#الحسن
الحلقة 23
#جمان_فريد
GomanFared
ﻛﺎﻧﺖ ﺍﺟﻮﺍﺀ ﺍﻟﻠﻤﻪ ﺣﻠﻮﺓ ﺍﻟﻤﻮﺟﻮﺩﻳﻦ ﻋﺠﺒﻮﻫﻢ ﻛﻨﺎﻳﻦ ﻋﻴﺖ ﺍﻟﺼﺎﺩﻕ ﺍﻟﺠﺪﺩ ﻛﻴﻒ ﺣﻠﻮﺍﺕ ﻭﻧﺎﺯﻛﺎﺕ .. ﻭﺑﺮﻧﻴﻪ ﺷﺎﻓﺖ ﺭﻭﺣﻬﺎ ﺑﻴﻬﻢ .. ﺍﻟﻨﺎﺱ ﺗﺮﻛﻴﺰﻫﻢ ﺃﻛﺜﺮ ﻉ ﻋﻠﻴﺎ ﺇﻟﻰ ﺟﺎﻧﺐ ﺟﻤﺎﻟﻬﺎ ﺍﻧﻬﺎ ﻣﺮﺕ ﺍﻷﻓﻨﺪﻱ ﺍﻟﺤﺴﻦ ﺍﻷﺷﻬﺮ ﻣﻦ ﺍﻟﻨﺎﺭ ﻉ ﻋﻠﻢ ...
ﺟﻲ ﻭﻗﺖ ﺍﻟﻤﺮﻭﺍﺡ ﻭﺭﻭﺣﻮﺍ ... ﻭﺻﻠﻮﺍ ﻣﻊ ﺑﻌﺾ ..
ﺍﻟﺤﺴﻦ ﻛﻴﻒ ﺩﺭﺱ ﺭﻥ ﺗﻠﻴﻔﻮﻧﻪ ... ﺭﺩ ..
ﺍﻟﺤﺴﻦ : ﻧﻌﻢ ...... ﺍﻣﻤﻤﻤﻢ ... ﺗﻤﺎﻡ ... ﻣﺴﺎﻓﺔ ﺍﻟﻄﺮﻳﻖ .. ﻭﺻﻜﺮ ..
ﺑﺮﻧﻴﻪ : ﺷﻨﻮ ﻓﻲ ﻭﻟﻴﺪﻱ ..
ﻋﻠﻴﺎ ﻣﺮﻛﺰﺓ ﻣﻌﺎﻫﻢ ..
ﺍﻟﺤﺴﻦ : ﻫﻴﺎ ﺍﻧﺰﻟﻮﺍ ﻳﺎﺣﻨﺎﻱ ﻋﻨﺪﻱ ﺧﺪﻣﻪ ..
ﺑﺮﻧﻴﻪ : ﺧﺪﻣﻪ ﺍﻟﻬﺪﻭﺩ ﻭﺍﻷﻳﺎﻡ ﺍﻟﺴﻮﺩ ..
ﺍﻟﺤﺴﻦ ﺍﺑﺘﺴﻢ ﻧﺺ ﺍﺑﺘﺴﺎﻣﻪ ﻭﻣﺎﺑﺎﺵ ﻳﻌﻠﻖ ..
ﻧﺰﻟﻮﺍ ﻋﻠﻴﺎ ﻭﺑﺮﻧﻴﻪ .. ﻭﻣﺸﻲ ﺍﻟﺤﺴﻦ ﻃﻮﻝ ...
ﻋﻠﻴﺎ ﻛﺎﻧﺖ ﺧﺎﻳﻔﻪ ﺣﺴﺖ ﺑﺨﻮﻑ ﻋﻠﻴﻪ .. ﺭﻛﺒﺖ ﻭﻫﻲ ﻣﺸﻐﻮﻟﻪ ﻋﻠﻴﻪ ..
ﺍﻣﺎ ﻋﻨﺪ ﻫﺎﻟﻪ ﻭﺣﺴﺎﻥ ...
ﺧﺸﺖ ﺳﻜﺮﺕ ﻉ ﺭﻭﺣﻬﺎ ﺍﻟﺪﺍﺭ ... ﻓﺘﺤﻬﺎ ﻭﺧﺶ ..
ﻫﺎﻟﻪ : ﻫﻴﻴﻴﻴﻴﻴﻪ ﺍﻧﺖ ﻭﻳﻦ ﻣﺎﺷﻲ ..
ﺣﺴﺎﻥ : ﻫﻬﻬﻊ ﺣﻠﻮﺓ ﺣﺘﻰ ﻫﺎﺩﻱ ... ﺣﻮﺷﻲ ﻧﺨﺶ ﻭﻳﻦ ﻣﺎﻧﺒﻲ ..
ﻫﺎﻟﻪ : ﺍﻣﺸﻲ ﺍﻃﻠﻊ ﻭﺍﺭﻗﺪ ﻓﻲ ﺩﺍﺭﻙ ... ﻹﻧﻚ ﺗﺨﺎﻑ ﻣﻦ ﺍﻷﺷﺒﺎﺡ ..
ﺣﺴﺎﻥ ﺿﺤﻚ ﻭﻗﺪﻡ : ﻳﺎﺭﻳﺖ ﻛﻞ ﺍﻷﺷﺒﺎﺡ ﺯﻱ ﺍﻟﻠﻲ ﻗﺪﺍﻣﻲ ..
ﻫﺎﻟﻪ ﺗﻠﺨﺒﻄﺘﺖ ﺑﺲ ﺗﻤﺎﺳﻜﺖ : ﺗﺮﺍ ﺍﻃﻠﻊ ﺍﻃﻠﻊ ..
ﺣﺴﺎﻥ : ﻣﺸﺸﺸﺶ ﻃﺎﺍﺍﺍﺍﻟﻊ ..
ﻫﺎﻟﻪ ﺷﺒﺤﺘﻠﻪ ﻭﺑﺤﺪﻩ : ﺍﻗﻌﺪ ﻣﺎﺗﻄﻠﻌﺶ .. ﻓﺘﺤﺘﺖ ﺍﻟﺪﻭﻻﺏ ﺧﺪﺕ ﺣﻮﺍﻳﺠﻬﺎ ﻭﺑﺘﻄﻠﻊ .. ﺟﺒﺪﻫﺎ ﻣﻦ ﺫﺭﺍﻋﻬﺎ ﻭﻟﻔﻬﺎ ﻟﻴﻪ ...
ﻫﺎﻟﻪ : ﺣﻮﻭﻭﻝ ..
ﺣﺴﺎﻥ ﺑﺈﺑﺘﺴﺎﻣﻪ ﻣﺎﻛﺮﻩ : ﻻﺍﺍﺍ ...
ﻫﺎﻟﻪ ﺭﻛﺰﺕ ﻉ ﻧﻈﺮﺍﺗﻪ ﻟﻨﻔﺲ ﺍﻟﻤﻜﺎﻥ ﻓﻲ ﻭﺟﻬﻬﺎ : ﻣﺎﺗﻔﻜﺮﺵ ...
ﺣﺴﺎﻥ ﻭﻫﻮ ﻫﺎﻳﻢ ﻓﻴﻬﺎ : ﻓﺸﻨﻮ ....
ﻫﺎﻟﻪ : ﻣﺎﺗﻘﺮﺑﺶ ..
ﺣﺴﺎﻥ ﻗﺮﺏ ﺃﻛﺜﺮ : ﻭﻟﻮ ﻗﺮﺑﺖ ..
ﻫﺎﻟﻪ ﺑﺪﺕ ﺗﻨﺨﻨﻖ ﻣﻨﻪ : ﺣﻮﻭﻭﻭﻭﻝ ..
ﺣﺴﺎﻥ ﻗﺮﺏ ﺑﺰﻳﺎﺩﻩ ..
ﻫﺎﻟﻪ ﻣﺶ ﻗﺎﺩﺭﻩ ﺗﺘﺤﻤﻞ : ﺣﻮﻝ ﻳﺎﻧﺠﺲ ..
ﺣﺴﺎﻥ ﻛﺈﻧﻬﺎ ﻋﻄﺎﺗﻪ ﻛﻒ .. ﻭﺧﺮ ﻋﻨﻬﺎ ﺑﺎﻟﺸﻮﻳﻪ ﻭﻃﻠﻘﻬﺎ ...
ﺣﺴﺎﻥ : ﻋﻨﺪﻙ ﺣﻖ ﻧﺠﺲ ﺍﻧﺘﻲ ﺣﺮﺍﻡ ﻓﻴﺎ .. ﻭﻃﻠﻊ ﻣﻦ ﺑﺤﺪﺍﻫﺎ ﻭﻃﻠﻊ ﻣﻦ ﺍﻟﺸﻘﻪ ﺑﻜﻞ ...
ﻫﺎﻟﻪ ﺗﻨﻬﺪﺕ ﺑﺄﺭﺗﻴﺎﺡ ﻭﺧﺪﺕ ﺣﻮﺍﻳﺠﻬﺎ ﻭﺧﺸﺖ ﺩﻭﺷﺖ ..
ﺃﻣﺎ ﻫﻮ ﻧﺰﻝ ﺑﺴﺮﻋﻪ ﻭﻫﻮ ﻛﺎﺭﻩ ﺭﻭﺣﻪ ﻉ ﺍﻵﺧﺮ ﻷﻭﻝ ﻣﺮﺓ ﻳﻨﺪﻡ ﻉ ﻛﻞ ﺷﻲ ﻋﺎﺷﻪ ﻗﺒﻞ ﻟﻴﻌﺮﻓﻬﺎ ... ﺗﻤﻨﻰ ﻟﻮ ﻋﺮﻓﻬﺎ ﻣﻦ ﺯﻣﺎﻥ ﻗﺒﻞ ﻣﺎﻳﻤﺸﻲ ﻓﻲ ﻃﺮﻳﻖ ﺍﻟﻐﻠﻂ ...
***
ﺧﺶ ﻟﻠﻤﺮﻛﺰ ﻭﺻﻞ ﻟﻤﻜﺘﺒﻪ ﻟﻘﻲ ﻫﻼﻝ ﻳﺴﺘﻨﻰ ﻓﻴﻪ ..
ﻫﻼﻝ : ﻳﺎﻣﺮﺣﺒﺎ ﺑﺎﻷﺥ ﺍﻟﻌﻘﻴﺪ ..
ﺍﻟﺤﺴﻦ ﺳﻠﻢ ﻋﻠﻴﻪ : ﻛﻴﻒ ﺣﺎﻟﻚ ﻫﻼﻝ ..
ﻫﻼﻝ : ﺍﻟﺤﻤﺪ ﻟﻠﻪ ..
ﻗﻌﻤﺰ ﺍﻟﺤﺴﻦ ﻭﻣﻘﺎﺑﻠﻪ ﻫﻼﻝ ...
ﺍﻟﺤﺴﻦ : ﺷﻦ ﻓﻲ ...
ﻫﻼﻝ : ﺷﻦ ﺭﺍﻳﻚ ﻧﻄﻠﻌﻮﺍ ﻣﻦ ﻫﻨﺎ ﻭﻧﺤﻜﻮﺍ ﻓﻲ ﻣﻜﺎﻥ ﺍﺷﺮﺡ ..
ﺍﻟﺤﺴﻦ ﻓﻬﻢ ﻗﺼﺪﻩ ﻭﻧﺎﺿﻮﺍ ﻃﻠﻌﻮﺍ ﻫﻤﺎ ﺍﻟﺰﻭﺯ ..
***
ﺍﻟﺤﻤﻮﻟﻪ ﺍﻟﺠﺎﻳﻪ ﺧﻄﻴﺮﻩ ﻫﻠﺒﻪ ﻳﺎﺗﻤﺴﺎﺡ ..
ﺍﻟﺘﻤﺴﺎﺡ : ﺍﻟﻤﻴﻨﺎﺀ ﺑﻜﺒﺮﻩ ﻳﺎﺭﺍﺟﻞ ...
ﻣﻨﺬﺭ : ﻣﺶ ﺑﺮﻭﺣﻨﺎ ﻣﻌﺎﻧﺎ ﺟﻤﺎﻋﻪ ﻣﻦ ﻏﺎﺩﻱ ..
ﺍﻟﺘﻤﺴﺎﺡ : ﺍﻟﻜﻮﺑﺮﺍ ﺷﻜﻠﻪ ﺣﻴﺎﺧﺪ ﻓﻲ ﻣﻜﺎﻥ ﺍﻟﻜﻮﻣﺎﻧﺪﺍ ..
ﻣﻨﺬﺭ : ﻫﺎﺩﻱ ﺍﻟﻠﻲ ﺟﺎﻳﻪ ...
....
ﻣﻘﻌﻤﺰﻳﻦ ﻉ ﺍﻟﺒﺤﺮ ...
ﻫﻼﻝ : ﻫﺎﻟﻌﻤﻠﻴﻪ ﺍﺧﺮ ﺷﻲ ﻛﻨﺖ ﺣﺎﺿﺮ ﻣﻌﺎﻫﻢ ﻓﻴﻪ ﻟﻤﺎ ﺧﻄﻄﻮﻟﻬﺎ ..
ﺍﻟﺤﺴﻦ : ﺗﻌﺮﻑ ﻳﺎﻫﻼﻝ ﺷﻦ ﻣﻀﻴﻌﻨﺎ .. ﺍﻥ ﺍﻟﻠﻲ ﺍﻟﻠﻲ ﻳﻨﺤﻂ ﻓﻲ ﻣﻜﺎﻥ ﻣﺴﺆﻭﻟﻴﻪ ﻻﺯﻡ ﻳﺨﻮﻧﻬﺎ ﺑﺶ ﻳﺨﺪﻡ ﻣﺼﺎﻟﺤﻪ ..
ﻫﻼﻝ : ﺻﺪﻗﺖ .. ﺍﻟﻌﻤﻠﻴﻪ ﺍﻟﺠﺎﻳﻪ ﻛﺒﻴﺮﻩ ﻭﺍﺟﺪ ..
ﺍﻟﺤﺴﻦ : ﺗﻮ ﻧﺸﻮﻑ ...
***
ﻓﺎﺕ ﻛﻢ ﻳﻮﻡ ﻭﺍﻟﺤﺴﻦ ﻣﺎﺭﻭﺣﺶ ﺑﻜﻞ .. ﻛﺎﻥ ﻳﺘﺼﻞ ﺑﺴﺮﻣﺪ ﻭﺣﻨﺎﻩ ﻭﻳﻄﻤﻨﻬﻢ ... ﻛﺎﻥ ﻳﺨﻄﻂ ﻫﻮ ﻭﻓﺮﻳﻘﻪ ﻟﻠﻌﻤﻠﻴﻪ ...
ﻋﻠﻴﺎ ﻛﺎﻧﺖ ﻣﺸﻐﻮﻟﻪ ﻋﻠﻴﻪ ﻫﻠﺒﻪ ﻭﻗﻠﺒﻬﺎ ﺑﺪﻱ ﻳﺎﻛﻞ ﻓﻴﻬﺎ ﻋﻠﻴﻪ ...
ﺍﺑﺘﺴﺎﻡ : ﺧﺪﻣﺘﻪ ﻫﻮ ﻫﻜﻲ ﻣﺘﻌﻮﺩ
ﻋﻠﻴﺎ ﺗﻨﻬﺪﺕ ﻭﺳﻜﺘﺖ ..
ﻧﺮﺟﺲ : ﻟﻠﻮﺷﻪ ﺍﻧﺘﻲ ﺑﺪﻳﺘﻲ ﺗﺤﺒﻴﻪ ..
ﻋﻠﻴﺎ ﺷﺒﺤﺘﻠﻬﺎ : ﻻ ... ﻗﻠﺒﻲ ﻣﺶ ﺟﺎﻫﺰ ﻟﻠﺤﺐ ﺑﺘﺎﺗﺎ ﺑﺲ ﺣﺎﺳﻪ ﺭﻭﺣﻲ ﺗﻌﻮﺩﺕ ﻉ ﻭﺟﻮﺩﻩ ..
ﺍﺑﺘﺴﺎﻡ : ﻫﻴﺎ ﻫﻜﻲ ﺍﻟﺒﺪﺍﻳﻪ ﺗﻌﻮﺩ ...
ﻋﻠﻴﺎ : ﻻﺑﺪﺍﻳﻪ ﻭﻻﻧﻬﺎﻳﻪ ...
ﻧﺮﺟﺲ : ﺭﺍﻙ ﺗﻘﻮﻟﻴﻠﻲ ﻣﺎﺯﻟﺘﻲ ﺗﺤﺒﻲ ﻫﺬﺍﻛﺎ ..
ﻋﻠﻴﺎ ﻗﻌﺪﺕ ﺳﺎﻛﺘﻪ
ﺍﺑﺘﺴﺎﻡ : ﺣﻤﺎﺭﺓ ﻳﺎﺻﺎﺣﺒﺘﻲ ..
ﻋﻠﻴﺎ ﺑﺤﺰﻥ : ﻣﺶ ﻗﺎﺩﺭﻩ ﻧﻨﺴﺎﻩ ﻭﻧﻨﺴﻰ ﺍﻳﺎﻣﻲ ﻣﻌﺎﻩ ...
ﺍﺑﺘﺴﺎﻡ : ﻭﺍﻟﻠﻪ ﻟﻮ ﻣﻨﻚ ﻟﻤﺎ ﺭﺧﻲ ﺑﻴﺎ ﻭﺳﻴﺒﻨﻲ ﻓﻲ ﺃﻛﺜﺮ ﻭﻗﺖ ﻛﻨﺖ ﻣﺤﺘﺎﺟﺘﻠﻪ ﻓﻴﻪ ﻻ ﻭﻛﺎﻥ ﻫﻮ ﻭﺍﻟﻨﺎﺱ ﻋﻠﻴﺎ ﻭﺯﺍﺩﻧﻲ ﻉ ﻣﺎﺑﻴﺎ .. ﻭﺍﻟﻠﻪ ﻣﻌﺎﺩ ﻳﻘﻌﺪﻟﻪ ﻓﻲ ﻗﻠﺒﻲ ﺫﺭﺓ ﻣﺸﺎﻋﺮ
ﻧﺮﺟﺲ : ﺍﻟﺮﺟﻮﻟﻪ ﺍﻓﻌﺎﻝ ﻭﺍﻟﺤﺐ ﺍﻓﻌﺎﻝ .. ﻭﺍﻧﻲ ﺷﺎﻳﻔﻪ ﺍﻟﺮﺟﻮﻟﻪ ﻓﻲ ﺍﻟﺤﺴﻦ ﻣﺶ ﻓﻤﻨﺼﻒ ...
ﻋﻠﻴﺎ : ﺍﻧﻲ ﻗﻠﺘﻠﻜﻢ ﻫﻮ ﻋﻼﺵ ﺗﺰﻭﺟﻨﻲ ..
ﺍﺑﺘﺴﺎﻡ : ﺍﻧﺘﻲ ﻋﺒﻴﻄﻪ ﻫﻠﺒﻪ ﻳﺎﺻﺎﺣﺒﺘﻲ .. ﺍﻟﺤﺴﻦ ﺑﻴﻚ ﻭﻻﺑﻼﻙ ﺣﻴﺠﻴﺐ ﺧﻮﻙ ﺣﻴﺠﻴﺒﻪ .. ﺑﺎﻟﻤﻨﻄﻖ ﻓﻜﺮﻱ ﻓﻴﻬﺎ .. ﻣﻨﺬﺭ ﺑﻌﺪ ﻋﺮﻑ ﺍﻧﻚ ﺗﺰﻭﺟﺘﻲ ﺍﻟﺤﺴﻦ ﻣﺎﺯﺍﻝ ﻳﺠﻲ ﺟﻴﻬﺘﻚ ﻫﻮ ..
ﻧﺮﺟﺲ : ﺍﻟﺤﺴﻦ ﻓﻲ ﻣﻮﻗﻒ ﻭﺍﺣﺪ ﺷﺎﻓﻪ ﻋﺮﻑ ﺍﺧﻼﻗﻚ ﻭﺗﺮﺑﻴﺘﻚ ﻣﺎﺗﺮﺩﺩﺵ ﻳﺨﻄﺒﻚ .. ﻣﺶ ﺑﺲ ﻷﻧﻪ ﻳﺒﻲ ﻳﺮﻳﺢ ﺿﻤﻴﺮﻩ ﺟﻴﻬﺘﻚ ﻷﻧﻪ ﺷﺎﻫﺪ ﻉ ﺍﻟﻠﻲ ﺻﺎﺭ .. ﻷﻧﻪ ﻓﻌﻼ ﺣﺲ ﺍﻧﻚ ﺗﻨﺎﺳﺒﻴﻪ ﻳﺎﻋﻠﻴﺎ ...
ﻋﻠﻴﺎ ﻗﻌﺪﺕ ﺗﻔﻜﺮ ﻓﻲ ﻛﻼﻣﻬﻢ ﻫﻠﺒﻪ ﺑﻌﺪﻳﻦ ﻗﺎﻟﺖ : ﺳﻴﺎﻥ ﻋﻨﺪﻱ .. ﻣﻌﺎﺵ ﻳﻬﻤﻨﻲ ﺷﻲ ﻏﻴﺮ ﺍﻧﻲ ﻧﻜﻤﻞ ﻗﺮﺍﻳﺘﻲ ﻭﻧﺤﻘﻖ ﺣﻠﻤﻲ ﻭﺑﺲ ...
***
ﻃﻖ ﺑﺎﺏ ﺍﻟﺤﻮﺵ .. ﻓﺘﺤﺖ ﻭﺳﻴﻠﻪ .. ﻛﺎﻥ ﻓﻲ ﺭﺍﺟﻞ ﺟﺎﺑﻠﻬﺎ ﻭﺭﻗﻪ ﻭﻣﻌﺎﻫﺎ ﻇﺮﻑ .. ﺧﺸﺖ ﻭﻟﻘﺖ ﻣﻜﺘﻮﺏ ﻋﻠﻴﻬﻢ ﺇﻟﻰ ﺧﻮﻟﻪ ﺍﻟﺼﺎﺩﻕ ..
ﻭﺳﻴﻠﻪ : ﺧﻮﻟﻪ ... ﻳﺎﺧﻮﻟﻪ ...
ﺟﺖ ﺧﻮﻟﻪ : ﻧﻌﻢ ﻣﺎﻣﺎ ..
ﻭﺳﻴﻠﻪ ﻣﺪﺗﻠﻬﺎ ﺍﻟﻮﺭﻗﺔ ﻭﺍﻟﻈﺮﻑ ﻗﺮﺕ ﺍﻟﻮﺭﻗﻪ ﺍﺭﺗﺴﻤﺖ ﻉ ﻭﺟﻬﻬﺎ ﻣﻼﻣﺢ ﺍﻟﺪﻫﺸﻪ ..
ﻭﺳﻴﻠﻪ : ﺷﻦ ﻓﻲ ..
ﺧﻮﻟﻪ ﺑﺪﻫﺸﻪ : ﻣﺎﻣﺎ ﻫﺎﺩﻱ ﻭﺭﻗﺔ ﻃﻼﻗﻲ ..
ﻭﺳﻴﻠﻪ ﺑﺼﺪﻣﻪ : ﺷﻨﻮﻭﻭﻭ ...
ﻓﺘﺤﺖ ﺧﻮﻟﻪ ﺍﻟﻈﺮﻑ ﻭﺷﺎﻓﺖ ﺍﻟﻔﻠﻮﺱ : ﻣﺎﻣﺎ ... ﻫﺬﺍ ﺍﻟﻤﺆﺧﺮ ..
ﻭﺳﻴﻠﻪ : ﻛﻴﻴﻴﻴﻒ ﻛﻴﻒ ﺻﺎﺭ ﻫﻜﻲ ..
ﺧﻮﻟﻪ ﻣﺼﺪﻭﻣﻪ ﻉ ﻓﺮﺣﺎﻧﻪ : ﻣﺶ ﻋﺎﺭﻓﻪ .. ﺧﻞ ﻧﺘﺼﻞ ﺑﺎﻟﺤﺴﻦ ..
ﺍﺗﺼﻠﺖ ﺧﻮﻟﻪ ﺑﺎﻟﺤﺴﻦ ﻭﺑﻠﻐﺎﺗﻪ ﺑﺎﻟﻠﻲ ﺻﺎﺭ ﻭﻫﻮ ﻗﺎﻝ ﺣﻴﺘﺄﻛﺪ ﺑﻌﺪ ﺷﻮﻳﻪ ﺍﺗﺼﻞ ﻭﺑﻠﻐﻬﺎ ﺍﻥ ﺍﻟﻄﻼﻕ ﺗﻢ ﻓﻌﻼ ... ﺧﻮﻟﻪ ﻓﺮﺣﺖ ﻭﺣﺴﺖ ﺍﻥ ﺍﻧﺰﺍﺡ ﻉ ﺻﺪﺭﻫﺎ ﻫﻢ ﻛﺒﻴﺮ ﺑﺮﻏﻢ ﺍﻥ ﺧﺎﻃﺮﻫﺎ ﺗﻌﺮﻑ ﻛﻴﻒ ﺻﺎﺭ ﻫﻜﻲ ..
...
ﻭﺻﻠﺘﻬﺎ ..
ﺭﻳﺎﺽ : ﻛﻮﻳﺲ ... ﺗﻮﺍ ﻧﺒﻴﻚ ﺗﻜﻤﻞ ﺍﻟﻠﻲ ﻗﺘﻠﻚ ﻋﻠﻴﻪ ..
ﻭﻟﻴﺪ ﺍﺑﺘﺴﻢ : ﺗﺤﺖ ﺃﻣﺮﻙ ....
****
ﻟﻴﻠﺔ ﺍﻟﻌﻤﻠﻴﻪ ...
ﺧﺸﻮﺍ ﺷﺎﺣﻨﺎﺕ ﻟﻠﻤﻴﻨﺎﺀ ﻣﺤﻤﻼﺕ ﺑﺒﻀﺎﻋﻪ ﻓﻲ ﺍﻟﻈﺎﻫﺮ ﻣﻮﺍﺩ ﺗﻨﻈﻴﻒ ﺑﺲ ﻛﺎﻥ ﻛﻤﻴﺎﺕ ﻛﺒﻴﺮﻩ ﻣﻦ ﺍﻟﻤﺨﺪﺭﺍﺕ ".. ﺍﻟﻬﺮﻭﻳﻦ ..."
ﻣﻨﺬﺭ ﻛﺎﻥ ﻣﻮﺟﻮﺩ ﻏﺎﺩﻱ ﻭﻛﺎﻥ ﻣﺸﺮﻑ ﻉ ﺍﻟﺘﺤﻤﻴﻞ .. ﻛﺎﻥ ﻛﻞ ﺷﻲ ﻛﻞ ﻭﺷﻚ ﺍﻧﻪ ﻳﺘﻢ ...
ﺑﺲ ﻓﺠﺄﺓ ..
" ﺍﻟﺸﺸﺸﺸﺮﻃﻪ "
ﺑﺪﺕ ﺍﺷﺘﺒﺎﻛﺎﺕ ﻣﺴﻠﺤﻪ ﻏﺎﺩﻱ ... ﻭﻛﺎﻧﺖ ﺍﻟﻤﻮﺍﺟﻬﻪ ﺣﺎﻣﻴﻪ ..
ﺍﻟﺤﺴﻦ : ﺁﺩﻡ ﺧﻠﻴﻜﻢ ﻉ ﺍﻷﻃﺮﺍﻑ ﻳﺎﺁﺩﻡ ﺍﻱ ﺣﺪ ﻳﻄﻠﻊ ﻣﻦ ﻏﺎﺩﻱ ﺍﺿﺮﺑﻮﺍ ﻉ ﺍﻟﺮﺟﻠﻴﻦ ﻃﻮﻝ ..
ﻣﻦ ﺟﻬﺔ ﺗﺎﻧﻴﻪ
ﻣﻨﺬﺭ ..₩¥$$#..¥₩$$ ﻛﻴﻒ ﻋﻨﺪﻫﻢ ﻋﻠﻢ ؟ ..!!
ﻳﺎﻭﻳﻠﻬﻢ ﻟﻮ ﻓﻜﺮﻭﺍ ﻳﺒﻴﻌﻮﺍ ...
ﻭﻗﻌﺪﺕ ﺍﻹﺷﺘﺒﺎﻛﺎﺕ ﻣﺴﺘﻤﺮﺓ ..
ﻟﻤﺢ ﺍﻟﺤﺴﻦ ﺣﺪ ﻳﺤﺎﻭﻝ ﺍﻟﻬﺮﻭﺏ ﺗﺴﻠﻞ ﺑﺶ ﻳﻠﺤﻘﻪ ﻭﺳﻂ ﺍﻃﻼﻕ ﺍﻟﻨﺎﺭ ﺑﺤﺬﺭ ﻟﻴﻦ ﻭﺻﻞ ﻓﻴﻪ
ﺍﻟﺤﺴﻦ : ﻛﺎﺍﺍﺍﻣﻠﻴﻮﻥ ..
ﻣﻨﺬﺭ ﺍﺩﺭﻕ ﻭﺭﺍ ﺣﺎﻭﻳﻪ : ﺍﻭﻭﻭﻭﻭﻭ ﻧﺴﻴﺒﻲ
ﺍﻟﺤﺴﻦ : ﻣﺎﻋﻨﺪﻙ ﻭﻳﻦ ﺗﻬﺮﺏ ...
ﻣﻨﺬﺭ : ﺣﻘﻘﻘﻮﻭﻭ
ﺍﻟﺤﺴﻦ ﺳﻜﺖ ﻭﻗﻌﺪ ﻳﻘﺮﺏ ﻭﻓﺠﺄﻩ ﻣﻨﺬﺭ ﺍﻃﻠﻖ ﺍﻟﻨﺎﺭ ﺍﺩﺭﻕ ﺍﻟﺤﺴﻦ ﺑﺴﺮﻋﻪ ﻭﺭﺍ ﺣﺎﻭﻳﻪ ..
ﻣﻨﺬﺭ : ﻣﺎﻧﺒﻴﺶ ﺍﺧﺘﻲ ﺗﺘﺮﻣﻞ ﻓﻴﺴﻊ .. ﺍﺧﻄﺎﻧﻲ ﺧﻴﺮ ..
ﺍﻟﺤﺴﻦ ﺑﺮﻏﻢ ﺍﻧﻪ ﺗﻨﺮﻓﺰ ﻷﻧﻪ ﺟﺎﺏ ﺳﻴﺮﻩ ﻋﻠﻴﺎ ﺑﺲ ﻣﺎﺑﺎﺵ ﻳﺮﺩ ..
ﻣﻨﺬﺭ : ﻭﻳﻦ ﻣﺸﻲ ﻫﺬﺍ .. ﻭﻗﻌﺪ ﻳﻄﻠﻖ ﻓﻲ ﺍﻟﻨﺎﺭ ﻟﻴﻦ ﻓﻀﻲ ﺍﻟﻤﺨﺮﻥ ﻛﻴﻒ ﺟﺎﻱ ﺑﻴﻌﺒﻴﻪ ﻣﺎﺣﺴﺶ ﺍﻹ ﺑﻔﻮﻫﺔ ﻣﺴﺪﺱ ﻣﺤﻄﻮﻃﻪ ﻉ ﺭﺍﺳﻪ ..
ﺍﻟﺤﺴﻦ : ﺧﻼﺹ ﻳﺎﻣﻨﺬﺭ ﻫﺬﺍ ﺍﺧﺮ ﺍﻟﻄﺮﻳﻖ ..
ﻣﻨﺬﺭ ﺭﻓﻊ ﺍﻳﺪﻳﻪ ﻓﻮﻕ : ﺑﺎﻋﻮﻧﻲ ﺯﻱ ﻣﺎﺑﺎﻋﻮﺍ ﺍﻟﻠﻲ ﻗﺒﻠﻲ ..
ﺍﻟﺤﺴﻦ : ﻫﺎﺩﻱ ﺍﺧﺮﺗﻜﻢ ﻛﻠﻜﻢ ..
ﻣﻨﺬﺭ ﺩﺍﺭ ﺭﻭﺣﻪ ﺍﺳﺘﺴﻠﻢ ﻭﺑﻴﻤﺸﻲ ﻣﻌﺎﻩ ﻭﺍﻟﺤﺴﻦ ﻣﺸﺖ ﻋﻠﻴﻪ ﺑﺤﺮﻛﻪ ﺳﺮﻳﻌﻪ ﺿﺮﺏ ﺍﻳﺪﻳﻪ ﺑﻘﻮﺓ ﺗﻨﻄﺮ ﻣﺴﺪﺳﻪ ... ﺿﺮﺏ ﺍﻟﺤﺴﻦ ﻉ ﻭﺟﻬﻪ ﺑﻘﻮﺓ ﻃﻴﺤﻪ ﻭﻃﻠﻊ ﻳﺠﺮﻱ ﺍﻟﺤﺴﻦ ﻧﺎﺽ ﻭﻗﻌﺪ ﻳﺠﺮﻱ ﻭﺭﺍﻩ ﻟﻴﻦ ﻭﺻﻞ ﻓﻴﻪ ﻭﺷﺪﻩ ..
ﻗﻌﺪ ﻣﻨﺬﺭ ﻳﻘﺎﻭﻡ ﻭﺩﻑ ﺍﻟﺤﺴﻦ .. ﺍﻟﺤﺴﻦ ﻭﻻﻟﻪ ﺿﺮﺏ ﻟﻴﻦ ﻃﻴﺤﻪ ﻭﺟﻲ ﻓﻮﻗﻪ ﻭﻗﻌﺪ ﻳﻀﺮﺏ ﻓﻴﻪ .. ﻣﻨﺬﺭ ﺑﻜﻞ ﻗﻮﺗﻪ ﺩﻑ ﺍﻟﺤﺴﻦ ﺑﺮﺣﻠﻴﻪ ﻃﻴﺤﻪ ﻭﻧﺎﺽ ﻣﺎﻟﺤﻘﺶ ﻳﺠﺮﻱ ﺿﺮﺑﻪ ﺍﻟﺤﺴﻦ .. ﻭﻗﻌﺪﻭﺍ ﻳﻀﺎﺭﺑﻮﺍ ....
ﻟﻴﻦ ﺟﺖ ﻣﻮﻃﻮﺍ ﺧﻄﻤﺖ ﻣﻦ ﻭﺭﺍ ﺍﻟﺤﺴﻦ ﺍﻟﻠﻲ ﻳﺴﻮﻕ ﻃﻠﻊ ﻣﻮﺱ ﺧﺮﻁ ﻇﻬﺮ ﺍﻟﺤﺴﻦ ﻭﺟﻲ ﻟﻤﻨﺬﺭ ﺭﻛﺒﻪ ﻭﻃﺎﺭ ﺑﻴﻪ ﻃﻮﻝ ... ﺍﻟﺤﺴﻦ ﺣﺎﻭﻝ ﻳﻠﺤﻖ ﺑﺲ ﻛﺎﻥ ﻣﺘﺄﻟﻢ ﻣﻦ ﺍﺻﺎﺑﺘﻪ ..
ﺟﺎﻩ ﺻﻮﺕ ﻣﻦ ﺍﻟﺴﻤﺎﻋﻪ ﻓﻲ ﻭﺫﻧﻪ : ﺳﻴﺪﻱ ﻗﺒﻀﻨﺎ ﻉ ﺟﻤﺎﻋﺔ ﻣﻦ ﺍﻟﻤﻴﻨﺎﺀ ﻣﺘﻮﺭﻃﻴﻦ ﻓﻲ ﺍﻟﺘﺤﻤﻴﻞ ﻭﺍﻟﺸﺤﻨﺎﺕ ﻛﻠﻬﺎ ﺷﺪﻳﻨﺎﻫﺎ ..
ﺍﻟﺤﺴﻦ : ﻛﻮﻳﺲ ... ﺍﺳﺘﺠﻤﻊ ﻧﻔﺴﻪ ﺍﻟﺤﺴﻦ .. ﻭﻗﻌﺪ ﻳﻤﺸﻲ ﻭﻳﻈﺎﻫﺮ ﺍﻧﻪ ﻣﺎﻓﻴﻪ ﺷﻲ ...
...
ﻟﻮﻳﻄﻠﻌﻮﺍ ﺑﺎﻳﻌﻴﻨﻲ ﺣﻨﺪﻣﻬﻢ ﻫﻠﺒﻪ ﻣﺶ ﺷﻮﻳﻪ ..
: ﻣﺎﺍﻇﻨﺶ ﻳﺎﺭﺍﺱ ... ﺍﻟﻜﻮﺑﺮﺍ ﻫﻮ ﺍﻟﻠﻲ ﺑﻌﺘﻨﺎ ﺑﺶ ﻧﻄﻠﻌﻮﻙ ﻗﺎﻝ ﺣﺘﻰ ﻟﻮ ﻣﺎﻃﻠﻌﺘﻮﺵ ﺑﺎﻟﺒﻀﺎﻋﻪ ﺍﻃﻠﻌﻮﺍ ﺑﺎﻟﻜﺎﻣﻴﻠﻴﻮﻥ ..
ﻣﻨﺬﺭ : ﻫﻮ ﻫﻜﻲ ﻗﺎﻝ ... ؟
: ﺍﻳﻪ ﻳﺎﺭﺍﺱ ..
ﻣﻨﺬﺭ " ﻛﻴﻒ ﻫﻜﻲ ﺑﻪ .. ﻣﻌﻘﻮﻝ ﻳﻜﻮﻥ ﻓﻲ ﺣﺪ ﺑﺎﻳﻌﻨﺎ ﻣﻦ ﺩﺍﺧﻞ !! ؟ "
...
ﺍﻟﺤﺴﻦ ﻭﺍﻗﻒ ﻣﻊ ﺟﺎﺩ ﺍﻟﻠﻪ ﻳﺸﻮﻓﻮﺍ ﻓﻲ ﺍﻟﺸﺤﻨﺎﺕ ﻣﺘﺎﻉ ﺍﻟﻬﺮﻭﻳﻦ ..
ﺟﺎﺩ ﺍﻟﻠﻪ : ﺍﻋﺪﻣﻮﻫﺎ ﻓﻮﺭﺍ ..
ﺍﻟﺤﺴﻦ : ﻓﻲ ﻋﻤﻠﻴﻪ ﺗﺎﻧﻴﻪ ﺣﺘﺼﻴﺮ ﻓﻲ ﻣﻜﺎﻥ ﺗﺎﻧﻲ ..
ﺟﺎﺩ ﺍﻟﻠﻪ : ﻋﻨﺪﻱ ﻋﻠﻢ ..
ﺍﻟﺤﺴﻦ : ﻗﻮﻝ ﻟﻠﺠﻤﺎﻋﻪ ﻓﻲ ﻫﺪﻳﻜﺎ ﺍﻟﻤﺪﻳﻨﻪ ﻟﻮ ﻳﺒﻮﺍ ﺍﻣﺪﺍﺩ ﺣﻨﻲ ﻣﻌﺎﻫﻢ ..
ﺟﺎﺩ ﺍﻟﻠﻪ : ﺍﻃﻤﻦ ﺗﺮﻳﺲ ﻫﻠﺒﻪ ﺍﻟﻠﻲ ﻏﺎﺩﻱ ... ﺭﻛﺰ ﻉ ﻭﺟﻬﻪ .. ﺧﻴﺮﻩ ﻟﻮﻧﻚ ﻣﺨﻄﻮﻑ ﻫﻜﻲ ...
ﺍﻟﺤﺴﻦ ﻛﺎﻥ ﻻﺑﺲ ﺟﺎﻛﻪ ﻭﻣﺴﻜﺮﻩ ﺑﺶ ﻳﺨﻔﻲ ﺑﻴﻬﺎ ﺍﻟﺠﺮﺡ ﺍﻟﻠﻰ ﻑ ﻇﻬﺮﻩ : ﻣﺎﻓﻲ ﺷﻲ ..
ﺟﺎﺩ ﺍﻟﻠﻪ : ﺑﻪ .. ﺗﻮﺍ ﺭﻭﺡ ﻃﻮﻝ ..
ﺍﻟﺤﺴﻦ : ﻙ ...
ﺟﺎﺩ ﺍﻟﻠﻪ : ﻟﻴﻚ ﻋﺸﺮﺓ ﺍﻳﺎﻡ ﻣﺎﺭﻭﺣﺘﺶ ﺭﻭﺡ ﻳﺎﺣﺴﻦ ﻫﺬﺍ ﺃﻣﺮ ..
ﺍﻟﺤﺴﻦ : ﻣﻌﺎﺵ ﺗﻨﺴﻰ ﺃﻝ ﺍﻟﺘﻌﺮﻳﻒ ﻳﺎﻓﻨﺪﻱ .. ﺩﺍﺭ ﺍﻟﺘﺤﻴﻪ ﻭﻣﺸﻲ ﺭﻛﺐ ﺳﻴﺎﺭﺗﻪ .. ﺟﺎﺩ ﺍﻟﻠﻪ ﻛﺎﻥ ﻣﻌﺎﻩ ﺑﻌﻴﻮﻧﻪ .. ﺣﻮﻝ ﻧﻈﺮﻩ ﺗﺤﺖ ﻟﻘﻲ ﺧﻂ ﺩﻡ ﻣﻦ ﻣﻜﺎﻧﻪ ﻟﻌﻨﺪ ﻭﻳﻦ ﻣﻜﺎﻧﺖ ﺳﻴﺎﺭﺓ ﺍﻟﺤﺴﻦ .
ﺟﺎﺩ ﺍﻟﻠﻪ ﻏﻤﺾ ﻋﻴﻮﻧﻪ ﺑﺸﺪﻩ : ﻣﺠﻨﻮﻥ ﺍﻟﺮﺍﺟﻞ ﻫﺬﺍ ...
***
ﻭﺻﻞ ﺍﻟﺤﺴﻦ ﻟﻠﺤﻮﺵ ﻣﻊ ﺍﻟﺴﺎﻋﻪ ...3 ﺧﺶ ﺑﻬﺪﻭﺀ ﻭﻛﺎﻥ ﻣﻨﻬﻚ ﻉ ﺍﻷﺧﺮ ﺑﺲ ﺗﻤﺎﺳﻚ .. ﻭﺻﻞ ﻭﻳﻦ ﻣﺎﻓﻲ ﺍﻟﻔﺎﺻﻞ ﻓﺘﺤﻪ ﻭﺭﻛﺐ ﻓﻮﻕ ... ﻭﺻﻞ ﻓﻲ ﺑﺎﺏ ﺍﻟﺸﻘﻪ ﻳﺪﻭﺏ ﺷﺎﻑ ﺍﻟﻤﻔﺘﺎﺡ ﻭ ﻓﺘﺢ ﺍﻟﺒﺎﺏ ﻭﺧﺶ ...
ﻛﺎﻥ ﺍﻟﺤﻮﺵ ﻣﻈﻠﻢ .. ﺳﻜﺮ ﺍﻟﺒﺎﺏ ﺑﻬﺪﻭﺀ .. ﺧﺶ ﻟﻠﺼﺎﻟﻪ ﻓﺘﺢ ﺍﻟﻀﻲ .. ﺣﻮﻝ ﺟﺎﻛﻪ .. ﺑﻌﺪﻳﻦ ﺣﻮﻝ ﺍﻟﺴﻮﺭﻳﻪ ﻭﻗﻌﺪ ﻫﻜﻲ ﻛﺎﻥ ﻻﻑ ﻉ ﺭﻭﺣﻪ ﻓﺎﺷﻪ ﻭﻳﻦ ﻣﺎﻓﻲ ﺍﻟﺠﺮﺡ ﺟﻴﻬﺔ ﻇﻬﺮﻩ .. ﺧﻼﺹ ﺣﺲ ﺍﻧﻪ ﺣﻴﻔﻘﺪ ﺍﻟﻮﻋﻲ .. ﺭﻗﺪ ﻋﺎﻟﻜﻨﺒﻪ ﻉ ﺑﻄﻨﻪ .. ﻭﻏﻤﺾ ﻋﻴﻮﻧﻪ
ﻋﻠﻴﺎ ﻧﺎﺿﺖ ﻓﻲ ﻧﻔﺲ ﺍﻟﻠﺤﻈﻪ ﺧﺸﺖ ﺍﻟﺤﻤﺎﻡ ﻭﻃﻠﻌﺖ .. ﺷﺎﻓﺖ ﺿﻲ ﺟﺎﻱ ﻣﻦ ﺑﺮﺍ ﺍﺳﺘﻐﺮﺑﺖ ﻭﻃﻠﻌﺖ .. ﺭﻛﺒﺖ ﺩﺭﺟﺘﻴﻦ ﻭﻛﻤﻠﺖ ﻟﻠﺼﺎﻟﻪ ﻗﺪﻣﺖ ﻭﺷﻬﻘﺖ ﺑﺼﺪﻣﻪ ﻣﻦ ﻟﻠﻲ ﺷﺎﻓﺘﻪ ﻣﺸﺘﻠﻪ ﺑﺴﺮﻋﻪ
ﻋﻠﻴﺎ ﺑﺨﻮﻑ ﺷﺪﻳﺪ : ﺣﺴﻦ .. ﺣﺴﺴﺴﻦ .. ﺣﺴﺴﺴﻦ .. ﺗﺴﻤﻊ ﻓﻴﺎ
ﻻﺭﺩ ..
ﻋﻠﻴﺎ : ﺣﻲ ﻋﻠﻴﺎ ﺧﻴﺮﻩ ... ﺣﺴﺴﺴﻦ ﺑﺎﻟﻠﻪ ﻋﻠﻴﻚ ﻟﻮ ﺗﺴﻤﻊ ﻓﻴﺎ ﺭﺩ ...
ﻻﺭﺩ
ﻋﻠﻴﺎ ﻛﺎﻧﺖ ﺣﺘﻨﻬﺎﺭ ﺑﺲ ﺗﻤﺎﺳﻜﺖ ﺣﻮﻟﺖ ﺍﻟﻔﺎﺷﻪ .. ﻟﻘﺖ ﺍﻟﺠﺮﺡ ﻋﻤﻴﻖ ﻫﻠﺒﻪ ... ﻣﺸﺖ ﺗﺠﺮﻱ ﺧﺪﺕ ﺷﻨﻄﻪ ﻋﻨﺪﻫﺎ ﻓﻴﻬﺎ ﺍﺳﻌﺎﻓﺎﺕ ﻛﺎﻣﻠﻪ .. ﻟﺒﺴﺖ ﻗﻔﺎﺯﺍﺕ ﻭﻋﻘﻤﺖ ﺍﻟﺠﺮﺡ .. ﺑﻌﺪﻳﻦ ﻃﻠﻌﺖ ﻋﺪﺓ ﺍﻟﺨﻴﺎﻃﻪ ﻭﺑﺪﺕ ﺗﺨﻴﻂ .. ﻋﻨﺪﻫﺎ ﺧﺒﺮﻩ ﺑﺴﻴﻄﻪ ﺷﻮﻳﻪ ﻣﻦ ﺍﻳﺎﻡ ﺍﻟﺤﺮﺏ .. ﺧﻴﻄﺖ ﺍﻟﺠﺮﺡ ﺑﺤﺬﺭ .. ﻭﻛﺎﻧﺖ ﺗﺘﺤﺴﺲ ﻓﻲ ﻣﻜﺎﻥ ﺍﻟﻨﺒﺾ ﻭﺗﺮﺗﺎﺡ ﻟﻤﺎ ﺗﺤﺲ ﺑﻴﻪ .. ﺑﻌﺪ ﺟﻬﺪ ﺧﻴﻄﺎﺗﻪ .. ﻭﺣﻄﺖ ﻋﻠﻴﺎ ﻻﺻﻖ ﻛﺒﻴﺮ ...
ﻋﻠﻴﺎ ﻻﺯﻡ ﺗﻨﻮﺿﻪ ﺑﺶ ﻳﻤﺸﻲ ﺍﻟﻤﺴﺘﺸﻔﻰ ﻭﻳﻌﻄﻮﻩ ﺩﻡ ﻷﻧﻪ ﻭﺍﺿﺢ ﻧﺰﻑ ﻫﻠﺒﻪ ﻧﺰﻟﺖ ﻉ ﺭﻛﺒﺎﻫﺎ ﻭﻗﺮﺑﺖ ﻣﻨﻪ : ﺣﺴﻦ .. ﺿﺮﺑﺖ ﻉ ﺧﺪﻩ ﺑﺨﻔﻪ ... ﺣﺴﻦ .. ﺣﺴﻦ ... ﺩﻣﻮﻋﻬﺎ ﺑﺪﻭﺍ ﻳﻨﺰﻟﻮﺍ .. ﺣﺴﻦ ﺑﺎﻟﻠﻪ ﻋﻠﻴﻚ ﻧﻮﺽ ﻣﺎﺗﻤﻮﺗﺶ ﺍﺭﺟﻮﻙ ..
ﺍﻟﺤﺴﻦ ﺷﺒﻪ ﻓﺎﻳﻖ ﻓﺘﺢ ﻋﻴﻮﻧﻪ : ﺍﻟﺤﺤﺴﻦ .. ﻣﺶ ﺣﺴﺴﻦ ..
ﻋﻠﻴﺎ ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ : ﺍﻟﻠﻲ ﻫﻮ .. ﺍﻟﻤﻬﻢ ﺗﻮﺍ ﻻﺯﻡ ﺗﻤﺸﻲ ﻟﻠﻤﺴﺘﺸﻔﻰ ..
ﺍﻟﺤﺴﻦ : ﺣﺴﺴﺎﻥ ..
ﻋﻠﻴﺎ ﻧﺎﺿﺖ ﻭﺍﺗﺼﻠﺖ ﺑﻬﺎﻟﻪ ﺑﻌﺪ ﺍﺗﺼﺎﻝ ﻣﺮﺗﻴﻦ ﺭﺩﺕ ..
ﻋﻠﻴﺎ : ﻫﺎﻟﻪ ﻓﻴﻘﻲ ﺣﺴﺎﻥ ﺿﺮﻭﺭﻱ ﻭﻗﻮﻟﻴﻠﻪ ﻳﺠﻴﻨﺎ ..
ﻫﺎﻟﻪ ﻧﺎﺿﺖ ﻣﺨﻠﻮﻋﻪ : ﺷﻦ ﺻﺎﺭ ..
ﻋﻠﻴﺎ : ﻏﻴﺮ ﺑﺎﻟﻠﻪ ﻋﻠﻴﻚ ﻗﻮﻟﻴﻠﻪ ﻳﺠﻲ ﺗﻮﺍ ..
ﻫﺎﻟﻪ : ﺑﺎﻩ ﺑﺎﻩ .. ﻭﺻﻜﺮﺕ .. ﻫﺎﻟﻪ ﻧﺎﺿﺖ ﻭﺗﻮﺟﻬﺖ ﻟﺪﺍﺭ ﺣﺴﺎﻥ ﻟﻘﺎﺗﻪ ﻧﺎﻳﺾ ﻭﻓﻲ ﺍﻳﺪﻩ ﺗﻠﻴﻔﻮﻧﻪ ﺍﻭﻝ ﻣﺎﺷﺎﻓﻬﺎ ﺍﺭﺗﺒﻚ ﻭﺣﻄﻪ ﻋﺎﻟﻜﺎﻣﺪﻳﻨﻮﺍ
ﻃﻨﺸﺖ ﻫﺎﻟﻪ : ﻧﻮﺽ ﻟﺤﻮﺵ ﺧﻮﻙ ﺍﺷﺒﺢ ﺷﻦ ﺻﺎﻳﺮﻟﻪ ..
ﺣﺴﺎﻥ ﺑﺨﻠﻌﻪ : ﺍﻟﺤﺴﻦ !!
ﻫﺎﻟﻪ : ﺍﻳﻪ ﻫﻴﺎ ﺑﺴﺮﻋﻪ ..
ﻃﻠﻊ ﺣﺴﺎﻥ ﻭﻟﺤﻘﺎﺗﻪ ﻫﺎﻟﻪ ﺑﻌﺪ ﺣﻄﺖ ﻭﺷﺎﺡ ﻉ ﺭﺍﺳﻬﺎ
ﻃﻖ ﻉ ﺍﻟﺒﺎﺏ ﻓﺘﺤﺖ ﻋﻠﻴﺎ ﺧﺶ ﻃﻮﻝ ﻟﻘﻲ ﺧﻮﻩ ﺑﻬﺎﻟﺤﺎﻟﻪ .. ﻧﻬﻀﻪ ﺑﻤﺴﺎﻋﺪﻩ ﻋﻠﻴﺎ ... ﻟﺒﺴﺎﺗﻪ ﻓﺎﻧﻴﻠﻴﺎ ﻭﻃﻠﻌﻮﻩ ﻃﻮﻝ ﻣﻦ ﺍﻟﺸﻘﻪ .. ﺍﻟﺤﺴﻦ ﻣﺎﺣﺒﺶ ﻣﻮﻗﻒ ﺍﻟﻀﻌﻒ ﺍﻟﻠﻲ ﻫﻮ ﻓﻴﻪ ﺗﻤﺎﺳﻚ ﻭﻧﺰﻝ ﺑﺮﻭﺣﻪ .. ﻭﻗﻌﺪﻭﺍ ﻭﺭﺍﻩ .. ﻟﻴﻦ ﺭﻛﺐ ﺳﻴﺎﺭﺓ ﺣﺴﺎﻥ ﻣﻦ ﺍﻟﻘﺪﺍﻡ .. ﻭﺭﻛﺒﻮﺍ ﻋﻠﻴﺎ ﻭﻫﺎﻟﻪ ﻣﻦ ﺍﻟﺘﺎﻟﻲ ﻭﻃﻠﻌﻮﺍ ﻣﻦ ﺍﻟﺤﻮﺵ ... ﻭﻣﺎﺣﺪ ﻓﺎﻕ ﺑﻴﻬﻢ ..
ﺑﺴﺮﻋﻪ ﺍﻟﺒﺮﻕ ﻭﺻﻞ ﺣﺴﺎﻥ ﺍﻟﻤﺴﺘﺸﻔﻰ ﻧﺰﻟﻮﺍ ﻭﺟﺎﻳﻴﻦ ﺑﻴﻨﺰﻟﻮﻩ ﻉ ﺍﻟﺒﺎﺭﻳﻼ ﺑﺲ ﻫﻮ ﺭﻓﺾ ﻭﻗﻌﺪ ﻳﻤﺸﻲ .. ﺷﺎﻓﻮﻩ ﺟﻤﺎﻋﺔ ﺍﻟﻤﺴﺘﺸﻔﻰ ﻋﺮﻓﻮﻩ .. ﺩﺧﻠﻮﻩ ﻟﻐﺮﻓﻪ ﻭﺭﻗﺪﻭﻩ ﻉ ﺑﻄﻨﻪ ﻭﻋﻠﻘﻮﻟﻪ ﺷﻜﺎﺭﺓ ﺩﻡ ..
ﺩﻛﺘﻮﺭ ﺟﻼﻝ : ﺣﺴﻮﻧﻪ ﺗﺒﻲ 15 ﺷﻜﺎﺭﺓ ﺩﻡ ..
ﺍﻟﺤﺴﻦ : ﻓﺼﻴﻠﺘﻲ ﻣﺶ ﻧﺎﺩﺭﻩ ﺗﻠﻘﻮﻫﺎ ...
ﺟﻼﻝ : ﻣﻦ ﺍﻟﻠﻲ ﺧﻴﻄﻠﻚ ﺍﻟﺠﺮﺡ ..
ﺍﻟﺤﺴﻦ ﺗﻔﺎﺟﺊ : ﻣﺨﻴﻂ؟ !!
ﺟﻼﻝ : ﺍﻳﻪ ﺍﻟﻠﻲ ﺧﻴﻄﻪ ﺧﻴﻄﻪ ﺑﺄﺗﻘﺎﻥ ﻣﻤﺘﺎﺯ ..
ﺍﻟﺤﺴﻦ ﻓﻜﺮ ﻭﻣﺎﺟﺎﺵ ﻓﻲ ﺑﺎﻟﻪ ﻏﻴﺮﻫﺎ .. ﺑﺲ ﻛﻴﻒ ﻗﺪﺭﺕ ﺗﺨﺶ ﻉ ﺟﺮﺡ ﻋﻤﻴﻖ ﺯﻱ ﻫﺬﺍ ﻻﺧﺎﻓﺖ ﻻﺍﺷﻤﺌﺰﺕ ﻭﻻﺩﺍﺧﺖ .. ﺻﺢ ﻃﺎﻟﺒﻪ ﻃﺐ ﺑﺲ ﻗﺎﻋﺪﻩ ﻓﻲ ﺍﻟﺒﺪﺍﻳﻪ ...
ﺟﺎﺑﻮ ﻟﻠﺤﺴﻦ ﺍﺍﻟﺪﻡ ﺑﻌﺾ ﺍﻟﻔﺤﺺ ﻭﻗﻌﺪ ﻟﻴﻠﻪ ﻛﺎﻣﻠﻪ ... ﻉ ﻫﺎﻟﺤﺎﻝ ﻟﻴﻦ ﺻﺒﺢ ﺍﻟﺼﺒﺢ .. ﺣﺴﺎﻥ ﺭﻭﺡ ﺑﻬﺎﻟﻪ .. ﻭﻋﻠﻴﺎ ﺳﻜﺮﺕ ﺭﺍﺳﻬﺎ ﻭﻗﻌﺪﺕ ..
ﺧﺸﺘﻠﻪ ﺍﻟﻐﺮﻓﻪ ﻟﻘﺎﺗﻪ ﺭﺍﻗﺪ ﻉ ﺑﻄﻨﻪ ﻭﻣﺎﻓﻴﺶ ﻉ ﺟﺴﻤﻪ ﻣﻦ ﻓﻮﻕ ﺍﻹ ﺍﻟﻀﻤﺎﺩ ﺍﻟﻤﻠﻔﻮﻑ ﻋﻠﻴﻪ .. ﻗﻌﺪﺕ ﺗﺸﻮﻓﻠﻪ ﺭﻛﺰﺕ ﻉ ﻇﻬﺮﻩ .. ﻟﻘﺖ ﻓﻴﻪ ﻋﻼﻣﺎﺕ ﻫﻠﺒﻪ " ﻣﻌﻘﻮﻟﻪ ﻫﺎﺩﻭﺍ ﻛﻠﻬﻢ ﺍﺻﺎﺑﺎﺕ ! ؟ " ﻗﻌﺪﺕ ﺗﺘﺄﻣﻞ ﻓﻴﻪ ﻭﻫﻮ ﺭﺍﻗﺪ .. ﻗﺪﺍﺵ ﻫﺎﻷﻧﺴﺎﻥ ﻣﺴﺘﻌﺪ ﻳﻔﻨﻲ ﻋﻤﺮﻩ ﻉ ﺧﺎﻃﺮ ﻫﺎﻟﺒﻼﺩ .. ﻓﻬﻤﺖ ﻋﻠﻴﺎ ﺍﻧﻪ ﻣﺶ ﺍﺳﺘﻌﺮﺍﺽ ﺑﻄﻮﻻﺕ .. ﻫﻮ ﻳﺤﺐ ﻳﻌﻄﻲ ﻟﻠﻲ ﻳﺤﺒﻬﻢ .. ﻣﺶ ﻋﺎﺭﻓﻪ ﻋﻼﺵ ﻭﻗﺘﻬﺎ ﺣﺴﺪﺕ ﻟﻴﺒﻴﺎ ﺍﻟﻠﻲ ﻳﺤﺒﻬﺎ ﺍﻟﺤﺴﻦ ﻛﻞ ﻫﺎﻟﺤﺐ ...💖💖
***
ﻳﺎﻟﻄﻴﻒ ﻳﺎﺭﺑﻲ ﻳﺎﻟﻄﻴﻒ ..
ﺍﻟﺤﺎﺝ ﻋﻠﻲ : ﺷﻦ ﺣﺎﻟﻪ ﺗﻮﺍ ..
ﺣﺴﺎﻥ : ﺍﺣﺴﻦ ﺑﻬﻠﺒﻪ ..
ﺍﻟﺤﺎﺝ : ﺍﺭﻛﺐ ﺗﺮﻳﺢ ﺍﻧﺖ ﺗﻮ ﻧﻤﺸﻮﻟﻪ ﺍﻧﻲ ﻭﻋﻤﻚ ﺳﺮﻣﺪ ...
ﺣﺴﺎﻥ : ﺑﺎﻩ .. ﺻﺎﺭ ﺷﻲ ﺑﻠﻐﻮﻧﺎ .. ﻭﻣﺸﻲ ﺭﻛﺐ ﻟﺸﻘﺘﻪ ..
ﺑﺮﻧﻴﻪ : ﺭﺟﻠﻲ ﻉ ﺭﺟﻠﻚ ﻣﺎﺩﺧﻠﻴﺶ ﺑﻴﻚ ..
ﺍﻟﺤﺎﺝ ﻋﻠﻲ : ﺑﺎﻫﻲ ﻳﺎﻭﺩﻱ ﺑﺎﻫﻲ ...
***
ﻓﺘﺢ ﻋﻴﻮﻧﻪ ﺑﺎﻟﺸﻮﻳﻪ ﺍﻭﻝ ﻣﻦ ﺷﺎﻑ ﻛﺎﻧﺖ ﻫﻲ ﺑﻤﻼﻣﺤﻬﺎ ﺍﻟﺤﻠﻮﻩ ﺍﻟﻨﺎﻋﻤﻪ ﺭﺍﻗﺪﻩ ﻉ ﺍﻟﻜﺮﺳﻲ .. ﻣﺎﺑﺎﺵ ﻳﻔﻴﻘﻬﺎ .. ﻧﺎﺽ ﻗﻌﻤﺰ ﻉ ﺣﻴﻠﻪ .. ﺑﻌﺪﻳﻦ ﻧﺎﺽ ﻣﻦ ﺍﻟﺴﺮﻳﺮ .. ﺩﺍﺭ ﺻﻮﺕ ..
ﻋﻠﻴﺎ ﻓﺎﻗﺖ ﺑﺨﻠﻌﻪ : ﺣﺴﻦ !!
ﺍﻟﺤﺴﻦ : ﺍﻟﺤﺴﻦ ﺍﻝ ﺍﻟﺘﻌﺮﻳﻒ ﺍﺳﺒﻘﻴﻬﺎ ﺑﻬﺎ ..
ﻋﻠﻴﺎﺑﻀﺤﻜﻪ : ﺍﻟﻤﻬﻢ ﺗﻮﺍ ﺷﻦ ﺣﺎﻟﻚ ..
ﺍﻟﺤﺴﻦ : ﻛﻮﻳﺲ ﺍﻟﺤﻤﺪ ﻟﻠﻪ .. ﻋﻼﺵ ﻗﺎﻋﺪﻩ ﻫﻨﻲ
ﻋﻠﻴﺎ : ﺑﻨﺮﺩﻟﻚ ﻣﻌﺮﻭﻓﻚ ..
ﺍﻟﺤﺴﻦ ﺍﺑﺘﺴﻢ ﻧﺺ ﺍﺑﺘﺴﺎﻣﻪ ﻭﺟﻪ ﻧﻈﺮﻩ ﺟﻨﺒﻪ : ﺟﻴﺒﻴﻬﺎﻟﻲ
ﻋﻠﻴﺎ ﺷﺒﺤﺖ ﻟﻠﻔﺎﻧﻴﻠﻴﺎ ﻭﺑﻌﺪﻳﻦ ﺧﺪﺗﻬﺎ .. ﻋﻄﺘﻬﺎﻟﻪ ﺧﺪﺍﻫﺎ ﺣﺎﻭﻝ ﻳﻠﺒﺲ ﺗﻮﺟﻊ .. ﻭﻗﻒ ﺷﻮﻳﻪ .. ﺑﻌﺪﻳﻦ ﺣﺎﻭﻝ ﺗﻮﺟﻊ ..
ﺍﺑﺘﺴﻤﺖ ﻋﻠﻴﺎ ﻭﺧﺪﺗﻬﺎ ﻣﻨﻪ ﻫﻮ ﺍﺳﺘﻐﺮﺏ .. ﺷﺎﻓﻬﺎ ﺗﺴﺎﻭﻱ ﻓﻴﻬﺎ ﻭﻗﺮﺑﺖ ﻣﻨﻪ ﻭﻟﺒﺴﺘﻬﺎﻟﻪ .. ﻫﻲ ﺗﻠﺒﺲ ﻓﻴﻪ ﻭﻫﻮ ﻣﺴﻬﻢ ﻭﺧﻼﺹ ﻛﺎﻧﺖ ﻗﺮﻳﺒﻪ ﻋﻠﻴﻪ ﻳﺸﻢ ﻓﻲ ﺭﻳﺤﺘﻬﺎ ﻛﻞ ﻣﺎﺗﺰﻳﺪ ﺗﻘﺮﺏ .. ﺍﺧﺮ ﺷﻲ ﺳﺎﻭﺗﻬﺎﻟﻪ ﻣﻦ ﺗﺤﺖ ﻏﻤﺾ ﻋﻴﻮﻧﻪ ﻭﻳﺸﻢ ﻓﻲ ﺭﻳﺤﺘﻬﺎ ﺗﻤﻨﻰ ﻫﺎﻟﻠﺤﻈﻪ ﺗﻘﻌﺪ ﻷﺧﺮ ﺍﻟﻌﻤﺮ .. ﻫﻲ ﻟﻤﺎ ﺟﺖ ﺑﺘﺤﻮﻝ ﻗﺎﻣﺖ ﺭﺍﺳﻪ ﺷﺎﻓﺖ ﺷﻌﺮﻩ ﺗﺸﻔﺸﻒ ﺳﺎﻭﺗﻬﻮﻟﻪ ﺑﺈﻳﺪﻳﻬﺎ ﻭﺍﺑﺘﺴﻤﺖ ..
ﻫﺬﺍﻛﺎ ﺍﻟﻮﻗﺖ ﺍﻟﺤﺴﻦ ﻛﺎﻥ ﻳﺒﻲ ﻳﺎﺧﺪﻫﺎ ﻓﻲ ﺣﻀﻨﻪ ﻭﻳﺪﺧﻠﻬﺎ ﻓﻲ ﺻﺪﺭﻩ ﺩﺍﺧﻞ ﺑﺶ ﺗﺸﻮﻑ ﻗﻠﺒﻪ ﺷﻦ ﺻﺎﻳﺮ ﻓﻴﻪ ﺗﻮﺍ ...
ﻭﺧﺮﺕ ﻭﺷﺒﺤﺘﻠﻪ ﻟﻘﺖ ﻧﻈﺮﺍﺗﻪ ﻏﺮﻳﺒﻪ ﺑﺲ ﺍﺣﺮﺟﺘﻬﺎ ﻧﺰﻟﺖ ﻋﻴﻮﻧﻬﺎ ﻟﻮﻃﺎ ﻭﺧﺪﻭﺩﻫﺎ ﺃﺣﻤﺮﻭﺍ ...
ﺍﻟﺤﺴﻦ : ﺷﻔﺘﻲ ﻓﻲ ﺍﻟﻤﺮﺍﻳﻪ ﻗﺒﻞ ﻟﺘﻄﻠﻌﻲ
ﻋﻠﻴﺎ ﺭﻛﺰﺕ ﻉ ﺭﻭﺣﻬﺎ ﻻﺑﺴﻪ ﺗﻮﺗﻪ ﺳﻤﺎﻭﻳﻪ ﺷﺘﻮﻳﻪ ﻋﻠﻴﻬﺎ ﻣﺎﻟﻴﻪ ﻗﻬﻮﻳﻪ ﻭﻭﺷﺎﺡ ﻭﺭﺩﻱ ﻭﻓﺮﺟﻠﻴﻬﺎ ﺷﺒﺸﺐ ﻻﺑﺴﺘﻪ ﻉ ﺷﺨﺸﻴﺮ
ﻋﻠﻴﺎ ﺣﻄﺖ ﺍﻳﺪﻫﺎ ﻉ ﻓﻤﻬﺎ ﺑﺼﺪﻣﻪ ﺑﻌﺪﻳﻦ ﺿﺤﻜﺖ ..
ﺍﻟﺤﺴﻦ ﺍﺑﺘﺴﻢ ﻟﻀﺤﻜﺘﻬﺎ ... ﺷﺒﺤﺘﻠﻪ ﻛﺎﻧﺖ ﺍﺑﺘﺴﺎﻣﺘﻪ ﺣﻠﻮﺓ ﺑﺎﻟﻤﺮﺓ ﻫﻮ ﺭﻛﺰ ﻋﻠﻴﻬﺎ ﻭﺟﻬﻪ ﻭﻻ ﺃﺣﻤﺮ ﻭﻏﻴﺮ ﻋﻴﻮﻧﻪ ﻋﻨﻬﺎ
ﺍﻟﺤﺴﻦ : ﺍﺣﻤﻢ .. ﻭﻧﺎﺽ ..
ﻋﻠﻴﺎ : ﻭﻳﻦ ..
ﺍﻟﺤﺴﻦ : ﺑﻨﺮﻭﺡ ...
ﻃﻖ ﺍﻟﺒﺎﺏ .. ﻭﺧﺸﻮﺍ ﺍﻟﺤﺎﺝ ﻋﻠﻲ ﻭﺍﻟﺤﺎﺟﻪ ﺑﺮﻧﻴﻪ ﻭﻣﻌﺎﻫﻢ ﺳﺮﻣﺪ ..
ﺍﻟﺤﺎﺝ ﻋﻠﻲ : ﻻﺑﺎﺱ ﻳﺎﻭﻟﺪﻱ ..
ﺍﻟﺤﺴﻦ ﺑﺎﺱ ﺭﺍﺱ ﺟﺪﻩ : ﻏﻴﺮ ﻋﻼﺵ ﺟﻴﺘﻮﺍ ﺑﺲ ﻣﺎﻓﻲ ﺷﻲ ﻳﺴﺘﺎﻫﻞ ..
ﺑﺮﻧﻴﻪ ﺑﻐﻀﺐ : ﺷﻨﻮ ﻫﻮ ﺍﻟﻠﻲ ﻳﺴﺘﺎﻫﻞ ﻟﻤﺎ ﻻﻗﺪﺭ ﺍﻟﻠﻪ ﺗﻤﻮﺕ ﻳﺒﺪﺍﻳﺴﺘﺎﻫﻞ ﺑﻌﺪﻳﻦ
ﺍﻟﺤﺴﻦ ﺣﻀﻨﻬﺎ ﻭﺑﺎﺱ ﺭﺍﺳﻬﺎ : ﻣﺎﺗﺮﻋﺸﻴﺶ ﺭﻭﺣﻚ ﻭﺍﻟﻠﻪ ﻣﺎﻓﻲ ﺣﺎﺟﻪ ﺗﺴﺘﺎﻫﻞ ﺷﻮﻓﻲ ﺍﻫﻮ ﻗﺪﺍﻣﻚ ﻭﺍﻗﻒ ﻉ ﺭﺟﻠﻴﺎ ..
ﺳﺮﻣﺪ ﺑﻀﺤﻜﻪ : ﻗﺮﻳﻨﺪﻳﺰﺭ ﻫﺬﺍ ﻳﺎﻡ ﻣﺎﻳﺼﻴﺮﻟﻪ ﺷﻲ ..
ﻋﻠﻴﺎ : ﻫﻬﻬﻬﻬﻬﻬﻬﻬﻬﻪ
ﺍﻟﺤﺴﻦ : 😑
ﻫﺪﺭﺯﻭﺍ ﺷﻮﻳﻪ ﻭﺑﻌﺪﻳﻦ ﻃﻠﻌﻮﺍ ﻣﻊ ﺍﻟﺤﺴﻦ ﺍﻟﻠﻲ ﺳﻜﺮ ﺭﺍﺳﻪ ﺑﻴﻄﻠﻊ ..
***
ﻭﺳﻴﻠﻪ ﺑﺒﻜﻲ : ﺍﺭﻓﻌﻨﻲ ﻟﻮﻟﺪﻱ ﻳﺎﻋﺎﺑﺪ
ﻋﺎﺑﺪ : ﻃﻠﻊ ﻟﺤﻮﺷﻪ ..
ﻭﺳﻴﻠﻪ : ﻭﻳﻦ ﻣﺎﻛﺎﻥ ﻳﻜﻮﻥ ... ﺍﺭﻓﻌﻨﻲ ...
ﺟﻨﺎﻥ ﺟﺖ : ﻫﻴﺎ ﺑﺎﺑﺎ ﻭﺍﺗﻴﻴﻦ ﺧﻮﻟﻪ ﺟﺎﻳﻪ ﻭﺭﺍﻱ ..
ﻋﺎﺑﺪ : ﺍﻧﻲ ﺑﺮﺍ ﻧﺮﺍﺟﻲ ﻓﻴﻜﻢ ..
***
ﻭﺻﻠﻮﺍ ﻟﻠﺤﻮﺵ ..
ﺍﻧﺼﺪﻡ ﺍﻟﺤﺴﻦ ﻟﻤﺎ ﻟﻘﻲ ﺍﻗﺎﺭﺑﻬﻢ ﺟﺎﻳﻴﻦ ﻭﻻﺩ ﻋﻢ ﺟﺪﻩ ﻭﺧﻮﺍﺕ ﺣﻨﺎﻩ .. ﺧﺶ ﻟﻠﻤﺮﺑﻮﻋﻪ ﺍﻟﺒﺮﺍﻧﻴﻪ .. ﻭﻋﻠﻴﺎ ﺭﻛﺒﺖ ﺩﻭﺷﺖ ﻭﺑﺪﻟﺖ ﻭﻧﺰﻟﺖ .. ﻗﻌﻤﺰﺕ ﻫﺪﺭﺯﻭﺍ ... ﻭﺑﻌﺪﻳﻦ ﺧﺸﻮﺍ ﻳﻌﻮﻟﻮﺍ ﻉ ﺍﻟﻌﺸﻲ .. ﺭﻛﺰﺕ ﻉ ﺑﻨﺎﺕ ﺧﻮﺍﺕ ﺑﺮﻧﻴﻪ ﻳﺸﺒﺤﻮﻟﻬﺎ ﻓﻲ ﺷﺒﺤﺎﺕ ﺳﻢ .. ﻣﻦ ﺍﻟﻠﻤﻪ ﺍﺻﻼ ﻻﺣﻈﺖ ﻫﺎﻟﺸﻲ ﺗﺠﺎﻫﻠﺖ ..
ﺍﻧﻌﺎﻡ : ﻟﻮﻟﻮ .. ﺗﻌﺎﻟﻲ ﻧﻌﺮﻓﻚ ﻉ ﻫﺪﻫﺪ ..
ﻋﻠﻴﺎ ﺟﺘﻬﺎ ﻭﺍﺑﺘﺴﻤﺖ : ﺷﺎﻳﻔﺘﻬﺎ ﻗﺒﻞ ..
ﻫﺪﻯ ﺑﻀﺤﻜﻪ : ﺍﻳﻪ ﺗﻼﻗﻴﻨﺎ .. ﻭﺳﻠﻤﻮﺍ ﻉ ﺑﻌﻀﻬﻢ ...
ﺷﻮﻳﻪ ﻭﺧﺸﻮﺍ ﺧﻮﻟﻪ ﻭﺟﻨﺎﻥ .. ﺳﻠﻤﻮﺍ ﻭﺑﺪﻭﺍ ﻣﻌﺎﻫﻢ ﻓﻲ ﺍﻟﻌﻮﺍﻟﻪ ..
ﻋﻠﻴﺎ : ﻣﺒﺎﺭﺭﻙ ﻋﻠﻴﻚ ﺍﻟﺤﺮﻳﻪ
ﺧﻮﻟﻪ : ﻫﻬﻬﻬﻬﻬﻬﻬﻬﻬﻬﻬﻪ ﻭﺍﻟﻠﻪ ﺃﺣﺴﻦ ﺗﻬﻨﺌﻪ ﺳﻤﻌﺘﻬﺎ
ﺍﻧﻌﺎﻡ : ﻓﻌﻼ ﻟﻤﺎ ﺗﺒﺪﺍ ﺍﻟﻮﺣﺪﻩ ﺣﺎﺻﻠﻪ ﻓﻲ ﻭﺍﺣﺪ ﻣﺎﻳﺴﻮﺍ ﺧﻼﺻﻬﺎ ﻣﻨﻪ ﻓﺮﺣﻪ " ﻃﺒﻌﺎ ﺍﻧﻌﺎﻡ ﻣﻄﻠﻘﻪ ﻭﺣﻨﻌﺮﻓﻮﺍ ﻗﺼﺘﻬﺎ .."
ﺑﺪﻭﺍ ﻳﻮﺗﻮﺍ ﻓﻲ ﺍﻟﺼﻔﺮ ﻗﻌﺪﻭﺍ ﻳﻤﺪﻭﺍ ﻟﻠﺮﺟﺎﻟﻪ ﺑﺶ ﻳﺮﻓﻌﻮﺍ
ﺳﺎﺭﺓ : ﻟﻮﻟﻮ ﻣﺪﻱ ﻟﺮﺍﺟﻠﻚ ..
ﻋﻠﻴﺎ ﺑﺪﻫﺸﻪ : ﺷﻨﻮ !! ﺗﻠﻘﺎﺋﻴﺎ ﻃﻠﻌﺖ ﻟﻘﺎﺗﻪ ﻭﺍﻗﻒ ..
ﺍﻟﺤﺴﻦ : ﻭﻳﻦ ﺍﻟﺼﻔﺮﻩ ..
ﻋﻠﻴﺎ ﺑﻌﺼﺒﻴﻪ : ﺻﻔﺮﺓ ﺷﻨﻲ ﺍﻟﻠﻲ ﺑﺘﻘﻴﻤﻬﺎ ﻭﺍﻧﺖ ﻫﺬﺍ ﺣﺎﻟﻚ
ﺍﻟﺤﺴﻦ ﺭﻓﻊ ﺣﻮﺍﺟﺒﻪ : ﺧﻴﺮﻩ ﺣﺎﻟﻲ ..
ﻋﻠﻴﺎ : ﻇﻬﺮﻙ ﻳﺎﺑﻨﻲ ﺁﺩﻡ ...
ﺍﻟﺤﺴﻦ : ﺍﻧﻌﺎﺍﺍﺍﻡ ..
ﻃﻠﻌﺖ ﺍﻧﻌﺎﻡ : ﻧﻌﻢ ..
ﺍﻟﺤﺴﻦ : ﺑﺎﻟﻠﻪ ﺑﺴﺮﻋﻪ ﺟﻴﺒﻲ ﺍﻟﺼﻔﺮﺓ ﺍﻟﻨﺎﺱ ﺗﺴﺘﻨﻰ ..
ﻋﻠﻴﺎ ﺗﻨﺮﻓﺰﺕ : ﺍﻗﻌﺪﻱ ﻳﺎﺇﻧﻌﺎﻡ ﺗﻮ ﻧﺠﻴﺒﻬﺎ ﺍﻧﻲ .. ﺷﺒﺤﺘﻠﻪ ﺑﺤﺪﻩ .. ﻭﺧﺸﺖ ..
ﺍﻧﻌﺎﻡ ﺿﺤﻜﺖ ﻭﺧﺸﺖ .. ﻭﻫﻮ ﺍﺑﺘﺴﻢ .. ﺷﻮﻳﻪ ﻭﺟﺎﺑﺘﻠﻪ ﺍﻟﺼﻔﺮﺓ
ﻋﻠﻴﺎ ﺑﻌﺼﺒﻴﻪ : ﺧﻮﺩ ﻫﺎﻙ .. ﺍﻧﻲ ﺍﻟﺤﻤﺎﺭﺓ ﻣﺎﻟﻲ ﻭﻣﺎﻟﻚ ﻇﻬﺮﻙ ﻭﻻﺑﻄﻨﻚ .. ﻭﺧﺸﺖ ﺩﺍﺧﻞ .. ﺍﻣﺎ ﻫﻮ ﻗﻌﺪ ﻳﻀﺤﻚ ﻻﺇﺭﺍﺩﻳﺎ ﻣﻦ ﻗﻠﺒﻪ ﻭﺭﻓﻊ ﺍﻟﺼﻔﺮﻩ ﻭﻫﻮ ﻳﺘﻨﻬﺪ ..💖
ﻛﻴﻒ ﺣﻄﻮﺍ ﺻﻔﺮ ﺍﻟﻨﺴﺎﻭﻳﻦ ﻋﻠﻴﺎ ﺷﺎﻓﺖ ﻭﺳﻴﻠﻪ .. ﺟﺖ ﺑﺘﺴﻠﻢ ﻋﻠﻴﻬﺎ ﺑﺎﻟﺨﺪ .. ﻭﺳﻴﻠﻪ ﺑﻌﺪﺕ ﺳﻠﻤﺖ ﺑﺎﻟﻴﺪ ﺑﺲ .. ﻋﻠﻴﺎ ﻗﺮﻳﺐ ﻣﺎﺗﺖ .. ﺷﺒﺤﻮﻟﻬﺎ .. ﻣﻮﻗﻒ ﺯﻱ ﺍﻟﺰﻓﺖ ..
ﺭﻳﺤﺎﻧﻪ ﺑﺮﺩﺕ ﻉ ﻗﻠﺒﻬﺎ ﺍﻟﺤﺮﻛﻪ ﻷﻧﻬﺎ ﻛﺎﻧﺖ ﻣﺤﺮﻭﻗﻪ ﻣﻦ ﺃﺧﺮ ﻣﺮﺓ ﺟﻲ ﻓﻴﻬﺎ ﻋﻤﻬﺎ ﻭﺗﻌﺎﻣﻞ ﻣﻊ ﻋﻠﻴﺎ ﺑﻄﺮﻳﻘﻪ ﻋﻜﺲ ﺍﻟﻠﻲ ﺗﻮﻗﻌﺘﻬﺎ ... ﺣﺘﻰ ﺑﻨﺎﺕ ﺧﻮﺍﺕ ﺑﺮﻧﻴﻪ ﻓﺮﺣﻮﺍ ﻓﻴﻬﺎ ..
ﺑﺮﻧﻴﻪ ﺑﺤﺪﻩ : ﻫﻴﺎ ﻗﻌﻤﺰﻭﺍ ﺗﻐﺪﻭﺍ ﺗﻐﺪﻭﺍ ﻭﺷﺒﺤﺖ ﻟﻮﺳﻴﻠﻪ ﺷﺒﺤﻪ ﻗﺴﻤﺘﻬﺎ ﻧﺼﻴﻦ ..
ﻳﺎﻧﺎﺭﻱ ﻋﻠﻴﺎ ﻣﺶ ﻗﺎﺩﺭﻩ ﺗﺒﻠﻊ ﺍﻟﻠﻘﻤﻪ ﻣﻦ ﺍﻟﻤﻮﻗﻒ .. ﺷﺎﺩﻩ ﺩﻣﻌﺘﻬﺎ ﺑﺎﻟﺴﻴﻒ ﻭﻛﻠﻬﻢ ﻣﺮﻛﺰﻳﻦ ﻋﻠﻴﻬﺎ .. ﻫﺎﻟﻪ ﻛﺎﻧﺖ ﺟﻨﺒﻬﺎ ﺣﻄﺖ ﺍﻳﺪﻫﺎ ﻉ ﻇﻬﺮ ﻋﻠﻴﺎ ﻭﻣﺸﺖ ﻋﻠﻴﻪ .. ﻋﻠﻴﺎ ﺷﺒﺤﺘﻠﻬﺎ ﻭﺍﺑﺘﺴﻤﺖ ﺑﺄﻟﻢ ..
ﻛﻤﻠﻮﺍ ﻭﻧﺎﺿﻮﺍ ﻟﻐﺴﻞ ﺍﻟﻤﺎﻋﻴﻦ ... ﻋﻠﻴﺎ ﺗﻐﺴﻞ ﻭﺗﻠﻬﻲ ﻓﺮﻭﺣﻬﺎ ﺑﺶ ﺗﻨﺴﻰ ﺍﻟﻤﻮﻗﻒ ﺍﻟﻠﻲ ﺣﺮﻗﻬﺎ ..
ﺑﻌﺪ ﻛﻤﻠﻮﺍ ... ﺧﺸﻮﺍ ﻭﻋﻠﻴﺎ ﺟﺖ ﺧﺎﺷﻪ ﻟﻘﺖ ﻭﺳﻴﻠﻪ ﻣﻊ ﺟﻨﺎﻥ ﻃﺎﻟﻌﺎﺕ ..
ﻋﻠﻴﺎ ﻛﻤﻠﺖ ﻃﺮﻳﻘﻬﺎ .. ﻭﺳﻴﻠﻪ ﺷﺒﺤﺘﻠﻬﺎ ..
ﻭﺳﻴﻠﻪ : ﻫﻜﻲ ﺭﺑﻮﻙ ﺍﻫﻠﻚ ﺗﻔﻮﺗﻲ ﻋﺰﻭﺯﺗﻚ ﻭﺗﺴﻜﺘﺮﺩﻳﻬﺎ ..
ﻋﻠﻴﺎ ﺍﻧﺼﺪﻣﺖ : ﻣﺶ ﻗﺼﺪﻱ ..
ﺟﻨﺎﻥ : ﻣﺎﻣﺎ ﺧﻴﺮﻙ ..
ﻭﺳﻴﻠﻪ : ﺍﻧﺘﻲ ﺍﺳﻜﺘﻲ .. ﻭﻟﺪﻱ ﻉ ﺧﺎﻃﺮﻙ ﺍﻧﺘﻲ ﻗﻄﻌﻨﻲ ﻭﻻﻋﺎﺩ ﻭﺭﺍﻧﻲ ﻭﺟﻬﻪ ﻭﻻﺳﻤﻌﻨﻲ ﺻﻮﺗﻪ ﻭﻳﺎﺭﻳﺘﻚ ﻏﻴﺮ ﺗﺴﺘﺎﻫﻠﻲ ..
ﻋﻠﻴﺎ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ﻭﻻﻗﺪﺭﺕ ﺗﻨﻄﻖ ﺑﺤﺮﻑ ..
ﺟﻨﺎﻥ ﺑﺤﺪﻩ : ﻣﺎﻣﺎ ﺍﺭﺟﻮﻙ
ﻭﺳﻴﻠﻪ : ﺍﻧﻲ ﻛﻞ ﻫﻤﻲ ﻣﺼﻠﺤﻪ ﻭﻟﺪﻱ ﻭﺻﻐﺎﺭﻩ ﺑﻌﺪﻳﻦ ﻣﺎﻧﺒﻴﺸﻲ ﻳﺎﺧﺪ ﻭﺣﺪﻩ ﻟﺤﻘﺘﻬﺎ ﺩﻭﺓ ﻭﺧﻮﻫﺎ ﻣﺠﺮﻡ .. ﻳﻘﻮﻟﻮﺍ ﻗﺒﻞ ﺗﺎﺧﺪ ﻟﻮﻟﺪﻙ ﺃﻡ ﺃﺳﺄﻝ ﻉ ﺧﻮﺍﻟﻪ .. ﻟﻜﻦ ﺍﻟﻠﻪ ﻏﺎﻟﺐ .. ﺑﺨﺖ ..
ﻭﻣﺸﺖ ﺧﺸﺖ ... ﻋﻠﻴﺎ ﻭﺍﻗﻔﻪ ﻣﺶ ﻗﺎﺩﺭﻩ ﺗﺘﺤﺮﻙ ﻣﻦ ﺻﺪﻣﺘﻬﺎ ﺑﺎﻟﻜﻼﻡ ﺍﻟﻠﻲ ﺳﻤﻌﺎﺗﻪ ..
ﺟﻨﺎﻥ ﺣﻄﺖ ﺍﻳﺪﻫﺎ ﻉ ﺫﺭﺍﻉ ﻋﻠﻴﺎ : ﻋﻠﻴﺎ ..
ﻋﻠﻴﺎ ﻭﺧﺎﻧﻘﺘﻬﺎ ﺍﻟﻌﺒﺮﻩ : ﺑﺎﻟﻠﻪ ﻋﻠﻴﻚ ﺧﻠﻴﻨﻲ ﺑﺮﻭﺣﻲ ...
ﺟﻨﺎﻥ ﻭ ﻫﻲ ﻣﺘﺄﺳﻔﻪ .. ﺧﺸﺖ ﻭﻋﻠﻴﺎ ﻣﺸﺖ ﻗﻌﻤﺰﺕ ﻉ ﻛﺮﺳﻲ ﻭﻗﻌﺪﺕ ﺗﺒﻜﻲ ﺣﻄﺖ ﺍﻳﺪﻫﺎ ﻉ ﻓﻤﻬﺎ ﺑﺶ ﻣﺎﺣﺪ ﻳﺴﻤﻌﻬﺎ ...
ﻟﺪﺍﺧﻞ ..
ﻧﺎﺩﺕ ﻋﻔﺎﻑ ﻉ ﺍﻟﺤﺴﻦ ﻭﺳﺮﻣﺪ ﺑﺎﺵ ﺗﺸﻮﻓﻬﻢ ... ﺟﻮ ﻭﻗﻌﺪﻭﺍ ﻭﺍﻗﻔﻴﻦ ﻳﻬﺪﺭﺯﻭﺍ ﺑﻌﺪ ﺳﻠﻤﻮﺍ ﻉ ﻋﻤﺘﻬﻢ .. ﺍﻟﺤﺴﻦ ﻗﻌﺪ ﻳﺪﻭﺭ ﺑﻌﻴﻮﻧﻪ ﻋﻠﻴﻬﺎ ﻣﺎﻟﻘﻬﺎﺵ ﻛﻠﻬﻢ ﻣﻮﺟﻮﺩﻳﻦ ﻣﺎﻋﺪﺍ ﻫﻲ ... ﺟﺖ ﻋﻴﻨﻪ ﻉ ﺟﻨﺎﻥ ﺍﻟﻠﻲ ﻛﺎﻧﺖ ﺗﺸﺒﺤﻠﻪ ﺑﻀﻴﻖ ﻫﻮ ﺭﻛﺰ ﻋﻠﻴﻬﺎ ﻧﺎﺩﻯ ﻋﻠﻴﻬﺎ ﺑﺤﺮﻛﻪ ﺩﺍﺭﻫﺎ ﺑﻌﻴﻮﻧﻪ .. ﺟﺎﺗﻪ ..
ﺍﻟﺤﺴﻦ : ﻭﻳﻨﻬﺎ ..
ﺟﻨﺎﻥ : ﺍﺣﻤﻢ ﺑﺮﺍ ..
ﺍﻟﺤﺴﻦ : ﻭﻳﻦ ﺑﺮﺍ ...
ﺟﻨﺎﻥ : ﻓﺎﻟﺠﻨﺎﻥ ﺟﻬﺔ ﺍﻟﻜﻮﺟﻴﻨﻪ ...
ﺍﻟﺤﺴﻦ ﻟﻒ ﻭﻃﻠﻊ ... ﻟﻒ ﻉ ﺍﻟﺠﻨﺎﻥ ﻣﻦ ﺍﻟﺠﻬﺔ ﺍﻟﺘﺎﻧﻴﻪ .. ﻟﻴﻦ ﻭﺻﻞ ﻟﺠﻬﺔ ﺍﻟﻜﻮﺟﻴﻨﻪ ... ﻟﻤﺤﻬﺎ ﻣﻘﻌﻤﺰﺓ ... ﻗﺪﻡ ﻟﻘﺎﻫﺎ ﺗﺒﻜﻲ ... ﻭﻗﻒ ﻋﻠﻴﻬﺎ ..
ﺍﻟﺤﺴﻦ : ﺧﻴﺮﻙ؟؟
ﻋﻠﻴﺎ ﻗﺎﻣﺖ ﻋﻴﻮﻧﻬﺎ ﺍﻟﻤﺪﻣﻌﺎﺕ ﻓﻴﻪ ﻭﻧﺎﺿﺖ ﻭﻫﻲ ﻓﻌﺰ ﻏﻀﺒﻬﺎ : ﻳﺎﺭﻳﺘﻨﻲ ﻣﺎﺷﻔﺘﻚ ﻭﻻ ﻋﺮﻓﺘﻚ ﻛﺎﺭﻫﺔ ﺍﻟﺴﺎﻋﻪ ﺍﻟﻠﻲ ﻭﺍﻓﻘﺖ ﻓﻴﻬﺎ ﻋﻠﻴﻚ .. ﺍﻧﺖ ﻧﻔﺴﻚ .. ﻧﻜﺮﻫﻚ .. ﻧﻜﺮﻫﻚ .. ﻭﺧﺸﺖ ﺩﺍﺧﻞ ﻭﻫﻲ ﺗﺒﻜﻲ ..
ﺍﻟﺤﺴﻦ ﻗﻌﺪ ﻭﺍﻗﻒ ﻣﺼﺪﻭﻡ .. ﺑﻌﺪ ﺷﻮﻳﻪ .. ﺗﺤﺮﻙ ﻭﻃﻠﻊ ﻣﻦ ﺍﻟﺤﻮﺵ ﻛﻠﻪ ..
... ﻳﺘﺒﻊ
