستخف بيها ولا من يحط من قدرها..رد بالك..
الحسن نظرته ولت تخوف...
منصف: ههههههههه هدي ياوحش..حبيت ننصحك بحكم اني اكثر شخص يعرفها اكثر حتى من بوها وأمها مش حتلقى خير مني ينصحك في اي شي يخص عليا....
ناض الحسن ومنصف ناض...توجهله الحسن وقدمله شبحله بنظرات حاده تخوف..وشد بآيده وجه منصف بالقوة: اسمها تجيبه ع لسانك مرة تانيه نقلعه من منبته..
منصف يشبحله بإستفزاز برغم انه متوجع من شدة الحسن ..
جبده الحسن من وجهه وفتح الباب وطلعه وحدفله شنطته برا..وسكر الباب..
ناض منصف يرتب في حوايجه وهو يحاول يهرب من نظرات اللي يتفرجوا عليه وهو في هالموقف المهين استجمع نفسه وخدي شنطته وطلع من المركز وهو مبتسم ابتسامة نصر ..انه دار شي يحرق بيه الحسن ولو كان بسيط..
اما الحسن فكان زي البركان اللي بيفور بس يحاول يخمد ناره ويتمالك نفسه..وشويه وطلع من المكتب..ومن المركز مره وحده
***
برنيه: مش لازم تنزلوا غدوه الهوا بحياشكم وشن بديروا لماليكم أولهم زياره..
عليا: تأنسي وتشرفي غدوة ياحناي انتي وانعام
برنيه: الله يأنسك بنيتي..إن شاء الله تو نشوف..هي تو ارفعوا عشاوات رجالتكم و اركبوا ..اكيد قريب يروحوا..
تغيرت وجوههم..مشوا الزوز للمطبخ خدوا العشاوات..وسلموا ع برنيه وركبوا..
عليا وين وصلت خشت للكوجينه حطت العشي ع طاوله الأكل ومشت لدار النوم طلعت حوايج دوشت وخشت فراشها..
بينما هاله حتى هي حطت العشي في المطبخ ..وخشت للدار دوشت وتوضت وصلت الشفع والوتر..وقعمزت تراجع في القرآن..
خش حسان ..سمع صوتها وهي تتلا في القرآن كان صوتها حلو ومريح قدم جيهة الدار..ووقتها كيف بدت بسورة الأنبياء
◇اقترب للناس حسابهم وهم في غفلة معرضون◇مايأتيهم من ذكر من ربهم محدث إلا استمعوه وهم يلعبون◇لاهيه قلوبهم....وكملت باقي السورة حسان جلده قشعر حس بشعور غريب خلا عيونه يتعبوا دموع..بسرعه توجه لداره وسكر عليه الباب..اما هاله فكملت مراجعة سورة الأنبياء وخشت فراشها ورقدت...
...
تاني يوم
الصبح..
ناضت هاله وبدت ادور ع حوشها كله تكنس وتنشف وترتب صح ماليهاش تلاته ايام وشبه ماقعدتش فيه..لكن فرحتها بزيارة بوها خلتها تتمنى لو بآيدها تفرشله الأرض ورد من حوشها لحوش بوها ...
اما عليا..
فكانت تشبح للحوش بملل وقالت في نفسها انه مضموم وهي كل صبح لازم ادير عليه تشك..فكرت وقررت تحوس ع الصاله الدخلانيه بس لإن حتستقبل أهلها فيها ..اللي اجلوا جيتهم للعشيه بسبب امتحانات أميره..
عليا حبت تكسر الروتين ودير حركه مجنونه شوي المهم تغير جوها...مشت لدار النوم..فتحت الدولاب طلعت منه قفطان ابيض في الأحمر..ضيق من فوق وواسع من لوطا وكان كتافه زي اليستيك..تقدر تنزلهم او تركبهم..لبساته..ومشطت شعرها الي واصل لأسفل رقبتها ودارت اي لاينر لعيونها وروج احمر فاقع..نزلت كتاف القفطان خلت كتافها عريانات..وكانت طالعه فاتنه للمليون💖💖💖
مشت للصاله اللي كان فيها تلفزيون وجنبه منظومه اللي استغربت أول مرو شافتها فيها كيف الحسن دارها في الحوش وهل ياترى هو اللي دارها اولا..
حطت سي دي فيه اغنيه وحده وهي اكثر اغنيه تحبها..
بدت الموسيقي وعليا بدت اضم وترقص وتغني..
ع هدير البوسطا اللي كانت ناقلتنا
من ضيعه حملايا ع ضيعة تنورين
تزكرتك ياعليا وتزكرت عيونك
يخرب بيت عيونك ياعليا شو حلوين...
الفاصل الموسيقي..عليا كانت تمسح وترقص وتتمايل كل ماترفع مخده وتنفضها..اوتقيم مفرش طاوله وتمسحها ..
او تقيم فازة وتنقلها من مكان لمكان ..ترقص وكانها فراشه ..ترقص بطريقه حلوة...وناعمه هلبه..خل نرفعكم شويه بمسافه لفم الصاله من تحت رجل متكيه ع صوابعها قدام رجل تانيه واقفه باستقامتها ..خل نركبوا فوق شويه لين نوصلوا في ايدين مكتفات في بعض تمام نكملوا فوق لين نوصلوا في وجه ملامحه الحاده مفتونه لأبعد حد في اللي قاعدة تتفرج عليه كان متكي ويتفرج عليها ويتأمل في حركاتها اللي كلها انوثه وجاذبيه..هي تتمايل قدامه وهو قلبه يرقص داخل من مشاعره اللي هاجت في لحظه..
عليا ولاتندري ع حاجه منسجمه مع الأغنيه ع الأخر
نحنا كنا طالعين بهالشوب وفطسانين
واحد عم ياكل خس واحد عم ياكل تين
وفي واحد هو ومرتوا ولو شوبشعه مرتو..
نيالون مااهدا بالن سكان تنورين
ومش عارفين عيونك ياعليا ياعليا
ياعليا شو حلوين آه عيونك
ع هدير البوسطا اللي كانت ناقلتنا
من ضيعة حملايا ع ضيعة تنورين..
تزكرتك ياعليا وتزكرت عيونك
يخرب بيت عيونك ياعليا شو.......
في المقطع الأخير لما كانت ترقص لفت حوالين نفسها والقفطان يدور معاها حركتها هادي قريب طلعت عقله من راسه ..وهي تلف لمحاته وقفت وقفطانها لف عليها ونزل لوطا..قعدت جامده وتشبحله كيف يشبحلها ..ماقدرتش ادير ولا ردت فعل...
اما هو فقدم وجي جيهة المنظومه وسكرها...وتلفتلها قدملها وقف قدامها بالزبط هي تشبحله وبس وهو يشبح لتفاصيل وجهها كلها..بعدين قعد يشبح لكتافها ..قام كتاف القفطان بصوابعه وهو يشبح لعيونها وغطا كتافها...
الحسن : البسي حاجه باهيه ..حطي وشاح ع راسك..وشبح لشفايفها..امسحي هذا واشر عليه بصبعه...وانزلي ديري الغدي لوطا عازم جماعه...اول عزومه نديرها..ونبيك انتي اديري كل شي ومانبي حد يمس معاك حاجه ..خل نشوفوا كان عندك مواهب تانيه فيها فايده...شبحلها بتحدي ولف وماشي بيطلع شويه وقال: المنظومه هادي تو نجيب من يطلعها من هني ..مش عارف من حطها اساسا..وطلع وسمعت صوت باب الشقه لما تسكر..
هي طبعا نست كل شي صار وفكرت في كلامه اللي كان فيه سخريه مبطنه وتذكرت نظرت التحدي متاعه..مشت لدار غيرت حوايجها وغسلت وجهها..وطلعت من الشقه متوجهه تحت...
...
والله ماليه داعي نزولك
عليا: معليشي ياحناي العزومه لراجلي وانا الأولى نعول عليها..
برنيه عجبها الكلام: غلبتيني ...
عليا ضحكت وقدمت وبتبدا اطيب..
طيبت في الجنان في طنجرة كبيرة طبيخة بازين باللحم الوطني..
ع جية انعام اللي حلفتلها عليا ماادير معاها حاجه..عجنت العجينه بمقدار قدراته بروحها ع عدد المعازيم..متعلمه هذا من امها منين كان بوها يعزم فالمشايخ ويدير في حفلات ختمه عنده في الحوش..
طيباته وبدت تعصد..وانعام وبرنيه مذهولات فيها..عاونتها انعام بس انها وتتلها الصواني حداها ...لان حتى من توتي صفر وتاته عليا بروحها...
كركبت البازين بطريقه احترافيه ...كملت كل شي ..وكانوا الصفر يحلوا العين المغمضه ..
وانعام وبرنيه مش مصدقات بكل اللي يشوفوا فيه كيف بنت 19سنه الجميله الناعمه اللي تبان مدلعه..فالحه هكي..وتأكدوا اكثر من ربايتها اللي تربتها في حوش اهلها..ربايه ع الغالي والعالي في الأخلاق والفلاحه...
ضيوف الحسن مسحوا البازين مسح..هو لما كلي حس بإن البازين غير اللي ذاقه قبل من اي وحده من نساوين عيلته..بس مش مستوعب ان عليا هي اللي دارته..
بعد الغدي ع طول روحوا الرجاله والحسن طلع معاهم ومشي للمركز..وعليا ركبت فوق توتي لجية اهلها اللي بعد العصر حيوصلوا....
....يتبع...
