#ليتني_مِتُّ_قبل_هذا
الفصل الثالث
_أنا مين؟! مش عـارف!
نطقها يحيـي بضياع ليطالعه الآخر مشدوهاً ويقول: مش عارف؟! مش عارف إزاي يعني؟!
نظر إليه يحيـي مجدداً وهو يعتصر رأسه لكي يجيب سؤاله و لكنه قد شَعَر ويكأنه قد وُلد لتوّه فتمتم بشرود: أنا مش فاكر أي حاجة ولا عارف حاجه، أنا حاسس إن دماغي صفحة بيضا!
نظر إليه مصعب مذهولاً وقال: معقول تكون فقدت الذاكرة!
إرتفعا حاجبيّ يحيي بصدمة ليستطرد مصعب حديثه و يقول: أكيد الضربه اللي خدتها علي دماغك أثرّت علي الذاكرة.
تسائل يحيي قائلاً: ضربة إيه؟! مين اللي ضربني أنا مش فاهم حاجه.
ليقصّ عليه مصعب ما رآه قائلاً: إمبارح لقيناك مرمي علي الأرض و غرقان في دمك و كان في شابين كده بيجروا ملحقناش نشوف وشّهم أكيد هما اللي ضربوك.. إنت مش فاكرهم؟!
أومأ يحيـي نافياً وقال: لأ مش فاكر حاجه خالص!
زمّ مِصعب شفتيه آسفاً وتابع قائلاً: أكيد ضربوك عشان يسرقوك لأن إحنا وإحنا بنغير لك هدومك مكانش فيهم أي حاجه ولا فلوس ولا تليفون، ده حتي مفيش معاك بطاقة ولا أي إثبات شخصية!
حملق بهِ يحيـي بدهشة وقال: يعني إيه؟! يعني هفضل تايه كده و مش عارف أنا مين!
أخذته سَوْرةٍ من الغضب ليقول مِصعب محاولاً تهدأته: إصبر بس و إستهدي بالله، إنت عشان الجرح لسه جديد و دماغك مش موزونه لسه مش فاكر حاجه بس يومين تلاته وإن شاءلله كل حاجه هتبقي زي الفل.
إنتبها علي دخول والدة مِصعب للغرفه وهي تمنحهم إبتسامة بشوشه ثم دَنت منهما لتجلس إلي جوار يحيـي و تقول بفرحة: إنت فوقت يا ضنايا، حمدلله على السلامة.
إبتسم لها لا إرداياً وأومأ قائلاً: الله يسلمك يا حجه.
ربتت علي ظهرهِ بحنان وقالت: هعملك بقا حاجه تتقوت بيها عشان تعوض الدم اللي نزل منك...
قاطعها قائلاً: لالا مش عايـز.
أردفت ببساطة: لا مفيش حاجه اسمها مش عايز، ولو علي الفطار يسيدي إبقا عوّضه بعد رمضان، ليس علي المريض حرج.
قطَب حاجبيه متعجباً وقال: هو إحنا في رمضان؟!
نظرت إليه السيده بإستغراب ثم نظرت إلي وَلَدِها لينظر إليها بأسف ويقول: الباشمهندس مش فاكر حاجه ياما.
أعادت النظر إليه بحسرة وقالت: يا حبيبي يبني! أكيد الضربه اللي خدتها في دماغك دي هي اللي خلتك تنسي، منهم لله اللي أذوك ربنا يأذيهم في نور عنيهم.
لم يجيبها يحيي بل ظل ينظر إلي الفراغ شارداً لتربت علي كتفه بمواساة وقالت: ولا يهمك يا حبة عيني، يومين إن شاء الله و هتبقي زي الفل.. بس أهم حاجه تاكل و تتغذي عشان تسترد عافيتك بسرعة، وأنا هعمللك شوية أكلات كده و خلطات من اللي بتقوي الذاكرة....
أنت تقرأ
ليتني مِتُّ قبل هذا
Romanceعندما يكون الندم في وقت لا يسمن فيه ولا يغني من جوع فماذا تفعل سوي أن تتمتم باكياً أن يا ليتني مت قبل هذا
