الحسن

الجزء الثامن

#الحسن

#جمان_فريد

الجزء الثامن

أنستوا وشرفتوا..عاودوها
زينب بضحكه: المرة جايه انتم نبوكم تأنسونا
وسيله بإبتسامه: نديروا نهار نجوكم فيه إن شاءالله
زينب : مرحبتين بيكم..
برنيه تشبح لعليا: إن شاء الله اللي حاز هالدرة يكون يستاهلها..
عليا تحشمت..
زينب: يستاهلها إن شاء الله..
طلعوا النساوين...ماشين لسيارة جعفر..اميرة وهي ماشيه قعدت توزع في نظرها ع المكان شافت سرمد والضحكه من الودن للودن
أميره"يارب يشوفني يارب يشوفني يااارب يشوفني" لين وصلت للسيارة وسرمد لاهي بالهدرزة وكيف ركبت وسكرت الباب جت عينه فعينها ابتسم بتفاجئ وهي ابتسمت وتحركت سيارتهم وسرمد معاهم لين اختفت...
***
عبدالقدوس يتفرج ع فيديو بنته لحظه ختمها للقرآن: الحمد لله ...ونزلوا دموعه ...باست ع راسه ابتسام ودموعها تنزل حتى هي..
عبدالقدوس: طلعت 500الف دينار صدقه عني وعنك..
ابتسام تمسح فدموعها: ربي يتقبل يااارب
رن جرس الحوش..
ابتسام: في حد جاييك
عبدالقدوس يمسح في دموعه: تس تس..
شويه وخشت الخدامه وجايبه معاها صندوق...كبير لونه ازرق كحلي مربوط بشريطه حمرا..
عبدالقدوس: شن هذا...
ناضت ابتسام من حدا بوها وقعدت تتفحص في الصندوق حطت صبعها ع ذقنها: ممكن وحده من صاحباتي..
عبدالقدوس: بعتتلك هديه..
ابتسام ابتسمت وقامتها : خل نمشي نشوفها...
عبدالقدوس ناض يضحك: خل مال اني  نمشي نرقد تصبحي ع خير بنتي..
ابتسام : وأنت من أهله بابا...خدت الصندوق وركبت فوق...وصلت في دارها حطت الصندوق وفتحت الباب دخلت الصندوق...وسكرت الباب...
فكت الشريطه وفتحت الصندوق ..لقت عبايه شرعيه لونها موف داكن ولقت معاها شنطه يد عمليه وحلوة تفاجئت هلبه
لقت كرت معلق في الشنطه مكتوب فيه
"هادي فمكان اللي قطعها المسردن"
ابتسام حطت ايدها ع فمها بصدمه بعدين قعدت تضحك ووجهها انحمر..حطت ايدها ع فمها وهي مبتسمه بخجل بعدين مشت بسرعه جهة الروشن لقاته متكي ع سيارته ويشبح لظوافره..قعدت تشبحله وتضحك
ابتسام"صح بارد...لكن يخش الخاطر"وعضت ع شاربها بخجل مع ضحكه...هو قام راسه شافها ارتسمت ع وجهه ابتسامه عريضه..هي طول وخرت وهي تضحك..
بلال حتى هو يضحك وركب سيارته ومشي بعد تأكد ان  الهديه وصلت لصاحبتها..
***
واقفة ع الروشن تشوف في حبيبها اللي مقعمز في سيارته وعيونه تراقب فيها بكل حب..
منصف: مش بإيدي حبيبي هكي الخدمه متاعي..
عليا بزعل: معقوله شهر كامل
منصف: والله يعز عليا ياقلبي..بس انتي مش غابيه في خدمتي ..
عليا تنهدت: ربي يوفقك..اهم شي في عرس مديحه تجي
منصف: اكيد ياقلبي من بداية الأسبوع..
عليا: منصف..
منصف تنهد: روووح منصف..
عليا: حنستاحشك هلبه..
منصف: آااااه ياقلبي مش اكثر مني ياأغلى ماعندي 💓
***
🌿وتعدي الأيام وكل حد مشغول بحاله..
الحسن وقضاياه وملاحقاته لتجار المخدرات وكشف اوكارهم
هالشي منعه من انه يشوف أي حد من اهله في هالفترة وحتى عرس اخته انشغل عنه..
وعليا اللي لاهيه بقرايتها وتجهيزات عرس  أختها ...
أما ابتسام اللي بلال قاعد محاوطها ..قدر يخش قلبها في هالفترة القصيرة لأن أول مرة حد يتجرأ ويقرب منها هكي قبل ماحد يفكر يقرب عليها بسبب بوها واسمه ومنصبه ..
***
اني ياحبيبتي وصيتك ع 20ربطه فطيرة لقيتهم 15 كيف هكي قوليلي!!
هاله بتوسل: والله اول مرة نغلط هالغلط تربحي ياوخيتي سامحيني شكلي لخبطتت بينك وبين زبونه تانيه..
الزبونه: والنبي فكيني من طروح جماعة الفقر اللي يبو يطلعوا القرش بالكذب والأحتيال...والله ماني طالعه من هني قبل يجوني فلوسي..
هاله بألم: باه كم تبي..
الزبونه:50دينار...
هاله هزت راسها بأيجاب ودمعتها في عينها خشت للكوجينه جبدت الفلوس من تحت شنتروا الطاوله وكانوا 50جني ماعندها غيرهم...طلعت ودمعتها في عينها وعطتها الفلوس..
الزبونه: اخر مرة نتعامل مع وحده خنابه زيك ولما نشهدر بيك في الفيس بش معاش تضحكي ع حد يافقريه ..ومشت..
هاله سكرت الباب وبخطوات تقيله خشت للحمام...قعمزت ع حافه البانيو وقعدت تبكي بعبرتها ...تبكي في الحمام بش
بوها مايشوفش دموعها لو روح وسألها علاش تبكي..بكت من القله من الفقر من الذل من الإهانه من الناس اللي ماترحمش ..من زهرة شبابها اللي قاعده تذبل من الحزن والقهرة اللي تكتم فيهم..بكت لين طاب مافي خاطرها...بعدين ناضت توضت وصلت وطرحت صلايتها وشكت لربها لين خداها النوم...
***
وهذا صاحب جديد..
محمد الفهد: هو مش صاحب بس تقدري تقولي معرفة جديده...امي هاتي الريحه ..عطاته أمه الريحه..بخها ع المشط وكمل لأمه مشط شعرها..بعدين بدي يظفر فيه..ويغازل فيها ويناشب فيها ويضحك معاها...بعد كمله..خدي قطنه ومسح وجه أمه بمية الورد وبخلها الريحة متاع الياسمين اللي امه تحبها..دفها بالكرسي المتحرك قدام المرايه..
محمد الفهد: تعرفي اني كان جيت بنتزوج ياوحده حلوة زيك هكي يامش لازم منه بكل الزواج..
نبيه بضحكه: الحلوات في كل مكان واحلى مني انت غير انوى وفرح قلبي..
محمد تنهد: كان نبي حلوة زيك منو بيعطيني...
نبيهه ملامح وجهها تبدلت للحزن: وعلاش وليدي تتكلم هكي .
محمد الفهد: امي لو جيت يوم بنتزوج واختار قلبي وحده مش من لوني نقعد طول عمري متعذب..ياإما مانطولها يانحرمها من أهلها ..
نبيهه دموعها نزلوا...
محمد الفهد: امي اني اسف اسف ياغاليتي ..وقعد يبوس في راسها وايديها...
نبيهه: وليدي خليك واثق من روحك ومادور شي المهم لما تجي تختار وتقرر فكر هلبه وقرر بقلب مطمن...
محمد الفهد ابتسم: إن شاء الله
***
عطيه فرصه باهي..
ابتسام: ع أي أساس..
نرجس: انتي اسمعي منه واعرفي شن يبي..
عليا: عجبك باهي ماخشش راسك فوتي...
ابتسام تشبح لبلال اللي مقعمز بعيد عليها شوي ويشبحلها...
عليا ناضت: هيا نرجوسه تعالي نديروا دورة..
نرجس ناضت : هيا...
قعدت ابتسام بروحها ومتوترة ع الأخر دايرة روحها لاهيه بتليفونها وهي ماتندريش ع روحها ع شن فاتحه أصلا..
"مرزن دمها اللعبه هادي"
ابتسام قربب يغمى عليها مافيش بيناتهم مسافه كبيرة ..في جنبها ..اول مرة يكون قريب هكي..
ابتسام بعصبيه وجهها احمر: زيد غادي..
بلال : هههههههه باه...وبعد شويه...هكي كويس
ابتسام تلفتت لتليفونها...
بلال: ابتسام..
ابتسام شبحتله : من وين عرفت اسمي
بلال: ههههههههههههه تو بالعقل يادكتورة نعرف حوشكم وين مانعرفش اسمك..
ابتسام بحزم: أنت شن تبي مني
بلال بنبرة حنونه: نبيك تكوني في حياتي ..حياتي كلها
ابتسام قلبها بيطلع من صدرها: ششن..قصدك
بلال: نبيك...
ابتسام حمقت وناضت: جو المفرخ هادا ماليش فيه برا دور غيري ..وبسرعة البرق مشت وخلاته..
بلال"ماعطتنيش فرصه حتى نشرح قصدي 😖"
عليا: شن صار..
ابتسام وعيونها معبيات دموع : طلع واحد تافه ...هيا نروحوا ومشت قدامهم وهما لحقوها...
***
ركب السياره جنب السواق وتحركوا..
محمد الفهد: مش حيشكوا في لقاءاتنا المتكررة
الحسن : اني نبيهم ديما يشكوا...مانبيهمش يرتاحوا لابد مايديروا حركه غلط..
محمد الفهد سكت وشبح القدام..
الحسن وهو يسوق لمح اخته جنان ماشيه ع رجليها جي جنبها: جناااان..
جنان شبحت جنبها وتفاجئت
الحسن : اركبي...
جنان كانت متحشمه ع الآخر لما شافت محمد ..وهو تلخبط بالمرة قعد ساكت وعيونه القدام..وبس..
طول الطريق كان الفهد ساكت والحسن كذلك ...بس دقات قلوب محمد وجنان كانت تتكلم..
جنان"قداش جذاب سمارة وعيونه خضر ونظرته حاده اكثر من نظرة خوي الحسن بس فيهاحنيه"
محمد"استغفر الله الراجل مدايرني رفيقه واني نفكر في اخته راك اطيح في المحظور يامحمد"
وصل الحسن جنان ومشي..اما جنان في المرة التانيه اللي تشوف فيها الفهد تحس بشعور حلو بالمرة ماحستش بيه قبل بكل 💓
***
خلاص معاد قعد من العمر اكثر من اللي مشي..
عابد: يطول في عمرك ع طاعته..
يونس: مابنكذب عليك وانت صاحبي..الدكاترة قالولي خلاص معاش فيك امل قلب تحندب ياعابد..
عابد يشبحله: لاحول ولاقوة إلا بالله..
يونس: والله ياعابد مافارقه معاي عشت حياتي وراضي بيها...بس بنتي لو صار فيا شي لمن بنخليها شنو بيصير فيها
عابد: واني شن قاعد ندير..
يونس : بارك الله فيك..لكن انبي نبي نطمن عليها ياعابد ..
عابد حط ايده ع إيد صاحبه: فاهم عليك تنو نتصرف يارفيقي...
يونس ابتسم بألم ...
***
هي قريب توصل للحوش وهو وقف قدامها
ابتسام بعصبيه: والله العظيم كان مااختفيت من قدامي اناديهم يعطوك طريحة نباش القبور.."قصدها الحرس"
بلال ببرود: ناديهم مش متحرك قبل تسمعيني وتفهمي
ابتسام : مانبيش نسمع ..
بلال بإصرار: لا حتسمعي...
ابتسام: من الأخير اني فهماتك ونوعيتك توا بس عرفتها تبي توصل في بوي عن طريقي..لكن اني فايقتلك كويس وتوا حول من قدامي خيرلك..
بلال بغضب ومضيق عيونه: من هو بوك بش نحاول نوصله ؟!!بوك معروف واللي ينقال عليه مش خافي عنك..واني راجل ناكل في لقمتي بالحلال..
ابتسام بغضب: بوي اشرف منكم كلكم الناس اللي ينافس فيهم حاقدين عليه ومطلعين عليه هالإفتراءات بش يخلوا الناس تكرهه...
بلال ضحك بتهكم: طبيعي بوك بدافعي عليه..برغم اني توقعت العكس وحده حامله كتاب الله مفروض تكون مع الحق حتى لو كان ضد بوها...لكن شكلك حتى اني تكملي في برستيج بوك قدام الناس...
ابتسام ردت فعلها الوحيده كانت صفعة قويه ع وجهه ودموعها مباشرة نزلت دفاته ومشت تجري للحوش وهي تبكي..
اما بلال ماوجعاش الكف اللي كلاه..وجعه قلبه لما شاف دموعها وإن هو من بكاها ..لف ومشي وهو كاره روحه ع اللي قاله ..رن تليفونه شاف المتصل زاد عصب بس رد..
بلال: نعم يافندي..
الحسن : قداش ليا عليك قلت خل نسأل...
بلال: كل شي ماشي زي ماتبي بس الحكايه تبي وقت..
الحسن : علاش ضرباتك..
بلال انصدم وقعد يدور بعيونه في المكان مالقي حد..رد التليفون..
بلال بتهكم: عركه بسيطه ياما يصير بين اي اتنين يحبوا بعض مش مجرب يافندي
الحسن: حد قايلك قبل ان دمك ثقيل..
بلال بضحكه: هلبه
الحسن : المهم امشي في الموضوع زي ماوريتك ..بلال بتتصرف من راسك حتندم ..
بلال بملل: مش حنتصرف من راسي اطمن يافندي..هو أنا ائدر...طوط طوط طوط...
بلال: سكر في وجهي كالعاده ...ايييه ..ع راسنا الحكومه...
***
عدوا اسبوعين 📅 والتجهيزات ع قدم وساق في حوش عابد الصادق..لعرس سارة...اليوم يوم الحمام وكانت سارة ماشيه مع خواتهالمركز كبير خاص فيه حمام بخاري ...رافعه معاها سبات البدله البودريه..خشوا للمركز....
البنات: السلام عليكم..
المسؤوله عن المركز: وعليكم السلام اهلا وسهلا...تفضلوا قعمزوا البنات..
جنان: الباين عليه حاجه صح..
سارة: صاحبتي قالتلي عليه..
خوله : خير من عفن الحمامات العامه اللي الدنيا فيها مخلطه ع بعضها....
المسؤوله : هيا ياأبله ...
ناضت سارة وحولت عبايتها وخشت...
شويه وفزبونات تانيات خشوا للمركز..
جنان : حي عليا وخواتها!!
خوله: ايه ...عرس أختها نفس الأسبوع قالتها قبل...
جوا بيقعمزوا تفاجئوا لما شافوهم ...سلموا ع بعض...
عليا: سارة داخل..
جنان: ايه توا كيف خشت..
مديحه : كويس ع الأقل نعرف منها شنو الجو داخل ..
...ومشت أجواء حلوة هدرزة وجو لين طلعت ساره ودارولها اللازم..وبعدها خشت مديحه..
لبسوا سارة البودري وخدت سلفيات هي وخواتها..وقعمزوا يستنوا في حسان يروح بيهم..طلعت مديحه ودارولها اللازم حتى هي ..كملت ولبسوها البودري وزغرطوا عليها وغنولها...وصوروا مديحه وسارة مع بعض بعدين كلهم خدوا سلفي ..وكانت الأجواء حلوة بالمرة🌹
جنان: هيا حسان لوطا...
ناضوا سارة وخوله...
ع جية وحده من المسؤولات :من منكم عيلة الحافظ
عليا : حني..
البنت: خوكم يستنى لوطا..
عليا بإستغراب: تو كيف صكرت من مصعب وقالي ف الطريق..
خوله : بالك قريب من هني..
عليا مطت شواربها : ممكن...
نزلوا كلهم مع بعضهم مجرد وصلوا لوطا..سارة وخواتها لقوا حسان يستنى..بينما مديحه وخواتها مالقوش مصعب..
فجأة...
يسمعوا في صوت مزمار يعزف وتبعاته ضربات طبل ودربوكه...ايه نوبه..كانت الفرقه جايه من المسافه..الكل يتفرجوا ومستغربين..
حسان في السيارة مع خواته: شكلها العروسه التانيه بيروحوا بيها بالنوبه..
سارة: خوها دارها مفاجأة سعد الناس 😒
حسان:😑
البرا...
كانت الفرقه تقدم وكانت مديحه وخواتها فرحنات ظنا منهم ان مصعب جايبها..بس ملامح فرحتهم بدت تتلاشى بمجرد مابدت تبان ملامح الشخص اللي شاد الطبل ويضرب عليه..
مديحه قعدت ترعش مع بعضها..وعليا تشبح بكره..وأميرة مصدومه وخلاص...
مديحه تشبحله وهو يضرب ع الطبل ويشبحلها ويغني مع الفرقه"صلي يامصلي ع الزين...حويته وخميسه وقرين"
مديحه وهي تشبحله رجعت بيها الذاكرة لسنين طويله فاتت. ايام الطفوله والبراءة ايام كانت القلوب بيضا والنوايا اصفى من المرايا...
فلاش باك...
يتفرجوا بحماس وشغف من فوق السطح ع النوبه اللي جايبها جارهم في عرس بنته..
مديحه:جوووو..
منذر: ايه شوفي كيف يضرب في الطبل ويرقص..
مديحه: هذا خوها..
مندر شبحلها: خو العروسه؟!
مديحه هزت راسها بإيجاب: ايه..
مديحه رجعت تتفرج ومنذر كذلك لين شافوا وحده لابسه بودري طالعه ترقص جنب اللي يضرب ع الطبله...
مديحه بإنبهار: هادي العروسه..سعدودها..
منذر شبحلها: حتى انتي لما تولي عروسه هكي نديرلك
مديحه : لكن لازم يكون عندك فلوس بش تجيب زيهم
منذر : تو نكبر ونخدم ويولي عندي فلوس ونجيبهم ..واني نضرب ع الطبله وانتي ترقصي حداي..
شبحوا لبعضهم بعدين ضحكوا ورجعوا يتفرجوا من جديد..
الوقت الحاضر..
منذر كان يقدم بالطبله ويضرب عليها وعيونه في اخته اللي كانت تشبحله وعيونها معبيات دموع...
عليا: شن يبي هذا شن يبي..
اميرة: يااارب استرها...
فهاللحظه نزلت مديحه من بحداهم وقدمت لخوها ..واميرة وعليا مصدومات...ومنذر يشبحلها ويقوي في الضرب ع الطبله ويغني...لين وصلت فيه..حاطه طرف الردي البودري ع راسها ومغطيه  وجهها بصوابعها..بدت ترقص ..ومنذر قدملها ويضرب ع الطبله ويغني...
واميره وعليا جامدات من الصدمه ولا حركه...
وحسان قاعد مع خواته في السيارة ويتفرجوا...
جت مديحه جنبه وترقص وهو جنبها يضرب بقوة ويغني...
دموع مديحه نزلت وهو شاف دموعها وبدت دموعه حتى هو تنزل...
يضرب ويغني...وهي ترقص...ودموعهم مابطلتش نزول...
لين جي مصعب اللي انصدم من اللي شافه نزل من السيارة طول...
مصعب بعصبيه: هيا مديحه..
شبحله ومنذر ووقف ابتسم ووخر هو والفرقه..مديحه شبحتله بنظرة أسف ومشت هي وخواتها ركبوا السيارة وتحركوا...
حسان: شن اللي صار توا..
جنان: حد فهم حاجه...
خوله: في شي غريب من هو اللي كانت مديحه ترقص معاه كان خوها اللي جي توا روح بيهم..
سارة: مرات خطيبها..
حسان : مصح وجهه..كاني في مكان خوها نخرب ع فية امه
خوله: واحني شن دخلنا...هيا بسرعه خل نروحوا من بكري يتصلوا ...
حسان ولع أغنيه وعلا الصوت : هيا سكروا الرواشن واقلبوها..
سارة: ع اساس بترقع الحكايه 😒
ضحكوا كلهم وتحرك بسيارته والبنات يغنوا ويصفقوا ويهيجوا...
في سيارة مصعب..
معصب بعصبيه: كيف ديري هكي يامديحه كككيف وقعد يخبط ع الستيرسو..
عليا : خلاص يامصعب اختك عروسه ماتغششهاش معقوله بتخش ع الناس وهي باكيه هكي...
مصعب استغفر وسكت وعليا واميرة يحاولوا يهدوا أختهم ويغيروا جوها...
***
متوجه لمكتب رئيسه طق الباب وخش ادى التحيه
جاد الله: سمعت ان عرس اختك سبوع هذا..
الحسن هز راسه بإيجاب..
جادالله بإبتسامه: حنعطيك اجازة باقي الأسبوع بش تحضر عرسها..
الحسن: مش مهم يافندي ..في امور اولى ...
جاد الله : مافيش اولى من العيله..
الحسن: البلاد اولى من كل شي..
جاد الله : مش حيصيرلها شي لوغبت كم يوم..
الحسن تنهد: يافندي حني بلادنا متأخرة عقود وعقود ...وبش تواكب الوقت اللي هي فيه لازم مانضيعوش  ثانيه وحده إلا وحني نخدموا عليها..اي بلاد مستحيل تقوملها قائمه بدون استبباب الأمن والإستقرار..لذلك لو وقفنا ولو شويه فرصتنا في ان هالبلاد تعمار حتضعف وحنتأخروا اكثر وأكثر..
جاد الله بضحكه: افحمتني..
الحسن :ع العموم نشكرك اللي فكرت فيا من هالناحيه..
جاد الله هز راسه بإيجاب وهو مبتسم: تقدر تولي لخدمتك..
أدى الحسن التحيه وطلع..
جاد الله "ياريت في منك هلبه في كل مكان من هالبلاد..لكن مش حيخلوكم في حالكم "تنهد ورجع يشوف في الملفات اللي قدامه...
***
شن جابه الزفت هذا..
منصف واقف ع عليا في الجنان الخلفي...
عليا: ربي يستر ويكون هذا حد اللي بيديره...
منصف : مصيبه هالمخلوق مصيبه..
عليا: منصف انت تخوف فيا بزياده..
منصف حاول يهدي: ماتخافيش حبيبتي خلاص..غير انتي عارفه خوك هذا قداش ينرفز فيا..
عليا بقلق: مش حيصير شي ولا؟!
منصف ابتسم بش يطمنها: اطمني ياعمري مش حيصير شي..
عليا : يااارب..خلاص اني بنخش أكيد فقدوني..
منصف : امتى تفوت هالسنه ونص بس ونعيشوا هالفرحه..
عليا ابتسمت : حيفوتوا اصبر بس..ومشت وهي تضحك..
منصف بصوت عالي: واني ليا غير الصبر..
عليا تلفتت وضحكت وكملت طريقها داخل...
***
مقعمز بروحه ويبكي...
منذر: كله منه...هو السبب...كان هادا راني جنبهم فرحان من فرحتهم...لكن هو حرمني من كل شي خلاني بروحي هو خلاني بروحي...هو وعليا ...عليا اللي لو ماكانتش سكرت الباب وقتها كان ممكن هربت...كان ممكن تعالجت كان ممكن تبت...وبنظرة غل وهو يمسح في دموعه...لكن والله لما تتحاسبي انتي وبوك ياعليا وحسابكم حيكون عسيير...

...يتبع...