"تأتي الرياح بما لا تشتهي السفن""على لسان فرح"
_ح تسألوني إذا مبسوطة ولا لا...ح أقول ليكم بين مبسوطة وخايفة..يمكن أسوأ حاجه في الحياة لما القدامك يعاملك بمزاجه..يوم لطيف معاك وظريف...ويوم يقلب عليك بوش الخشب..في الحقيقة أنا عارفة الكلام ده كله وممكن أدي فيه محاضرات بس منو يقدر يقنع قلبي بإنو عمار ما الشخص المناسب لي...عمار ما الشخص المفروض أكمل معاهو حياتي...أنا كل يوم قادرة أقيف قدام المراية وأقول لنفسي ما تستاهلي يا فرح البحصل فيك ده..أقطعي علاقتك بيهو وعيشي حياتك..وحتى قبل أكمل كلامي بلقى فكرة "الفراق" صعبة علي شديد...ما بحب أشوفه زعلان أو مضايق وبحرص شديد إني أبسطه مهما كان...بس هو عادي عندو يغلط فيني وما يعتذر...يغيب بدون ما يقول...يمشي ويجي عشان ضامن...خلص اليوم وأنا في قمة سعادتي..عمار كان جايب لي سلسلة فضة هدية مكتوب عليه "فرحتي"...طول الطريق كان بتعامل معاي بحب وحنية...بقيت أتمنى الزمن يقيف بس عشان عمار ما يتغير علي تاني...وصلني البيت حوالي الساعه 6..ودعته ونزلتا...!
"على لسان لميس"
_إنك تفتش على حقيقة حاجه ما عليها أدِلة أو ملاحظات دقيقة..إعتبر نفسك بتفتش في إبرة وسط كوم قش..ده الكان حاصل معاي..لافة من الصباح بالعربية وبفكر ابدأ من وين..لقيت أسلم حل إني أمشي المستشفى لأبوي...فعلاً عملت كده..كان واضح على ملامحي الضيق...أبوي سألني:-خير يا بتي مالك!؟..قولته ليهو:-في حبة زهج وضيق بس...قال لي:-الله يهون عليك ويخفف عنك..ها مريضكم ما خرجوه؟؟...قولته ليهو:-للأسبوع الجاي كده إن شاء الله...صحي يا عمو يحيى عاوزة أسألك سؤال حشري شوية..قال لي:-أتفضلي...قولته ليهو:-أنت كنت عايش في مصر زي ما كلمتني..طيب لما مِرضتا مش مفروض تمشي المستشفيات الهناك...يعني الطب هناك متقدم أعتقد...شنو الخلاك ترجع السودان!!..قال لي:- كنت أساساً قبل أمرض عندي نية أرجع السودان فترة من الزمن...ولما مِرضتا أصريت علي أولادي يجيبوني هنا...مع أنهم شافوا هناك أفضل لي...بس طبعاً لما لقوني مُصر..أتنازلوا...قولته ليهو:-أهااا..وكنت عايش وين قبل تسافر مصر!!..قال لي:- في ولاية "......"...بعدها استرسل في الكلام وبقى يحكي لي عن منطقته وهكذا...وبرضو ما جاب سيرة إنو كان متزوج إطلاقاً...ما عرفت أجيب ليهو أسم كمال الدين ده كيف...هو كان لسه بتكلم وبشرح وأنا بفكر لي في طريقة أقول بيها الأسم وأشوف بناء عليها ردة فعله...وباءت محاولاتي بالفشل..محتاجه أسم الشخص ده كامل علشان أعرف قصته شنو وليه أسمه تحديداً أتذكر يوم طلاق أمي وأبوي..!؟
"على لسان عمار"
