اقرب من القريب

بارت 14

حوراء: ـ
راحة اول مره احس بيها. يوم زواجي جان احلى يوم بحياتي رغم الحنة و الزفة بنفس اليوم و البارحة ما نايمة زين. كعدت اليوم قبل اذان الصبح بساعة. صفنت على عباس نايم بصفي. اكو ضوة قليل بالغرفة يسمحلي اشوف ملامح وجهه تعبان بيه سمار حلو لحيته حلوة مو عالية عيونه كلش حلوات بقيت اباوعله و ادعي الله يحفظه الي صدك من عرفته لليوم ما خلاني احتاج شي ابد.
ما اعرف ليش فجأة صرت افكر اذا اجه يوم و خسرته اسم الله شنو راح يصير بية. شلون راح اكدر اعيش. بدون ما احس نزلت دموعي اختنكت كلش. فزيت على صوته
عباس: ـ ادري اني هالكد حلو بس مو لدرجة تعوفين نومتج وتصفنين بوجهي تبجين.
خليت ادية على وجهي و بجيت من كل گلبي.
كام عباس كعد كدامي ولزم ادية جان يحجي بخوف و قلق و توتر.
عباس: ـ شبيج بنيتي ليش هالبجي حاجيني الله يخليج اكو شي ديأذيج بيج شي فدوة حاجيني مو اني عبوسي صديقج جنتي تحجيلي كلشي مضوجج.

حوراء: ـ مابية اجاوبه و لا بية احجي اي شي زدت بالبجي احس گلبي ديطلع من مكانه. افكار غريبة تجي بعقلي. ممكن اخسر عباس بيوم. معقولة راح يتركني لان احتمال ما يصير عندي اطفال. استغفرت ربي كله البارحة تزوجنا. شدافكر اني. ممكن احتاج اهلي. صدك حسيت نفسي مشتاقتلهم. ليش عافوني و سافرو. وين راحو. شوكت يرجعون.

عدل كعدته عباس شغل الضوة. و اخذني لحضنه خله راسي على صدره حضني كلش قوي و يمسح على شعري بهدوء و يحاجيني بصوت هادئ
عباس: ـ بنيتي احجيلي شبيج حبيبتي انتي شفتي حلم مزعج. فززتج من حجيت اني. اكو شي خوفج. شي ما عجبج.
احجي وماكو اي رد بس هدأت.
كومي بنيتي خل نصلي سوة تكعدين يمي نقره قرآن سوة.
حوراء: ـ بلاعيمي راحت من البجي مابية ارد بس هزيت براسي.
رحنا توضينا سوة و صلينا خلصت صلاتي و سجدت لربي و دموعي تصب. ادعي يحفظلي عباس صدك مالي احد غيره اهلي راحو و تركوني وحدي. شوية وحسيته تقرب كعد يم راسي.
عباس: ـ كومي بنيتي كافي بجي. تعالي نقره قرآن هذا اول يوم بحياتنا سوة و ان شاء الله نبقى سوة لأخر يوم بعمرنا. و يصيرون عدنا اطفال حلوين يشبهوج واحبكم و اداريكم و اخليكم ما تحتاجون اي بشر.
حوراء: ـ كلامه هدأني شوية بس صرت احس بوجع بگلبي كلت يمكن لان بجيت.
فتح القرآن وبده يقرأ الجزء الاول بصوته كلش حلو ما كدرت اقره بس بقيت مركزه وياه بالقراءة خليت راسي على جتفه واستمعله شوية و زاد نبض كلبي و الوجع هم زاد غمضت عيوني واني استمع لعباس و ما حسيت شصار بالدنيا بعد.

كعدت بمكان هوسة و اكو وجع بأيدي مابية حيل افتح عيوني احس دايخة حجيت بصوت ناصي كلش. اني وين. اريد مي.
ام عباس: ـ الحمدلله على سلامتج بنيتي. هذا مي يروحي. عينيني اكعدج حتى تشربين.
حوراء: ـ يربي هم بالمستشفى والله مليت من هالوضع. كعدت بصعوبة شربت شوية مي. بقيت كاعدة.
ام عباس: ـ تنامين يمة اروح اشوف الدكتورة تشوفج.
حوراء: ـ لا ابقى كاعدة.

شوية دخل عباس و ياه ممرضة. شالت المغذي والكانونة وكالت تكدرون تطلعوها هسة. الحمدلله على سلامتها.
عباس: ـ الله يسلمج خوية.
يلا حوري بيج حيل تكومين لو اكومج.
حوراء: ـ اكوم بس مابية حيل امشي.
عباس: ـ سهلة بوية امشيج لو اجيبلج كرسي. تريدين اشيلج.
حوراء: ـ لا ماريد كرسي. نتمشى احسن.
عباس: ـ سهلة يروحي انتي. يله عدلي ملابسج و حجابج. تعالي يمة ساعديها.
ام عباس: ـ على كيفك وياها ابني خليها براحتها لا تستعجلها.
عباس: ـ براحتكم عيني.
ام عباس:ـ هدي يمة اني اعدل حجابج.
يلا نطلع خلصنا.
حوراء: ـ عباس و امه لازميني كل واحد من صفحة جانو خايفين علية كلش.
عمتي كلش كلش حبابة جانت تحاجيني و بعيونها قلق. وصلنا للبيت كالت عمتي: ـ خليها ترتاح اني رايحة اسويلها شي تاكله.
صعدني عباس على كيفه كعدني ع الفراش و نزعني عباتي و حجابي كعد يمي و لزم ايدي.
عباس: ـ الحمدلله على سلامتج يبعد حيلي. شلون صرتي.
حوراء: ـ الحمدلله احسن.
عباس: ـ هسة امورتي ما راح تسولفلي منو وياها.
حوراء: ـ محد.
عباس: ـ امممم يله لعد اتركي الضوجة و اضحكي بربج اني عريس و انتي عروس ليش هالنكد حجاها وضحك.
حوراء: ـ عباس.
عباس: ـ عيونه.
حوراء: ـ عساهن سالمات حبيبي.
عباس: ـ يروحلج فدوه حبيبج. كولي يروحي.
حوراء: ـ اسم الله عليك لا تحجي هيج.
عباس: ـ ماشي اميرتي. سولفي شنو ردتي بابا.
حوراء: ـ لا تعوفني.
عباس: ـ هههه لج خبلة وين اعوفج غير مرتي صرتي.
حوراء: ـ خايفة حيل.
عباس: ـ لا تخافين بنيتي. انتي روحي تتوقعين واحد يعوف روحه.
حوراء: ـ الله لا يحرمني منك بابا.
عباس: ـ و يخليج الي بنوتتي الحلوة.
حوراء: ـ يله خلينا ننزل يم ماما.
عباس: ـ ها حلو صارت ماما. خير ان شاء الله.
حوراء: ـ اي معليك انت صارو اهلي بعد.
عباس: ـ و اني لعد مو خطية.
حوراء: ـ لا مو خطية يله ننزل.

بدلنا و نزلنا جوة جانو كلهم كاعدين باركولنا كعدنا سوة تريكنا كلش حبيت اهل عباس.
ناس بسيطة كلش بينهم بس الحب و الاحترام يضحكون و يتشاقون كلهم سوة. و من يخلصون اكل كلهم يتساعدون يشيلون الماعين.
عمي كال لعباس اني ابسط انت لا تجي للشغل اليوم.
مر اليوم كلش حلو كلهم مهتمين بية كلهم خايفين علية. اخيرا الله عوضني بعائلة صارولي اكثر من اهل. حتى عمي ابو عباس مرتين خابرني يسأل عني و يشاقيني.
هاي صارت عائلتي بعد و هذولة صارو اهلي. كل صلاة ادعي ربي يحفظهم الي.
سوينا الغدة سوة طبعا عمتي متقبل اني و زينب نتعب نفسنا خطية كله عليها بس نساعدها بشغلات بسيطة. طول الوقت تضحك و تتشاقة ويانه. كملنا غدة غسلنا الماعين اني وزينب رتبنا المطبخ عباس راد ينام صاحني اصعد وياه.
حوراء: ـ هسة بس احجي ويه ماما شوية و اصعد.
عباس: ـ اي عيني صار بيها ماما بعد عباس بيش كيلو. الله يرحم ايام زمان. ايييي يا گلبي باعوك بسرعة.
حوراء: ـ هههههه هاي شنو ماما شوفي ابنج يغار ههههه. روح هسة اجي والله ما اتأخر.
ماما اذا تسمحيلي محتاجتج بشغلة.
زينب: ـ اي كولي اني وماما دنسمع.
ام عباس: ـ انلصمي و گومي عزلي الصالة هسة اجي انظفها.
تعالي بنيتي وياي للغرفة. ادخلي وسدي الباب.
حوراء: ـ دخلت الغرفة كلش حلوة و مرتبة بيها برودة. استحيت احجي بس خلص ما عندي غيرها تساعدني.
ام عباس: ـ احجي يروحي انتي مثل زنوبة والله.
حوراء: ـ ماما علمود البارحة ما كدرت جنت تعبانة و عباس طلب ننام و كال الا تكونين جاهزة يله نتمم زواجنا والصراحة اني ضجت لان جذبت على امي اليوم من سألتني بس استحي اطلب منه هالشي.
ام عباس: ـ  عادي حبيبتي هو زوجج وابو اطفالج ان شاء الله  لا تستحين منه. اذا استحيتي تطلبين منه بس انتي جهزي نفسج بدلي و خلي عطر ومكياج ووو هو راح يفهم مو ضروري تحجين كلشي  اكو شغلات تنفهم بالفعل مو بالحجي. وانتبهي على نفسج ميصير تتعبين گلبج هالفترة. التزمي بعلاجج و اكلج ماريد تنقهرين ولا تبجين بعد ابد اني امج اختج صاحبتج بكيفج اي شي تحتاجين اني يمج احجيلي كلشي يعجبج صدكيني بكلشي راح اكون وياج حتلو ضد ابني.
حوراء: ـ كلامها ريحني كلش حسيت بيها حنان مثل بيبي و خالة منى. بستها من راسها. الله يخليج النا يارب.
صعدت لغرفتي نفذت كلامها و صرت مرت عباس شرعا و قانونا. بديت اجمل ايام بحياتي. تركت الخوف و التفكير بقيت ادعي ربي يحفظهم الي ويبعد عني و عنهم كل شر.
نمنا و گعدنا العصر على صوت هوسة و جهال ما افتهمنا شي طلع عباس يشوف شكو اني گمت عزلت الغرفة و رتبتها طلعت ملابس النا حتى ننزل جوة بعد و...
يتبع...
ــــــــــــــــــــــــــــــــــــــــــــ
مسائكم عافية و سعادة يارب
اعتذر ع التأخير نت ماكو و صحتي تعبانة 
محتاجة دعواتكم حبايب
اعوضكم ان شاء الله بأقرب وقت
احبكم
لا تنسون التصويت
متابعة ممتعة