"في صباح أحد الأيام"
"على لساني"
_كنت ماخده إجازة شهر بدون مرتب...حسيت نفسي محتاجه أروق وأهدأ شوية...بعد رتبت البيت مع أمي..قررت أطلع وأمشي لفرح في الشركة...لبست لي فستان جوافي وعملت شعري كعكه لفوق بطريقة عشوائية...لبست شبشب بيت عادي وكنت طالعه..لاقاني عمر أخوي في الباب..سألني:-على وين يا حلوة ؟؟...قولته ليهو:-ماشة لفرح لي زمن منها...قال لي:-في الشركة ولا البيت ؟؟..جاوبته:-الشركة...قال لي:-يبقى طالع معاك...عاوز أشوف آسر..دقيقه بس أجيب تلفوني من الشاحن...أستنيته برة...جات خالتو منال أم سلطان سلمت علي وقالت:-الناس المختفية...وينك ما قاعدة تجي علينا ؟؟..قولته ليها:-والله يا خالتو مع الشغل بس..يدوب أخدت إجازة...قالت لي:-لالا تمام..بعدين المساء كده بغشاكم...سلمي على أمك..قولته ليها:-طيب تمام...عمر جاا طالع وبعدها إتحركنا...لما وصلنا هو مشى محل آسر وطلب مني بس أخلص أجي عندهم لأنو ح يكون مستنيني نرجع سوا...دخلت الشركة ومشيت مكتب فرح دغري...لقيتها بتتكلم بالتلفون وبتتفصل...قبل تقفل قالت:-طيب خلي لي أكلي زي ما هو إياك تهبشه...لا ما جاية أسي...أمممم طيب...باااي...قفلت منه..قعدت على كرسيها وختت يدها على قلبها وقالت:-صراحة صراحة يتحب...عاينت ليها وأنا مضيقة عيوني وقولته:-منو هو يا أستاذة ؟؟..قالت لي:-ح يكون منو يعني...آسر الحاج...قولته ليها:-أهااااااا...وقعتي يعني ؟؟...قالت:-وقعة بفهم لكن..مش زي كل مرة...إبتسمت على خفيف وقولته:-أتمنى أتمنى...عاينت لي في وشي وقالت:-وأنتي مالك...الحاصل عليك شنو ؟؟...قولته ليها:-ولا شيء...عادي يعني...جات قعدت جنبي ومسكت يديني:-إيناس...أنا حاساك ما كويسة من أخر مرة إتلاقينا فيها متذكرة !!...ما بتحبي تحكي تفاصيلك ليه ؟؟...قولته ليها:- ما القصة...بس الموضوع عدى خلاص...قالت لي:-موضوع شنو..أنتي وهادي إختلفتوا؟؟...قولته ليها:-لالالا يا بت...إبتديت أحكي ليها عن حركة سيذر معاي أخر مرة وإني بجد ما قادرة أتجاوز النقطه دي وما مستوعبة كيف قدر يعمل كده..وما قادرة أدس على هادي قصة زي دي...مع إنو ما مفروض يعرف لأنو ما حصلت حاجه خطيرة..بس كل ما نتلاقى أنا وهادي بحس إني لازم أقول ليهو...فرح إتنهدت وقالت:-من رأي ما ضروري يعرف...قصة وعدى عليها فترة أساساً...وسيذر حالياً في السعودية...لو كلمتي هادي ح يتعصب على الفاضي..لا ح يسافر لسيذر ولا ح يقدر يعمل شيء...ويمكن يخت اللوم عليك يتعصب ويكورك فيك إنو ليه ما كلمتي من الأول من أيام سيذر هنا...ح يفتكرك لسه بتفكري فيهو...ماف داعي يا إيناس...أكسري الحنك ساي...ما تجيبي ليهو السيرة...هزيت ليها راسي ب"طيب"...تلفوني إتصل رديت ب:-حبيبي...قال لي:-يا عيونهٌ...في الجامعه أنا..وين أنتي.؟..قولته ليهو:-مع فرح صحبتي...قال لي:-نتلاقى طيب !!...قولته ليهو:-جيت مع عمر أخوي...قال لي:-أنا عاوز ألاقيك ضروري..كاسرة حنك موضوعنا بكلهٌ...ما مٌلاحظه؟؟...قولته ليهو:-طيب ينفع نتلاقى بكرة أو أي يوم تاني...لأني شوية وح أرجع البيت مع عمر...قال لي:-تمام يا زولة....بعد قفلت منهٌ...فرح قالت لي:-وأنتي صحي ليه ما عاوزاهٌ يصل البيت..إيناس دي شنو الحركات دي؟؟..قولته ليها:-عاوزة أنا..بس ما نفسي نستعجل...قالت لي:-إستعجال شنو يا بت..بحبك وبتحبي..وعارفين طبايع بعض..يبقى شنو؟؟...قولته ليها:-أوووف..الموضوع عندي أبعد من قصة حب...خليك مني...أنتي وآسر إرتبطوا ولا شنو ؟؟...قالت:-شبه كده...أنا أيوة حبيته وفتحت ليهو قلبي..لكن ما بالكامل...عاوزة قصتنا دي تكمل على خير...لأنو خلاص والله قلبي ده وجعني...قولته ليها:-ح تكمل إن شاء الله♡...هييي أمشي أنا...عطلتك عن شغلك...قالت لي:-يا غبية ما تقولي كده..أرح طالعه معاك أجيب فطوري...ونحنا في طريقنا للمحل صادفنا سلطان..سلمنا عليهٌ وواصلنا...قالت لي:-ح يخطب قريب...قولته ليها:-كذابة والله...قالت لي:-سامعه كده...وصلنا المحل...سلمت على آسر وقعدت جنب عمر...كان واضح على ملامح فرح وآسر الحب والتودد♡...لطيفين شديد وبحسهم أطفال.... !!
