اقرب من القريب

بارت 1

بيت جبير بوسط المدينة لعائلة متمكنة ماديا لكن نرجع ونكول الفلوس ماتشتري عقول

حوراء:-كعدت ع صوت المنبه طفيته وكمت ياربي هاليوم راح يصير شطوله وراي كوم شغل.
الساعة بال4 الصبح الجو بارد كلش تقريبا نهاية شهر ال1
كمت ع كيفي شغلت الصوبة خليت عليها قوري الجاي وبديت انظف بالغرف الفوك
تعالوا اعرفكم ع نفسي بينما اكمل تنظيف

اسمي حوراء. عمري 25 سنة. اني طالبة سادس اعدادي بس تاركة الدراسة بسبب اهلي لان ابن عمي تقدملي وابوي هددني اذا ماقبلت بيه راح يحرمني من دراستي وفعلا هذا اللي صار رغم اني جنت كلش شاطرة بس مكدرت اقبل بأبن عمي لان اصلا بيت عمي مايحبونا لا هو ولا امه يطيقوني وامه راح تسويني خدامة عدها لذلك ضحيت بدراستي حتى ما انحرم من حياتي كلها
طبعا اكيد عندي امل ربي راح يعوضني عن كلشي خسرته ومتفائلة جدا ان حياتي راح تكون حلوة وراح اعيش براحة وسعادة

خل اعرفكم ع عائلتي
طبعا اني الجبيرة عندي 2 اخوان واخت
اخواني باسم وجاسم توأم عمرهم 22 سنة واختي زهراء عمرها 15
طبعا جاسم هذا طافر من الجدر مثلما يگولون 😅 هذا مايشبه احد بالعائلة ابد
من هو زغير جان وكح كلش ياهو يشوفه كدامه يضربه وبيه طبع كلشي يريده يگلب الدنيا حتى يحصله وبعدين يخسره
طبعا هو المدلل عند ابوي من زغره ابوي يگول هذا احبه حيل شخصيته قوية وسبع وياخذ حقه بيده عكس اخوته فاهيين

طبعا زهراء اكيد هاي المدللة عند الكل وكلش قريبة من جاسم دائما يحاميلها ويدافع عنها وياخذ حقها وكلشي تريده يجيبيالها لو من اخر الدنيا

ابوي تاجر جبير يشتغل بالاثاث حالتنا المادية زينة الحمدلله وشغله ماشي بس كلش متعصب وعنده كلشي ممنوع
امي ربة بيت من عمري 7 سنوات علمتني ع شغل البيت حتى تتفرغ لنفسها كلش تحب تهتم بنفسها وشكلها ولبسها من جنت زغيرة جان بس الطبخ عليها ويمكن مرة بالشهر تنظف غرفتها ومتقبل احد يدخل غرفتها غير ابوي نهائيا

اليوم عدنا عزيمة اصدقاء ابوي 2 هم وعوائلهم يمنا بمناسبة ابوي فتح فرع جديد بشغله وقرر يخلي ابن صديقه بيه لان كال اخواني ملتهين بدراستهم ومايريدهم يضيعون مستقبلهم

نظفت الفوك كله نزلت توضيت وصليت لكيت الجاي صاير تريكت شوية ونظفت المطبخ وعزلته حتى بس اكمل باقي البيت اجي ابلش بالطبخ
كملت من المطبخ كعدوا اهلي سويتلهم ريوك وطلعوا للدوام بلشت بباقي البيت نظفته وعزلته كله دخلت للاستقبال تقريبا نظيف ميحتاج شغل هواي لان البارحة نظفته بس هم نظفته ورتبته
واني انظف اسمع اختي تصيح طبعا هي ماعجبها تروح للدوام كالت معندي شي وطبعا اهلي عادي كلولها بكيفج

زهراء:-ولج حوراء وينج بعدج نايمة اكعدي يلا
نسيتي اليوم يجون خطار اصدقاء بابا من بغداد امي كالت اكعدج حتى تنظفين وتلحكين تطبخين .