صراع الحب - متوقفة حاليا

الفصل السادس عشر

رمضان كريم عليكوا وكل سنة وانتوا طيبين💕
كنت مشغولة فى امتحانات الميد معلش 😂💕

____________________________

وقفت امال بجانب سعاد بالمطبخ
لتهتف بانزعاج : شايفة قلة الحيا بتاعة بت هارون
لا و زينب جاتلها عالطبطاب
وعاوزة تولعها
اجابت سعاد باستنكار :
ويعنى فرحة مالها ومال شغل فريدة يا امال
دى حاجة تفيدها فى ايه عشان تسأل فيها؟
امال باستنكار : جرى يا سعاد
انتى هتعومى على عومهم ولا ايه ؟
سعاد : انى بقولك الى شايفاها يا امال
انتى عارفة
انى عمرى ما هقف مع اى حد
على حساب حد من البنات
وانى مبسيبش حد يكلم واحدة فيهم
بس انتى كمان شايفة الى انا شايفاه وبتنكرى
غيرة فرحة من فريدة
هى الى مخلياها مش قاعدة ساكتة
امال : وبت اخويا هتغير منها فى ايه ان شاء الله؟
ان كان عالشكل ففرحة
تقول للقمر قوم وانى اقعد مكانك
اما بقى العلام
ف فرحة هتدخل الجامعة زيها زى الى اسمها فريدة
يبقى تغير منها على ايه؟
صاحت سعاد بنفاذ صبر : تغير على مراد يا امال
امال بدهشة : ماله مراد؟
ما هو خلاص اتجوز وخلصت حكايتهم من زمان
سعاد : بس الكلام دة بقى
لسة مش واصل لفرحة وهنية
وخصوصا هنية
الى بتلعب بعقل عيلة صغيرة
لسة مطلعتش من البيضة
عشان توصل للى هى عاوزاه
امال : كلامك مش عاجبنى يا سعاد
تقصدى ايه بالظبط
زفرت سعاد قائلة : يا امال افهمينى
انتى وعصمت اخواتى
الى باقيينلى بعد موت ناجى وصابر
بس الى هنية بتعمله هيوقع العيلة فى بعضها
هى لسة عندها امل ان مراد يتجوز فرحة
وفرحة تبقى مرت الكبير
انى مكنش عندى مانع قبل كدة
وكنت بحاول اساعدها
بس دلوقت زى ما قولتى مراد اتجوز خلاص
واى حاجة هتعملها فرحة ولا هنية تنهى الجواز دة
هتنهى معاها الصلح الى الكبير عمله
امال بتفكير : لا انتى لو كلامك صح
يبقى هنية اتجننت خلاص
سعاد : هنية عاوزة الى يوقفها عند حدها يا امال
فرحة كدة كدة هتسافر قريب وهتنشغل بجامعتها
ولا هتشوف مراد ولا فريدة
بس هنية بقى مش هتتهد
امال : هنية دى سيبيهالى انى
____________________________

صاحت مروج بنفاذ صبر : لا اسمعى بقى اما اقولك
انا سمعت كلامك قبل كدة وسكتت
انما بعد الى قاله دة
لازم تقولى لمراد
سمعانى؟
لتجيب فريدة باستنكار : هقوله ايه؟
هقوله
فى واحد مريض نفسى
كنت مرتبطة بيه قبلك وبحبه
وكان بيننا ورقة جواز عرفى فهمنى انه حرقها
جاى دلوقتى وعاوز يرجعلى وبيهددنى بيها وبصور تانية جمعتنى انا وهو ايام ما كنا مرتبطين
تذكرت مروج قائلة : انتى لحد دلوقتى مفهمتنيش
موضوع الجواز العرفى دة
ورقة ايه الى كتبتوها بقى عاوزة ؟
فريدة : عمر كان معايا فى الكلية
انا وهو كنا دفعة واحدة وتعاملى معاه كان كتير بحكم انه كان مسئول دفعة وكدة
صمت قليلا لتكمل قائلة :
كنت مشدودة ليه فى الاول
زى اى بنت فى الكلية عندنا
بس الفرق بينى وبينهم انه هو كمان
كان معجب بيا وكان بيحاول يقربلى بكل الطرق
موقف يجيب موقف
فحبيته
  طلب يتقدملى اول ما تخرجنا
و خدتله معاد من هارون صفوان
الى رفضه حتى من قبل ما يقابله
مش بس كدة دة راح قابله من ورايا
واهانه وحذره انه ميقربش منى
طبعا دة الى عمر حكاه ليا
ومن طبعى المعروف
انى بمسك اكتر فى الحاجة
الى يتقالى عليها لا
فمسكت فيه
لتعلق ساخرة :
وهو عرف يستغل دة كويس!
فضلنا مرتبطين فترة
واقنعنى اننا ممكن نكتب ما بيننا ورقة
مجرد ورقة
هتمنع هارون صفوان انه يبعدنا عن بعض
معرفش كنت ساذجة ازاى عشان اوافقه على كدة
كتبنا الورقة
بس مكانش جواز حقيقى
وهو حتى مفكرش يقرب منى
او يتعدى حدوده معايا
عشان ميكشفش نفسه قدامى فى الاول طبعا
بس ربنا اراد انه يتكشف على حقيقته
بعدها بكام يوم
طلع قذر ومريض وبيجرى ورا الفلوس والستات
مكنتش اول واحدة يعمل معاها كدة
بس الفرق انه خد الى هو عاوزه من الى قبلى
بس انا ملحقش يعمل معايا حاجة
اتاسفلى كتير وحاول يرجعلى
البنت الى كشفتهولى ادتنى دليل يدينه وقتها ووعدتنى انها هتشهد ضده لو قدمت الدليل دة للنيابة عشان كانت خايفة تاخد الخطوة دى لوحدها
بس لما عرفت ان لسة محصلش حاجة بيننا هى الى اقترحت عليا انى اهدده عشان اخد الورقة
و هددته انى هفضحه فعلا وهبلغ عنه
خاف
و حرقها قدامى
كانت مروج تطالعها بصدمة لا تصدق ان ابنة عمها وصديقتها المقربة فعلت كل هذا دون ان يشعر احدهم بشئ
مروج : طب فرضنا انه مريض نفسى زى ما بتقولى وضحك عليكى ومحرقهاش
ايه الى رجعه دلوقتى طيب؟
فريدة بيأس : هو مبطلش يطاردنى اصلا يا مروج
بس عمره ما جبلى سيرة الورقة دى
تقريبا لما عرف موضوع جوازى
اتجنن وقرر يهددنى بيها
مروج : ما يمكن الورقة اتحرقت فعلا
وهو بيهددك وخلاص؟
فريدة : وممكن الورقة معاه لسة
فلو استفزيته هيبعتها لمراد وهتفضح
جلست مروج امامها
ممسكة يديها
حاولت بث الطمأنينة بها قائلة :
فريدة انتى معملتيش حاجة غلط عشان تتفضحى
اسمعى كلامى بس
الموضوع دة لازم مراد يعرف بيه
عشان لو عرف من حد تانى هتبقى مصيبة
انما لو روحتى انتى وحكيتيله وانتوا لسة عالبر
ممكن يساعدنا ويسكت الى اسمه عمر دة خالص
فريدة بتفكير : طب ما نحاول نوصل لحل معاه
من غير ما حد يعرف خالص
صاحت بها مروج بعصبية قائلة : فريدة متجننيش
انتى بنفسك الى قايلة انه مريض نفسى
وكمان انا وانتى مش هنسلك معاه
لتكمل بتهديد : على فكرة بقى
انتى لو مقولتيش لمراد هقوله انا
لتحذرها فريدة قائلة : مروج متتصرفيش بغباء
انا مش ناقصاكى
مروج : انا قولت الى عندى يا فريدة وانتى حرة
لتخرج من الغرفة وتتركها وحدها
قاصدة غرفتها
_____________________________