Wished One, But Got Five (Published under PSICOM)

Chapter 24

ISANG linggo na ang nakakalipas simula nang lumipat si Rica sa apartment na tinutuluyan niya ngayon. Tamang-tama lang ang sukat at laki nito dahil mag-isa lang naman siyang nakatira dito at madalas ay nasa trabaho siya kaya hindi naman siya palaging maglalagi dito.

Sa loob ng dalawang buwang upa niya ay sina Trevor at Calvin na ang nagbayad nun. Bale 8k lahat ang ibinayad ng mga ito sa land lady dahil 4k sa isang buwan ang renta sa apartment niya. Kahit anong pilit noon ni Rica na siya na ang magbabayad ng upa sa apartment na tinutuluyan niya ay talagang mapilit sina Trevor at Calvin kaya sa huli ay nagtagumpay ang mga ito sa pagmamatigas niya at sila na ang nagbayad ng upa sa apartment.

Babayaran rin iyon ni Rica pero kailangan niya munang magtrabaho ng maayos. Minimum wage naman ang sinahod niyang bale sa flower shop nila Maru kaya makakapag-ipon pa siya ng tuition fee para sa pag-aaral niya next year. Sapat rin ang kinita niya para sa pang araw-araw na kakailanganin niya sa sarili katulad ng pagkain, kuryente, tubig at iilang mga damit na sa ukay-ukay nalang niya siguro bibilhin para man lang makatipid siya.

Paminsan-minsan ay dinadalaw siya ni Trevor para tignan ang kalagayan niya sa apartment niya. Kahit alam niyang busy ito sa trabaho ay naglalaan pa rin ito ng oras para lang puntahan siya sa apartment. Palagi rin itong may dalang take out food kapag nagpupunta ito sa kanya kaya nga nakakatipid siya ng kaunti sa pagkain dahil binabaon nalang niya minsan ang mga natirang pagkain na dala ni Trevor para sa kanya.

Malaki ang ipinagbago ni Trevor simula nang maging kaibigan niya ito. Palagi na itong nakangiti na para bang masaya ito palagi kapag nakikita siya hindi katulad noon na puro ngisi at pang-iinsultong tingin lang ang binibigay nito sa kanya. Mabuting tao si Trevor, ni hindi siya nito hinusgahan kung nagkakagusto man siya sa mga kaibigan ni Sage. Wala naman itong nababanggit tungkol doon.

Sa bawat araw na lumilipas ay napapansin ni Rica na may kakaiba na siyang nararamdaman para kay Trevor. Sino ba naman ang babaeng hindi magkakagusto sa lalakeng iyon? Bukod sa gwapo na nga, may magandang pangangatawan ay mabait pa ito at maaalalahanin sa kanya.

Natatakot siyang umamin ng totoo niyang nararamdaman para sa binata. Paano kung hindi siya nito gusto at talagang magmamalasakit lang ito sa kanya dahil ulilang lubos na siya at walang kasama sa buhay? Ayaw na muna niyang mag-assume basta't masaya siya na kaibigan na niya ito at palagi itong nasa tabi niya.

Tungkol naman kila Sage, Zian, Wenhan, Ran at Yruma ay hindi na rin niya nakikita pa ang mga ito. Kung sa bagay ay magkalayo na sila ng tinitirhan at sino ba naman siya para alalahanin pa ng mga ito? Ang sabi nga nila Sage, Zian at Wenhan ay siya ang dahilan kung bakit nagkakasira na silang magkakaibigan kaya tama lang na lumayo siya sa mga ito.

Habang abala si Rica sa cashier counter niya sa flower shop ay nakita niyang pumasok sa loob si Yruma. Hindi niya ipinahalatang nagulat siya nang makita ulit ang binata at ipinagpatuloy nalang ang ginagawa niyang paglilista sa mga presyo ng bulaklak na naideliver sa flower shop nila kaninang umaga.

Hindi niya naman maiwasang mapansing sumusulyap si Yruma sa kanya habang tumitingin ng mga bulaklak na para siguro sa lola nitong namapaya pa. Halatang kakauwi lang rin nito galing sa unibersidad na pinapasukan nito dahil nakasuot pa ito ng uniform at may sukbit na bag.

Si Lillian muli ang nag-assist kay Yruma at mukhang namukhaan nito si Yruma dahil napapatingin sa gawi niya si Lillian at nakangisi pa ito.

Lumapit na si Yruma sa cashier counter ni Rica at inabot nito sa dalaga ang napili niyang bulaklak. Kinuha naman iyon ni Rica at binalot sa diyaryo saka inilagay sa plastic.

Nang mabayaran na ni Yruma ang bulaklak na binili niya ay wala pa yata itong balak umalis sa harapan ni Rica. Nakatingin lang ito sa kanya na parang may gustong sabihin.