#الحسن
#جمان_فريد
الجزء22💓
وصلوا الحسن وعليا للحوش ..نزلت قبله وهو نزل بعدها وفتح الباب..خشت وهو خش وصكر الباب..
قابلوهم سرمد وانعام واقفين برا..
سرمد: لاباس لاباس ..
عليا ابتسمت: لايوريك باس..
الحسن:😑
انعام شاده ضحكتها لما وزعت نظرها ع عليا من فوق لتحت عليا ركزت عليها..
عليا : اضحكي ماتشديهاش معترفه ان منظري يضحك..تقول جايه من أنجامينا وشبحت لحسن ع الجنب😒
سرمد وانعام : هههههههههههههههه
الحسن : خشوا داخل خشوا..
سرمد بضحكه:اني طالع عندي مشوار..
الحسن : وين ...
سرمد : واحد من جماعه محطة*****بيكلمني في شغل...
الحسن : قصدك بتسيب المحطه اللي انت فيها..
سرمد : قاعد نفكر..
عليا : خليه يطور مش ديما حيقعد في نفس المكان..
سرمد: ناس تفهم...
الحسن : انتي شن قاعده اديري هني خشششي..
عليا لفت وخشت وهي متنرفزة...
أما سرمد قعد يضحك وطلع ....
والحسن قام تليفونه ودار مكالمه..
عليا وهي خاشه: خل نركب فوق نغير العار هذا قبل..
***
تمساح الليله الكوبرا يبينا ...
التمساح: خطير الكوبرا هذا...اخطر من الكوماندا..
منذر: الكوماندا ليه وقت خلاص كبر..حتى أساليبه قديمه بس الكوبرا في ريعان الشباب وخبيث من الطراز الرفيع..
التمساح : اول مرة نقعمز معاه...
منذر:قابلته مره وحده ..كان مقنع بعدين فهمت ان ماحد يقدر يشوفه..
التمساح : شن يبي في نظرك...
منذر مط شواربه بتساؤل :مش عارف..ابتسم ..في الليل حنعرفوا...
***
بعد كمل الحسن مكالمته خش داخل لقاهم مقعمزين في الصاله قعمز ...
طلعت انعام القهوة طلعت وراها ريحانه بالبسبوسه..والحسن معنداش الروح معاها..
وصلت فيه وهي تفرق ..
ريحانه : عسلها حقاني ...
الحسن: انتي تجيبي فيها صح..
ريحانه فرحت اول مره يمدحها اول مرة يقوللها كلمه حلوه ..الشعور اللي هو يحس بيه مخليه كان يلقى يفرق حب ع الناس كلها..
ريحانه ابتسمت: شكرا..
ع خشة عليا شافت اللقطه..ارتفعت حرارتها مش من البرده...بس من مرض تاني شكلها عليا حتنصاب بيه عن قريب...
خشت قعمزت وهي ع أعصابها جتها ريحانه...
ريحانه بإبتسامه خبث: تفضلي..
عليا ابتسمت من غير نيه: شكرا مانبيش..
ريحانه : اييه ع راحتك...وحطتها ع الطاوله وقعمزت...
سارة: يعطيك الصحه ياريحانه..
انعام : فنانه في البسبوسه..
حسان: ايه مافي حد يعرف يديرها خير منها..هاله تاكل ومطنشه..
الحسن يشبح لعليا اللي كانت مكتفه ايديها في بعض ورافعه حاجبها وواضح معصبه..
الحسن : في الحلو كله فنانه..
ريحانه فتحت عيونها بدهشه وابتسمت بفرح..
اما عليا قامت عيونها في الحسن وهو شبحلها بإستفزاز ورجع ياكل في البسبوسه ...
عليا قربت من هاله : تنوضي نخشوا الكوجينه..
هاله : احسن شي...
ناضوا الزوز ...
انعام : خيركم...
عليا : بنخشوا نعولوا ع العشي..
سارة : شن بديروا..
هاله : شاورما..
عليا: واني بندير بيتزا ..
ساره : يمممممي..
ضحكوا الزوز ومشوا للكوجينه ...وحسان والحسن معاهم بعيونهم...
***
بنمشي نشوف بوي..
وسيله : الله يسامح من تسبب في قص رجلنا من هداكا الحوش..
عابد: هيا اني طالع ماتبي شي..
وسيله : سلم ع الحاج والحاجه..
عابد هز راسه بإيجاب وطلع..
***
البنات في الكوجينه..
انعام : غدوة لمه بنت خالتي مرضيه..
ساره: ربيعه ...بدير لمه جيابها وأخيرا ...صغارها سكروا 40يوم..
عليا وهي تطرح في العجينه: صغارها؟
انعام بضحكه: ايه جابت توأم..
هاله : ماشاء الله..
انعام : المهم عزمتكم انتوا الزوز خص نص..
عليا: جت فوقتها خاطري في مناسبه..
هاله بضيق: اني نبيكم تعذروني ..
انعام : وعلاش..
هاله بضيق: ماخاطريش..
ساره : لا خاطرك وبتمشي..
هاله : معليشي اعفوني..
عليا : علاش هاله...
هاله سكتت..
انعام قربت منها وحطت ايدها ع كتفها :حبيبتي احني خواتك...ماتتحشميش منا...
ساره : ايه حبيبتي قولي خيرك..
هاله ودموعها فعيونها : ليا وقت طويل ماخشيتش مناسبات بعد ماتوا خوتي وأمي..خوتي ماتوا في الحرب وأمي لحقتهم..اني نسيت المناسبات والأفراح..نسيت كيف نلبس ونهتم بنفسي نسيت اني بنت نسيت كل شي وقعدت تبكي..حضنتها انعام طول ودموعها ينزلوا دمعت ساره وعليا قعدت تبكي ..
بعدت انعام هاله وشدتها من كتافها: خلاص الحزن ديرله نهايه وعيشي حياتك واهتمي بنفسك البسي وافرحي واحضري مناسبات اكيد أمك وخوتك ماكانوش حيفضلوا غير انك تعيشي سعيده عمرك كله من بعدهم..
ساره تمسح في دموعها: ايه حبيبتي حتى بوك ربي يطول في عمره حيفرح لما يلقاك سعيده وعايشه حياتك..
عليا جت حضنتها: بابا يقول لو نزلت علينا مصايب الدنيا ومازلنا من بعدها نتنفسوا معناها مازال في حاجات حلوه ربي يبينا نعيشوها فإن مع العسر يسرا إن مع العسر يسرا..
هاله ابتسمت وبعدت من عليا: باه ..اني ماعنديش حوايج مناسبات..
عليا : ولا يهمك عندي ليك حاجه تمشي معاك وتطلع عليك..
سارة : خلاص غدوة سلمولي نفسكم بنمشوا لمزين قريب من هني...حاجه صح...
عليا : واحني استسلمنا...
ضحكوا كلهم وولوا لشغلهم..
...
من جهةتانيه خش عابد للحوش ..وخش لداخل ...لما شافوه ولاده وقفوا ..
عابد : ماتبوش تجوا تسلموا حتى بعد جيتكم برجليا..
قدم الحسن باس ايد بوه وراسه..وحسان حتى هو ..
برنيه : خش ياعابد خش ..
عابد : كيف حالك خالتي ..
برنيه : الحمد لله ..كيف حال وسيله ..
عابد : كويسه ..تسلم عليكم..
برنيه :سلمها وسلم من جاب سلامها
قعمز عابد بعد سلمت عليه ريحانه وقعمزوا كلهم وقعدوا يهدرزوا...
...
عليا : خل نطلع نسألهم كان يبوا عصير طبيعي ولامشروب..
انعام : ايه ..
طلعت عليا ومشت للصاله ..تفاجئت بالموجود بيناتهم..
برنيه : تعالي بنيتي سلمي ع عمك عابد..
عليا شبحتله ابتسمت وهو رد الإبتسامه..مشتله باست ع ايده وراسه:كيف حالك عمي..
عابد بإبتسامه: الحمد لله يابنتي كيف حالك انتي..
عليا : الحمد لله عمي...
عابد : كيف حال ولدنا معاك..
عليا شبحتله لقاته يشبحلها برفعه حاجب: كويس..
عابد بضحكه: كان كويس معاك ...معناها الحمد لله..
كلهم ضحكوا ...
برنيه : بري بنيتي نادي ع سلفتك..
عليا : حاضر ومشت..
عابد: ربي يحفظها واضح بنت جعفر حق..
الحسن ابتسم ...
جت هاله: عمي عابد...باست ايده وراسه..
عابد: كيف حالك يابنتي ..
هاله : الحمد لله..
عابد شبح لحسان: كيف حال ولدنا معاك..
هاله : الحمد لله ...
حسان قعد يشبحلها ..لين ولت للكوجينه...
شويه وطاب العشي..قعمزوا تعشوا والاجواء كانت حلوة وعابد فرح بكناينه اللي كان باين عليهم بنات أصول..واحسن اختيار لولادهم...
...
تاني يوم..
عليا وهاله روحوا بكري من الكليه ورفعهم مرعي مع ساره للمزينه ...
المزينه: شعرك كثيف حلو بس جزء كبير منه بسبب عدم الإهتمام متقصف هلبه..لازم ينقص
هاله اضايقت..
ساره : ايه حبيبتي قصيه واهتمي بيه كويس يطول زي قبل واحسن..
هاله تنفست بعمق وقالت: تمام..قصيه...
قصت المزينه شعر هاله..ودارولها فتله وحلوه وماسكات لبشرتها...شويه وبدولها بشعرها اللي قصاته قصه حلوة ع الموضه..استشورتهولها ...وبدتلها بالمكياج..كان ناعم وحلو غير في هاله هلبه وابرز حلاوة عيونها وروج أحمر بين حلاوة شكل شفايفها..وعليا كذلك استملت شعرها ومكياجها..وساره معاها...كملوا مع 6العشيه وروح بيهم مرعي..
طبعا برنيه طلبت من الحسن وحسان يوصلوا نساوينهم..وهي تركب مع الحسن..وانعام تركب مع حسان..
ركبوا هاله وعليا وسارة لحياشهم يبدلوا..
لبست هاله جمبسوت اسود خداته من عليا من غير كمام معدس من فوق ...لبست تعليقه ذهب خفيفه وبخت ريحه..وقعدت تشبح لروحها هلبه في المرايا حبت شكلها الجديد هلبه وحست انها لازم تزيد تسمن شويه حتولي احلى..
من جهة تانيه خش حسان بش ياخد جيبوطيه لإن الجو مصقع ..طق ع الباب متاع دار النوم..هاله عرفاته هو استجمعت نفسها..
هاله : خش..
فتح الباب وخش وقاعد جامد في مكانه ..معرفش من هي هادي اللي واقفه ع مرايه ..هي وحده حلوة حلوة بالمرة عمره ماشاف وحده بحلاوتها ع قد مامر عليه..
هاله خدت عبايتها جت بتطلع..
هاله وعيونها لوطا: ترا شويه..
حسان بشقاوة : عطيني رقمك نخليك تفوتي..
هاله قامت عيونها فيه..ضاع فيهم اول مرة يركز ع لونهم البني الغامق اللي ابرزه الايلاينر..
هاله : حول من غير ثقل دم..
حسان تايه مش عارف شن يدير طار عقله فيها..
هاله : اووفف استغفرالله ..دفاته وطلعت..وهو شم ريحتها الحلوه..قعد واقف زي المسبوه وهو يتفرج عليها كيف تلبس في العبايه..وحطت الخمار وفتحت الباب وطلعت..
وهي نازله لقت عليا لابسه عبايتها وخمارها ونازله..
هاله : عليا..
عليا وقفت: هيا هلول..
ابتسمت هاله ونزلوا مع بعض وخشوا داخل مشوا لدار انعام..
انعام وهي تلبس في العبايه: هلا بالعرايس..
ساره : تو تحولوا عبايتكم بنشوفكم...
ضحكوا الزوز وحولوا عبايتنهم..
انعام وساره : واااااااااااااااو..
عليا: هلول ياقلبي تهببببلي اللهم بارك
ساره بأعجاب: عسسسسل ياهاله خياال يابنتي جسمك يهبل..
انعام : اللهم بارك غير تزيدي شوي بس
هاله ابتسمت بخجل: حتى اني قلت هكي..
ع جية برنيه : اللهم صل ع النبي ع كنيناتي ع بنياني ياربي حجب من العين..اقروا ع رواحكم ياكبداتي..
هاله وعليا ابتسموا بخجل: حاضر..
برنيه: هيا ياهاله وانعام حسان يستنى برا..
هاله لبست عبايتها وخمارها وانعام لبست وشاحها وطلعوا هما الزوز..
ساره تناشب في عليا : ايوا انت ياحموري..
عليا : ههههههههههه
عليا كانت بيضا هلبه لابسه قفطان احمرقصير ربع كم مفصل جسمها طوله لفوق الركبه بشوي..ودايره شعرها مموج ومكياجها ابرز عيونها وروج احمر كاسي شفايفها المليانه والحلوة ...
وكانت لابسه تعليقه ذهب ع هيئه ورده سلسله وخاتم وخراص...وكانت زي عادتها فااااتنه..💖💖
برنيه : خش كلمها مهناك حد داخل خل بنجيب جلابيتي..
الحسن خش : سارة..
سارة غمزت لعليا: تعالى خوي هني..قدم الحسن وخش..
الحسن : ساره..مرعي.....قال....زي كل مرة تنسيه علاش جاي يعني هالمره تحديدا كانت غير هلللبه تهبببببل بزياده..هو خلاص استسلم ماعاش يقدر اكثر من هكي..قلبه يدق بعنف شدييييييييد..يحبها خلاص يحبها...سنين عمره اللي ع قد مامر عليه من جنس حوا مافي وحده حركت فيه شعره..بس هالبنيه الصغيرونه هزت كيانه هز ..خدت قلبه مره وحده...في فتره قصيره...سلباته من نفسه تماما...
سارة بضحكه: خيره مرعي يالحسن..
الحسن بلع ريقه ووجهه احمر غير عيونه لأخته : قاال..احمم..هيا..وطلع طول...
ساره بضحكه: ياناري ع وخيي..
عليا بتموت من الخجل وخدودها احمروا...
ساره : والورد اتفتح ع الخدين ختسلم الخجلانين..
عليا ضحكت بخجل..
لبسوا عباياتهم وخمارتهم وطلعوا ...
عليا ركبت اللتالي لأن برنيه القدام..
تحرك الأول مرعي بعده ...الحسن..
في الطريق كان سابقهم بشويه حسان اللي كان يسرق في نظرات لهاله اللي كانت بعبايتها وخمارها ومش باين منها شي..شبح القدام وجي بين عيونه شكلها كيف كان قعد يضحك ويمسح بإيده ع شعره وعض ع شاربه وقعد يبتسم..
اما الحسن حالته حاله ...تفاصيلها بين عيونه كان يحاول يسيطر ع نفسه ويرجع لوعيه مش قادر...هبلاته صغيرونته💖
حسان والحسن عايشين نفس المشاعر في هاللحظه وخيالهم سارح بيهم في عالم الحب اللي عمرهم ماعرفوه إلا توا برغم اختلاف شخصياتهم واللي كانوا عايشينه...سرحانين بخيالهم في جميلاتهم اللي تمكنوا من قلوبهم بقوة...
🎶يالرموش ياسهام قويه ياسهام قويه
سهم ولا قولوا 100قول 300
لون عيونها لون عيون الحلوه ديه
الشمس وقت المغربيه المغربيه
آه عيونها برجلتني يابا برجلتني..
نورها ساطع ذللتني يابا ذللتني
جيت اقرب من رموش لمسة منهم كهربتني يابا كهربتني
غير الشفايف وردايه بلون ربيعي..
ياما وخدودها دي حكايه حمر وطبيعي
ودا مين ودا مين ينساها..
....يتبع....
