بنظرة أخرى (مـكـتملـة)

الفصل الثاني عشر

جنى: آسفة يا مريم بس انا مقدرتش امسك نفسي اكتر من كده

مريم بحنان: يا حبيبتي انتي لو مسكتي نفسك معايا هتفتحي قلبك لمين؟ بصي يا جنى انتي أكيد هتنسيه في يوم من الأيام فمتتعبيش نفسك كده علشان النسيان يجي مع مرور الوقت مش بسرعة

جنى بحزن: لامتى يا مريم ده انا بقالي ست سنين و منسيتش خالص ولو يوم واحد

مريم: فوضي أمرك لربنا هو الوحيد اللي هيربط على قلبك و يدبر أمرك

جنى: سبحانه وتعالى

مريم: خليني أوصلك البيت علشان ترتاحي و متفكريش في اي حاجة

جنى بنفي: لا انا هروح عند مرات اخويا عمر عشان برتاح معاها أوي و بعدين مش هينفع تشوفني ماما بالحالة دي

مريم بغيظ: يا خاينة يا زفتة بقى بتخونيني مع مرات أخوكي

ضحكت جنى رغما عنها وردت: خلاص متزعليش اصلي مقبلتهاش من وقت طويل هي و عمر

مريم: ماشي هسامحك المرادي بس

بعد ربع ساعة تقريبا كانت جنى في شقة عمر، فتحت لها الملاك الباب فإندفعت جنى تحتضنها بقوة حتى إستغربت ملاك من فعلها ذلك وقالت بمرح: يا عيني يا عيني والله وبقيت اوحشك يا جنجون و أول ما تقابلني تاخدني بالحضن كده

جنى بحزن مصطنع: لا تكون اتضايق ولا حاجة يا ملوك

ملاك بعتاب: انا فعلا متضايقة منك علشان نسيتيني و مش بتسألي عليا خالص

جنى: آسفة يا ملاك علشان..

ترقرقت الدموع في عينيها وسألت: هو عمر بالبيت؟

ملاك بقلق: راح الشركة، هو انتي بتعيطي ليه؟ تعالي ادخلي جوه

دلفا إلى الداخل وجلسا في الصالة فأجابت جنى على سؤالها بسؤال آخر
جنى بصوت محتقن بالدموع: هو لو حد حب حد و الحد ده تركه و سافر لبعيد، الحد اللي حب هينسى ولا هيفضل على طول يتعذب و عايش على ذكرياته؟

ملاك بنفاذ صبر: حد و حد و حد! بلاش الفرضيات دي يا جنى و قوليلي في ايه على طول

جنى: انا بحب واحد يا ملاك، و مش بس بحبه انا بعشقه أوي و هو مسافر بقاله ست سنين و انا مش عارفة أنساه أبدا

ملاك باستغراب: و الواد ده يبقى مين؟ و انتي عرفتيه ازاي؟

جنى: كريم صاحب عمر و احنا أصدقاء و نعرف بعض من الطفولة و قبل ما يسافر كان على طول يجي عندنا عشان يبقى مع عمر و حتى ماما و بابا بيحبوه جدا و بيعتبروه ابنهم زي عمر بالضبط و انا يا ملاك مش عارفة حبيته ازاي و امتى و لما سافر اتعذبت كتير و لسه لحد دلوقتي بتعذب على بعده عني

ظلت ملاك تفكر في إسم كريم فقد بدا لها مألوف و قد سمعته من قبل حتى تذكرت عمر عندما أخبرها عن قصة الندبة التي ينتهي بها حاجبه فقد أخبرها أنه تعرض للضرب بسببه على يد أحمد
تحدثت ملاك قائلة: اه فعلا عمر حكالي عنه قبل كده بس هو فين دلوقتي؟