الحسن

الجزء الحادي عشر

#الحسن

#جمان_فريد

الجزء الحادي عشر...

نزل من السيارة..وخداها في حضنه وقامها دخلها داخل وصل في دار فتحوهاله..كانت فاضيه تماما فيها فراش بس حطها عليه وطلع وسكر الباب بالمفتاح..وتوجه برا ..كان في طاوله وكرسي محطوط عليها ماكله قعمز وبدي ياكل ولا كإن
داير شي...
عند أهل عليا...
فاتت ساعة اتنين تلاته اربعه ..بدوا يتصلوا ويسألوا عليها..
ابتسام قالتلهم: قالت بدير دورة ع السوق...
ونرجس قالت: قالت بتمشي للسوق ولما قلنالها بنمشو معاك رفضت..حسبنا خطيبها روح..يعني بتتلاقى معاه....
بس منصف ماروحش منصف قاعد برا يهيج في وحده من البارات ولايندري ع حاجه...
جعفر حالته حاله وزينب قريب تهبل...ومصعب ماخلا وين سأل..عليا فص ملح وذاب ..الوحيده اللي مسألوهاش بتينه..
الساعه 9:00ليلا..
زينب تندب: ياحليلي البنت وين مشت ياحليلي بنتي وين يااااربي ياااااربي بنتي وييين..
اميرة تبكي: امي بالله عليك وطي صوتك فكينا من الفضايح...
زينب قعدت تبكي..
أما جعفر كان مقعمز في المربوعه حاط راسه بين ايديه ويبكي...
خش مصعب : مهناش مهناش البنت تبخرت...
زينب ضربت بإيدها ع صدرها: حي عليا حي عليا حي عليا...
جعفر سمع الصوت وجاهم: اسكتي معاش تندبي صوتك معاش نبي نسمعه اصصصص...
زينب حطت ايدها ع فمها وقعدت تبكي ...جعفر وزع نظره عليهم وجاي بيولي للمربوعه..رن تليفون..كلهم شبحوا لبعض...
التليفون اللي يرن تليفون جعفر...رقم غريب قعد يشبحله وقلبه خلاص بيوقف من الخوف...رد
"غير عليا رن ماعندكش مشكله امتى تبي رن ماعندكش مشكله"
الأغنيه هادي اللي سمعها جعفر لما رد ..و في صوت ضحك نساوين ورجاله..جعفر يسمع ويشبح لعيلته اللي يشبحوله ويراقبوا في ملامحه..
جعفر : الوووو....الوووووو
منذر: الو الو بابا فين بابا هنا هنا هو..
جعفر غمض عيونه بشده ...
منذر: هههههههههههه...الجو هني فانتاستك ياحاج..كان صليت العشي تعالى غير جو..
جعفر فتح عيونه وبغضب: وين بنتي يافاجر...
منذر: فاجر!!!؟شكلك ماتبيش تعرف وين الريلاا متاعك...
جعفر بصوت عالي : تككككككككلم ياحيوووووان..
منذر: تس تس تس ...حرام ياشيخ لايجوز...
زينب فهمت كل شي...مسحت دموعها وقدمت بعصبيه جبدت التليفون من ايد جعفر ..
زينب بغضب ممزوج بألم : ليتني متت نهار جبتك ليتني ممتت..ليت عيني غمضت وماعاد فتحتها نهار فتحت انت عينك في الدنيا...
منذر مجرد سمع صوتها سكت...
زينب: اختك عندك يافاجر..
منذر بلع ريقه بألم وبصوت يدوب طالع: ايه...
زينب : ردها ياضايل ردها ..
منذر استجمع نفسه: قولي لراجلك ينساها ..وانتم انسوها زي مانسيتوني ..عليا حتعيش زي الللي اني عشته..وعلا صوته..حذوووووق زي اللي ذقته...وصكر عليها...
زينب بصدمه: آلووو..آلوووو...جعفر قدملها وخدي التليفون..
جعفر: سكر الوسخ..شن قالك ..
زينب شبحتله وبلعت ريقها: ماتخافش عليها خوها مش حيضرها...
جعفر: شن تقولي انتي ...غابيه فيه ولدك هذا..كيف مش حيضرها..
زينب بحزم: مش حيضرها..اسمع ..الفتت لصغارها ..كلكم اسمعوني..اختي سعاد..خالتكم..جايبه ومشت عليا بتقعد عندها تعول عليها بعد تمت امتحاناتها...
جعفر : زينب..
زينب: ارجوك ياجعفر..اسمع كلامي ...بنتنا مانبوهاش تنفضح بالذات مع اختك وولدها...لين ادبروا حل لهالمصيبه..
مصعب : اما حل يما وولدك هذا خداها..
زينب: حيردها حيردها...مانستاهلش نعيش لو مردهاش...
جعفر خبط بأيده الزوز ع جبتهه..
اميره بهلع: بابا...
زينب شداته وببكي: وحق الله حيردها والله حيردها ياجعفر أقوى تربح..
جعفر بعدها ومش للدار وسكر ع روحه وهي لحقاته طول...
أميرة : الله ياخدك يامنذر الله ياخدك...
***
سارة ووسيله يتهامسوا..
سارة : وامتى يطلع..
وسيله : بعد شهر..بيطلع من هني بوك بيزوجه طول...
سارة : منووو
وسيله: تجينا نهار ونحكيلك..
خش الحسن : السلام عليكم ..ناضت ساره حضناته وهو حضنها وباس راسها..الحمد لله ع سلامتكم...
سارة : الله يسلمك ياغالي...قعمز الحسن وقعمزت سارة جنبه
الحسن : كيف حالك مرت عمي..
فاطمه : الحمد لله ولدي كيف حالك انت
الحسن : الحمد لله..
في الكوجينه
ريحانه: شن رايك..
انعام بملل: مايأستيش..
جنان : اسمعيني ريحانه عمتي عندها الحق الحسن خوي طلعيه من راسك..حضيعي عمرك ع الفاضي وانتي تستني..
ريحانه ساكته وعيونها تعبوا دموع..
خوله: كلامهم يوجع بس حق..خوي وعارفاته سكر راسه ع الزواج..وانتي حتخشي 25 والله في عرس سارة هلبه تكلموا عليك وعجبتيهم..توقفي في نصيبك ع وهم علاش...
انعام : عييت واني نقول في نفس الكلام..
ريحانه دموعها نزلوا: ماه انتم مش فاهمين مش حاسين اني نحبه افهموا مش بيدي..مش متخيله نكون لراجل تاني غيره..نحبه افهموا مش بيدي..
حضنتها انعام: اششش خلاص...
جنان وخوله سخفتهم وقعدوا يشبحولها بألم...
***
خش عليها بعد مااجهدت روحها من العياط وصياح...كانت طايحه وتبكي...سكر الباب وقدملها وفي ايده مقص..
حاولت تنوض ع حيلها وتشبحله بنظرات حاده...
عليا : يامريض ياقذر...
قرب شدها من وشاحها وحوله بعنف طاح شعرها ع طوله...
جبدها منه ولفها للحيط وخلا وجهها لاصق في الحيط...
منذر: قداش بوك يحب شعرك.. يمشطلك فيه بإيديه..يضفر فيه ويقرا عليه..كان حالف لأمي ماتقرب منه حتى شويه..
لو قصيته حينحرق قلبه أكيد...هههههههههه حينحرق حرق.
وقعد بهيستريا يجبد فيها ويقص..
عليا بالعبرة: حررراااام عليك يامنذررر حراااام راااني اختك
اخخخختك..
منذر وهو في حالة غضب جنونيه: اختي من اختي..اللي سكرت عليا...اللي بسبب اللي دارته..اني وليت هكي ..انتي خليتني هكي انتي وبوك..انتي وبوك جنيتوا عليا..ويقص في شعرها..
عليا تعيط ع طول رقبتها ..وهو مرة يضحك مرة يبكي..
قصه لين وصل لرقبتها...
منذر : ههههههههه..هكي كويس ...كويس بكل..طلق المقص وسيبها ومشي ..طلع وسكر الباب..وهي انهارت ..تبكي بحرقه طاحت ع ركابها تشوف في شعرها المقصوص الطايح وتبكي بحرقة تقيم فيه وتحضن فيه وتبكي وتنوح..
وهو طلع يكمل في سهرته..ولاكإن دار حاجه..قلبه مات تماما ..🖤
.....
ليلة سودا فاتت ع حوش جعفر ولا واحدغمضت عينه..دموعهم مابطلتش نزول وهما يفكروا شن ممكن يدير منذر في عليا...
🍁فاتوا يومين تماما..
وعيلة جعفر يظاهروا بإن الوضع طبيعي..وانتشرت كذبة ان عليا عند خالتها في غريان...
جي يوم..طق الباب..
طلعت اميرة تجري ووراها بوها وامها وخوها..فتحت الباب
مديحه بأبتسامه : مفااااجأة..
كلهم شبحولها بنظرة خيبه وكسر..
مديحة تلاشت ابتسامتها: خيركم...
أميره حضنتها بقوة ..
مديحه : خيرك أميرة..شبحتلهم..شن في ...
دخلتها اميره وهي تبكي وسكرت الباب..مديحه لاحظت اختفاء عليا..
مديحه : عليا وين...
بوها خش داخل...
وامها دموعها نزلوا ومصعب يشبحلها وع وجهه ملامح الغضب..
مديحه بخوف شديد: شن في تكلمواااا..
اميرة: عليا انخطفت...!
....
عليا من دارها ماتطلعش إلا للحمام كانت في معاها وحده اطلع فيها وادخل فيها..كانوا يجيبولها في الماكله بس هي رفضت تحط في فمها شي ..كانت تصلي ع حسب ماتقدر وطول الوقت ع لسانها الدعاء والقرآن ..ومنذر يجي للمكان االلي هي فيه..لكن معاش خشلها من هذاكا اليوم...
***
خوله تكلم في سارة بالتليفون ..
خوله : توقعته مش حيجي..
سارة: جي ولا جعنه لاجي مهما حاول يماطل حيطلق في النهايه..
خوله : خايفه يعلقني ياساره..
ساره: بش خوك الحسن يعلقه قدام حوشهم..
خوله ضحكت..
سارة : اضحكي..ومادوريش كل شي ليه نهايه..وربي حيعوضك...
خوله: يااارب...
***
قصدك االلي حاطه ليه وقت معاهم...
الحسن: 4سنين..
محمد الفهد: مشكوش فيه..
الحسن : تس..
محمد الفهد : وهادي اخر مهمه ليه..
الحسن : ايه..هو كانت مهمته انه يطيح الشروده والبوكشاش..والخونه لجهاز الشرطه..وغيرهم من مترأسين مناصب في الدوله..
محمد الفهد: بس بعد اتم مهمته حيعرفوه وحيقتلوه..
الحسن : اني حنقتله..
محمد الفهد بصدمه : كيف!؟
الحسن ابتسم بتهكم وقعد ساكت..
***
تمر الأيام وتتبعها الأيام..وعليا مافيش عليها اي خبر..وجعفر تعب هلبه...وزينب حتى هي بس كانت تظاهر بالقوة ع خاطر عيلتها..ومديحه متنكده..بس تحاول تمثل قدام راجلها اللي ماقدرتش تحكيله هالمرة لأنه الموقف صعب ع الآخر ..
صاحباتها ماصدقوش حكايه انها عند خالتها حاسين بحاجه صايرة لعليا ..
اما عند عليا ...
كانت طالعه من الحمام توضت للظهر..وكيف بتخش للدار..خش شروده وشافها ...برغم شحوب وجهها ونزول وزنها وعيونها الحلوة الذبلانه...إلا أن جمالها صعب يخفى ع عيون حد يفهم في الجمال كويس..قعد واقف ويشوفلها وهي شبحتله بحده خششتها المراة وسكرت عليها الباب بالمفتاح...
شروده"منو هادي ..سبحان اللي خلقها...آاااخخخ"
***
الحسن مجتمع بفريق كامل من العناصر وبحضور العقيد جاد الله..
الحسن : العمليه الجايه اهم عمليه حتقوموا بيها واني شخصيا زيكم...هادي العمليه حتتسجل في سجلاتكم كضباط ..هادي العمليه كانها عمليه جهاديه ..لو تمت بنجاح حنحققوا انتصار لهالبلاد...مش حنقول شي عن التفاصيل الا يوم العمليه اللي يفصلنا عليها..واشر بأيده 3أيام بس..
جاد الله : خليكم ديما في جاهزيه ممكن يتغير شي ويطرأ طارئ في أي لحظه..
كلهم بصوت صادح :تمام يافندي...
جاد الله : تقدروا تتوكلوا...
ادوا التحيه وطلعوا...
جاد الله : وحدة مكافحة الإرهاب معانا...
الحسن: ايه ..والله قبل كل شي .
جاد الله ابتسم: ونعم بالله...
***
محتاط هالمرة كويس...
: انتم احتاطوا اكثر منه...الصفقة صعب يعرف عنها اي شي..هو قاعد يدوخ فينا يبينا نتصرفوا تصرف غلط
:ممكن..
: ركز في الصفقة ياكوبرا ركز في الصفقه..رقابي نطيرهم لو فشلت..
: اطمن اطمن ...
***
عبد القدوس: دير تشيك اخير..خير ماتقعد ماشي جاي ولاتبي تقعد ماشي جاي ياشويطين
منصف بضحكه: نبي نلهى بروحي
عبدالقدوس بضحكه: أكثر من هكي..
منصف: ههههههه اما انت يابي..
عبدالقدوس: ههههه...المهم كمل اسبوع تاني تم كل شي وولي هني والهى بروحك..خلاص العزوبيه بعد كم شهر حتودعها..ماتضيعش منها تانيه..
منصف: ههههههههههه به يابي به..
***
منذر : الحوازة اللي جنبنا مباشره..
شرودة: كويس كويس...كون هاني ..الا قولي ياكامليون..
منذر : شني
شرودة: عندك ضيوف هنايا...
منذر شبحله بحده وبحركه سريعه جبده من سوريته: شرودة اني لماندير خطوط حمر مانحبش من يتعداهم اللي بيتعداهم
مالاش عندي عقاب غير اني نجبد روحه من خشمه..
شرودة بخوف: واني...ششن ..قلت..
طلقة منذر: نحذر فيك بس..وناض من حداه ماشي يشوف عليا..
شرودة"خشت راسي يامنذر ومش حنهرب من هني ألا وهي معاي "
وصل منذر في الدار اللي فيها اخته فتحها لقاها تصلي شبحلها هلبه بعدين سكر الباب بالمفتاح ومشي...
***
بسرعه يامصعب بسرعه..
مصعب طلع قايم بوه ع كتفه بعد رقي عليه الضغط واغمي عليه بحداهم..حطه في السيارة ومشوا  معاه زينب واميرة...
كان ع وشك ينصاب بجلطه بس ربي ستر..وقاللهم الدكتور اي اي انفعال تاني حتصيبه جلطه لامحاله..
عيطت زينب وبكت لين عيت..واميرة تهدي فيها..سمعت مديحه وجت مع راجلها وبكت بعبرتها ع الحال اللي وصله بوها بسبب ولده.
جت اخته بثينه مع راجلها..هي حاسه إن في شي مش طبيعي صاير..ومش خاشه راسها قصة قعاد عليا في غريان عند خالتها...
منصف بعد دار تليفون جديد ع قد ماأتصل بيها ماحصلهاش بكل يعطي فيه خارج التغطيه..قعد يطمن في روحه ان ممكن المكان اللي هي فيه التغطيه ضعيفه..قعد يطمن عليها من مديحه وخلاص..ومع هذا قلبه مقبوض وحاس ان في شي...
***
يوم العمليه....
الصبح...
سرمد والحسن بفطروا
سرمد: في مهمه..
الحسن : زي قبل..
سرمد: ربك يحفظ
الحسن ياكل وساكت..رن تليفون طلعه من جيبه وشاف المتصل ..سكر عليه بالحمرا...
سرمد: علاش سكرت.
الحسن: مولي قصقاص..
سرمد بضحكه: انت غموضك مثير للفضول..
الحسن: حناي وين...
سرمد: مشت مع الحاج يعاينوا
الحسن شبحله: خيرهم
سرمد بإبتسامه: اطمن فحص عادي...
الحسن : اكيد؟!
سرمد: هههههه وراس حناك أكيد
الحسن هز راسه يمين ويسار وكمل ماكله...
***
بعد تلاته ايام رقدهم جعفر في المستشفى ...طلع ..اول ماخش للحوش قعد يدور بعيونه بالك يشوف بنته اللي ليه 15يوم لاراها ولاسمع صوتها...نزلت دمعته ونفض ايده مرته عنه وطلع للجنان وقعمز فيه
جعفر: مش حنخش لين تروح بنتي..
زينب: يهديك ربي الدنيا صقعت ياراجل خش...
جعفر ماباش يعدل ع كلامها..
مصعب قدمله : بوي أنت إنسان مؤمن وتعرف ربي ..
"واستعينوا بالصبر والصلاة وإنها لكبيرة إلا على الخاشعين"..
تمسك بالصلاة والدعاء..واصبر..حيردها ربي زي مارد يوسف ليعقوب...
جعفر قعد يشبح لولده هلبه قاعد يشوف في عوض ربي فيه ..ارتاح قلبه...وناض بيطلع..
زينب :وين ماشي...طلع وسكر الباب دون مايرد...الحق بوك ياولدي..
مصعب : ماتخافيش يما ماشي للجامع...
أميره: هيا امي تعالي نخشوا ...
لفت زينب وخشت مع بنتها...ومصعب طلع بيلحق بوه للجامع..
***
ابتسام: حاسه بشي قلبي واكلني عليها معقول لاتتصل ولاترد علينا وديما خارج التغطيه..
نرجس : إن شاء الله خير وخلاص..ديما نفكر فيها..
ابتسام: مش عارفه علاش حاسه ان هذاكا منذر مداير حاجه..
نرجس: حاجه زي شنو...
ابتسام : مش عارفه..بس هذا مانستبعد عنه شي..
نرجس: حسك خوفتيني..
ابتسام مطت شورابها لداخل وسكتت
***
الساعه 12:00ليلا...
طاوله كبيرة اشبه بطاولة الإجتماعات محاوطه بكراسي عليها كل الحاضرين ..ويستنوا في الشخص..اللي حيكون مشرف ع الصفقه ...الكوبرا...ومعاه منذر ..
...
من برا بكل كانت وحدات الشرطه كيف واصله ومحاوطه المكان كله...
الحسن: تلاته دقايق بالزبط وحنقتحموا المكان..تسمعوا الأمر مني تتحركوا...الفهد الأسود تسمع فيا
الفهد الأسود: بعدتلاته الدقايق بالزبط حنعطي الأمر
الحسن: تمام
....
منذر بصدمه: كبسه..
الكوبرا : ايه ماتمشيش غادي
منذر : شرودة غادي...
الكوبرا: هو اللي حيتريس الصفقه..
منذر: كبش فداء
الكوبرا: ماضيعش وقت هيا...وصكر
منذر ولا هو وجماعته...وهرب طول...ونسي عليا تماما..
فهالوقت..
اقتحموا قوات المكافحه كل من المخدرات والأرهاب المكان..وصارت مواجهات مسلحه مات من مات وانصاب فيها من انصاب..وقبضوا ع الموجودين كلهم...
شرودة كان يقاوم هو واللي معاه وطلع من المكان ..
شرودة: استنوني هني ...
خش للمكان اللي فيه عليا لقاه فاضي ينفض..فرح وين وصل في الدار كسر الباب لقاها مقعمزة اول ماشافته فزت طول
...
الحسن : حنمشط الحوازة اللي جنبهم مشطوا انتوا الأطراف ..
...
عليا : انت منو....
شرودة: عيني مارتش زي زينك ولعتي فيا النار من اول مرة شفتك فيها..
عليا من خوفها حاولت تهرب شدها شرودة حاول يبوسها لكن هيا كانت تقاوم دفلت عليه هو تكنطا ضرباته ع راسه براسها بكل قوتها وخر وشد راسه وهي راسها وجعها من قوة الضربه وكانت حدوخ بس قاومت..
شرودة: تهبللللي ياشرسه...قدملها ...وشدها وطيحها وجي فوقها وبدي يحول في سوريته..هي كانت تتلاحق في المقص اللي خلاه منذر يوم قص شعرها...
....
الحسن خش لداخل تفحص المكان..سمع صوت صادر من داخل تقدم..
...
نزل شرودة ع رقبة عليا في هاللحظه جبدت المقص وطعناته في ظهره...فشل شرودة من الضربه بماتبقى من جهدها دفاته جي منقلب ع ظهره..وناضت بصعوبه بتهرب .
...
الحسن قدم وبحركه سريعه وجه سلاح للدار اللي فيها عليا..ع طلعة عليا هاربه جت قدام مسدس الحسن بالزبط...
تالت مرة يشوف فيهم العيون اللي حركوا قلبه الصلب ..
اول مرة شافهم  عيون قويه نظرتهم حاده..
تاني مرة شافهم عيون مدمعه من الألم..
هالمرة كانت عيون مليانه خوف عيون ذابله..تفاصيل وجهها الفاتنه ذابله..لونها الأبيض انقلب لأصفر شاحب..مصدوم هلبه بس قاعد بوضعيته موجه السلاح جيهتها..
هي خلاص جهد معاش عندها شبه اسبوعين مش واكله فيهم كويس ..النوم شبه معدوم..بذلت جهد في مقاومه وحش قبل شوي..وتوا تشوف نفس الشخص اللي تقابل فيه في مواقف تكون فيها ضعيفه وهالمرة هي فقمة ضعفها ..انهارت تماما وكانت حطيح ..بس الليث حاوطها بإيديه وجت في حضنه كانت اخر حاجه تشوفهم عيونه اللي كانت نظرتهم مش مفهومه ...وفقدت الوعي...

...يتبع...