بسم الله الرحمن الرحيم ...
قبل البدأ في قراءة الرواية احب التنويه على ان الرواية قيد الكتابة ..
قراءة ممتعة ..
.....................................
"بعض القصص يجب أن تبقى ناقصة،مُبهمه،نهايتها غير مُبهرة حتى لا نتأذى"
"على لسان عمار"
_والله يا لميس ما متذكر شديد الفترة الكنا فيها هناك..كنت صغير يعني...البعرفه إنو أبوي كان عندو موضوع تجارة هناك بدأ من المنطقة ديك ووسع شغله في الخرطوم بعدها...قالت لي:-هو أبوك أسمه بالكامل منو!!..قولته ليها:-كمال الدين عبد الله البدري..قالت لي:-عمار بصراحه عمري ما أتوقعت ألجأ ليك وأنت بتكون عارف ده...فبس الله يرضى عليك ساعدني أكتر...أبوك زمان عندو صحبه أسمه يحيى الحسن أو مثلاً حصل سمعت الأسم ده عندو!!...قولته ليها:-ما حصل سمعته...أنتي عاوزة تعرفي شنو بالضبط!!...سكتت ما ردت علي...قولته ليها:-طيب عايني..أنا ح أسأل ليك أمي بطريقة غير مباشرة عن الموضوع ده..وح أشوف إذا بتعرف عنه حاجه ولا لا...قالت لي:-أيوة ضروري...لو طلع أبوك نفس الشخص الأنا بفتش عليهو يبقى الموضوع ح يتحل...ما سألتها موضوع شنو وما حاولت أتطفل...وعدتها بس إني اساعدها...وبعدها كل واحد مننا مشى بطريق...رجعت البيت لقيت أمي شبه بتبكي...مشيت عليها...قولته ليها:-مساء الخير...قالت لي:-غريبة جاي بدري...قولته ليها:-عادي..أبوي وين!؟...قالت:-ما رجع من الشغل لسه..قعدت قصادها وأبتديت أتونس معاها..هي زاتها بتكون أستغربت...بعد ونسة طالت مدتها..سألتها:-أنتي يا أمي...زمان لما كنتوا في البلد..أكيد كان عندكم أهل وحبايب كتار...قالت لي:-طبعاً..المنطقة الكنا فيها ناسها ما متداخلين شديد...لكن المنطقة البعدها كويسسين وتحسهم اسرة...قولته ليها:-كنتي بتعرفيهم!؟..قالت لي:-ما شديد..لأنو أبوك كان حارمني الطلعه من البيت إلا للضرورة القصوى...قولته ليها:-وهو ما كان بطلع ولا شنو!..قالت لي:-كييف..بطلع طبعاً..وأصحابه بجوا ويتلموا في بيتنا...كلهم نفس الشاكلة..إلا يمكن واحد هو الكويس...قولته ليها:-كويس في شنو ما فهمت!!...قالت لي:-بخاف الله شديد وإنسان خلوق يعني...ما عارفة كان مُصاحب أبوك كيف!!..قولته ليها:-ده منو ده...قالت لي:-أنت كنت صغير ما بتتذكرو...كان مع أبوك اصحاب الروح بالروح بس بعدها اختلفوا في تجارة وبضايع..أبوك ياهو طوالي جابنا الخرطوم..ومن يومها ما سمعنا عنه حاجه...قولته ليها:-معقولة ما عندهم صورة مع بعض أو شيء...قالت لي:-عمار بتسأل كتير كده ليه!!...قولته ليها:-فضول وبعدين مما قلتي زول كويس وبتاع...جاا في بالي أشوفه...قالت لي بهمس:-بعد المشكلة الحصلت أبوك ما خلا حاجه بتخص يحيى معاهو..أي شي متعلق بيهو خلاهو في البلد...لما قالت أسم يحيى ما حاولت أحك الموضوع تاني...واصلت كلامي مع أمي وبعدها مشيت غرفتي..أتصلت على لميس ما ردت..رجعت لي بعد دقايق...حكيت ليها الحوار الدار بيني وبين أمي..قالت لي:-متأكد أمك ذكرت أسم يحيى ده!!..قولته ليها:-أيوة متأكد..قالت لي:-تمام..لو أحتجت حاجه ح اتصل عليك تاني...!
