#الحسن
#جمان_فريد
الجزء21💓
أسبوع كامل فات من هذاكا اليوم..
الحسن ماجاش فيهم للحوش بتاتا طلع في مهمه لمنطقه تانيه في طرابلس..
عليا لأول مرة ماتتجاهلش غيابه ماتحسش انها مرتاحه لأنها معاش تشوف فيه..حست بشعور خوف من نوع جديد..
خوف من الفقد..مش عارفه علاش حست بيه..ممكن لأن في هالأيام البسيطه اللي عاشتها معاه شافت فيه حنيه ماشفتهاش في حد من قبل حنيه ماليهاش زي..او لأنها حست بأمان حقيقي معاه..المهم هي حاسه روحها فاقدته وخلاص..الوعد اللي قطعه ع نفسه قدامها هو كان أكبر سبب في وجود هالخوف ...
أما هو فكان حاط كل اهتمامه في المهمه اللي ماشيلها..هو قلبه صح مش مهنيه بس يحاول يتجاهله ع قد مايقدر..يبي يعوده ع غيابها يبيه يفهم انها مش ليه..بس القلب كان عاند في الحب السيطره عليه مستحيله..
في يوم الصبح
كانت السمي معبيه غيوم لونها غامق تنذر بهطول امطار غزيرة..
عليا لبست ماليه ورديه تحتها سروال جنيز ..ولبست فوقهم بالطوا لونه موف داكن ووشاح وردي ولبست بوت حلو في رجليها لونه موف داكن حشت فيه السروال..كانت واقفه مع هاله يستنوا في العم سالم السواق...
عليا : نحبه الجو هذا..
هاله : امم حلو جايه مطره قويه
عليا : ايه ..
ع طلعة برنيه: لابسين باهي
هاله وعليا ابتسموا وهزوا روسهم بإيجاب...
انفتح باب الحوش الحسن كان خاش ويتكلم بالتليفون..
عليا لما شافته لأول مرة قلبها يدق بالقوة ..💓
سمعوا الكلاكس.
هاله: عمي سالم جي..
عليا وهي تشبح للحسن: هيا..
سلموا ع برنيه...الحسن وهو يتكلم في التليفون قام عيونه فيها مرر نظراته عليها وركز عيونه في بوتها"تو هذا يتحمل اللبز والميه عليك حاله"..
نزلوا هما الزوز متوجهات للباب ..هاله ماشيه قدام عليا..
الحسن كمل مكالمته وبيخش خطموا جنب بعض عليا قعدت تشبحله وهو شبحلها بنظره ع جنب حاده...عليا تشجعت
عليا : صباح الخير...
لكن هو حول عيونه القدام وكمل طريقه ولا رد عليها ولاعبرها..اضايقت لين خلاص..طلعوا من الحوش وركبوا السياره صبحوا ع السواق...السواق فتح الراديو وصدفت فيه أغنيه ليبيه قديمه...
خطم حفني شيع عيونه فيا
سلمت مارد السلام عليا..
مااارد السلام
ماااارد السلام
رد السلام عليا ..
عليا تنهدت بضيق وقعدت تشبح للروشن وهي مش فاهمه شن اللي ضايقها لهالحد...
***
الساعه 11
كان اليوم موعد الجلسه الثالثه في قضية الطلاق اللي رفعتها خوله ع سليم..كانت متأمله انه مايجيش كالعاده وتحكملها المحكمه بالطلاق..
كانت مقعمزة تستنى في دورها شدت انتباهها مكالمه لشخص مقعمز وراها..
: لا يابابا طعمته زي الكرز اللي درتيه ع الكيكه يومها.....ايه....هيا اشربيه واذكري لما كنتي تاكلي في الكرزة......هيا حبيبة بوها.................شربتيه حق!!!...قلتها اني بنتي شاطره وقويه....لما بنروح جايبلك معاي مفاجأة...هههههه ايه ....تمام عطيني ابله حميده......
ايوه حميده شربت الدوا.....كويس....عينك عليها ياحميده ردي بالك تغفلي لحظه.....تمام......صكر..قام عيونه لقي خوله متلفته وتشبحله وجهها ولااحمر ابتسمت ابتسامه خفيفه وتلفتت بسرعه..اما هو ابتسم ورجع يستنى في دوره...
شويه وخش سليم ومعاه محاميه ...خوله لما شافته انصدمت وكذلك نجاه اللي حست ان في شي...
شويه وضبحوا عليهم..ناضت خوله مع نجاه..وسليم مع المحامي وخشوا..
سأل القاضي شن اسباب طلب الطلاق...
شرحت خوله أسبابها للقاضي..والقاضي بدوره سأل سليم هل حيطلق أولا..
سليم شبحلها بغل وشبح للقاضي: نطلقها!!!طلع فيا العيب كله توا ياخوله...حضرة القاضي ..اني عشت مع المراة هادي واني متوهم انها تجيب في الصغار وامورها تمام وماعندهاش مشكله..لين عرفت بطريقتي الخاصه انها ماتجيبش وانها طلبت من الدكتورة اللي تعاين عندها تقول العكس وتسلمني نتائج تحاليل كاذبه انها سليمه تجيب في الصغار وفي الحقيقه هيا عقيمه..
خوله انصدمت : كذاب...
سليم: اللي ماعنده شاهد كذاب زي مايقولوا..عندي شاهد ع صحه كلامي..
القاضي : جاي معاك...
سليم : ايه...
القاضي : نادوا ع الشاهد ..الاسم..
سليم : ملاك الزايدي...
خوله انصدمت لما سمعت الإسم...
نادوا عليها وخشت ملاك هادي تكون دكتورة خوله وصديقتها في نفس الوقت..حكت للقاضي ان خوله ترجتها تزور في التحاليل وان هي دارت هكي فعلا وعطتهولها بش توريها لراجلها وعطت للمحكمه وراق تحاليل قالت انهم التحاليل اللي تثبت ان خوله عقيمه...
خوله قريب انشلت من الصدمه من اللي تشوف فيه معاش عرفت شن تقول ولانجاه كذلك اللي صار توا صادم بقوة...وغير متوقع...
سليم: هذا غير اني شديتها كذا مرة تتكلم بالتليفون مع واحد بس ماقدرت ندير شي...خوها كان شخص متجبر والحق كنت خايف ع نفسي وعيلتي منه وماقدرت نديرلها شي...
المحامي متاعه..طلب انه موكله يطلق بشرط تسقط حقوق خوله كامله وماتاخد منه ولا حاجه..
ونجاه ترافعت بطريقه خلت القاضي يأجل الجلسه لتاريخ يوم تاني بعد شهر...طلعوا من القاعه وخوله من قهرتها قعدت تتحسب.."حسبي الله ونعم الوكيل فيكم الله ينتقم منكم كلاااب" طلعوا وتجاهلوها وهي من قهرتها اغمى عليها....
***
في الجامعه...
ابتسام: للوش خيرك نحس فيك مش ع بعضك..
عليا ابتسمت مجامله: مافي شي ..انتي ماصارش معاك جديد..
ابتسام بحزن هزت راسها بالنفي...
عليا تنهدت وسكتت...
"السلام عليكم"
تلفتوا الزوز..وابتسام فرحت من قلبها..
عليا ابتسمت وناضت: تلقيني بحدا القاعات بسبس..ومشت..
قعمز بلال في مكان عليا..وقعد يشبح لأبتسام اللي وجهها كان أحمر ومبتسمه بخجل وعيونها لوطا...
بلال: استاحشتك..
ابتسام قعدت تفرك في ايديها ببعض من الخجل وشادة ضحكتها...
بلال بضحكه: وانتي..
ابتسام شبحتله: اسفه ع اللي صار أخر مرة والله من يومها لليوم حتى النوم معاش نرقد كويس..
فهم بلال انها قالتله استاحشتك بطريقة تانيه..
بلال بإبتسامه: حتى اني النوم جفاني..وجعتني أمي هلبه..
اول مره تنهان هكي..
ابتسام بأسف: ياحليلي..والله لو نلقى نمشيلها نبوس ع راسها ونعتذر منها..
بلال بإبتسامه يتامل فيها: انتي ماغلطتيش بش تعتذري..
ابتسام بخجل: مهما كان اللي غلط فيها بوي...
بلال: تعرفي انك عجبتيها هلبه..
ابتسام وطت عيونها لوطا وسكتت من الحشم..
بلال: ابتسام..
شبحتله : نعم..
بلال يشبحلها بحب: الله ينعم عليك...بنجي لبوك مرة تانيه..
ابتسام متفاجئه : تحكي جد!!!
بلال: وجد الجد...
ابتسام ابتسمت: تصدق انه اخر مرة قالي لو شفتيه قوليله يجيني نتفاهم معاه لو يبي ياخدك يعرف شروطي..
بلال"كويييس بكل": بجديات!!
ابتسام بضحكه: والله ...
بلال: تمام ...الأيام الجايه حنمشيله..بس نقدر نعرف نبده عن شروطه..
ابتسام بضحكه: اعرفهم بروحك أفضل..
بلال: هههههههههه تمام...
ابتسام ناضت : نستأذن توا ومشت..
بلال قعد معاها بعيونه.."والله ياإبتسام نبيك ..الذنب مش ذنبك ذنب بوك ولازم يلقى جزاء أفعاله"..
***
الحسن : الواطي وديني وماأعبد لما ندمه ع يوم اللي جي فيه ع الدنيا..
نجاه: تصرف بحذر يالحسن ماتعرفش شن يطلع معاه هذا..
الحسن هز راسه بإيجاب وهو في قمة العصبيه..
طلعت خوله من حجرة الدكتورة...
الحسن جاها: وحق من حط فيا الروح حناخد حقك من عيونه...خوله خشت في حضن خوها..وهو قاعد حاضنها ومشوا مع نجاه طالعين من المستشفى..
***
نزل من السيارة ونزلوا وراه الحرس..خش لمبنى كبير ..كل من يشوفه يوقفله ..لين وصل في مكتبه..
وراه السكرتيره: عندك مواعيد اليوم نأجلها ولانخليها استاذ رياض..
رياض: اجليها كلها...ناديلي وليد..
هزت راسها بإيجاب وطلعت ..شويه وخش وليد..وقعمز طول..
وليد: شن صار معاك..
رياض : خديت الحضانه..
وليد: مبارك ياباشا..شن نديروا توا
رياض : فوتوها هي وماليها في ستين داهيه المهم بنتي قعدت عندي..نبيك في موضوع تاني..
وليد: قول..
رياض: نبيك تجيبلي معلومات عن زوز..
وليد : الأسماء..
رياض : سليم محمدالصافي...وخوله عابد الصادق..
وليد : ممكن نعرف علاش..
رياض: يجي وقته وتعرف..نبي عنهم كل شي ياوليد
وليد : تمام ...
***
الساعه 1ظهرا..
المطر تصب وعليا تتفرج عليها من روشن السيارة ومبتسمه ..يومها كانت مروحه بروحها لأن هاله كملت بكري وروح بيها السواق قبلها...
عليا كالعاده تحب دير حاجات مجنونه المهم تستمتع بوقتها كل ماسنحتلها الفرصه..
عليا : عمي سالم وقف هني..
سالم : علاش..
عليا: بنكمل ع رجليا..
سالم اتفاجئ:بنتي ماتشوفيش في الجو برا
عليا بضحكه: خيره يهبببل..
سالم ضحك: ويمرض يابنتي..
عليابتوسل : غير بالله عليك ياعمو وقف..خلاص اصلا الحوش اهوا..
سالم : يابنتي مسؤوليه ره..
عليا : اني حنتحملها ..وبعدين مافي حد حيعرف..
بعد محاولات استسلم سالم ونزلها ..وكملت عليا تحت المطر وكانت تجري وتضحك..وتعفس ع التراب المبلول اللي مولي "لبز" وبوتها مشي فيها ..وصلت للحوش فتحت الباب وخشت..تسحبت بش ماحد يشوفها مبلوله حولت بوتها تحت اول درجه من دروج واجهة الحوش وحولت شخشيرها المبلول وهي ادور بعيونها في المكان وركبت تجري فتحت الفاصل بهدوء وسكراته وراها وركبت لشقتها...
***
كلب الزينه هذا ...
: شن نديروا..
منذر: اني تو ندير ...المهم توا ..نبيك تمشي للتمساح قوله يجيني..
: حاضر...ايه بنقولك..امك الفترة اللي فاتت تعبت وخشت المستشفى يوم وطلعت وماحد يعلم بيها من خواتك المتزوجات ..
منذر بخوف : خيرها....
:ضغط هبط..
منذر بألم : ديما كانت تصيرلها هالحاله بنيتها ضعيفه شويه..وتوا شن حالها
: كويسه ...
منذر تنهد بألم: تمام..برا دير اللي قتلك عليه..
: تم ياراس..ومشي..
ومنذر عيونه تعبوا دموع وهو يفكر في أمه...
***
وسيله : جعله يلقاه ويتلقاه هالكلب ...
عابد : خوك شن قال..
خوله ببكي : يتوعد فيه من بكري قالي حيتصرف معاه..
جنان: معقوله سليم يطلع حقير لهالدرجه..
خوله : هو حقير من الأساس بس هذا وين بانت حقيقته..
عابد: والله يابابا ماهو مفوتها تو يشوف شن يصير فيه..
وسيله : الله ياخد الحق فيه بجاهه وسلطانه..
...
العشيه
في حوش الحاج علي..
برنيه : الفجي فيها بنيتي..
انعام ودموعها تنزل: كلاب ..
ساره بغضب: واحد مسخ ماتوقعتاش هكي بكل..
عليا : لاحول ولاقوه إلا بالله..والله خوله طيبه وماتستاهلش بكل...
هاله : إن الله إذا احب عبدا ابتلاه ..ربي يفرج عليها ويعوضها خير..
كلهم : آاامين..
عليا قعدت تكح..
برنيه : خيرك بنتي..
عليا ابتسمت : شرقت بريقي"كذابه"
انعام تمسح في دموعها : تو نجيبلك اميه..
عليا ناضت: والله مانك نايضه..تو نمشي بروحي..ومشت عليا..
هاله : وجهها احمر ..
برنيه : حتى اني لاحظتها..
ساره: الجو يمرض..حتى اني رقبتي حسيتها مجرحه..
برنيه :ردي بالك انتي راك حامل..
ساره : اطمني ياحنينه..
انعام : اليوم برنامج سرمد..
سارة : ايه...
وفات الوقت وجي الليل كانوا يتفرجوا ع برنامج سرمد مع بعض ماعدا عليا اللي كانت في شقتها تقرا..وشدتها كحه وحاسه روحها مش ع بعضها بس تجاهلت..وكملت قرايه..شويه وناضت وتت حوايجها لليوم اللي بعده..
عليا ضربت بأيدها ع راسها : نسيت مامسحتش البوت..ووواك..لبست وشاحها وكبوط مشت بش تنزل تمسحه وتركبه..
في نفس الوقت..
خش الحسن للحوش...وهو ماشي..لمح البوت في اول الدروج كيف ملبز..ابتسم بتهكم وهز راسه ايمين ويسار..قامه وركب بيه حول بالطوه حطه ع المدخل المحطوط برا..وطلع فرشه نظيفه من القجر متاع المدخل..وقعمز ع الدروج اللي تأكد انه جاف لأن المطر وقفت من بعد الظهر ..وقعد يمسح في البوت..
عليا نزلت كان الباب متاع الفاصل مفتوح وهي طالعه انصدمت باللي شافاته..مقعمز ويمسح فيه زين ..بس كان منظره يهبل ..عليا وهي تشبحله عيونها تعبوا دموع وخرت خطوات ورجعت ركبت من جديد ودموعها ينزلوا خشت شقتها وسكرت الباب..خشت قعمزت ع الصالون وهي تبكي
"آاااه لو نعرف علاش يدير هكي..علاش هو هكي..اني مش قادره نفهمه "...
شويه وطق الباب طقتين شبحت للباب هلبه بعدين ناضت..
فتحاته مالقت حد استغربت كيف جت بتخش عيونها شبحوا تحت لقت بوتها نظيف تماما ابتسمت من بين دموعها وقاماته..شمت ريحته عالقه في البوت ابتسمت ومسحت دموعها وخشت..
***
تاني يوم الصبح..
برنيه : وين عليا..
هاله : مش عارفه علاش عطلت ..تو نتصل بيها..اتصلت هاله..
في نفس الوقت عليا كانت قاعده في سريرها بس عيونها مفتوحات حاسه روحها تعبانه وجهدها طايح..رن تليفونها
بالسيف بش خداته من ع الكامدينو وردت..
عليا بصوت تاعب: آاالو..
هاله : عليا وينك..
عليا : امشي..هاله..اني ..مش ماشيه..
هاله بخوف: عليا خيره صوتك هكي..
عليا: حاسه.. روحي ..مريضه
هاله : تمام تمام تو نكلم حناي وسكرت..هاله قدمت داخل..
هاله : حناااي حناااي..
طلعت برنيه : شنو بنيتي..
هاله : عليا مريضه شكلها
برنيه بخلعه : مريضه!!!
هاله : ايه..
صوت كلاكس ...
هاله : هذا عمي سالم جي..هي بالسلامه ياحناي..ومشت طلعت بسرعه..
ركبت برنيه فوق وطقت ع عليا..
عليا تسمع في طق الباب حاولت تنوض..وناضت ..تمشي بالسيف لين وصلت في الباب..فتحت..
برنيه: خيرك بنيتي..
عليا: علاش تعبتي ..روحك.
برنيه : شن تقولي يابنتي بس..شدت عليا وقعمزتها مست جبهتها...بنيتي راك نار تلهب
عليا مش قادرة ترد..قعدت تكح..
برنيه : هادي برده..رقدتها ع الكنبه..شويه بنيتي وجايه..
نزلت الحاجه من فوق ..سمعت باب الحوش انفتح لقاته الحسن..قدم وركب للدروج ..
الحسن : صباح الخير حناي..
برنيه : خير خير..اركب لمرتك وليدي راهي مريضه..
الحسن قلبه رعش : خيرها!!!
برنيه : شكلها واخده برده.. وخشت طول..
الحسن بسرعه ركب الدرجتين بدرجه لين وصل في الشقه لقاها مفتوحه خش لقي عليا راقده ع الكنبه وتأن..قدملها قعد يشوف في حرارتها..حط ايده ع جبهتها فتحت عيونها وشافته..حط ايده بالقفا ع خدودها ..بعدين رقبتها..
الحسن : زي النار.. قامها في حضنه وهي تفتح في عيونها وتسكر وتشوفله..دخلها داخل ...لقي بشت ازرق كحلي ع الشماعه خداه ووشاح مشماشي.
لبسها البشت ولف عليها الوشاح وقنطه كويس..
وقامها..وطلع بيها من الشقه ونزل بيها من الدروج وهي تفتح في عيونها تشوفله وتسكرهم..وصل تحت قابلاته حناه..
برنيه : وين رافعها..
الحسن قعمزها ع الدروج وقعد يلبسلها في كندرتها: حرارتها مرتفعه هلبه ياحناي تبي مستشفى هادي..لبسها كندرتهاوعليا تشوفله ...قامها وطلع بيها طول..
وبرنيه واقفه بطاستها اللي كان دايره فيها اعشاب لعليا ..ابتسمت وقالت: طالع لجده علي ضحكت وخشت..
اما الحسن ركب عليا جنبه بعد نزل الكرسي شويه وركب هو وطلع طووول لأقرب مستشفى...
كان يسوق ويشوفلها ...يشبح فيها دايخه خاف..
الحسن : عليا..
عليا لما سمعت اسمها لأول مرة من فمه حست قلبها تكهرب فتحت عيونها وشبحتله هو شبحلها وارتاح وشبح القدام..
رد من جديد شبحلها لقاها مسكرة عيونها: فايقه..
عليا فتحت عيونها ..دارت حركه غيرمتوقعه حطت ايدها ع ايده..هو انصعق وقريب دار حادت من تأثير لمستها عليه
عليا : بنشد ايدك بش تعرف انه مافقدتش الوعي..هو ماقدرش يشبحلها عيونه القدام..وعقله مش معاه..وحالته حاله ..مش عارف كيف وصل قدام أول مصحه شافها...
نزل ..ومشي جيهتها فتح الباب بينزلها..
عليا : تو يشوفوك الناس ويضحكوا عليك كان دخلتني بهالطريقه..
الحسن: ترا سكري فمك..وقامها وخش بيها داخل وكلهم يشوفوله..جماعه المصحه عرفوه وخلوه طول يدخلها لوحده من الغرف داخل وطلع وخلاهم يفحصوها...
بعدين شوي طلعت الدكتورة ...
الدكتورة : برده ..عطيناها خافض حراره وتونكتبلها مضاد تاخده لأن عندها احتقان في رقبتها..لاباس عليها..
الحسن : لايوريك باس...
بعد كم ساعه..عليا ولت أحسن وطلعت شدها من يدها وطلعها وصلوا في السيارة فتحلها الباب ركبت سكر الباب وهو ولا ركب..وتحركوا..
عليا : عليك عار ..
الحسن : شنو!!
عليا : شن اللي لبستهولي هذا..وشاح مشماشي وبشت ازرق كحلي وكندرة خضرا..
الحسن هز راسه ايمين وايسار وماباش يعلق..
عليا حطت ايدها ع وجهها :وووااك كل مانذكر منظري كيف كان تمنيت الأرض انشقت وبلعتني..
الحسن عصب: ماك تافهه..
عليا تنرفزت : شنووو
الحسن : ايه تافهه للمليون..انتي قريب شيطي من الحرارة وشبه مش واعيه..تبيني نفكر في اناقة حضرت جنابك وقتها..
عليا: بكل اسلوبك ديما بربري..
الحسن : كان عجبك...
عليا : مش عاجبني..
الحسن : افتحي الباب وانزلي..
عليا عصبت : باه وقف خل ننزل..
الحسن : انزلي منها وهي تمشي..
عليا بشهقه: شنوووو؟
ابتسم بتهكم وماباش يرد...
عليا جربت تفتح الباب من كثر ماعصبت بس كان مسكر بتأمينه..
الحسن قعد ع صوابعه : عيله..ومهبوله..وتافهه..
عليا قعدت تعد ع صوابعها : وانت همجي ..وبربري..ومتخلف..
الحسن : به ضمي فمك خليني نعرف نسوق..
عليا : مانيش ضاماته
الحسن زاد السرعه وعليا ماتت من الخوف..
عليا بخوف شديد: خللاااااص خلااص واها ..حطت ايدها ع فمها..
هو هدا وابتسم ع جنب..
جت عليهم الشمس لبس نظراته ونزل واقي اللي فوق كرسيها ع مرش بش يتقي عليها الشمس ..هي قلبت وجهها للروشن وابتسمت..وهو قعد مركز في الطريق...
...يتبع...
