انتهى حفل الخطبة وذهب الجميع لتوديع العروسين فذهبت همس برفقة شهاب إلى كل من غادة وبلال، تجهمت غادة لرؤيتها قريبه منها بينما تبسم بلال فقد كانت همس فاتنه حقاً تلك الليلة.. ابتسمت همس هي الأخرى ثم قالت
-الف مبروك يا حبايبي عقبال الفرح يارب
-الله يبارك فيكي ومبروك ليكم انتوا كمان
وضعت همس يديها على كتف شهاب ثم قالت
-الله يبارك فيك.. دعواتكم بقى اننا نتجوز بسرعه عشان احنا بنحب بعض موووت.. مش كدا يا شهاب
-كدا ونص ياقلب شهاب
قالها بإندفاع فكتمت همس ضحكاتها بصعوبة ثم ودعت بلال وصديقتها السابقة وخرجت برفقه شهاب من تلك الحفلة اللعينة.. سرعان ما خرجت همس انفجرت ضاحكة مما آثار تعجب شهاب وقال
-بتضحكي على ايه
-ممثل حلو انت يا واد.. كدا ونص ياقلب شهاب
قالتها ثم ضحكت من جديد فضحك هو الاخر ثم قال
-ضحكتك اوي يعني
-اوي اوي
-مبسوطة ياهمس؟
-طول ما انت جنبي ايوا انا مبسوطة
ابتسم هو بينما لاحظت همس اقتراب فتاتين منهم وكلاهن لم يعرن إلى همس اي اهتمام فوقفت احداهن أمام شهاب وقالت
-مش معقول!!، شهاب عمران بنفسه هنا.. واحشني ياراجل
رفعت همس حاجبيها بإستهزاء وهي تستمع إلى ما تقوله الفتاة ونظرت إليها بنظرات حارقه بينما عقد شهاب حاجبيه بتعجب فصوتها بدى مألوفاً إليها فقال
-انا مش شايفك بصراحة فـ ياريت اعرف انتي مين واكيد انتي كمان وحشتيني
ضحكت الفتاة فوجهت همس نظرها إلى شهاب المبتسم ولكنها قررت الصمت فعادت الفتاة تقول
-انا رغد يابني مش معقول تكون نسيتني
-لا اكيد منستكيش.. ايه الصدفة الغريبة دي
وكزت رغد سارة الواقفة بجانبها كيما تتحدث فقالت سارة بهدوء بعض الشيء
-ازيك يا شهاب
تلاشت بسمته على الفور ثم قال
-سارة مش كدا؟
ضربت همس كفاً على كف عندما أيقنت ان تلك الفتاة هي حبيبته السابقة وقررت التزام الصمت أيضاً كما انها تراجعت بضع خطوات للخلف تاركةً إياهم وحدهم لكنها كانت تستطيع سماع ما يدور بينهم.. ابتسمت سارة ثم قالت
-كويس انك لسه فاكرني
-وهو انتي تتنسي
-تقصد أن اللي بينا ميتنسيش مش كدا
قالتها بسعادة فقال هو
-لأ.. اقصد اللي انتي عملتيه معايا ميتنسيش.. المهم عايزه ايه؟
شعرت سارة بالإحراج قليلاً لذلك قالت
-ابدا شوفتك قولت اسلم عليك في النهاية احنا عشرة سنين كتيرة
-تعرفي إن دي اول مرة احمد ربنا فيها اني مش شايف.. بصراحة مش حابب اشوفك ابدا
-انت بتعمل ليه كدا يا شهاب ده انا لسه بحبك!
-وهو اللي بيحب حد بيتخلي عنه يا سارة!.. بيسيبه في اكتر الأوقات اللي هو محتاجله فيها!
