#الحسن
#جمان_فريد
الجزء 24
بعد العصر جو أهل عليا..وهي ع قد ماتقدر ماحسستهم بشي وكانت تتحاشى في عزوزتها..بس وسيله مااكتفتش باللي قالته لعليا..قعدت تتعامل مع أمها بتعالي وزينب وجعتها منها هلبه..لكن برنيه اللي كانت مركزة ع كل شي طيبت خاطرها وكبرت بيها هلبه..
في الكوجينه
خشوا يعولوا ع العشي ويهدرزوا..
خوله: اني تفاجئت علاش اتصلوا بيا اني تحديدا...
انعام : كان هذا خل واحد من الأولاد يمشي معاك..
خوله : حتى اني هكي مفكره برغم انها شركه ليها اسمها ومعروفه..
ساره: الإحتياط واجب..لتوا حني مش عارفين كيف طلقك هذاكا المنحط بسهوله بعد اللي داره وفوقها عطاك المؤخر..
انعام : صح...ربي يستر..
خوله بضحكه: خوفتوني..
انعام: ههههههههه...حني نبوك تكوني حريصه بس..
هاله وجنان وعليا وميسون مع بعض ...
جنان بعصبيه: واحد يبي مكرونه واحد يبي رز واحد يبي حب زقوقو..
عليا وميسون وهاله : هههههههههههههههههه
جنان بضحكه: والله حق هما يتشرطوا وحني هني نعانوا..
هاله بألم : خوتي الله يرحمهم رز بالخلطه كانوا يختلفوا عليه..واحد يبي فيه زبيب واحد لا وواحد مايبيش فيه كبده..شدت دمعتها
كلهم بأصوات متقطعه: الله يرحمهم..
ميسون تغير في الجو: ايه حقه ماقلتلكمش ..بديت نجيب صح في كيكه الكراميل..
كلهم : اوووووووو
جنان: عمتك حتى الباسطي العادي ماتعرف اديره..
هاله بضحكه: حقه!!
جنان: الحلو مانجيبش فيه بكل..ع عكس الحار..
عليا : في ناس هكي صح..
ميسون: مرت عمو انتي لازم تتقني البسبوسه..
عليا وجهها تغير وردت بمجامله: اني نجيب في هلبه حلويات صح.بس أكثر شي القطايف..
ساره : سمعت حد قال قطايف..جتهم
جنان: ههههههههه..مخرومه قطايف هادي ره..
عليا : تو نديرها تو خير ماتطلع في البيبي..
ساره : هههههههه نهاري لالا مش لازم
عليا بإبتسامه: ماتتحشميش عادي..يعني لو اني في مكانك مش حيديرلي اللي خاطري فيه..
ساره : انتي بالذات احملي بس بكتكوت لخوي الحسن واني نسكنلك في الكوجينه..
عليا:😳😳😳😳
....
الحسن في هالوقت روح بعد مالف بالسياره في الشوراع من ضيقه..خش ومشي للمربوعه تفاجأ لما لقي الفهد وهلال..اعتذر منهم وقعمزوا وبدوا يهدرزوا..وفي عين كانت تراقب فيهم....👁👁
...
المطر بدت تبشبش ..
جنان شبحت لعليا : قريب تكملي..
عليا : ايه خلاص عسلتهم..
جنان : هيا نطلعوا..
عليا بضحكه: تمام..دست عليا القطايف بياخدوهم مع النسكافيه بعدين..وطلعوا لبرا مستغلين انشغال الكل..
قعدوا زي المهبولات ينقزوا تحت المطر ويضحكوا ماكانتش قويه هلبه..
جنان : عليا..
عليا : شنو ..
جنان وجهها احمر: اللي يعطيك سر..
عليا: في بير غارق..
جنان بضحكه: اني حاسه روحي حبيت..
عليا : الله !!!
جنان : ايه ...تنهدت وبدت تحكيلها كل شي بالتفصيل..
عليا: فوتي موضوع اللون وجو الجاهليه هذا ماتعدلي ع حد ..المهم اخلاقه وافعاله ..
جنان : حتى اني مش مدورة..بس المشكله اني مش عارفه كيف نوصل فيه..
عليا قعدت تفكر...بعدين قالت: ماعنداش فيس..
جنان : مافكرتش فيها.يعني جماعة الشرطه مرات مايهتموش بحاجات زي هادي..اهو الحسن عمره مادار فيس..
عليا ابتسمت بتهكم : خوك هذا حاله خاص ..طايح علينا من كتاب التاريخ من الحقبه العثمانيه تحديدا..
جنان: هههههههههههههههههه
عليا بضحكه: المهم توا انتي دوري وراه في الفيس..
جنان : مانعرفش اسمه..
عليا : اني نعرف..مرة سمعت سرمد يتكلم عليه قال اسمه محمد رزق الله..ملقب بالفهد الأسود..
جنان : سرمد؟؟
عليا : ايه كان يتكلم بالتليفون..شكله يبي يدير معاه مقابله..
جنان : ممكن...
عليا : المهم توا دوري وراه وجربي حظك..
جنان : هكي تقولي ..يعني عادي..
عليا : اعرفي كيف تتصرفي بس وخليك فطيينه..
جنان بضحكه: انتي مرات تباني طفله ومرات تباني من عمر حناي برنيه..
عليا : ههههههههههههه يامعفنه..
انعام جتهم: انتم هني ..ماتشعفوش..خشوا هيا خشوا...
جنان وعليا : هههههههههههه..وخشوا داخل..
اما هي جايه بتخش شافت عرف العنبه بيطيح..مشتله تجري"تعشق العنب وهي المهتمه بيه"
وصلت فيه سواته ع السقاله..ووخرت تشوفله كويس ..ابتسمت بعدين التفت وانصدمت..
هلال : نابيدي حقيته قبل لتجي ..بنعدله انتي سبقتي هالمره..
انعام شبحتله شويه وبعدين مشت تجري وخلاته واقف..
هلال : ربي يطول في عمرك ياحني قمرة..كل مرة تتصلي بيا اطلعبني من المجمع بش نحق هالعنبه السمحه اللي خشت راسي 😍...
روحوا خوات برنيه واخت الحاج علي وولاد عمه..وقعدت العيله بس وكلهم مقعمزين في الصاله..
الحسن خش قعمز في بين امه وحناه هما اللي نادوه يقعمز حداهم.وكانوا كلهم مقعمزين..سرمد مرعي حسان..ونساوين العيله اما الرجاله الكبار برا مع الحاج علي..
حطوا ع الطاوله اللي فنص الصاله حلويات..
كيكه كراميل دارتها ميسون..
بسبوسه ريحانه..
دبلة دارتها هاله..
شويه وطلعت انعام تفرق عليهم في النسكافيه ..وطلعت وراها عليا بصونيه القطايف..والحسن عيونه معاها ...حطتها وولت قعمزت...
ناضوا هاله وريحانه وميسون يفرقوا في حاجاتهم..اللي يبي ياخد ..
حسان ماباش ياخد من ميسون وريحان وصلت فيه هاله خدي الدبله وكان يشبحلها اما هي شبحتله بحده وشقلبت عيونها وفاتته..هو ابتسم وهز راسه ايمين ويسار ..
الحسن ماباش ياخد ولا حاجه وعيونه ع عليا وهي تهدرز ع جنان...
قعمزوا اللي كانوا يفرقوا..
ناضت ساره: سلمهالي مرت خوي اللي ع خاطري دارت القطايف..
مرعي: ههههههههههه واني نقول..
عليا بإبتسامه: صحتين حبيبتي..
مرعي : خلاص ياعليا بتشدها في جرتك..
عليا : تدلل..
ساره : نجيها ياربي أم عيون سماح..
ابتسمت عليا وقامت عيونها جت في عين الحسن غيرت عيونها طول..
وسيله مش عاجبها..وريحانه بتنحرق..
وسيله : خيرك ولدي ماخديت شي مع النسكافيه اهي بسبوسه نجيبلك..
الحسن : لا امي قعمزي..
ريحانه ناضت: تبي اني نجيبلك
عليا تسمع وحاسه روحها سخنت ..وتراجي فرده..
الحسن :لا ارتاحي...مانبيش بسبوسه..
برنيه : في غريبه درتها امس نجيبهالك..
الحسن : تس ارتاحي حناي..شبح لعليا..اللي دارت القطايف تجيبلي..
عيونهم كلهم ع عليا اللي وجهها راح طماطم ..ناضت وهي محرجه خدت الصونيه وقدمتله ومدتهاله..
الحسن قعد يشبحلها : بشن مدايرتيها..
عليا بدون ماتشبحله : قشطه..
الحسن: فيها عسل
عليا : ايه واضح...
برنيه : خود من المراه ايديها طاحوا..
الحسن شبحلها برفعة حاجب وخدي وعليا ولت حطت الصونيه وقعمزت في مكانها وجهها نار من الخجل..ومتنرفزة منه في نفس الوقت..
ريحانه "ياربي تموتي ياااربي"
وسيله تشبحلها بغل حتى هي...حست ان ولدها طايح فيها رسمي واضح عليه من نظراته ..وزادت كرهتها..
سارة : حسان تليفوني اشبح شن صار لنظامه ولاملخبط تشوفهولي..
حسان : جييه ترا..جابتهوله ساره وقعد يشوف فيه وهاله تشبحله من تحت لتحت..شويه وكمل
حسان :اهو اموره تمام..شافته سارة ابتسمت بفرحه
ساره: ايدياتك في الجنه وخيي..
ابتسم شبح لهاله اللي غيرت عيونها طول وهو تنهد ورجع يشرب في النسكافيه..
بعد سهريه حلوة..روح عابد بعيلته وركبوا الكل لشققاهم...
الحسن قعد مع سرمد..
عند..هاله..
ركبت ودارت روتينها المعتاد..رن تليفونها كان بوها..
هاله : السلام عليكم..
يونس: وعليكم السلام بنتي..كيف حالك
هاله : الحمد لله ..كيف حالك انت وبيي..
يونس : الحمد لله ..كيف حال سلفك انشغلت وماقدرتش نجي اليوم..
هاله : الحمد لله حاله باهي..خيرك بوي بشنو انشغلت..
يونس : هكي مشاغل..المهم بنتي غدوه نبيك تجي انتي وراجلك..
هاله : خير ان شاء الله!!
يونس بضحكه: خيرك انخلعتي..نبيكم تزروني نبي نهدرز عليكم..
هاله : والله متحشمه منك وبيي بس والله انشغلت هالفتره..
يونس: ولا يهمك بنيتي معذورة..المهم نبيكم تجوني قبل الظهر نبي تغدا من ايدياتك..
هاله : حاضر وبيي جايين إن شاء الله..
خش حسان للحوش يشبح فيها تتكلم بالتليفون..
يونس : باه بنتي هي مالا بالسلاامه..
هاله : في أمان الله وغدوه إن شاء الله من العشرة عندك.
يونس: إن شاء الله..هي بالسلامه..
هاله : فأمان الله..سكرت بعد سكر بوها التفتت لقت حسان واقف..
هاله شبحتله بحده: بوي يبينا غدوة نجوه نتغدوا عنده..
حسان: مش عارف..كان فضيت باهي كان هذا بري مع عمي سالم..
هاله اتكنطت منه ماسد لما جي بوها اول مرة ماحضرش وحتى بعد عزمهم مايبيش يمشي حست بالإهانه..
هاله بتهكم :كان فضيت !!هالمحلات والشركات اللي واقفه عليك!! يرفعني عمي سالم..انت خليك مشغول في مواعيدك وفي التافهات اللي تكلم فيهم..وخشت للدار وصكرت عليها..
اما هو فعصب لين خلاص ومشي لداره وصكرها عليه..
...
تاني يوم
الصبح ..
الساعه 9:50
هاله مامشتش للكليه وكانت تستنى في السواق بيرفعها وتت روحها كيف جايه بتنزل رن تليفونها
في نفس الوقت..
خش حسان للحوش تقابل مع حناه .
برنيه بإبتسامه: جاي بترفع مرتك وتتغدوا في حوش بوها
حسان بضحكه هز راسه بإيجاب ...
برنيه : شوي ونازله..
"آاااااااااااااااااااااااااااااااااااااااااااااه"
برنيه بخلعه: هذا شنو..
حسان : هاله..وركب يجري وصل في الباب ويسمع فيها تعيط
فتح الباب خش لقاها مقعمزة تعيط وتبكي وتليفونها ملوح بحداها..
حسان نزل ع ركابه : خيييرك هاله خيييرك..
هاله تبكي وتعيط : بوووووووي بوووووووي مااااات مااااااااااات...وتعيط وتبكي شدها حسان يحاول يهديها ..
حسان متأثر هلبه: هاله هاله مش هكي..
هاله دفاته: شنو هو اللي مش هكي شنو هو وناضت بتطلع قابلتها برنيه: يابنتي اذكري الله..
هاله : بووووووووووي ياحنااااااي بووووي شكله كان حاااسسس يقولي تعااالي نبي نهدررررز عليك ...شكله كااان يبي يودعني ....آااااااااااااااااه اااااااااااااااااه...وقعدت تخبط وتعيط وتبكي..
حسان جاها وشدها من ايدها: هااااله شن اللي ديري فيه هذا...
هاله تعيط: حوووووووول خلييييييييني خليييييييني بوي ماااااات ظهري انكسسسسر خلاااااااص قعدت بروووووحي..آااااااه تعيط ع طول رقبتها..
حسان مالقاش غير طريقه وحده يخليها ترجع لوعيها بيها ..ضربها كف👋..
حسان بصوت عالي: يرضي ربي اللي ديري فيه هذا..
هاله بعصبيه : علاش انت تعرفه ربي ...
حسان بنفس مستوى الصوت: اييييه ماكنتش نعرفه..لكن انتي خلتيني نعرفه..انتي اللي خلتيني نقرب منه..خليتيني نصلي خليتيني نقرا قرآن ..كتاب ربي اللي تحفظي فيه..رشف ومسحه دموعه..مش قاريه الآيه االلي تقول"الذين إذا اصابتهم مصيبة قالوا إن لله وإن إليه راجعون أولئك عليهم صلوات من ربهم ورحمه وأولئك هم المهتدون"...
هاله قعدت تشبحله بصدمه وعيونها ينزلوا منهم دموع وبرنيه ابتسمت من وسط دموعها..
هاله بصوت مبحوح: أرفعني نشوفه لأخر مره..
حسان مسح دموعه: باهي..
رفع حسان هاله ومشت معاهم برنيه لحوش بو هاله..
لأول ماجت لقت زحمه خشت داخل لقت بوها راقد في فراشه الرقدة الأخيره وعلى وجهه ابتسامه خفيفه نزلت تبوس في راسه وايديه..وتقول"سلم ع أمي وخوتي يابوي قوللهم مستاحشتهم هلبه وحتى انت بنستاحشك معاهم"..
وقعدت تبكي بعدين قعدت تقرا قرآن عند راسه لين جو طلعوه بيرفعوه لمغسله الموتى...
العيله كلهم جو ...ووقفوا مع هاله مابوش يخلوها بكل..وهي طول الوقت في دار بوها راقده ع فراشه ...واللي بيجي يعزيها يعزيها غادي...
فات أسبوع
هاله ع نفس الحاله...في يوم..خشلها حسان الدار لقاها راقده في فراش بوها وحاضنه المصحف..
قعمز ع ركابه بحداها...حول منها المصحف بالشويه حطه..ع طاوله..وقعد يتأمل في وجهها اللي ذبل من الحزن..قعد يمسح بإيده ع شعرها: من اليوم اني ظهرك وسندك وعيلتك مستحيل نخدلك لحظه او نخليك..انتي احلا نعمه بعتهالي ربي انتي طوق نجاتي ياهاله انتي اللي خلتيني بنادم ياهاله
قعد بحداها لين فاقت...شبحتله..
هاله : شن ادير هني.
حسان : قاعد معاك..
هاله : خليني بروحي..
حسان : هاك قاعده بروحك..
هاله : مش وقته ره..نوض خليني بروحي..
حسان بإبتسامه : اهو انتي قاعده بروحك..اني روحك..
هاله ناضت : بجديات انت واحد تافه وماعندكش دم..
حسان : راضي باللي تقوليه فيا والله راضي..بس ياهاله حالتك هادي صح..اللي ديري فيه بشن حيفيدك..عمي يونس الله يرحمه حيرتاح وانتي هكي..
هاله : ارجوك حسان اطلع..
حسان : هاله لو اني في مكانك حتخليني بروحي..
هاله : ايه..
حسان بإبتسامه : هاله اللي نعرفها حتقعد جنبي ..مش محبه فيا ..عارفه روحي مانستاهلش محبتك..بس حتقعد جنبي بش اطيب خاطري ودير واجبها اتجاهي..
هاله سكتت وقعد تشبحله..
حسان: هيا نوضي معاي..
هاله : مانبيش نروح..
حسان : من قال بنروح بيك ..نبي نرفعك لمكان ونولوا..
هاله : وين ..
حسان ناض: تو تعرفي هيا وتي روحك ...اه ايه..تبدلي بروحك ولانعاونك..
هاله غصب عنها ضحكت: امشي اطلع برا..
حسان ابتسم بإرتياح مشي خطوتين للخلف وبعدين لف وطلع..
وهاله حست براحه ..برغم حزنها شديد..طلعت من الدار ومشت لدارها تلبس..
***
مسكينه توجع هلبه..
جنان : ايه عيلتها كلهم ماتوا مقعدلها حد..
خوله :حسان وين مشي حني وين مشينا..
جنان: خوك ماينعباش عليه..
خوله: معقوله جنان مش ملاحظه عليه انه تغير..
جنان: صعب اللي زي خوك يتغير..
خوله : يهدي من يشاء وهو على كل شيء قدير..
جنان : ونعم بالله..
وسيله جتهم للدار: خوله ماما خوك يبيك برا..
خوله : الحسن جي..
وسيله :ايه
خولة ناضت وطلعت بعد امها : وينه ماما..
وسيله : في الجنان..
خوله طلعت برا لقاته واقف يستنى فيها..
خوله : شن جوك ..
الحسن : تمام ..وحط ايده ع راسها وحرك شعرها..وانتي..
خوله بضحكه: الحمد لله كويسه..
الحسن حط ايديه في جيوبه: ايه شن قصة عرض العمل هذا..
خوله: يومها اتصلوا بيا شركه خاصه شركه "RZB" شركه قابضه اول شركه في ليبيا من هالنوع ..من بعد الحرب تأسست وهي في الأساس شركه كبيرة خارج ليبيا..اللي استغربتله انهم كلموني وعرضوا عليا نخدم عندهم مترجمه...
الحسن : عاي أساس اتصلوا بيك انتي
خوله : قالولي لإنك كنتي الأولى ع دفعتك وعندك أكثر من لغه..بحتنا عنك وعرفنا.
الحسن : خليني نسأل ع الوضع كويس ونرد عليك ..
ابتسمت خوله : ربي مايحرمني منك..
ابتسم الحسن ع جنب..
خوله : كيف حال عليا..
الحسن وجهه ولاأحمر وغير نظره لجهةتانيه : كويسه..
خوله ابتسمت لخجل خوها : البنيه جدعه وطيبه ياالحسن بس صغيره ..اعرف كيف تتعامل معاه..
الحسن شبحلها وهز راسه بإيجاب: ماتبي شي..
خوله : سلامتك...
الحسن علا صوته : بالسلامه ياامي ..
طلعت وسيله سلمت عليه وهو طلع وهما خشوا داخل..
***
في الجامعه..
الساعه 3ظهرا
يعني بلال وافق..
ابتسام: ايه..بس قاله اني ومرتي حناكلو من تعبي ..
نرجس:شن قاله بوك..
ابتسام : قاله ع راحتك..
عليا : وشن مخططه توا..
ابتسام : خطوبه لين نكمل الإمتحانات وبعدين العرس..
نرجس : ربي يتمم ع خير..
عليا: ربي يفرحك أكثر وأكثر..
ابتسام بإبتسامه: الفال ليك نرجوستي..وربي يهنيك للوشتي..
عليا تنهدت وغيرت عيونها جهه تانيه وانصدمت..
واقف من بعيد شويه يشبحلها بنظرات شوق هيا تعرفهم حست بشعور غريب لما شافاته..قلبها تلخبط هلبه..
ابتسام ونرجس شافوه عصبوا ع الأخر..
هو تجرأ وقدم..
ابتسام : مصح وجهه
نرجس : شن يبي هذا..
أما عليا فساكته ...
وصل فيهم ...
منصف : عليا ممكن شويه بس..
ابتسام ناضت: هيا عليا ..
منصف شبح لإبتسام بعدين شبح لعليا..شويه ياعليا ارجوك..
نرجس: هيا عليا نوضي ..
عليا ناضت : بروا تونلحقكم..منصف ابتسم ونرجس وابتسام انصدموا..
ابتسام : عليا..
عليا شبحتلها : تونلحقكم..
ابتسام مشت هي ونرجس وعليا شبحتلهم بعدين شبحتله..
عليا : نسمع فيك..
....
تو في كلية الطب بنشوف ورقه لأختي ونروح بيها مش لازم تجي....بارك الله فيك..مع السلامه..صكر الحسن وخش للمبنى..
...
منصف: نادم اشد الندم ياعليا كان الندم يقتل ره قتلني ..بنموت من حسرتي كل يوم ياعليا..عارف اني نستاهل ..بس اني مستعد ندفع عمري كله بش نصلح هالغلط..
بحداهم بمسافه مش بعيده واحد مقعمز عاطي بظهره لابس نظرات وطاقيه ويسمع في حديثهم: آاااه ياكلب الزينه ياوسخ..
عليا ابتسمت بتهكم: تدفع عمرك ولا ماتدفعه خلاص كل شي انتهى وانت اللي نهيته بإيدك..خذلتي وبعتني ..وفي الوقت اللي كنت فيه بأمس الحاجه ليك تخليت عني..معاش عندي فيك ثقه خلاص..
منصف: عليا انتي تتحملي نص الغلط كم مرة قتلك معاش تعدلي عليه خوك القذر هذاكا لكن انتي ماتسمعيش في الكلام..
...
منذر " قذر!!اخر واحد مفروض ينعتني بهالصفه انت ياخامر"
...
عليا : مش مبرر بكل..خوي حقير نعترف وهو سبب في كل شي صار لي لتوا اني وعيلتي..
...
منذر"حقير..من يوم يومك شلولح ولسانك 7ميترو"
...
عليا: انت اكثر شخص عرفني واول من تخلا عني ..في الوقت المفروض فيه انت اللي مفروض تسندني وتوقف معاي.لكن الغريب دارها..اللي موقف واحد شافه مني يومها كفيل انه يخليه ياخد قرار الزواج مني متحدي الناس كلها ..اكيد امك وخواتك حكولك كيف جي خطبني وحكولك كيف كانت فضانيتي.. قام قدري وقدر بوي وأهلي قدام الناس في الوقت اللي مفروض انت ياولد عمتي ادير هكي ..يعني بعد هذا كله وأكثر ..تبيني نسيبه ونرجعلك انت..غبيه قالولك ولا تشوف فيا حماره..
...
منذر: عفاااارم عليك يابنت بوك..
....
عليا : برا شوف حياتك خلاص وحولني من راسك ..نصيبنا مش في بعض..
منصف تألم من كلامها وزع نظره ع مكان ووطى راسه لوطا..
عليا في هاللحظه شافت أخر شخص توقعت انها تشوفه..واقف يشبحلها وايديه في جيوبه كان واقف من مسافه..
منصف ركز عليها كيف مصدومه وتلفت ..وارتسمت ع وجهه ملامح ابتسامه نصر مستفزة..
...
منذر اللي كان يراقب في الوضع: اووووبا ..شبح لمنصف كيف مبتسم..آااه ياكلب الزينه ياشيطان....
...
عليا قريب تموت خلاص ..الحسن نزل نظراته اللي كانوا فوق راسه ع عيونه..ولف ومشي..
عليا بصدمه وصوت هامس: الحسن...دفت منصف بقوة ومشت لحقاته تجري...
...يتبع...
